Le Auala ma le Māfuaaga na Fanau Mai ai Iesu

“E LĒ mafai ona tupu lenā mea!” O faaupuga masani nei a le toʻatele o i latou e lē o ni Kerisiano, pe a faalogo i tala o le fanau mai o Iesu. E latou te manatu e leai ni faavae faasaienisi e ao ai ona talitonu, e mafai e se tamaʻitaʻi taupou ona maʻitaga ma fanauina mai se pepe tama e aunoa ma se tamā. O le ā sou manatu i ai?

I le 1984, na lomia ai e le Times a Lonetona se tusi o loo talanoaina ai lenei mataupu e faapea: “E lē talafeagai le avea o le faasaienisi ma mea e finau faasaga ai i vavega. O le talitonu e faapea e lē mafai ona tutupu vavega, e tai pei foʻi o le talitonu maumauaʻi e mafai ona tutupu.” Na sainia lenei tusi e ni polofesa o le faasaienisi e toʻa 14 o ni iunivesite o Peretania. Na latou faapea mai: “E matou te taliaina ma le fiafia le tulaga lea o le fanau o se taupou, o vavega o loo taʻua i Evagelia, ma le toetū mai o Keriso o ni mea mataʻina na tutupu i le talafaasolopito.”

Peitaʻi, e malamalama le tulaga, e faigatā ona talitonuina e se tasi faatoʻā faalogo i le tala e faapea, na fanau mai Iesu i se taupou. Na faigatā foʻi ona talitonuina e le tinā taupou lava ia o Iesu ina ua faapea atu le agelu: “Faauta foʻi, o le a tō oe, ma e fanauina se tama tane, e te faaigoa iā te ia o Iesu.” Na fesili atu Maria: “A faapefea le mea nei; auā ou te leʻi iloa se tane?” Ona faamatala atu lea e le agelu e faapea o le a faia e le Atua lenei vavega e ala i Lona agaga paia, ona toe faapea atu lea: “E leai lava se mea e tasi e lē mafaia e le Atua.” (Luka 1:31, 34-37) E mautinoa la, o Lē na faia lenei fuafuaga ofoofogia o le fanau mai o le tagata, e mafai foʻi ona faapogaia le afuafuaina ma le fanauina mai o Iesu mai se taupou. Pe afai na foafoaina e le Atua le lalolagi aoao ma ona tulafono lelei atoatoa, e mafai foʻi ona ia faaaogāina se fuāsela ma i le totoga fanautama o Maria e faia ai se Alo lelei atoatoa faaletagata.

Le Māfuaaga na Manaʻomia Ai

Na faamau atu Iosefa o se tagata amioatua iā Maria i le taimi ua afuafua lona maʻitaga. I se miti, na faamatala atu ai e le agelu a le Atua iā Iosefa le māfuaaga mataʻina ua maʻitaga ai lana uō taupou. Na faapea atu le agelu: “Aua e te fefe ina au mai iā te oe o Maria lau avā; auā o lana tō mai le Agaga Paia lea. E fanau mai e ia le tama tane, e te faaigoa foʻi iā te ia o Iesu; auā e faaola e ia lona nuu ai a latou agasala.” (Mataio 1:20, 21) O le uiga o le igoa o Iesu i le faa-Eperu o “Ieova o le Faaolataga.” Ua faamanatu mai ai iā i tatou le manaʻomia ona faasaoina mai le agasala ma le oti, ma o le  sauniuniga a le Atua mo lenā faaolataga o Iesu lea.

Talu ai na agasala le uluaʻi tagata o Atamu, na lē lelei atoatoa uma ai ē na tupuga mai iā te ia, na iai ma se faanaunauga e solia le tulafono a le Atua. (Roma 5:12) E faapefea i ē na tupuga mai iā Atamu ona tuusaunoa mai le agasala ma maua le tulaga lelei atoatoa? O se isi ola lelei atoatoa faaletagata e tutusa pau ma le aogā o le ola o Atamu, e tatau ona totogi ai ina ia paleni le tulaga faamasinotonu. O le māfuaaga lenā na faapogaia ai e le Atua le fanau mai faavavega o le tagata lelei atoatoa o Iesu, ma faatagaina ai e Iesu ona fili e fasiotia o ia. (Ioane 10:17, 18; 1 Timoteo 2:5, 6) Ina ua māeʻa ona faatūina mai ma afio aʻe Iesu i le soifuaga faalelagi, na mafai ai ona ia fetalai ma le mautinoa e faapea: “Sa ou oti, faauta foʻi, ou te ola e faavavau faavavau lava; o iā te aʻu foʻi ki o le oti ma seoli [le tuugamau mo tagata].”—Faaaliga 1:18.

O ki faafaatusa o le oti ma seoli, ua faaavanoa atu ai e Iesu le ala mo tagata agasala ina ia mauaina le mea na melea e Atamu. Na faamatalaina e Iesu e faapea: “O aʻu nei o le toe tū ma le ola; o lē faatuatua mai iā te aʻu, e ui lava ina oti, a e ola lava ia.” (Ioane 11:25, 26) Maʻeu se folafolaga ina a matagofie! E lē gata i lenā, e iai foʻi se isi māfuaaga e sili atu o le fanau mai o Iesu.

O le Māfuaaga e Sili Ona Tāua

E lē o le afuafuaina o Iesu i le manava o Maria le amataga lea o lona soifuaga. Na ia taʻua ma le manino e faapea: ‘Na ou alu ifo mai le lagi.’ (Ioane 6:38) Na soifua Iesu i le nofoaga agaga faatasi ma lona Tamā faalelagi mai le amataga o le foafoaga. O le mea moni, ua faamatala e le Tusi Paia o ia o “le amataga o mea na faia e le Atua.” (Faaaliga 3:14) Na molimauina e Iesu mai le lagi le fouvalega a le agelu amioleaga lea na faaliliueseina le uluaʻi ulugalii ina ia tetee atu i le pule a le Atua. O le māfuaaga sili lea na manaʻo ai o ia e fanau mai o se Alo lelei atoatoa o le Atua. O le ā lea māfuaaga?

Ina ia faamaoniaina ai e iai i lona Tamā faalelagi le aiā e pule ai i le lagi ma le lalolagi atoa. E ala i le tumau faamaoni i lona soifua mai e oo i lona maliu i luga o le lalolagi, na faaalia ai e Iesu lona lotomalie e gauaʻi atu i le auala e puleaina ai e Ieova Ana meafaiola. A o leʻi fasiotia o ia e fili o le Atua, na faamanino atu ai e Iesu le māfuaaga o lona lotomalie e maliu faataulagaina. Na ia fetalai e faapea ina ia iloa e le lalolagi, sa ia alofa i le Tamā. (Ioane 14:31) Pe ana faapea e atiina aʻe e le uluaʻi ulugalii lenā alofa, semanū la te manumalo mai i lo la tofotofoga e sili atu ona faigofie.—Kenese 2:15-17.

O le faamaoni foʻi o Iesu na faaalialia ai le agelu amioleaga o Satani o sē e pepelo. Na taufaaleaga e Satani le Atua ma tagata e ala i lona faapea mai i luma o agelu o le lagi: “O mea uma  foʻi ua i ai i le tagata, e avatua e ia e sui aʻi lona ola.” (Iopu 2:1, 4) Sa tuuaʻi sesē e Satani e faapea o le a lē usiusitai tagata uma i le Atua pe a faamataʻuina o latou ola.

O luʻi ia na muaʻi taʻua, na luʻia ai le tonu ma le saʻo o le pulega a le Atua. Ina ia foʻiaina la, na lotomalie ai Iesu ina ia fanau mai o se tagata ma tumau faamaoni seʻia oo i le oti.

O lea la, o le māfuaaga autū o le soifua mai o Iesu i le lalolagi e pei ona ia fetalai i ai, ‘ina ia molimau o ia i le upu moni.’ (Ioane 18:37) Na ia faia lea e ala i le faaalia i upu ma gaoioiga e faapea o le pulega a le Atua e tonu atoatoa, ma o le gauaʻi atu i ai e iʻu ai i le fiafiaga e faavavau. Na faamatalaina foʻi e Iesu e faapea na afio mai o ia i le lalolagi, ina ia tuuina atu lona soifua faaletagata o se “togiola mo tagata e toʻatele,” ma faaavanoa atu ai le ala mo tagata agasala ina ia lelei atoatoa ma ola e faavavau. (Mareko 10:45) Ina ia malamalama la tagata i nei mataupu tāua, e manaʻomia ai ni faamaumauga o le fanau mai o Iesu. E lē gata i lenā, o mea na tutupu i le fanau mai o Iesu o loo iai ni mea tāua e aʻoaʻoina mai ai, lea o le a faailoa mai e le mataupu o loo sosoo ai.

[Ata i le itulau 4]

E faapefea i ē na tupuga mai iā Atamu ona tuusaunoa mai le agasala?