Pe E te Masani iā Safana ma Lona Aiga?

INA ua faitauina lau Tusi Paia, pe sa e mātauina ai ni faamatalaga e faatatau iā Safana ma nisi o lona aiga taualoa? O ai i latou? O ā ni mea na latou faia? O ā ni lesona e mafai ona tatou aʻoaʻoina mai iā i latou?

Ua faailoa mai e le Tusi Paia iā i tatou o “Safana le atalii o Asalaia, le atalii ia o Mesulama” i le taimi ina ua toe faafoʻisia e Iosia le tapuaʻiga moni pe tusa ma le 642 T.L.M. (2 Tupu 22:3) I le faagasologa o le 36 tausaga mulimuli ane, seʻia oo i le faaumatiaina o Ierusalema i le 607 T.L.M., ua faafeiloaʻi atu ai i tatou i ona atalii e toʻafā, o Aikamo, Eliasa, Kemaria, Iaasenaia, ma atalii e toʻalua o ona atalii, o Mekaio ma Ketalia. (Tagaʻi i le siata.) Ua faamatala mai i le Encyclopaedia Judaica e faapea: “Sa maualuga le tulaga o le aiga o Safana [i le malo o Iuta] ma sa umia le tulaga o tusiupu a tupu mai le taimi o Iosia seʻia oo atu i le Tafeaga.” O le autaluina o faamatalaga a le Tusi Paia e uiga iā Safana ma lona aiga, o le a tatou malamalama ai i le auala na latou fesoasoani ai i le perofeta o Ieremia ma le tapuaʻiga moni a Ieova.

Lagolagoina e Safana le Tapuaʻiga Moni

I le 642 T.L.M., ina ua tusa ma le 25 tausaga o le Tupu o Iosia, ua tatou iloa ai sa auauna Safana o se failautusi ma o se tusiupu a le tupu. (Ieremia 36:10) O le ā na aofia ai i lenā mea? Ua taʻua i le tusi lea e i luga e faapea, o le tusiupu ma le failautusi a le aiga tupu, sa avea o se faufautua vavalalata i le tupu ma sa gafa foʻi o ia ma mataupu tautupe, e tomai foʻi i le faafoeina o ni leleiga i le va o atunuu, ma e lava lona iloa o mataupu tau i le va i fafo, tulafono faavaomalo, ma mataupu tau i fefaatauaʻiga. O lea la, ona o se failautusi a le aiga tupu, na avea ai Safana o se tagata e sili ona aloaʻia i le malo.

I le sefulu tausaga muamua atu, na ‘amata ai ona saʻili i le Atua o Tavita lona tamā’ le talavou o Iosia. E mautinoa lava e matua atu Safana iā Iosia, o le mea lea sa avea ai o ia ma faufautua lelei faaleagaga iā te ia, ma o se lagolagosua malosi i le uluaʻi tauiviga a Iosia ina ia toe faafoʻisia le tapuaʻiga moni. *—2 Nofoaiga a Tupu 34:1-8.

I le taimi a o faagasolo le toe fausiaina o le malumalu, na maua ai “le tusi o le tulafono” ona “faitau ai lea e Safana i luma o le tupu.” Na faateʻia Iosia ina ua faalogo i upu o le tusi, ma aauina atu ai ni tane maufaatuatuaina e avatu le aveaʻi iā Ulata le perofeta fafine, ina ia fesili atu iā Ieova e tusa ai ma upu o le tusi. Na matuā maufaatuatuaina e le tupu ia Safana ma lona atalii o Aikamo e ala i le faaaofia o i laʻua i ē na ō atu e avatu le aveaʻi.—2 Tupu 22:8-14; 2 Nofoaiga a Tupu 34:14-22.

E na o le pau lava lenei o le faamatalaga a le Tusi Paia e uiga i mea na faia e Safana lava ia. I isi mau o le Tusi Paia, ua na ona faasino atu iā te ia e faapea o se tamā, po o se tamā matua. Sa māfana lelei fesootaʻiga a le fanau a Safana ma le perofeta o Ieremia.

Aikamo ma Ketalia

E pei ona tatou iloa, o Aikamo le atalii o  Safana, o loo taʻua muamua lona igoa i tagata ia na ō atu e avatu le aveaʻi iā Ulata le perofeta fafine. Ua faapea mai se tasi faamaumauga: “E ui e lē o taʻua i le Tusi Paia Eperu le tofi o Aikamo, ae e mautinoa lava, sa ia umia se tofiga maualuga.”

I le 15 tausaga talu ona mavae lenā mea na tupu, na oo ai ina lamatia le soifua o Ieremia. Ina ua ia lapataʻia tagata e uiga i le fuafuaga a Ieova e faaumatia Ierusalema, “ona puʻe atu ai lea iā te ia e le ʻau faitaulaga, ma perofeta, ma le nuu uma, ua faapea atu, E oti lava oe.” O le ā la le mea na tupu? Ua faaauau mai le faamatalaga: “A ua fesoasoani Aikamo le atalii o Safana iā Ieremia, ina ia lē tuuina atu o ia i lima o le nuu e fasioti iā te ia.” (Ieremia 26:1-24) O le ā ua faaalia mai i lenei mea? Ua taʻua i le Anchor Bible Dictionary e faapea: “O lenei mea, ua lē gata ina faamaonia ai le malosi o taaʻiga a Aikamo, ae ua faaalia ai foʻi, e pei lava o isi tagata o le aiga o Safana, sa latou agalelei atu iā Ieremia.”

Pe a ma le 20 tausaga mulimuli ane, ina ua mavae le faaumatiaina o Ierusalema e Papelonia i le 607 T.L.M. ma ave faatagataotaua le toʻatele, ae na tofia ia Ketalia le atalii o Aikamo le atalii o Safana, e fai ma kovana i tagata na totoe o Iuta. Pe na pei o ia o isi tagata o le aiga o Safana, na tausia lelei Ieremia? Ua faitauina faapea le faamatalaga a le Tusi Paia: “Ona alu ai lea o Ieremia iā Ketalia le atalii o Aikamo i Mesepa; ua nofo foʻi ma ia.” E leʻi umi se taimi, ae fasiotia loa Ketalia, ona ave ai lea e tagata na totoe o Iuta ia Ieremia ma latou ō i Aikupito.—Ieremia 40:5-7; 41:1, 2; 43:4-7.

Kemaria ma Mekaio

E tāua le vaega na faia e Kemaria le atalii o Safana, ma Mekaio lona atalii, i mea na tutupu na o loo faamatalaina i le Ieremia mataupu e 36. O le taimi lea e tusa ma le 624 T.L.M., i lona lima o tausaga o le nofoaiga a le tupu o Ioakima. Na faitau leotele atu ai e Paruka le failautusi a Ieremia upu mai le tusi a Ieremia i le fale o Ieova, “i le potu o Kemaria le atalii o Safana.” O lea la, “ua faalogo Mekaio le atalii o Kemaria, le atalii o Safana, i afioga uma a Ieova nai le tusi.”—Ieremia 36:9-11.

Na faailoa atu e Mekaio i lona tamā ma isi alii uma e uiga i le tusi, ma na latou fia faalogo uma lava i mea o fai mai ai. O ā o latou uiga na faaalia? “Ua latou faalogo i ia upu uma, ona latou fefefe ai lea, o le tasi ma le tasi, ma latou fai mai iā Paruka, Matou te taʻu atu lava ia upu uma i le tupu.” Ae peitaʻi, ae latou te leʻi tautala atu i le tupu, na latou fautuaina Paruka e faapea: “Inā alu ia, lua te lalafi, oulua ma Ieremia, aua neʻi iloa e se tasi po o fea lua te i ai.”—Ieremia 36:12-19.

E pei lava ona faatalitalia, na teena e le tupu le feʻau ma susunu uma le tusi tāʻai. O nisi o alii  e aofia ai ma Kemaria le atalii o Safana, ‘na ʻaiʻoi atu i le tupu e aua neʻi susunuina le tusi tāʻai, ae e leʻi faalogo le tupu iā te i latou.’ (Ieremia 36:21-25) Ua faapea mai le tusi, Jeremiah—An Archaeological Companion: “Sa fesoasoani malosi Kemaria iā Ieremia i le maota o le tupu o Ioakima.”

Eliasa ma Iaasenaia

I le 617 T.L.M., na pulea ai e Papelonia le malo o Iuta. E faitau afe tagata Iutaia, o “alii uma foʻi, atoa ma ē totoa uma . . . o tufuga uma foʻi, atoa ma ē galulue i uʻamea,” na ave faatagataotauaina, e aofia ai ma le perofeta o Esekielu. O Matania lea na avea ma tupu fou, na suia e tagata Papelonia lona igoa iā Setekaia. (2 Tupu 24:12-17) Mulimuli ane, ona auina atu ai lea e Setekaia se aveaʻi i Papelonia, lea na aofia ai ma Eliasa le atalii o Safana. Na tuuina atu e Ieremia iā Eliasa le tusi lea sa iai se feʻau tāua mai iā Ieova i le tafeaga a sa Iutā.—Ieremia 29:1-3.

O lea, ua faaalia i faamaumauga a le Tusi Paia e faapea, sa faaaogā e Safana ma ona atalii e toʻatolu, ma atalii e toʻalua o ona atalii lo latou tulaga pule e lagolagoina ai le tapuaʻiga moni ma le perofeta faamaoni o Ieremia. Ae faapefea le atalii o Safana, o Iaasenaia? E lē pei o isi tagata o le aiga o Safana, e foliga mai sa auai o ia i tapuaʻiga e ifo i tupua. I lona ono o tausaga o le ave faatagataotauaina o Esekielu i Papelonia, pe tusa o le 612 T.L.M., na iloa ai e le perofeta se faaaliga i tagata e toʻa 70 o loo faamū taulaga o mea manogi i tupua i le malumalu i Ierusalema. E na o Iaasenaia lava na taʻua lona igoa mai iā i latou uma sa iai i inā. E iloa mai ai i lenei mea, sa lauiloa o ia i lenei vaega. (Esekielu 8:1, 9-12) O le faaaʻoaʻoga a Iaasenaia, ua faaalia ai e faapea, o le tausia aʻe o se tasi i se aiga amio Atua, e lē faamautinoa ai le avea o ia ma tagata tapuaʻi faamaoni iā Ieova. E tali lava le tagata ia e tusa ai ma ana gaoioiga.—2 Korinito 5:10.

Le Gafa o Safana ma Lona Aiga

I le taimi na faia ai e Safana ma lona aiga se vaega i mea na tutupu i Ierusalema, sa taatele lava i Iuta le faaaogāina o faamaufaailoga. O faamaufaailoga, sa faaaogā e fai ma molimau pe e faamaonia ai faamaumauga ma sa faia mai i maa tāua, uʻamea, nifo elefane, po o tioata. I le faamaufaailoga, e masani ona vane ai le igoa o lē e ona le faailoga po o le igoa o lona tamā ma i nisi taimi, o le tofi o lē ona le faailoga.

E faitau selau faaupuga o faamaufaailoga faa-Eperu na maua o vaneina i maa omea. Na mātauina e le polofesa o Nahman  Avigad, o se tagata tomai i tusitusiga faa-Eperu ia suʻesuʻega o tusitusiga anamua, e faapea: “O faamatalaga i faamaufaailoga, e na o le pau lava na o tusitusiga faa-Eperu anamua o loo taʻua ai tagata na lauiloa o le Tusi Paia.” Pe na maua la se tusitusiga i se faamaufaailoga a Safana po o tagata o lona aiga? Ioe, o loo aliaʻi mai le igoa o Safana ma lona atalii o Kemaria i le faamaufaailoga i le ata lea e i le itulau e 19 ma le 21.

Ua faapea mai foʻi tagata tomai, atonu o loo faasino atu ia faaupuga i le faamaufaailoga i isi tagata e toʻafā o le aiga—o Asalia, le tamā o Safana; o Aikamo ma Kemaria o atalii o Safana; ma Ketalia, o lē e foliga mai o loo faasino atu i ai le faaupuga i le faamaufaailoga e faapea, o lē na “pule i le Aiga.” O le faamaufaailoga lona fā ua manatu i ai e faapea, e o Ketalia, le atalii o le atalii o Safana, e ui lava e lē o taʻua mai ai le igoa o Aikamo lona tamā. Ua faaalia i lona tofi lea o loo tusia i le faamaufaailoga e faapea, sa avea o ia o se alii maualuga i le malo.

O le ā se Mea e Tatou Aʻoaʻoina Mai Ai?

Maʻeu se faaaʻoaʻoga lelei na faia e Safana ma lona aiga i le faaaogāina o lo latou tulaga maualuga e lagolagoina ai e lē na o le tapuaʻiga moni, ae faapea foʻi Ieremia faamaoni! E mafai foʻi ona tatou faaaogāina a tatou alāmanuia ma o tatou tulaga e lagolagoina ai le faalapotopotoga a Ieova ma o tatou uso tapuaʻi.

O se mea e faatamaoaigaina ai ma faamalosia ai lo tatou faatuatua e lē gata i le faitauina e lē aunoa o le Tusi Paia, ae ia suʻesuʻe loloto foʻi i ai ma ia tatou faamasani i na molimau anamua a Ieova, e pei o Safana ma tagata o lona aiga. E aofia ai foʻi i latou “i molimau e toʻatele” na e mafai ona tatou faataʻitaʻi i a latou faaaʻoaʻoga.—Eperu 12:1, NW.

[Faamatalaga pito i lalo]

[Pusa i le itulau 22]

O Ulata—O se Perofeta Fafine Iloga

I le faalogo atu i le faitauina o “le tusi o le tulafono” lea na maua i le malumalu, na faatonuina ai e le Tupu o Iosia ia Safana ma isi alii sili e toʻafā ina ia ō atu e “fesili atu iā Ieova” e uiga i le tusi. (2 Tupu 22:8-20) O fea o le a maua ai e tagata na ō atu ma le aveaʻi se tali i le fesili? I lenā taimi, na nonofo ai Ieremia, atonu ma Nauma ma Sefanaia, o perofeta uma ma o tusitala o le Tusi Paia i Iuta. Ae peitaʻi, sa oo atu lenei aveaʻi iā Ulata le perofeta fafine.

Ua faapea mai le tusi, Jerusalem—An Archaeological Biography: “O le mea e sili ona mataina o lenei mea na tupu, ona sa lē taʻua ai i lenei tala se vala o le tala e faatatau i tane ma fafine. E leai lava se tasi sa iai sina manatu i lenei mea e faapea e lē talafeagai ona avatu e se komiti e na o ni tamāloloa, le Tusi Tāʻai o le Tulafono i se fafine e iloiloina lona tulaga. Ina ua ia faapea mai o le afioga lenei a le Alii, e leai se tasi na ia fesiligia lana pule e iloilo ai le mataupu. E masani lava ona lē amanaʻia e tagata aʻoga lenei mea na tupu ona o le manatu i le tāua o le vaega na faia e fafine i Isaraelu anamua.” O le mea moni, o le feʻau lea na tuuina atu, e mai iā Ieova.

[Siata/Ata i le itulau 21]

(Tagaʻi i le lomiga mo le ata atoa)

Le Gafa o le Aiga o Safana

Mesulama

↓

Atalia

↓

Safana

↓ ↓ ↓ ↓

Aikamo Eliasa Kemaria Iaasenaia

↓ ↓

Ketalia Mekaio

[Ata i le itulau 20]

O Kemari ma isi o loo talosaga atu iā Ioakima e aua le susunuina le tusi tāʻai mai iā Ieremia

[Ata i le itulau 22]

E ui o Iaasenaia o se tasi o le aiga o Safana, ae na vaaia o ia i se faaaliga o loo tapuaʻi atu i tupua

[Faamatalaga i Ata i le itulau 19]

Faatagaga a le Israel Antiquities Authority

[Faamatalaga i Ata i le itulau 21]

Faatagaga a le Israel Antiquities Authority