“E Saʻo Lelei Oe, e Ese le Manaia o le Olaga!”

PE E te fia iloa le uiga moni o le olaga? O le mea tonu lava lenā na fesoasoani atu ai Magdalena e 18 tausaga, o se tasi o Molimau a Ieova e nofo i Szczecin i Polani, i lana uō o Katarzyna i le aʻoga maualuga e faia. Na taʻutino atu e Katarzyna, o ia e lē talitonu e iai se Atua, ae ina ua talanoa atu i ai Magdalena e uiga i le Tusi Paia, sa ia faaalia le naunau moni.

E ui lava sa fiafia ia Katarzyna i mea na talanoa atu ai ia Magdalena iā te ia mai le Tusi Paia, ae na te leʻi matuā taliaina atoatoa na mea. A o la talanoa ma Magdalena e uiga i ni uō moni, na faapea atu ia Katarzyna: “O lenā e iā te oe le Tusi Paia; o lenā foʻi e te iloa po o ā mataupu silisili e mulimuli ai ina ia maua ai ni uō. Ae faapefea la i latou o ē e lē o taliaina i le taimi nei na mataupu silisili?”

Ae na iai se suiga ina ua malaga atu Katarzyna i Lonetona i Egelani. Na asiasi atu o ia i le ofisa o le lālā o Molimau a Ieova i inā, ma na faagaeetia ai ona o le agalelei na faaalia iā te ia. Sa matuā faafiafiaina o ia i nai gaoioiga e pei o le tatalaina o le faitotoʻa mo ia ma faaalia atu le naunau moni i mea na ia fai atu ai.

Iā Setema 2001 ina ua amata le tausaga fou faaleaʻoaʻoga, na manaʻo ai Katarzyna ina ia faia e lē aunoa sana suʻesuʻega faale-Tusi Paia. Ua faateleina lona talisapaia o mataupu silisili o le Tusi Paia ma ua amata ona faatatauina i lona olaga i aso faisoo. Talu ai nei lava, na ia taʻutino atu ai iā Magdalena e faapea: “Ua ou lagona, e pei lava ua amata ona ou ola i se olaga fou.” Sa ia auina atu foʻi iā te ia e ala i le telefoni feaveaʻi sina upu puupuu: “Faafetai tele lava mo la ta suʻesuʻega i lenei aso! E saʻo lelei oe, e ese le manaia o le olaga! E ese le lelei o le iloa po o ai e tatau ona tatou faafetai atu i ai mo na mea.”