Ia Faaalia le Alofa Naunau i Tagata o le Aiga

NA LUʻIA e Tohru lana avā o Yoko i le faapea atu: “Tago la e susunu pe afai e te mafaia! Susunu loa!” * Na tali atu le fafine ma tusi le afi tusi e susunu ai lo la ata: “Ou te susunu moʻia lava.” Sa ia toe fai atu ma le ita tele, “Ou te susunuina foʻi ma le fale lenei!” Na tali atu Tohru i le poina o lana avā, ma iʻu ai le taugāupu i faiga sauā.

I le tolu tausaga muamua atu, na amataina ai le olaga faaipoipo o Tohru ma Yoko o se ulugalii fiafia. Ae o le ā la le mea na tupu? E ui lava sa foliga mai o Tohru o se tamāloa lelei, ae sa lagona e lana avā e faapea, e lē o faaali atua e lana tane se alofa naunau iā te ia ma e seāseā lava popole mai lana tane i ona faalogona. E foliga mai e lē mafai lava ona ia tali atu i le alofa naunau o lana avā. Ona o le lē mafai ona onosaia e Yoko o lenei mea, na oo ai ina matuā faateteleina lona loto tigā ma le ita. Sa oo ai iā te ia ni faafitauli e pei o le lē mafai ona moe, popole, ua lē fia ʻai, itaitagofie, mafatia le mafaufau ma le popolevale. Ae peitaʻi, e foliga mai sa lē manatu mamafa i ai Tohru e uiga i le tulaga faigatā lea ua oo i lona aiga. E foliga mai sa pei lava o se tulaga masani iā te ia.

“O Aso Faigatā”

Ua taatele lava faafitauli faapena i aso nei. Na valoia e le aposetolo o Paulo e faapea, i o tatou aso, o le a iai tagata o ē e “lē lotoaiga.” (2 Timoteo 3:1-5) O le upu faa-Eleni lea ua faaliliuina i le “lē lotoaiga” e fesootaʻi lelei lava i inei ma le upu ua faaalia ai le faalogona o le alofa naunau lea e iai i tagata o se aiga. O le tulaga moni lenā ua iai i o tatou aso, ua leai se lotoaiga. E tusa lava pe iai le lotoaiga, ae atonu e seāseā ona faaalia lea uiga e le tasi i le isi.

E toʻatele mātua i aso nei e lē iloa pe faapefea ona faaalia atu le alofa ma le lotoaiga i a latou lava fanau. O nisi na ola aʻe i ni siʻomaga faaleaiga e leai se alofa naunau po o se lotoaiga, ma atonu e lē o iloa, e mafai ona sili atu ona fiafia ma manaia le aiga pe afai e mafai ona lagona ma faaalia le alofa naunau. E foliga mai o le tulaga lenā o le aiga o Tohru. A o laʻitiiti o ia, sa masani lava ona pisi lona tamā i le galuega ma e foʻi mai i le aiga ua leva le afiafi. Sa seāseā lava talanoa ma Tohru, ma afai foʻi e talanoa, e masani lava ona ia faitioina o ia. Sa faigaluega foʻi i aso uma le tinā o Tohru, ma sa lē tele sona taimi na faaaluina ma ia. Sa avea le televise ma tausi tama iā Tohru. Sa leai se faamālō leai ni fesootaʻiga i le aiga.

O aganuu, o se isi foʻi lea vala. I nisi vaega o Amerika Latina, e teena ai e se tamāloa le tū taatele a le atunuu o le faaali atu o lona alofa naunau i lana avā. I le tele o atunuu i Asia ma Aferika, e lē ōgatusa ma le aganuu le fai atu e se tasi o ni upu, pe faia ni gaoioiga e faaalia ai lona alofa naunau. E ono faigatā i tane ona fai atu i a latou avā po o  fanau, “Ou te alofa iā te oe.” Ae peitaʻi, e mafai ona tatou aʻoaʻoina se lesona mai se faiā faaleaiga aupito sili ona māfana, lea sa tumau mo se taimi umi lava.

Se Faiā Faaleaiga e Fai ma Faaaʻoaʻoga

O le faaaʻoaʻoga aupito sili mo se aiga, e maua i le faiā māfana i le va o Ieova le Atua ma lona Alo pele e toʻatasi. E la te fefaaaliaʻi i se auala lelei atoatoa, le alofa o le tasi i le isi. I le lē mafaitaulia o le tele o tausaga, sa olioli ai le foafoaga agaga o Iesu Keriso, i se faiā fiafia ma lona Tamā. Na ia faamatalaina ai lea faiā e faapea: “Na fai foʻi aʻu mona fiafia i lea aso ma lea aso; sa ou olioli i ona luma i aso uma lava.” (Faataoto 8:30) Sa matuā mautinoa e le Alo le alofa o lona Tamā, lea na ia faailoa atu i isi e faapea, sa fiafia faapitoa lava Ieova iā te ia i lea aso ma lea aso. Sa ia lagona le fiafia i luma o lona Tamā i aso uma lava.

E oo lava i le taimi a o i ai Iesu i le lalolagi o se tagata, na faamautinoa atu ai i le Alo o le Atua le alofa loloto o lona Tamā. Ina ua uma ona papatisoina Iesu, na ia faafofogaina ai le siʻufofoga o lona Tamā, o faapea mai: “O loʻu atalii pele lenā, ua ou fiafia lava iā te ia.” (Mataio 3:17) Maʻeu se faaaliga faalaeiau o le alofa i le amataga lava o le faiva a Iesu i le lalolagi! E lē taumatea na matuā pāʻia lona loto i le faalogo atu i le finagalo malie o lona Tamā ma ia toe manatua lelei ai lona soifuaga atoa i le lagi.

I lea, ua faataatia ai e Ieova le faaaʻoaʻoga sili ona lelei i le faaalia o le alofa atoatoa i lona aiga i le vateatea aoao. Pe afai e tatou te talia Iesu Keriso, e mafai foʻi ona tatou olioli i le alofa naunau o Ieova. (Ioane 16:27) E ui lava e tatou te lē faalogo i se fetalaiga mai le lagi, ae o le a tatou vaaia le alofa o Ieova o faaalia mai i le natura o mea, i le saunia o le taulaga togiola a Iesu, ma i isi lava auala. (1 Ioane 4:9, 10) E faafofoga mai foʻi Ieova i a tatou tatalo ma tali mai i se auala e sili ona lelei mo i tatou. (Salamo 145:18; Isaia 48:17) A o tatou atiina aʻe se faiā vavalalata ma Ieova, ua tatou matuā loto faafetai ai ona o lana tausiga alofa.

Sa aʻoaʻoina e Iesu mai lona Tamā le auala e faaalia ai le tigā alofa, magafagafa, agalelei, ma le manatu mamafa i isi. Na ia faamatala mai e faapea: “O mea na te vaai atu i le Tamā o faia; o mea foʻi o faia e ia, o loo faia foʻi ia lava mea e le Atalii. Auā o loo alofa le Tamā i le Atalii, ua faaali mai foʻi iā te ia mea uma lava e faia e ia.” (Ioane 5:19, 20) I lea, ua mafai ai ona tatou aʻoaʻoina le tomai e faaalia ai le alofa naunau e ala i le suʻesuʻeina o le faaaʻoaʻoga a Iesu a o iai i le lalolagi.—Filipi 1:8.

Alofa Naunau i le Aiga—Faapefea?

Ona o le “Atua o le alofa” ma ua faia i tatou “i lona faatusa,” ua iā i tatou la le tomai e lagona ma faaalia ai le alofa. (1 Ioane 4:8; Kenese 1:26, 27) Peitaʻi, e tusa lava pe e iā i tatou lenā tomai, e lē teʻiteʻi lava mafai ona faaalia atu. Ina ia faaalia atu le alofa, e tatau ona tatou alolofa muamua i a tatou paaga ma fanau. Ia vaavaai ma mātau o latou uiga lelei, e ui lava ina foliga mai e faatauvaa, ae ia mafaufau i na uiga. Atonu e te faapea mai: ‘E leai lava se mea lelei i laʻu tane [avā po o le fanau].’ O i latou e filifilia e mātua paaga faaipoipo, atonu e laʻitiiti lava se alofa naunau i a latou paaga. O nisi ulugalii atonu e lē mananaʻo e fai ni fanau. Ae, seʻi manatunatu i faalogona o Ieova agaʻi i lona faletua faafaatusa, le nuu o Isaraelu, i lona sefulu o senituri T.L.M. A o faia e lana perofeta o Elisaia le faaiʻuga e faapea, e leai lava nisi tagata tapuaʻi o Ieova i ituaiga e sefulu o le nuu o Isaraelu, ae na matuā suʻesuʻe uga e Ieova i latou ma maua ai le anoanoaʻi o tagata, e 7,000, o ē uma sa iai uiga lelei na fia silasila i ai Ieova. Pe e mafai ona e faataʻitaʻi iā Ieova e ala i le vaavaai i uiga lelei o tagata o lou aiga?—1 Tupu 19:14-18.

 Ae peitaʻi, ina ia lagona e isi tagata o le aiga lou alofa naunau, e tatau ona e taumafai e faailoa atu lou alofa. Pe afai e te iloa se mea e tatau ona e faamālō ai, ia faailoa atu i au upu lou talisapaia. I le faamatalaina o se avā amio lelei, ua taʻua e le Afioga a le Atua uiga manaia o lona aiga e faapea: “E tulaʻi mai lana fanau, ma faafetai iā te ia; o lana tane foʻi ua vivii iā te ia.” (Faataoto 31:28) Ia mātau le auala na faaalia ai ma le lē taofiofia e tagata o le aiga le alofa o le tasi i le isi. O le faaleoina atu e se tamā o ni upu faaviivii i lana avā, ua ia faataatia ai se faaaʻoaʻoga lelei mo lona atalii, ua faalaeiauina ai o ia ina ia faamālō ma le agalelei i lana paaga pe a faaipoipo o ia.

E tatau foʻi i mātua ona faamālō atu i a latou fanau. E fesoasoani lenā mea e tāmau ai i loto o le fanau ni lagona mautinoa o i latou iā i latou lava. Ioe, e mafai faapefea i se tagata ona ‘alofa i lona tuaoi e pei o ia lava’ pe afai e lē faaaloalo o ia iā te ia lava? (Mataio 22:39) I le isi itu, afai e fai ma masani le faitioina e mātua o a latou fanau ae lē faamālō i ai, e faigofie ai ona manatu faatauvaa tamaiti iā i latou lava ma lē faaalia ai le alofa naunau i isi.—Efeso 4:31, 32.

E Mafai Ona E Maua le Fesoasoani

Ae faapefea pe afai e te leʻi ola aʻe i se aiga alolofa? E mafai lava ona e aʻoaʻo e faaalia atu le alofa naunau. O le laasaga muamua lava, o le iloa lea o le faafitauli ma taumafai e faaleleia. O le fesoasoani sili i lenei itu, o le Afioga lea a le Atua. Ua mafai ona faatusaina i se fāʻata. Pe a tatou iloiloina i tatou lava i se fāʻata faafaatusa, o aʻoaʻoga a le Tusi Paia, ona faaalia mai ai lea o ni mea o faalētonu i o tatou mafaufauga. (Iakopo 1:23) I le ōgatasi ai ma aʻoaʻoga a le Tusi Paia, e mafai ona suia ni mea lē talafeagai i o tatou mafaufauga. (Efeso 4:20-24; Filipi 4:8, 9) E manaʻomia ona tatou faia e lē aunoa lenei mea, ma aua lava neʻi ‘faapalapala i le amio lelei.’—Kalatia 6:9.

Atonu e faigatā i nisi ona faaalia le alofa naunau ona o le siʻomaga po o le aganuu na ola aʻe ai. Ae ui i lea, ua faaalia i suʻesuʻega na faia talu ai nei e faapea, e mafai lava ona foʻia na toʻatugā. Ua faamatala mai e se fomaʻi faapitoa o le mafaufau o Dr. Daniel Goleman e faapea, ‘e oo lava i masaniga ua mauaa i le loto ia na aʻoaʻoina a o laʻitiiti, e mafai lava ona suia.’ Na faaalia mai i le Tusi Paia i le silia ma le 19 senituri ua mavae e faapea, e oo lava i ni mafaufauga ua matuā mauaa, e mafai lava ona suia ona o le fesoasoani a le agaga o le Atua. Ua apoapoaʻi mai le Tusi Paia iā i tatou: ‘Ia toeseina e outou le tagata tuai atoa ma ana amio, a ia outou oofu i le tagata fou.’—Kolose 3:9, 10.

O le taimi lava e iloa ai le faafitauli, ona mafai lea ona suʻesuʻeina e le aiga le Tusi Paia e tusa ma o latou manaʻoga. Mo se faataʻitaʻiga, aiseā e lē suʻe ai po o le ā o fai mai ai le Tusi Paia e uiga i le faaupuga “alofa naunau”? Atonu e te mauaina se mau e pei o lenei: “Ua outou faalogologo i le onosai o Iopu, ua outou iloa foʻi le iʻuga i la le Alii, ina ua mutimutivale tele le Alii ma le alofa naunau.” (Iakopo 5:11) Ona talanoa lea i le faamatalaga a le Tusi Paia e uiga iā Iopu, ma taulaʻi atu i le auala na mutimutivale tele ai Ieova ma alofa naunau iā Iopu. E lē taumatea o le a e manaʻo e te faataʻitaʻi iā Ieova i le faaalia o le alofa naunau ma le alofa mutimutivale i lou aiga.

Ae peitaʻi, ona o le lē lelei atoatoa, “o mea e tele e sesē ai i tatou uma” i le faaaogāina o o tatou laulaufaiva. (Iakopo 3:2) I le aiga, e tatou te ono lē faaaogāina ai o tatou laulaufaiva i se  auala e faalaeiauina ai. E manaʻomia ai i lenei mea le tatalo faatasi ma le faalagolago atu iā Ieova. Aua le faavaivai. “Ia tatalo e lē aunoa.” (1 Tesalonia 5:17) O le a fesoasoani Ieova iā i latou o ē faaalia le alofa naunau i le aiga, faapea i latou o ē mananaʻo e faaalia lea alofa, ae e lē o mafai ona latou faia faapea.

E lē gata i lea, ua saunia ma le agalelei e Ieova le fesoasoani i le faapotopotoga Kerisiano. Na tusi mai Iakopo e faapea: “Ua maʻi [faaleagaga] ea so outou? Ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suauʻu i le suafa o le Alii [o Ieova].” (Iakopo 5:14) Ioe, e mafai ona avea toeaina o faapotopotoga a Molimau a Ieova o se fesoasoani sili i aiga, o ē o loo avea ma faafitauli le faaali atu o le alofa naunau o le tasi i le isi. E ui lava e lē o ni fomaʻi, ae e mafai e toeaina ona fesoasoani ma le onosai i o latou uso talitonu, e lē o le taʻu atu iā i latou o le mea e tatau ona fai, ae ia faamanatu atu iā i latou le silafaga a Ieova ma tatalo faatasi ma i latou.—Salamo 119:105; Kalatia 6:1.

I le tulaga o Tohru ma Yoko, sa faalogologo lelei ai pea toeaina Kerisiano i lo la faafitauli ma faamāfanafana atu iā i laʻua. (1 Peteru 5:2, 3) I nisi taimi, sa asiasi atu se toeaina ma lona faletua ina ia mafai ai e Yoko ona maua aogā mai le auaufaatasi ma se fafine Kerisiano e lava le poto masani, o lē na faamanatu atu iā Yoko ina ia ‘alofa atu i lana tane.’ (Tito 2:3, 4) O le faaalia o le loto malamalama ma le mutimuti alofa mo Kerisiano loto mafatia ma faanoanoa, ua avea ai toeaina “e pei o se lafitaga i le matagi, ma se mea e malu ai i le afā.”—Isaia 32:1, 2.

Ona o le fesoasoani a toeaina alolofa, na iloa ai e Tohru, e iai sona faafitauli i le faaalia atu o ona faalogona, ma i nei “aso e gata ai” ua osofaʻia ai e Satani le faatulagaga faaleaiga. (2 Timoteo 3:1) Na manatu loa Tohru e tatau ona faia se gaoioiga i lona faafitauli. Na amata ona ia iloa e faapea, o lona lē faaalia o le alofa, na māfua mai ona o le leai o se alofa na faaalia iā te ia a o tuputupu aʻe. Ona o le matuā suʻesuʻeina o le Tusi Paia faatasi ma le tatalo, na amata mālie ai ona faaali atu e Tohru ona faalogona i manaʻoga tau i faalogona o lana avā o Yoko.

E ui lava sa ita Yoko iā Tohru, ae ina ua malamalama o ia i le talaaga o le aiga o Tohru, ma iloa foʻi e ia ona lava vaivaiga, na ia taumafai malosi ai ina ia vaai mo uiga lelei o lana tane. (Mataio 7:1-3; Roma 5:12; Kolose 3:12-14) Sa talosaga faatauanau atu o ia iā Ieova mo le malosi ina ia faaauau ai pea ona alofa o ia i lana tane. (Filipi 4:6, 7) Mulimuli ane, na faaalia e Tohru lona alofa, ma ua faafiafiaina ai lana avā.

O le mea moni, e tusa lava pe faafaigatā ona e lagona ma faaalia lou alofa i le aiga, ae e mautinoa lava e mafai ona e foʻia lenā faafitauli. Ua aumaia e le Afioga a le Atua ni taʻiala mamā iā i tatou. (Salamo 19:7) Ona o le iloaina o le matuiā o le mataupu, taumafai e vaai mo uiga lelei i tagata o lou aiga, suʻesuʻeina ma faatatauina o le Afioga a le Atua, faalagolago atu iā Ieova e ala i tatalo faatauanau, ma le saʻilia o le fesoasoani a toeaina Kerisiano taʻumatuaina, o le a mafai ai ona e manumalo i ni faafitauli e foliga mai e matuā tetelē i le va o oe ma lou aiga. (1 Peteru 5:7) E mafai foʻi ona e maua le olioli e pei o se tasi tane i le Iunaite Setete. Sa faalaeiauina o ia ina ia faaali atu lona alofa naunau i lana avā. Ina ua ia maua le lototele e faapea atu ai “Ou te alofa iā te oe,” na faateʻia o ia i le tali mai a lana avā. I le faatumuina i loimata o le fiafia na ia faapea atu ai: “Ou te alofa foʻi iā te oe, ae o se taimi muamua lea i totonu o le 25 tausaga ua e fai mai ai ma le alofa naunau.” Aua le faatali mo lenā umi ona faatoʻā faaali atu lea o lou alofa i lau paaga ma lau fanau!

[Faamatalaga pito i lalo]

[Ata i le itulau 28]

Ua saunia e Ieova le fesoasoani e ala i lana Afioga, le Tusi Paia