“Ia Outou Faalatalata Atu i le Atua”
“Ia Outou Faalatalata Atu i le Atua”
“Ia outou faalatalata atu i le Atua, ona faalatalata mai lea o ia iā te outou.”—IAKOPO 4:8.
1, 2. (a) O le ā e masani ona taʻua e tagata? (e) O le ā le timaʻiga na aumaia e Iakopo, ma aiseā sa manaʻomia ai?
“O LOO faatasi le Atua ma i tatou.” O upu na ua teuteuina ai faailoga faaleatunuu, e oo lava i togiga a fitafita. Ua tele tupe i aso nei o loo tusia ai le faaupuga, “Matou te Faatuatua i le Atua.” O se mea masani i tagata ona faapea mai e iai sa latou faiā vavalalata ma le Atua. Ae, pe e te lē ioe ea e faapea, o le iai o se faiā faapenā e sili atu i lo le na ona talanoa i ai po o le faaali o ni faaupuga ua tusia?
2 Ua faailoa mai e le Tusi Paia e mafai ona iai se faiā ma le Atua. Peitaʻi, e manaʻomia ai ni taumafaiga. E oo lava i nisi o Kerisiano faauuina i le uluaʻi senituri sa manaʻomia ona faamalosia la latou faiā ma Ieova le Atua. Sa tatau i le ovasia Kerisiano o Iakopo ona lapataʻia nisi e uiga i o latou tuʻinanauga faaletino ma le tulaga lē mamā faaleagaga sa iai. I lenā fautuaga, na ia avatu ai lenei timaʻiga malosi: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:1-12) O le ā sa uiga i ai Iakopo ina ua fai mai “faalatalata atu”?
3, 4. (a) O le ā sa ono faamanatu atu i le ʻaufaitau a Iakopo i le uluaʻi senituri e uiga i le faaupuga “faalatalata atu i le Atua”? (e) Aiseā e tatou te mautinoa ai e mafai ona faalatalata atu i le Atua?
3 Na faaaogā e Iakopo se faaupuga sa masani ai le toʻatele o lana ʻaufaitau. Sa iai i le Tulafono na tuu atu iā Mose ni faatonuga maʻoti mo faitaulaga, i le auala e “faalatalata” atu ai iā Ieova e fai ma sui o ona tagata. (Esoto 19:22) Sa ono faamanatu atu i le ʻaufaitau a Iakopo e faapea, e lē o se mea e manatu māmā i ai le faalatalata atu iā Ieova. O Ieova o lē silisili ona mamalu i le aoao o mea.
4 I le isi itu, e pei ona taʻua e se tasi tagata atamai i le Tusi Paia, “ua faaalia i lenei timaʻiga [i le Iakopo 4:8] le iʻu i se tulaga e sili ona lelei.” Na iloa e Iakopo sa lē aunoa ona valaaulia ma le alofa e Ieova tagata lē lelei atoatoa ina ia faalatalata atu iā te Ia. (2 Nofoaiga a Tupu 15:2) E ala i le taulaga a Iesu, ua mafai ona faalatalata atu iā Ieova i se auala e sili atu. (Efeso 3:11, 12, LF ) I aso nei, ua tatala mai i le faitau miliona le ala e faalatalata atu ai i le Atua! E faapefea ona tatou faaaogāina atoatoa lenei avanoa matagofie? O le a tatou talanoa puupuu i auala e tolu e faalatalata atu ai iā Ieova le Atua.
Ia “Iloa” Pea le Atua
5, 6. Ua faapefea i le faaaʻoaʻoga a le talavou o Samuelu ona faataʻitaʻia mai ai mea e aofia i le ‘iloaina’ o le Atua?
5 E tusa ai ma le Ioane 17:3, na fetalai Iesu: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” E ese laʻitiiti lava le New World Translation mai lenei fuaiupu atoa ma isi faaliliuga. Na i lo o le faapea mai ia “iloa” le Atua, o loo faaaogāina le faaupuga “mauaina pea o le poto” e uiga i le Atua. Ua mātauina foʻi e tagata atamamai e faapea, e sili atu se isi mea o loo aofia i le upu na faaaogā i le uluaʻi gagana Eleni—o se gaoioiga e faifai pea, lea e mafai ona taʻitaʻia atu i se mafutaga vavalalata ma se isi tagata.
6 E leʻi avea o se manatu fou i taimi o Iesu le iloaina lelei o le Atua. Mo se faaaʻoaʻoga, i Tusitusiga Eperu, o loo faapea mai a o tamaitiiti Samuelu, “e leʻi oo ina iloa e ia Ieova.” (1 Samuelu 3:7) Po o le uiga o lenei manatu e itiiti se mea na iloa e Samuelu e faatatau i lona Atua? E leai. E lē taumatea le tele o mea na aʻoaʻo atu i ai e ona mātua atoa ma faitaulaga. Peitaʻi, o le upu Eperu o loo faaaogā i lenā fuaiupu, e tusa ai ma se tasi tagata atamai faapitoa, e mafai “ona faaaogā mo se mafutaga e sili ona vavalalata.” E leʻi oo i le taimi e iloa lelei ai e Samuelu ia Ieova, e ese mai le taimi lea o le a mulimuli ane auauna ai o se fofoga fetalai a Ieova. A o tuputupu aʻe Samuelu, sa ia iloa moni lava Ieova ma maua se faiā totino ma ia.—1 Samuelu 3:19, 20.
7, 8. (a) Aiseā e lē tatau ai ona faalotovaivaia i tatou i aʻoaʻoga loloto o le Tusi Paia? (e) O ā nisi o upu moni loloto o le Afioga a le Atua e lelei ona tatou suʻesuʻe i ai?
7 Po o e mauaina pea le poto e uiga iā Ieova ina ia mafuta vavalalata ai ma ia? Ina ia ausia lenei tulaga, e manaʻomia ona e “naunau” i taumafa faaleagaga o loo saunia mai e le Atua. (1 Peteru 2:2) Ia taumafai e ave i fale nisi o aʻoaʻoga loloto, na i lo o le faamalieina tau i aʻoaʻoga faavae o le Tusi Paia. (Eperu 5:12-14) Pe e faalotovaivaia oe i na aʻoaʻoga loloto, i le manatu ua faigatā naʻuā? Afai o le tulaga lenā, ia manatua o Ieova o le ‘Aʻoaʻo Silisili.’ (Isaia 30:20) O loo ia silafia le auala e faamatala mai ai upu moni loloto i mafaufau lē lelei atoatoa o tagata. E mafai ona ia faamanuia i au taumafaiga fitā ina ia tāea mea o loo ia aʻoaʻoina ai oe.—Salamo 25:4.
8 Aiseā e te lē iloiloina ai po o le ā le tele o lou iloa o nisi o ‘mea loloto a le Atua’? (1 Korinito 2:10, LT) O nei mataupu, e lē pei o mataupu lē uigā lea o loo fefinauaʻi ai tagata popoto i lotu ma failotu. Ae o ni mataupu aogā ua aumaia ai se malamalamaga faaosonaunau e uiga i le finagalo o lo tatou Tamā agaalofa. Mo se faaaʻoaʻoga, o le togiola, le ‘mealilo paia,’ ma feagaiga eseese sa faaaogā e Ieova ina ia manuia ai ona tagata ma faataunuu ana fuafuaga. O nei mataupu, ma le tele o isi e talitutusa, e matagofie ma o ni mataupu aogā pe a saʻiliʻili ma suʻesuʻe totino i ai.—1 Korinito 2:7.
9, 10. (a) Aiseā e lamatia ai i le faamaualuga, ma o le ā e fesoasoani iā i tatou e ʻalofia ai? (e) E tusa ai ma le poto o Ieova, aiseā e tatau ai ona tatou taumafai malosi ia lotomaulalo?
9 A o tuputupu aʻe lou poto i upu moni loloto faaleagaga, ia faaeteete i le lamatiaga e ono ō mai faatasi ma le poto—le faamaualuga. (1 Korinito 8:1) O le faamaualuga e lamatia ai auā e faaesea ai tagata mai le Atua. (Faataoto 16:5; Iakopo 4:6) Ia manatua, e leai se māfuaaga e mitamita ai fua se tagata i le poto ua ia mauaina. Mo se faataʻitaʻiga, seʻi manatu i faamatalaga a se tusi e faatatau i le tulaga o loo agaʻigaʻi ai i luma faiga faasaienisi a tagata: “E taʻu mai e le tele o mea e tatou te iloa, le itiiti o mea o loo tatou iloaina. . . . E lē mafaatusalia mea ua uma ona tatou aʻoaʻoina i mea e leʻi oo ina tatou aʻoaʻoina.” Maʻeu le moni o lenei faamatalaga. Peitaʻi, a oo mai loa i le mauaina o le poto atoatoa—le poto o Ieova le Atua—ua iā i tatou māfuaaga e sili atu ina ia lotomaulalo ai. Aiseā?
10 Seʻi mātau mai nisi o faamatalaga a le Tusi Paia e uiga iā Ieova. “E loloto lava ou manatu.” (Salamo 92:5) “[O Ieova] e lē ma faamatalaina lona poto.” (Salamo 147:5) “[O Ieova] e lē masuʻesuʻeina lona mafaufau.” (Isaia 40:28) “Auē! le loloto o le tamaoaiga o le poto atoa ma le silafaga a le Atua.” (Roma 11:33) Ua manino mai le lē mafai ona tatou iloa o mea uma e faatatau iā Ieova. (Failauga 3:11) E anoanoaʻi mea matagofie ua ia aʻoaʻo mai, ae o le a iai pea le tele o mea e mafai ona tatou aʻoaʻoina. Pe e lē o se mea lenā inā matagofie ma faamaualaloina? O lea la, a o aʻoaʻoina i tatou, ia faaaogā pea lo tatou poto o se faavae e faalatalata atu ai iā Ieova ma ia fesoasoani i isi ia faia foʻi faapea, ae aua neʻi avea ma mea tatou te faamaualuluga ai i isi.—Mataio 23:12; Luka 9:48.
Ia Faaali Lou Alofa mo Ieova
11, 12. (a) E tatau faapefea ona aafia i tatou i le poto e uiga iā Ieova? (e) E faapefea ona iloa e faamaoni le alofa o se tagata i le Atua?
11 Na taʻua ma le talafeagai e Paulo le sootaga i le va o le poto ma le alofa. Na ia tusi e faapea: “O laʻu tatalo foʻi lenei, ia faatuputeleina pea lava lo outou alofa, ma le iloa lelei, atoa ma le faautauta uma.” (Filipi 1:9) Na i lo le faafefeteina ai, e tatau i upu moni tautele uma ua tatou aʻoaʻoina e uiga iā Ieova ma ana fuafuaga, ona faateleina ai lo tatou alofa mo lo tatou Tamā i le lagi.
12 O le mea moni, e lē faamaoni le alofa o le toʻatele o ē e faapea mai e alolofa i le Atua. Atonu e iai i o latou loto ni faalogona malolosi. O se mea lelei tele le iai o nei faalogona, pe afai e ōgatasi ma le poto saʻo. Peitaʻi, e lē tutusa le iai o nei faalogona ma le alofa moni i le Atua. Aiseā? Mātau le auala ua faamatalaina ai i le Afioga a le Atua lenei alofa: “Auā o lenei lava le alofa i le Atua, ia tatou tausi i ana poloaʻiga.” (1 Ioane 5:3) O lea la, e faamaoni le alofa mo Ieova pe afai e faaalia i gaoioiga usiusitai.
13. E faapefea ona fesoasoani le mataʻu faale-Atua iā i tatou e faaalia le alofa mo Ieova?
13 E fesoasoani le mataʻu faale-Atua iā i tatou e usiusitai ai iā Ieova. E atiina aʻe lenei mataʻu ma le migao mo Ieova mai le mauaina pea o le poto e uiga iā te ia ma aʻoaʻo e faatatau i le tele o lona paia, mamalu, mana, faamasinotonu, atamai ma le alofa. E matuā tāua lenā mataʻu i le faalatalata atu iā te ia. Seʻi mātau le mea o fai mai ai le Salamo 25:14 (NW): “O ē e matataʻu iā Ieova e mafuta lea ma ia.” O lea la, e mafai ona tatou faalatalata atu i lo tatou Tamā faalelagi pe afai e iā i tatou le mataʻu lelei, o le lē faia lea o se mea e lē fiafia ai o ia. O le a fesoasoani le mataʻu faale-Atua iā i tatou e utagia le fautuaga atamai o loo i le Faataoto 3:6: “Ia e manatua o ia i ou ala uma, ona faatonuina ai lea e ia lava ou ala.” O le ā le uiga o lenei mea?
14, 15. (a) O ā nisi o filifiliga tatou te faia i le olaga i aso faisoo? (e) E faapefea ona tatou faia filifiliga i se auala o le a faaatagia atu ai le mataʻu faale-Atua?
14 E tatau ona e faia filifiliga tetele ma filifiliga laiti i aso taʻitasi. Mo se faaaʻoaʻoga, o ā ituaiga talanoaga tou te faia ma au aumea i galuega, aʻoga, ma tuaoi? (Luka 6:45) A tuu atu e fai se galuega, po o le a e galue malosi e faatinoina, pe e te saʻilia ni auala e faatino ai e aunoa ma le tele o galuega e alu ai? (Kolose 3:23) Pe e te faalatalata atu i ē e itiiti pe e leai foʻi se alofa mo Ieova, po o le a e taumafai e faamalosia lau faiā ma tagata faaleagaga? (Faataoto 13:20) O le ā e te faia, e oo lava i auala laiti, e faaauiluma ai manaʻoga o le Malo o le Atua? (Mataio 6:33) Afai e taaʻina au filifiliga i aso faisoo i mataupu silisili faale-Tusi Paia e pei ona taʻua, e mafai moni la ona faapea atu o loo e amanaʻia Ieova “i ou ala uma.”
15 O lona uiga, e tatau ona taʻitaʻia i tatou i le manatu lenei pe a faia a tatou filifiliga taʻitasi: ‘O le ā o loo finagalo Ieova ou te faia? O le ā le mea o le a sili ona faafiafiaina ai o ia?’ (Faataoto 27:11) O le faaalia o le mataʻu faale-Atua i lenei auala, o se faiga sili lea ona lelei e alofa ai iā Ieova. O le a uunaʻia foʻi i tatou e le mataʻu faale-Atua ina ia tausia le mamā i le itu faaleagaga, tau amio ma faaletino. Ia manatua, i le fuaiupu lava lea o loo apoapoaʻia ai e Iakopo Kerisiano ia “faalatalata atu i le Atua,” na ia timaʻi mai foʻi: “Tagata agasala e, inā fafano ia o outou lima, o outou e faalotolotolua e, inā faamamā ia o outou loto.”—Iakopo 4:8.
16. E ala i le foaʻi atu iā Ieova, o le ā le mea e lē mafai ona tatou faia, ae o le ā le mea o le a tatou taulau pea ona fai?
16 E moni, e sili atu mea e aofia i le faaalia o le alofa iā Ieova na i lo le faamamao mai mea leaga. E uunaʻia foʻi e le alofa i tatou e faia le mea lelei. Mo se faataʻitaʻiga, e faapefea ona tatou tali atu i le tele o le aaofoaʻi o Ieova? Na tusi Iakopo e faapea: “O mea lelei uma e foaʻifuaina mai, atoa ma mea alofa uma e atoatoa ona lelei, mai lugā lava ia, e alu ifo mai le Tamā o malamalama.” (Iakopo 1:17) E moni, e lē faaʻoaina Ieova iā tatou meafaitino e foaʻi atu iā te ia auā ua iā te ia mea lelei ma alāmanuia uma. (Salamo 50:12) Pe afai e foaʻi atu iā Ieova lo tatou taimi ma le malosi, tatou te lē o faia se mea e lē mafai ona ia aao i ai. E tusa pe tatou te mumusu e talaʻi le tala lelei o le Malo o le Atua, e mafai ona ia faapogaia maa e alalaga mai! Aiseā la e avatu ai iā Ieova a tatou alāmanuia, taimi ma le malosi? O le māfuaaga autū, ia faailoa atu ai lo tatou alofa iā te ia mai o tatou loto atoa, agaga atoa, manatu atoa, ma le malosi atoa.—Mareko 12:29, 30.
17. O le ā e mafai ona uunaʻia i tatou e foaʻi atu ma le lotomalie iā Ieova?
17 A tatou foaʻi atu iā Ieova, e tatau ona faia ma le lotofiafia, “auā e alofa le Atua i lē ua foaʻi ma le loto malie.” (2 Korinito 9:7) O le a fesoasoani le mataupu silisili i le Teuteronome 16:17 iā i tatou e foaʻi atu ai ma le lotofiafia: “E taʻitasi le tagata e tusa ma mea ua iā te ia, e tusa ma le manuia ua foaʻiina mai e Ieova lou Atua iā te oe.” A manatunatu i le tele o le aaofoaʻi o Ieova, tatou te mananaʻo e foaʻi atu ma le fiafia iā te ia. E faafiafiaina lona finagalo i meaalofa faapenei, e pei ona fiafia se matua e maua se meaalofa laʻitiiti mai se fanau pele. O le faaalia o le alofa i lenei auala o le a fesoasoani iā i tatou e faalatalata atu ai iā Ieova.
Ia Atiina Aʻe se Mafutaga Vavalalata e Ala i le Tatalo
18. Aiseā e talafeagai ai ona tilofaʻia le auala e faaleleia ai a tatou tatalo?
18 O taimi e fai ai a tatou tatalo totino, o se avanoa sili lea ona lelei e talanoa māfana atu ai ma taʻu atu o tatou faalogona i lo tatou Tamā i le lagi. (Filipi 4:6) Talu ai o se vala matuā tāua lenei e faalatalata atu ai i le Atua, e talafeagai la ona tilofaʻia le tulaga o a tatou tatalo. E lē faapea e ao ona faaaogā ai upu maotua ma faatulagaina i se auala faapitoa, ae e tatau ona taʻua ai faaupuga faamaoni e sau mai le loto. E faapefea ona faaleleia a tatou tatalo?
19, 20. Aiseā e manatunatu loloto ai a o leʻi tatalo, ma o ā nisi o mataupu talafeagai e manatunatu loloto i ai?
19 Atonu tatou te taumafai ia manatunatu loloto muamua a o leʻi tatalo. A faia faapea, e mafai ona maʻoti ma uigā ai a tatou tatalo, ma ʻalofia ai le toe taʻu o faaupuga masani e manatuaina i le taimi e tatalo ai. (Faataoto 15:28, 29) E ono fesoasoani foʻi le mafaufau i mea na taʻua i le tatalo faataʻitaʻi a Iesu, ona manatunatu lea i le auala e fesootaʻi atu ai i o tatou lava tulaga. (Mataio 6:9-13) Mo se faaaʻoaʻoga, atonu e fesili ifo iā i tatou lava po o le ā la tatou vaega itiiti e fai i le faia o le finagalo o Ieova i le lalolagi. Pe tatou te taʻu atu iā Ieova lo tatou faanaunauga ia tatou matuā aogā iā te ia ma talosagaina lana fesoasoani i le faataunuuina o so o se tofiga e na te aumaia? Po o faapopolegia i tatou i o tatou manaʻoga faaletino? O ā agasala e manaʻomia ai le faamagaloga, ma o ai e tatau ona sili ona tatou faamagalo atu i ai? O ā faaosoosoga o tatou faafesagaʻia ma pe tatou te iloa le tulaga o loo vave manaʻomia ai le puipuiga a Ieova e tusa ai ma lenei mataupu?
20 E lē gata i lenā, tatou te ono mafaufau i tagata tatou te iloa o loo manaʻomia patino lava le fesoasoani a Ieova. (2 Korinito 1:11) Aua foʻi neʻi galo ona avatu le faafetai. A mafaufau i ai, e mafai ona tatou maua māfuaaga e faafetaia ma viia ai Ieova i aso taʻitasi mo le tele o lona agalelei. (Teuteronome 8:10; Luka 10:21) E iai se aogā faaopoopo o le faia faapea, e mafai ona fesoasoani iā i tatou ia iai se vaaiga mautinoa atoa ma le lotofaafetai i le olaga.
21. O ā faaaʻoaʻoga faale-Tusi Paia e suʻesuʻeina e ono fesoasoani iā i tatou pe a faalatalata atu ai iā Ieova i le tatalo?
21 E mafai foʻi i suʻesuʻega ona faaleleia ai a tatou tatalo. O loo iai i le Tusi Paia ni tatalo matagofie a tane ma fafine faamaoni. Mo se faataʻitaʻiga, pe afai o le a tatou fesagaʻi se faafitauli faigatā o faaloloʻi mai, ma ua faapopoleina ai i tatou ona e tatou te ono lamatia ai ia po o se tasi foʻi e pele iā i tatou, tatou te ono faitau i le tatalo a Iakopo e uiga i le la feiloaʻiga ma lona uso fia taui ma sui o Esau. (Kenese 32:9-12) E tatou te ono suʻesuʻeina foʻi le tatalo a le tupu o Asa ina ua faamataʻu ane i tagata o le Atua ia ʻautau pe ā ma le miliona a Aitiope. (2 Nofoaiga a Tupu 14:11, 12) Afai o loo tatou popole i se faafitauli lea e mafai ona faalumaina ai le suafa lelei o Ieova, atonu la o se mea lelei le manatunatu i le tatalo a Elia i luma o le ʻautapuaʻi a Paala i le mauga o Karamelu, atoa ma le tatalo a Neemia e uiga i le tulaga malapagā sa iai Ierusalema. (1 Tupu 18:36, 37; Neemia 1:4-11) O le faitauina ma le manatunatu loloto i nei tatalo, e mafai ona faamalosia ai lo tatou faatuatua ma maua ai se manatu i le auala sili ona lelei e taʻu atu ai iā Ieova o tatou popolega o loo avea ma avega mamafa iā i tatou.
22. O le ā le mau o le tausaga 2003, ma o le ā e ao ona tatou fesili ifo ai iā i tatou lava mai lea taimi i lea taimi a o faagasolo le tausaga?
22 E manino mai, e leai se tulaga e sili ona mamalu po o se sini e sili ona maualuga na i lo le utagiaina o le fautuaga a Iakopo ia “faalatalata atu i le Atua.” (Iakopo 4:8) Seʻi tatou faia ia faapea e ala i le agaʻigaʻi i luma i lo tatou poto i le Atua, i le saʻilia o auala e faaalia atili atu ai lo tatou alofa mo ia, ma i le atiina aʻe o se mafutaga vavalalata ma ia e ala i a tatou tatalo. A o faagasolo le tausaga faaleauaunaga 2003, ma a o teu i manatu le Iakopo 4:8 lea ua avea ma mau o le tausaga, seʻi faaauau ona iloiloina i tatou lava pe faamata o tatou faalatalata moni atu iā Ieova. Peitaʻi, e faapefea le vaega mulimuli o lenā fuaiupu? O le ā le uiga o le faaupuga “faalatalata mai lea o [Ieova] iā te outou,” ma o ā faamanuiaga e maua mai ai? O le a talanoaina lenei manatu i le mataupu o loo sosoo mai.
Pe E te Manatua?
• Aiseā e manatu mamafa ai i le faalatalata atu iā Ieova?
• O ā nisi o sini tatou te ono faatulaga e faatatau i le mauaina pea o le poto e uiga iā Ieova?
• E faapefea ona tatou faataʻitaʻia le faamaoni o lo tatou alofa mo Ieova?
• I ā auala atonu e atiina aʻe ai se mafutaga e sili atu ona vavalalata ma Ieova e ala i le tatalo?
[Fesili mo le Suʻesuʻega]
[Faamatalaga faaopoopo i le itulau 12]
O le mau o le tausaga mo le 2003: “Ia outou faalatalata atu i le Atua, ona faalatalata mai lea o ia iā te outou.”—Iakopo 4:8.
[Ata i le itulau 9]
A o tuputupu aʻe o ia, na oo ina iloa lelei e Samuelu Ieova
[Ata i le itulau 12]
Ua avea ma faaaʻoaʻoga lelei mo i tatou le tatalo a Elia i le mauga o Karamelu