O le ā e Mafai Ona Fesoasoani iā i Tatou e Talaʻitonuina le Upu Moni?

I SE tasi aso, na alu ai se faamasino o ata tifaga mo se tasi o nusipepa e matamata i se koneseti. Sa leʻi fiafia i ai o ia, ma na ia tusia ai mulimuli ane e faapea: “Afai e te manaʻo e fia matamata i ni mea lē lelei po o ni mea e lē tāua, e tatau lava ona e alu e te matamata i le koneseti lea.” Mulimuli ane, na tusia ai e i latou na saunia lea koneseti se faasalalauga na faatomua ai se faaupuga mai le faaiʻuga a le faamasino. Na faapea lea faaupuga: “E tatau lava ona e alu e te matamata i le koneseti lea”! Na sii saʻo mai lava e le faasalalauga ia upu a le faamasino, ae na suia le uiga mai le manatu autū, ma matuā faauiga sesē ai lona manatu.

Ua faaalia ai i lenā faaaʻoaʻoga le tāua e mafai ona iai le manatu autū o se faamatalaga. O le aveesea o upu mai le manatu autū, e mafai ona mimilo sesē ai uiga o upu, e pei lava ona mimilo sesē e Satani le uiga o le Tusi Paia ina o taumafai e faasesēina Iesu. (Mataio 4:1-11) I le isi itu, o le mafaufau loloto i le manatu autū o se faamatalaga, e fesoasoani iā i tatou e mauaina ai se malamalamaga e sili atu ona saʻo i le uiga o le faamatalaga. O le māfuaaga lea, pe a tatou suʻesuʻeina se mau o le Tusi Paia, o se faiga atamai tele le taulaʻi atu pea i le manatu autū ma vaai i le faatulagaina o le fuaiupu ina ia malamalama lelei ai po o le ā le mea lea sa talanoa i ai le tusitala.

Ia Taulima ma le Faaeteete

Ua faamatalaina e se lomifefiloi le manatu autū e faapea, “o ni vaega o se faamatalaga tusitusia po o le tautala, lea e muamua pe mulimuli mai i se upu po o se fuaiupu patino, e masani lava ona iloa ai le uiga po o le ʻauga o lenā upu po o le fuaiupu.” O le manatu autū, e mafai foʻi ona faapea, o “le faasologa o tulaga po o mea moni e fesootaʻi ma se mea patino na tupu, se tulaga, ma isi mea faapena.” I le uiga mulimuli lenei, o le upu e tutusa lona uiga ma le “manatu autū” o le “talaaga.” O le talanoaina o le manatu  autū o se mau, e tāua patino lava pe a manatu i le mea na tusi atu ai le aposetolo o Paulo iā Timoteo: “Ia e taumafai ina ia avea oe ma lē ua fiafia mai i ai le Atua, o lē faigaluega e leai se mea e mā ai, na te talaʻitonuina le upu moni.” (2 Timoteo 2:15, LF) Ina ia talaʻitonuina le Afioga a le Atua, e manaʻomia ona tatou malamalama lelei i ai, ona faamatala saʻo atu lea ma le faamaoni i isi. O le faaaloalo iā Ieova le Tusitala o le Tusi Paia, o le a uunaʻia ai i tatou e taumafai e faia lenā mea, o le a avea o se fesoasoani tāua le talanoaina o le manatu autū.

Le Talaaga o le Tusi Lona Lua iā Timoteo

Seʻi o tatou iloiloina mo se faaaʻoaʻoga le tusi o le Tusi Paia o le Lua Timoteo. * Ina ia amata la tatou iloiloga, e mafai ona tatou saʻilia le talaaga o le tusi. O ai na tusia le Lua Timoteo? O anafea na tusia ai? I lalo o ā tulaga? Ona tatou fesili lea, O le ā le tulaga o “Timoteo” lea ua faaigoaina ai le tusi? Aiseā na ia manaʻomia ai faamatalaga ia e i le tusi? O le mauaina o tali i nei fesili o le a tatou matuā talisapaia ai le tusi ma fesoasoani iā i tatou i aso nei e iloa ai pe faapefea ona tatou maua mai ai aogā.

Ua faaalia i fuaiupu amata o le tusi lona Lua iā Timoteo e faapea, o le tusi na tusia e le aposetolo o Paulo iā Timoteo. Ua faaalia i isi fuaiupu e faapea, na tusia e Paulo le tusi a o noanoatia o ia i filifili ona o le tala lelei. Talu ai na tuulafoaʻiina o ia e le toʻatele, na lagona ai e Paulo ua lalata mai lona iʻuga. (2 Timoteo 1:15, 16; 2:8-10; 4:6-8) O lea, atonu na ia tusia le tusi i le taimi lea ua faalua ona tuuina o ia i le falepuipui i Roma, e pe a ma le 65 T.A. E leʻi pine lava talu mai lenā mea, atonu na faasalaina ai loa o ia e Nero i le oti.

O le talaaga lenā o le tusi lona Lua iā Timoteo. Peitaʻi, e lelei ona mātauina e faapea, e leʻi tusi atu Paulo iā Timoteo e faitio atu i ai e uiga i ona lava faafitauli. Na i lo o lea, sa ia lapataʻi atu iā Timoteo e uiga i aso faigatā o loo fotuaʻi mai i le lumanaʻi ma faalaeiauina lana uō ina ia ʻaloese mai mea faatosina, a ia faaauau pea ona “faamalosia oe,” ma ia aʻoaʻo atu i isi faatonuga a Paulo. I lea, o le a faaauupegaina lelei ai i latou nei e fesoasoani atili atu i isi. (2 Timoteo 2:1-7) Maʻeu se faaaʻoaʻoga sili ona lelei o le manatu mamafa lē faatuaoia mo isi e oo lava i taimi faigatā! Ma maʻeu se fautuaga lelei mo i tatou i aso nei!

Ua taʻua e Paulo ia Timoteo o “loʻu atalii pele.” (2 Timoteo 1:2) E taʻua soo lenei tauleʻaleʻa talavou i le Tusi Paia Kerisiano Eleni, o se aumea faamaoni a Paulo. (Galuega 16:1-5; Roma 16:21; 1 Korinito 4:17) Ina ua tusia e Paulo lenei tusi iā Timoteo, o le taimi lea e foliga mai ua tolu sefulu ona tausaga; o loo manatu pea i ai o se talavou. (1 Timoteo 4:12) Peitaʻi, sa iai sona talaaga e sili ona lelei o le faamaoni, sa ‘auauna faatasi ma Paulo’ pe ā ma le 14 tausaga. (Filipi 2:19-22) E ui sa talavou lava Timoteo, ae sa tofia o ia e Paulo na te avatua fautuaga i nisi toeaina ina ia “aua neʻi latou fefinauaʻi i upu” ae ia uaʻi atu i mataupu e tāua, e pei o le faatuatua ma le tumau. (2 Timoteo 2:14) Sa tuuina atu foʻi le pule iā Timoteo na te tofia ai ovasia ma auauna o le faiva i le faapotopotoga. (1 Timoteo 5:22) Ae peitaʻi, atonu sa fai si ona lē mautonu e uiga iā te ia lava e faatatau i le faatinoina o lana pule.—2 Timoteo 1:6, 7.

Sa fesagaʻi le toeaina talavou ma ni luʻi faigatā. O se tasi o mea faapena, o ni tagata se toʻalua, o Umenio ma Fileto, sa la “faaliliu ese ai nisi tagata i le faatuatua,” ma aʻoaʻo e faapea ‘ua mavae lava le toetū.’ (2 Timoteo 2:17, 18) E foliga mai sa la manatu, e na o le pau lava le toetū, o le toetū faaleagaga ma ua mavae mo Kerisiano. Atonu na latou faia lea faamatalaga e aunoa ma le iloiloina o le manatu autū o le faamatalaga a Paulo e faapea, ua oti Kerisiano i a latou lava agasala ae ua faaolaina e ala i le agaga o le Atua. (Efeso 2:1-6) Na lapataʻi atu Paulo e faapea, o le a faateteleina nei taaʻiga faaaposetate. Na ia tusia e faapea: “Aua e oo i ona pō latou te lē mafafai ai ona talia o le aʻoaʻoga e ola ai, . . . latou te liliu ese foʻi o latou taliga i le upu  moni, a e liliu atu i tala o le vavau.”(2 Timoteo 4:3, 4) O le avatua o le lapataʻiga a Paulo a o mamao le taimi, na faaalia ai sa manaʻomia ona utagia vave e Timoteo lenā fautuaga.

Le Tāua o le Tusi i Aso Nei

Mai lava i le amataga, ua tatou iloa ai na tusia e Paulo le Lua Timoteo mo nisi o māfuaaga nei: (1) Sa ia iloa ua latalata mai lona iʻuga, ma sa ia manaʻo ina ia saunia Timoteo mo le taimi o le a lē toe iai o ia e fesoasoani atu ai iā Timoteo. (2) Sa naunau o ia e faaauupegaina Timoteo ina ia puipuia le faapotopotoga lea na te vaavaaia mai taaʻiga faaaposetasi ma isi mea e lamatia ai. (3) Sa manaʻo o ia e faalaeiau Timoteo ina ia pisi pea i le auaunaga a Ieova, ma ia faalagolago i le poto saʻo o le Tusi Paia faagaeeina e tetee atu ai i aʻoaʻoga sesē.

O le malamalama i lenei talaaga, ua matuā uigā ai iā i tatou le tusi o le Lua Timoteo. I aso nei, e iai foʻi aposetate e pei o Umenio ma Fileto o ē o loo aʻoaʻo mai o latou lava manatu ma ua mananaʻo e faaleagaina ai lo tatou faatuatua. E lē gata i lea, ua oo mai “aso faigatā” ia na valoia e Paulo. E toʻatele ua latou iloa le moni o le lapataʻiga a Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:1, 12) E mafai la faapefea ona tatou tutumau? I le pei o Timoteo, e manaʻomia ona tatou utagia fautuaga a i latou ua tele tausaga o auauna iā Ieova. O au lava suʻesuʻega, tatalo, ma aufaatasiga faa-Kerisiano, e mafai ai ona tatou “maua pea le malosi” e ala i le alofa tunoa o Ieova. E lē gata i lea, o le mautinoa o le mana o le poto saʻo, e tatou te utagia ai apoapoaʻiga a Paulo e faapea: “Ia taofi i matua o upu e ola ai.”—2 Timoteo 1:13, NW.

“Le Matua o Upu e Ola Ai”

O ā “upu e ola ai” ia na talanoa i ai Paulo? Ua ia faaaogāina lenā faaupuga e faasino atu ai i aʻoaʻoga moni faa-Kerisiano. I lana tusi muamua iā Timoteo, na faamatala atu ai e Paulo e faapea, “o upu e ola ai” o le mea moni, o “upu e ola ai a lo tatou Alii o Iesu Keriso.” (1 Timoteo 6:3) O le faataʻitaʻi i matua o upu e ola ai, e iʻu ai i le mauaina o se mafaufau lelei, se uiga alofa, ma le manatunatu mo isi. Talu ai o loo ōgatasi le faiva ma aʻoaʻoga a Iesu ma isi aʻoaʻoga uma i le Tusi Paia atoa, e mafai la ona faasino atu faalauaʻitele le faaupuga, o “upu e ola ai” i aʻoaʻoga a le Tusi Paia.

Mo Timoteo ma isi toeaina Kerisiano uma, sa tatau ona leoleoina ia matua o upu e ola ai, o se ‘mea lelei’ ua tuuina atu latou te tausia. (2 Timoteo 1:13, 14) Sa tatau iā Timoteo ona “talaʻi atu le upu, ia e faamalosi i ona aso e taugalemu ai, ma ona aso e lē taugalemu ai, ia e faatonu atu, ia e aʻoaʻi atu, ia e apoapoaʻi atu ma le onosai uma atoa ma le aʻoaʻo atu.” (2 Timoteo 4:2) Pe afai ua tatou iloa sa salalau atu aʻoaʻoga faaaposetate i aso o Timoteo, ua tatou iloa la le māfuaaga na faamamafa mai ai e Paulo ina ia faanatinati ona aʻoaʻo atu upu e ola ai. Ua tatou malamalama foʻi sa tatau ona puipuia e Timoteo le lafu mamoe e ala i le ‘faatonu atu, aʻoaʻi atu, apoapoaʻi atu’ ma le onosai uma, i le faatinoina o le tomai e aʻoaʻo atu ai.

O ai sa tatau ona talaʻi atu i ai e Timoteo le upu? Ua faaalia i le manatu autū e faapea, e tatau iā Timoteo o se toeaina ona talaʻi atu le upu i le faapotopotoga Kerisiano. I le vaai atu i omiga ua faapogaia e tagata tetee, sa tatau iā Timoteo ona tausia lona paleni faaleagaga ma folafola atu ma le faamalosi le afioga a le Atua, ae lē o filosofia a tagata, po o ona lava manatu, ma mafaufauga lē aogā. E moni, e ono aumaia  ai i lenei mea ni teteega mai nisi o ē atonu o iai ni faanaunauga sesē. (2 Timoteo 1:6-8; 2:1-3, 23-26; 3:14, 15) Ae peitaʻi, o le mulimuli i le fautuaga a Paulo, o le a avea ai pea Timoteo ma papupuni i faiga faaaposetasi, e pei lava foʻi o Paulo.—Galuega 20:25-32.

Pe e faatatau foʻi upu a Paulo i le talaʻi atu o le upu i fafo atu o le faapotopotoga? Ioe, o le mea lenā e pei ona faaalia i manatu autū. Ua faapea atili mai Paulo: “A o oe, ia e faautauta i mea uma lava, ia e onosai i mea e tigā ai, ia e fai le galuega a lē folafola le tala lelei, ia e matuā faaiʻuina lau faiva.” (2 Timoteo 4:5) O le faaevagelia, o le talaʻia lea o le tala lelei o le faaolataga i tagata lē talitonu, o le autū lenā o le faiva faa-Kerisiano. (Mataio 24:14; 28:19, 20) Ma e pei lava ona talaʻia le afioga a le Atua i faapotopotoga e oo lava i “aso e lē taugalemu ai,” o lea, tatou te maumauaʻi ai e talaʻi atu le upu iā i latou i fafo atu o le faapotopotoga e oo lava i taimi o tulaga faigatā.—1 Tesalonia 1:6.

O le faavae o la tatou talaʻiga ma le aʻoaʻo atu, o le Afioga faagaeeina a le Atua. Ua tatou matuā mautinoa atoatoa i le Tusi Paia. Na taʻu atu e Paulo iā Timoteo: “O tusi paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu.” (2 Timoteo 3:16) E masani lava ona sii saʻo mai na upu e faailoa ai o le Tusi Paia o le Afioga faagaeeina a le Atua. Ae o le ā le fuafuaga na ala ai ona tusia e Paulo?

Sa talanoa atu Paulo i se toeaina, o sē na iai le tiute tauave e aʻoaʻi ai, ma faasaʻo ai mea, ma faapoto ai i le amiotonu,’ i totonu o le faapotopotoga. Talu ai, sa ia faamanatu atu iā Timoteo ina ia faalagolago i le atamai o le Afioga faagaeeina, lea foʻi na aʻoaʻoina ai o ia a o tamameamea. E ao i toeaina e pei o Timoteo ona aʻoaʻi atu i ē fai mea sesē i nisi taimi. Pe a faia faapea, e tatau ona iā i latou le mautinoa atoatoa i le Tusi Paia. E lē gata i lea, talu ai ua faagaeeina e le Atua le Tusi Paia, o aʻoaʻiga uma lava la e faavae mai i na tusi, o aʻoaʻiga moni mai le Atua. So o se tasi la na te teena aʻoaʻiga e faavae mai le Tusi Paia, ua latou teena, e lē o ni manatu o tagata, ae o fautuaga faagaeeina e sau mai iā Ieova lava ia.

Maʻeu le anoanoaʻi o le atamai o le Atua o loo i le tusi o le Lua Timoteo! Maʻeu la le aogā pe a tatou iloiloina fautuaga o loo aumaia i manatu autū! I lenei mataupu, ua na ona tatou aoteleina puupuu ai ia faamatalaga matagofie faagaeeina o loo i ai i lenei tusi, ae ua lava ma totoe lenei faamaoniga e iloa ai e faapea, maʻeu le aogā o le iloiloina o manatu autū o mea o loo tatou faitau ai i le Tusi Paia. O le a fesoasoani lenā mea e faamautinoa ai e moni, o loo tatou “talaʻitonuina le upu moni.”

[Faamatalaga pito i lalo]

[Ata i le itulau 27]

Sa naunau lava Paulo ina ia faaauupegaina Timoteo e puipuia faapotopotoga

[Ata i le itulau 30]

Sa faamanatu atu e Paulo iā Timoteo ina ia faatuatua i le atamai o le Afioga faagaeeina