Pe E te Talisapaia ea le Alofa o le Atua?

NA faamatalaina e le tagata o Iopu le tulaga lē lelei atoatoa o le tagata i upu nei: “O le tagata ua fanau mai i le fafine, ua saasaa ona aso, mona ua tumu i le atuatuvale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.” (Iopu 14:1, 2) O le olaga, e pei o lea na oo i ai Iopu, sa tumu i tiga ma faanoanoaga. Pe na oo ea iā te oe se lagona faapena?

E ui lava i mea faigatā ma faafitauli uma atonu e tatou te fesagaʻi, ae peitaʻi, o loo iai se faamoemoe mautū lea e faavae i le agalelei ma le alofa o le Atua. Muamua lava, ua saunia e lo tatou Tamā faalelagi alofa mutimutivale le taulaga togiola e togiolaina ai le fanau a tagata mai lo latou tulaga ua paʻū atu i le agasala. E tusa ai ma le Ioane 3:16, 17, na taʻua e Iesu Keriso e faapea: “Auā ua faapea lava ona alofa mai o le Atua i le lalolagi [otagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau. Auā e lei auina mai e le Atua lona Atalii [o Iesu] i le lalolagi ina ia faamasino i le lalolagi, a ia faaolaina le lalolagi ia te ia.”

Seʻi mafaufau foʻi i le agalelei mai o le Atua iā i tatou o tagata lē lelei atoatoa. Na faalauiloa mai e le aposetolo o Paulo e faapea: “Ua faia foi e ia nuu uma o tagata i le toto e tasi, ia nonofo i le fogaeleele uma lava, ua na tuu foi tausaga na tofia anamua, ma tuaoi o mea latou te nonofo ai; ina ia latou saili i le Alii, pe mafai ona latou tautāgotago ma latou iloa o ia; a e peitai e le mamao o ia ma i tatou taitoatasi.” (Galuega 17:26, 27) Seʻi mafaufau i ai! E ui lava o i tatou o tagata e lē lelei atoatoa, ae e mafai lava ona tatou olioli i se faiā totino ma Lē na Foafoaina i tatou e alofa, o Ieova le Atua.

Ua mafai nei la ona tatou faafesagaʻia ma le mautinoa le lumanaʻi, i le iloaina o loo manatu mai le Atua iā i tatou ma ua ia faia ma le alofa ia sauniuniga mo lo tatou lelei e faavavau. (1 Peteru 5:7; 2 Peteru 3:13) E mautinoa lava la le tele o māfuaaga e tatau ai ona tatou aʻoaʻoina atili e uiga i lo tatou Atua alofa e ala i le suʻesuʻeina o lana Afioga, le Tusi Paia.