Talaaga o le Soifuaga

Faamalosia e Ala i lo Tatou ʻAuuso i le Lalolagi Aoao

UA FAAMATALAINA E THOMSON KANGALE

Iā Aperila 24, 1993, na valaaulia ai aʻu ou te auai i le polokalame o le faapaiaina o se ofisa o se lālā fou, e faia aʻe i fale e 13, i Lusaka, i Zambia. Talu ai sa faafaigatā ona ou savali, na fesili mai ai ma le agalelei se tuafafine Kerisiano sa na faafoeina la matou maimoaga i fale e faapea, “E te manaʻo ou te aveina se nofoa mo oe a o faagasolo le maimoaga ina ia mafai ai ona e mālōlō i nisi taimi?” O aʻu ou te uliuli, a o le tuafafine e paʻepaʻe, ae sa lē āfaina iā te ia lea tulaga. I le matuā faagaeetia, na ou faafetai atu ai iā te ia, talu ai o lona agalelei na mafai ai ona ou matamata i fale uma o le lālā.

I LE faagasologa o tausaga, na faamāfanafanaina ai loʻu loto ona o mea faapenei na tutupu, ua faamautinoa ai loʻu talitonuga e faapea, i le aufaatasiga o Kerisiano Molimau a Ieova, o loo iai le alofa lea na fetalai Iesu e faapea o le a iloga ai ona soo moni. (Ioane 13:35; 1 Peteru 2:17) Seʻi oʻu faamatala atu iā te outou le auala na ou masani ai i nei Kerisiano i tuā i le 1931, le tausaga lea na latou faalauiloa mai ai i le lautele lo latou faanaunauga ina ia faaigoaina i latou i se igoa e faavae mai i le Tusi Paia, o Molimau a Ieova.—Isaia 43:12.

Le Uluaʻi Faiva i Aferika

Iā Novema 1931, o le taimi lenā ua 22 oʻu tausaga ma sa ou nofo i Kitwe, e tū i le Copperbelt, i Rhodesia i Mātū (lea ua igoa nei iā Zambia). O laʻu uō na ma taaalo soka faatasi na ia faafeiloaʻi atu aʻu i Molimau a Ieova. Sa ou auai i nisi o a latou sauniga ma tusi atu i le ofisa o le lālā i Cape  Town, i Aferika i Saute, ma talosagaina se tusi sa fai ai suʻesuʻega faale-Tusi Paia, The Harp of God. * O le tusi sa faa-Peretania, ma sa faigatā ona ou malamalama talu ai ou te lē malamalama lelei i lenā gagana.

O le vaipanoa lea e taʻua o le Copperbelt, e tusa ma le 150 maila (240 kilomita) i saute sisifo o Lake Bangweulu, lea e latalata i le nuu na ou ola aʻe ai, sa faafaigaluega ai le toʻatele o tagata mai isi itumalo i nofoaga e eli ai le ʻapamemea. O i inā, e masani ona feiloaʻi ai nisi vaega o Molimau mo suʻesuʻega faale-Tusi Paia. Ina ua mavae sina vaitaimi, na ou siitia atu ai mai Kitwe i le taulaga e latalata ane o Ndola ma amata ona auaufaatasi ma se vaega o Molimau i inā. I le taimi lenā, sa avea aʻu ma kapeteni o le ʻausoka na igoa o le Perenise o Uelese. Sa ou faigaluega foʻi i le faia o feʻau i le fale o se papalagi sa pule i le African Lakes Corporation, o se kamupanī e tele o latou faleoloa i Aferika tutotonu.

E leʻi lava saʻu aʻoaʻoga ae na ou aʻoaʻoina sina faa-Peretania mai tagata Europa ia na ou faigaluega ai. Ae peitaʻi, sa ou naunau lava e faalautele laʻu aʻoga ma ou talosaga ai loa ou te aʻoga i se aʻoga i Plumtree, i Southern Rhodesia (ua igoa nei iā Zimbabwe). Ae i lenā taimi foʻi, na ou tusia ai se tusi lona lua i le ofisa o le lālā i Cape Town e faailoa atu ai iā i latou e faapea, o lea ua ou maua le tusi The Harp of God ma ua ou manaʻo e auauna faataimi atoa i le Atua.

Sa faateʻia aʻu ina ua maua la latou tali e faapea: “Matou te faamālō atu mo lou faanaunauga e auauna iā Ieova. E matou te fia faalaeiauina oe ina ia avea ma mataupu o au tatalo, ma o le a fesoasoani Ieova iā te oe ina ia maua se malamalamaga lelei o le upu moni, ma o le a ia maua se nofoaga mo oe e te auauna atu ai iā te ia.” Ina ua uma ona faitau ma toe faitau le tusi, sa ou fesili atu i nisi o Molimau a Ieova po o le ā se mea e ao ona ou faia. Na latou faapea mai: “Afai o lou faanaunauga moni lenā e auauna iā Ieova, ia fai loa.”

E atoa le vaiaso o ou tatalo iā Ieova i le mataupu, ma iʻu ai ina ou filifili e tuu laʻu aʻoga ae faaauau ona faia laʻu suʻesuʻega faale-Tusi Paia ma Molimau. I le tausaga na sosoo ai, iā Ianuari 1932, na faailogaina ai loʻu tuuina atu iā Ieova le Atua i le papatisoga i le vai. Ina ua ou siitia atu mai Ndola i se aai latalata ane o Luanshya, na ma feiloaʻi ai ma Jeanette, o se tuafafine talitonu, ma ma faaipoipo ai iā Setema 1934. E ma te faaipoipo, ae ua iai le fanau e toʻalua a Jeanette, o le tama ma le teine.

Sa auaumālie lava ona ou agaʻigaʻi i luma faaleagaga, ma i le 1937, na ou ulu atu ai i le faiva faataimi atoa. I sina taimi puupuu lava mulimuli ane, na tofia ai aʻu e auauna e avea o se faifeʻau femalagaaʻi, lea ua taʻua nei o le ovasia o le matagaluega. O ovasia femalagaaʻi e latou te asiasia faapotopotoga a Molimau a Ieova ina ia faamalosia i latou i le itu faaleagaga.

Talaʻiga i Tausaga Amata

Iā Ianuari 1938, na faatonuina aʻu ou te asiasi atu i se alii tāua i Aferika, e igoa iā Sokontwe, o lē na talosaga mai ina ia asiasi atu Molimau  a Ieova iā te ia. E tolu aso na ou tiʻetiʻe atu ai i le uila vilivae i lona nuu. Ina ua ou faailoa atu i ai o aʻu lea ua auina atu e tusa ai o lana tusi na lafo atu i lo matou ofisa i Cape Town, sa faaalia lona matuā lotofaafetai.

Sa ou alu atu mai lea fale i lea fale o lona nuu ma valaaulia i latou ina ia ō mai i le insaka (fale tele). Ina ua latou faapotopoto mai, sa ou lauga atu i le aofia. O le iʻuga, e tele suʻesuʻega faale-Tusi Paia na amataina ai. O le alii tāua o le nuu ma lana failautusi na muamua lava avea ma ovasia o faapotopotoga i inā. I aso nei, e sili atu i le 50 faapotopotoga i lenā vaipanoa, lea ua faaigoaina i le taimi nei o le itumalo o Samfya.

E mai le 1942 e oo i le 1947, sa ou auauna ai i le oganuu e latalata ane i Lake Bangweulu. Sa ou faaalu ai le sefulu aso ma faapotopotoga taʻitasi. Talu ai le toʻalaʻitiiti o le ʻaufaigaluega sa auai i le seleselega faaleagaga i lenā taimi, na oo ai iā i matou le lagona tonu lava lea na oo i lo tatou Alii o Iesu Keriso, i lona fetalai mai e faapea: “E tele le saito e seleseleina, a o le au fai galuega e toʻaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Mataio 9:36-38) I na aso amata, sa faigatā ai femalagaaʻiga, o lea, e masani ai lava ona nonofo ia Jeanette ma tamaiti i Luanshya ae ou alu e asiasi i faapotopotoga. I le taimi lenā, sa maua ai le isi a ma fanau e toʻalua ma Jeanette, ae na maliu le isi o i laʻua ina ua sefulu masina le matua.

Sa tau leai ni taavale i na aso, ma e faapena foʻi ma auala. I se tasi aso, na ou faimalaga ai i le uila vilivae a Jeanette mo le silia ma le 120 maila (200 kilomita). I nisi taimi ou te sopoʻia ai se vaitafe laʻitiiti, sa ou amoina ai le uila e taofi e loʻu lima e tasi, ae aau i le isi lima. Na vave lava ona tupu aʻe i se auala mataʻiina le faitauaofaʻi o Molimau i Luanshya, ma i le 1946, e 1,850 na auai i le Faamanatuga o le maliu o Keriso.

Feagai ma Teteega i la Matou Galuega

I se tasi aso i le vaitaimi o le Taua Lona Lua a le Lalolagi, na samania mai ai aʻu e le komesina o le itumalo i Kawambwa ma faapea mai: “Ou te manaʻo ina ia taofia loa lou faaaogāina o tusi a le Sosaiete o le Olo Matamata, auā ua faasāina nei na tusi. Ae e mafai ona ou avatu iā te oe ni tusi e fesoasoani i le tusiaina o nisi tusi e faaaogā i lau galuega.”

Sa ou tali atu i ai: “O lea ou te fiafia lava aʻu i lomiga ia ou te maua, ou te lē toe manaʻomia nisi mea.”

Sa ia faapea mai: “E lē mafai ona e faatuatuaina tagata Amerika (o le taimi lenā sa lomia ai a matou lomiga i le Iunaite Setete). O le a latou taʻitaʻisesēina oe.”

Sa ou tali atu: “E leai, e lē mafai e tagata ia matou te feutagaʻi ona faia se mea faapena.”

Ona ia fesili mai lea: “Faamata e lē mafai ona e uunaʻia a outou faapotopotoga e faia ni meaalofa tautupe e fesoasoani ai i le taua e pei ona faia e isi lotu?”

Sa ou tali atu: “O le galuega lenā a avefeʻau o le malo.”

Na ia faapea mai: “Aiseā e te lē alu ai i le fale ma mafaufau i lenā mea?”

Na ou tali atu e faapea: “I le Esoto 20:13 ma le 2 Timoteo 2:24, ua poloaʻiina ai i tatou e le Tusi Paia e aua le fasioti tagata ma aua le fetauaʻi.”

E ui lava sa tuu mai aʻu ou te alu, ae na samania mai aʻu mulimuli ane e le komesina itumalo i Fort Rosebery, o se taulaga lea ua faaigoa nei iā Mansa. Na ia faapea mai: “Ua ou valaaulia oe e te sau i inei e faailoa atu iā te oe e faapea, ua faasāina e le malo a outou tusi.”

Na ou faapea atu: “Ioe, sa ou faalogo i ai.”

“O lea la, e ao ona e alu i a outou faapotopotoga uma lava ma fai atu i tagata na tou te tapuaʻi faatasi ina ia aumai uma tusi i inei. Ua e malamalama?”

Sa ou tali atu i ai: “E lē o saʻu galuega lenā. O le tiute tauave lenā a avefeʻau o le malo.”

Se Feiloaʻiga na Maua ai se Iʻuga Lelei

Ina ua mavae le taua, sa faaauau pea ona matou talaʻi. I le 1947, ina ua faatoʻā uma lava ona ou asiasia se faapotopotoga i le nuu o Mwanza, na ou fesili ai po o fea e mafai ona faatau ai saʻu iputī. Na faasino aʻu i le fale o le susuga iā Nkonde, e iai se potu e fai ai iputī. Sa talia fiafia aʻu e le susuga iā Nkonde ma lona faletua. Sa ou talosaga atu iā Nkonde a o inu laʻu iputī pe mafai ona ia faitauina le mataupu i le tusi “Let God Be True” e  faapea, “O Seoli, o se Nofoaga e Mālōlō ai mo le Faamoemoe.”

Ina ua uma ona inu laʻu iputī, sa ou fesili atu: “O le ā la sou malamalamaga e uiga iā seoli?” I le maofa i mea na ia faitau ai, na amata ai ona ia suʻesuʻeina le Tusi Paia ma Molimau, ma na papatisoina mulimuli ane faatasi ma lana avā. E ui lava sa leʻi tumau ona avea o ia ma Molimau, ae sa tumau pea lana avā ma nisi o lana fanau. O le mea moni, o Pilney, o se tasi o lana fanau, o loo auauna pea i le ofisa o le lālā o Molimau a Ieova i Zambia. Ma e ui lava ua matuā matua lava le tinā o Pilney, ae o loo avea pea o ia ma Molimau faamaoni.

Se Taimi Puupuu i Aferika i Sasaʻe

Na tofia aʻu e le ofisa o lo matou lālā lea na faavaeina i le amataga o le 1948 i Lusaka i Rhodesia i Mātū, ou te alu i Tanganyika (lea ua igoa nei iā Tanzania). Na matou malaga faatasi ma laʻu avā ma se tasi Molimau e savalia oganuu maugā. E tolu aso na matou malaga ai ma sa lagona le matuā vaivai. A o ou tauaveina le tele o tusi, sa ave e laʻu avā o matou lavalava, ae sa aveina e le isi Molimau mea matou te momoe ai.

Iā Mati 1948, ina ua matou taunuu i Mbeya, sa tele ni gaoioiga na faia ina ia fesoasoani ai i uso e suia o latou olaga ina ia ōgatusa atoatoa ma aʻoaʻoga a le Tusi Paia. O le tasi o mea, sa lauiloa ai i matou i lenā vaipanoa o tagata o le Olomatamata. E ui lava ua uma ona talia e uso le igoa Molimau a Ieova, ae sa leʻi faailoaina faalauaʻitele. E lē gata i lea, sa manaʻomia ona lafoaʻia e nisi Molimau nisi o tū e faatatau i le faaaloalogia o tagata ua feoti. Ae atonu o se suiga sa sili ona faigatā mo le toʻatele, o le lesitalaina faaletulafono lea o a latou faaipoipoga, ma faamamaluina ai i luma o tagata uma.—Eperu 13:4.

Mulimuli ane, na ou maua ai le faaeaga o le auauna i isi vaipanoa o Aferika i Sasaʻe, e aofia ai Uganda. E ono vaiaso na ou nofo ai i Entebbe ma Kampala, o inā na maua ai e le toʻatele le fesoasoani ina ia malamalama i le upu moni o le Tusi Paia.

Valaaulia e Alu Atu i le Aai o Niu Ioka

Ina ua mavae sina taimi na ou auauna ai i Uganda, na ou alu ai i le amataga o le 1956 i Dar es Salaam, le laumua o Tanganyika. Ou te taunuu atu i inā, o taatia mai ai se tusi mai le ofisa ulu o Molimau a Ieova i le lalolagi mo aʻu. Sa iai ni faatonuga mo aʻu ina ia amata ona ou sauni ou te alu atu i Niu Ioka ou te auai i se tauaofiaga faavaomalo o le a faia iā Iulai 27 e oo iā Aokuso 3, 1958. Na mautinoa lava loʻu matuā fiafia i lenei faamoemoe.

Ina ua oo mai le taimi, na ma felelei atu ai ma le isi ovasia femalagaaʻi e igoa iā Luka Mwango, mai i Ndola i Salisbury (ua igoa nei iā Harare), i Rhodesia i Saute, ona ma ō atu ai lea i Nairobi, i Kenya. E mai i inā, na ma felelei atu ai i Lonetona, i Egelani, o inā na matuā talia fiafia ai i maʻua. Ae ma te leʻi momoe i le pō na ma taunuu atu ai i Egelani, sa matuā faafiafiaina i maʻua ma talatalanoa ai pea i le auala talimālō na faafeiloaʻia ai i maʻua o ni tagata uli mai Aferika e tagata papaʻe. Sa matuā faalaeiauina i maʻua i lenei mea na tupu.

Mulimuli ane, na ma ō atu ai loa i Niu Ioka, i le nofoaga na faia ai le tauaofiaga. I se tasi aso i le taimi o le tauaofiaga, na ou talatalaina atu ai se lipoti e uiga i le galuega a Molimau a Ieova i Rhodesia i Mātū. I lenā aso, na toetoe lava atoa le 200,000 o le aofia na faatasi ai i malae e lua o le aai o Niu Ioka, o le Polo Grounds ma le Yankee Stadium. Ou te leʻi moe i lenā pō ona o le mafaufau  pea e uiga i le avanoa matagofie na ou olioli ai.

Sa vave lava ona uma le tauaofiaga ma toe foʻi atu i o ma aiga. I lo ma foʻi atu i o ma aiga, na ma toe olioli ai foʻi i le agaga talimālō o o tatou uso ma tuafāfine i Egelani. I lenā malaga, na faigatā ona galo iā i maʻua le autasi o tagata o Ieova na faaalia iā i maʻua e tusa lava po o le ā le lanu po o le atunuu!

Faaauau Pea le Auaunaga ma le Feagai ai ma Tofotofoga

I le 1967, na tofia ai aʻu e avea ma auauna o le itumalo—o se faifeʻau femalagaaʻi e faimalaga atu mai lea matagaluega i lea matagaluega. E oo ane i le taimi lenā, ua faateleina le aofaʻi o Molimau i Zambia i le sili atu i le 35,000. Mulimuli ane, ona o le faalētonu o le soifua mālōlōina, na toe tofia ai aʻu o se ovasia o le matagaluega i le Copperbelt. I se taimi mulimuli ane, na oo ai faafitauli i le soifua mālōlōina o Jeanette ma na maliu ai iā Tesema 1984 a o faamaoni pea iā Ieova.

Na matuā tigā lava oʻu faalogona auā ina ua mavae lona maliu na faitioina aʻu e ona aiga lē talitonu faapea o aʻu ua pogai ai lona maliu, talu ai le lē faaaogāina o fofō faataulaitu. Ae sa faamatala atu i nei tauaiga lē talitonu e nisi o ē na malamalama i le maʻi o Jeanette ma sa talanoa atu foʻi i lana fomaʻi le mea moni e uiga i le mataupu. Ona toe oo mai foʻi lea o se isi tofotofoga. Sa mananaʻo nisi o tauaiga lē talitonu ou te faia se isi foʻi tū faaleaganuu e taʻua o le ukupyanika. I le vaega o le atunuu lea ou te sau ai, o le tū lenei e faapea, pe a maliu se paaga, e manaʻomia i le paaga lea e ola ona faia se feusuaʻiga ma se tasi o tauaiga vavalalata o le paaga lea ua maliu. Lea na ou matuā teena.

Ae na iʻu lava ina lē toe iai ni omiga mai tauaiga. Sa ou lagona le lotofaafetai ona sa fesoasoani mai Ieova iā te aʻu ina ia ou tumau ma le mausalī. Ina ua mavae se masina talu ona maliu laʻu avā, na sau ai se tasi o uso ma faapea mai iā te aʻu: “Uso o Kangale, sa avea lava oe ma faalaeiau iā i matou i le taimi o le maliu o si au avā, talu ai e leai lava se tū faaleaganuu lē faale-Atua e tasi na e lolo atu e fai. E matou te fia faafetai tele atu ai lava iā te oe.”

Se Seleselega Mataʻina

Ua 65 nei tausaga talu ona amata laʻu faiva faataimi atoa i le avea o se tasi o Molimau a Ieova. Maʻeu se olioli na oo iā te aʻu i le faagasologa o nei tausaga i le vaai atu o faavaeina le faitau selau o faapotopotoga, ma fausiaina le tele o Maota o le Malo i vaipanoa sa ou auauna ai i le avea o se ovasia femalagaaʻi! E mai i se 2,800 Molimau i le 1943, ua iai nei la matou faatelega i le silia ma le 122,000 ē o loo folafola le Malo i Zambia. O le mea moni, i le tausaga ua mavae, e sili atu ma le 514,000 tagata na auai i le Faamanatuga i lenei atunuu, o lona faitau aofaʻi e itiiti ifo i le 11 miliona.

I le taimi nei, o loo tausia lelei pea aʻu e Ieova. Pe a manaʻomia ona ou alu e vaai se fomaʻi, e ave aʻu e se uso Kerisiano i le falemaʻi. O loo valaaulia pea aʻu e faapotopotoga e faia ni lauga i le lautele, ma o lenei avanoa ua ou maua ai le tele o taimi e faamalosia ai aʻu. E fuafua e le faapotopotoga lea ou te auai ai ia tuafāfine Kerisiano e feauauaʻi i le faamamāina o loʻu fale, ma uso e tauofo e ave aʻu i sauniga i vaiaso uma. Ou te iloa e lē mafai ona ou olioli i lenei tausiga alofa pe ana ou lē auauna iā Ieova. Ou te faafetai atu iā te ia ona o loo faaauau pea ona faaaogāina aʻu i le faiva faataimi atoa, faapea le tele o tiute tauave na mafaia ona ou tauaveina e oo mai lava i le taimi nei.

Ua faasolo ina lē lelei laʻu vaai, ma ou te mālōlō soo foʻi pe a ou savali i le Maota o le Malo. E foliga foʻi ua mamafa laʻu atotusi i nei aso, ae ina ia faamāmā, ou te aveeseina ni tusi ou te lē manaʻomia i le sauniga. O laʻu faiva i le fanua, e tele lava i le faia o suʻesuʻega faale-Tusi Paia ma i latou e ō mai i loʻu fale. Peitaʻi, o se fiafiaga le toe tepa i tua i le faagasologa o tausaga ma mafai ona manatunatu i le faatelega ofoofogia lea na tupu! Sa ou auauna i le fanua lea na faataunuuina ai i se auala mataʻina upu a Ieova ia o loo faamauina i le Isaia 60:22, o loo faapea mai: “O le toʻaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” Ioe, sa ou ola e vaai i lenā mea o loo tupu e lē gata i Zambia, ae i le lalolagi atoa. *

[Faamatalaga pito i lalo]

[Ata i le itulau 24]

Thomson ma le lālā i Zambia lenā e i tua

[Ata i le itulau 26]

Le lālā i Zambia i aso nei