Fesili Mai le ʻAufaitau

Afai e pule i le ola se tasi, pe e talafeagai i se faifeʻau Kerisiano ona faia le lauga o le falelauasiga?

O le a filifili le faifeʻau Kerisiano lava ia i lona lotofuatiaifo lelei i luma o le Atua pe na te faia se lauga o le falelauasiga o se tasi e foliga mai sa pule i lona ola. Pe a fai le filifiliga, e ao i le faifeʻau ona iloiloina fesili nei? O le ā le silasila a Ieova i le pule i le ola? Pe na oti le tagata ona na ia fuafuaina e fasiotia o ia lava? Pe na māfua le pule i le ola ona o se faalētonu i le mafaufau po o faalogona? O le ā le vaaiga a tagata i le vaipanoa e uiga i le pule i le ola?

I le avea o ni Kerisiano, tatou te naunau i le silafaga a Ieova i le pule i le ola. I le silafaga a Ieova e tāua le ola o le tagata ma e paia. (Kenese 9:5; Salamo 36:9) O le fuafuaina e se tagata e fasioti o ia lava, o le fasioti tagata le mea lenā, ma e lē fiafia iai le finagalo o le Atua. (Esoto 20:13; 1 Ioane 3:15) Pe e taofia ai ea ona o lenā māfuaaga le faia o se lauga o se falelauasiga o se tagata ua pule i lona ola?

Manatu i le mea na tupu iā Saulo le tupu o Isaraelu. Ina ua ia iloa o le a lē faasaoina o ia i lana taua mulimuli faasaga i tagata Filisitia, na i lo le tuu atu i ona fili e faaleagaina o ia, fai mai le tala “ona tago ai lea o Saulo i le pelu, ma faapaū i ona luga.” Ina ua maua e tagata Filisitia lona tino maliu, na latou faamauina i luga o le pa o le aai o Petesani. Ina ua iloa e ē na nonofo i Iapese-Kiliata le mea na faia e Filisitia, na latou aveesea mai le tino maliu ma susunu. Ona latou ave lea o ona ivi ma tanu. Sa latou anapopogi foʻi mo aso e fitu, o se tu e masani ai o le faanoanoa i tagata Isaraelu. (1 Samuelu 31:4, 8-13; Kenese 50:10) Ina ua iloa e Tavita, o lē na faauuina e Ieova le mea na fai e ē na nonofo i Iapese-Kiliata, na ia faapea atu: “Ia manuia outou mai ia Ieova, auā na faapea ona outou agalelei i lo outou alii o Saulo; na outou teuteu foi ia te ia. O lenei, ia agalelei faamaoni Ieova ia te outou.” (2 Samuelu 2:5, 6) E lē o faapea mai le Tusi Paia sa taʻusalaina ē na nonofo i Iapese-Kiliata ona o le faia o le mea e foliga mai o se sauniga faalelotu o se falelauasiga mo le tupu o Saulo. E faatusatusa lenā ma le tulaga o i latou e leʻi tanumia ona o a latou amioga leaga. (Ieremia 25:32, 33) E ono iloiloina e se faifeʻau Kerisiano le faamatalaga i le Tusi Paia e faatatau iā Saulo e fuafuaina pe tatau ona ia faia se lauga o se falelauasiga o se tasi na pule i lona ola.

E ono manaʻo foʻi le faifeʻau e iloiloina le fuafuaga o le lauga o le falelauasiga. I le lē pei o tagata o ē e talitonu i le ola pea o le agaga pe a oti le tagata, e lē faia e Molimau a Ieova falelauasiga ma le manatu sesē e faapea, ina ia faalauiloa ai se alu atu o le tagata ua maliu i se isi nofoaga. Na i lo le aogā i le tagata ua maliu, o le fuafuaga autū o le faia o le sauniga o le maliu ina ia faamāfanafana ai ē ua faavauvau ma ia avatu ai se molimau i ē o auai e faatatau i le tulaga o le tagata pe a maliu. (Failauga 9:5, 10; 2 Korinito 1:3-5) O le isi māfuaaga tāua o le faia o se lauga o le falelauasiga ina ia fesoasoani ai iā i latou uma o loo aofia ai ina ia manatunatu ai i le saasaa o le olaga. (Failauga 7:2) Pe o le a faataulauina ea nei fuafuaga pe a faia se lauga o le falelauasiga o se tasi na pule i lona ola?

E moni, e ono manatu nisi faapea sa pule le tagata i lona ola ma le loto iai, na malamalama lelei ua ia agasala iā Ieova. Peitaʻi pe e mafai ea i taimi uma ona faamautinoa na manatu? Faamata e lē o se gaoioiga na tupu faafuaseʻi e leʻi mafaufauina? O nisi sa taumafai e pule i le ola na oo ina suia o latou manatu ma ua lē toe manaʻo e oo i lea tulaga. E lē mafai e se tagata ua oti ona toe salamō i se mea na ia faia.

O le tasi itu e ao ona amanaʻia o le lē mautonu faalemafaufau ma tau i faalogona lea o loo aofia ai i le tele o pule i le ola. E lē tatau ona tuuaʻia i latou na ona o le pule i o latou ola. E tusa ai o nisi o fuainumera  faamaumauina, o le 90 pasene o i latou e pule i o latou ola e iai ni faafitauli faalemafaufau, tau i faalogona, ia pe e ola faalagolago i se masaniga. Pe e faamagaloina ea e Ieova le tagata e fasiotia e ia ia lava ae o loo iai i se tulaga faalemafaufau faapena? E lē mafai ona tatou faamautinoaina pe na faia e le tagata ua maliu se agasala e lē mafaamagaloina i le silafaga a Ieova. E ono manatunatu se faifeʻau Kerisiano i mea na tutupu atoa ma le talaaga tau i le soifua mālōlōina i le tino ma le mafaufau o le tagata ua maliu, pe a ia fuafuaina pe tatau ona ia faia se lauga o le falelauasiga o se tagata na pule i lona ola.

E iai ma se tasi mea e ao ona amanaʻiaina. O le ā le vaaiga a tagata o le vaipanoa i le pule i le ola ma le maliu o le tagata? E ao ona manatu mamafa toeaina i le mea lenei, auā latou te naunau i le talaaga lelei o le faapotopotoga o Molimau a Ieova i lea vaipanoa. E faalagolago i le vaaiga lautele i le pule i le ola i lea vaipanoa, aemaise lava le pule i le ola lea ua tupu, e ono filifili ai toeaina i le lē lagolagoina i le lautele o se falelauasiga faapena pe faaaogā foʻi le Maota o le Malo e fai ai.

Peitaʻi, afai e fesiligia se faifeʻau Kerisiano e lauga i se falelauasiga ua fuafuaina e nisi, e ono manatu iai le uso i lona lava tulaga toʻatasi e mafai ona ia faia. Afai e filifili o ia e faia faapea, e ao lava ona faautauta aua neʻi taʻua se faamatalaga e faatatau i le ono mafai ona maua le toetū. So o se avanoa i le lumanaʻi mo le tagata ua maliu ua i aao o Ieova, ma e leai se tasi e mafai ona fai atu o le a toetū mai lē ua maliu pe leai foʻi. E ao ona taulaʻi atu le faifeʻau i upu moni o le Tusi Paia e faatatau i le oti ma avatu faamāfanafanaga mo e ua faavauvau.