‘Ia Fefaamagaloaʻi Outou’

PE E te talitonu ua faamagaloina e le Atua au agasala? E foliga mai o le toʻatele o tagata i le Iunaite Setete, e latou te ioe i ai. Ua taʻua e Dr. Loren Toussaint, ina ua ia taʻitaʻia se suʻesuʻega i le University of Michigan Institute for Social Research e faapea, pe a ma le 80 pasene mai le 1,423 o tagata Amerika e silia ma le tai 45 tausaga na faapea mai, ua faamagaloina e le Atua a latou agasala.

Peitaʻi, e na o le 57 pasene o i latou na fesiligia sa faapea mai, ua uma ona latou faamagalo atu i isi. Ua manatua ai upu a Iesu i lana Lauga i luga o le Mauga: “Afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.” (Mataio 6:14, 15) Ioe, o le faamagaloga a le Atua e faalagolago lava i lo tatou nofosauni e faamagalo atu i isi.

Sa faamanatu atu e Paulo i Kerisiano i Kolose lenei mataupu silisili. Na ia fautua atu ma le malosi iā i latou e faapea: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou.” (Kolose 3:13) E moni, e lē faigofie ona faatinoina lea tulaga. O se faataʻitaʻiga, afai o oe lea sa fai atu i ai ni faaupuga lē mafaufau ma ni upu faatigā, e ono faafaigatā lava ona e faamagalo atu.

Peitaʻi, e aogā le faamagalo atu o isi. Na taʻua e Dr. David R. Williams, o se tagata sinia i suʻesuʻega tau i amioga faavafealoaloaʻi e tusa ai o ana saʻiliʻiliga: “Ua matou iloa patino lava le malosi o le faiā i le va o le faamagalo atu o isi ma le mafaufau lelei i tagata Amerika e i le va o le taʻi 40 ma le 60 tausaga pe sili atu foʻi le matutua.” Ua ōgatusa lenei faamatalaga ma upu a Solomona na tusia e tusa ma le 3,000 tausaga ua mavae: “O le loto lelei, o le ola lea o le tino.” (Faataoto 14:30) Talu ai o le agaga faamagalo e uunaʻia ai se faiā lelei ma le Atua ma o tatou tuaoi, o lea e tatau ai ona tatou fefaamagaloaʻi o le tasi i le isi mai le loto.—Mataio 18:35.