‘O le Tagata Amio Lelei e Alofa Iai le Atua’

O IEOVA le Atua o ia o le puna o le ola uma. (Salamo 36:9) Ioe, “o ia o loo ola ai i tatou, ma gaoioi ai.” (Galuega 17:28) Pe lē atili ai ea ona tatou mauaina le loto talisapaia pe a tatou mafaufau i faamanuiaga na ia aumaia iā i latou o ē e iai se faiā vavalalata ma ia? Auā, “o le ola e faavavau, o le mea foaʻifuaina mai lea e le Atua.” (Roma 6:23) Maʻeu le tāua o lo tatou sailia o le faamaoniga a Ieova!

Na faamautinoa mai e le faisalamo iā i tatou e faapea, ‘e foaʻiina mai e Ieova le alofa tunoa.’ (Salamo 84:11) O ai na te foaʻiina atu i ai? I aso nei e masani ona faaalia e tagata le alofa i isi e faavae i tulaga tau aʻoaʻoga, tamaoaiga, lanu, ituaiga, ma isi mea faapena. O ai e alofa i ai le Atua? Ua tali mai le tupu o Solomona e faapea: “O le tagata amio lelei, e maua e ia le alofa mai iā Ieova; a o le tagata ua fai togafiti leaga, e faasalaina lea.”—Faataoto 12:2.

E manino lava, e fiafia le finagalo o Ieova i le tagata amio lelei ma amiotonu. O uiga o le tagata amio lelei e aofia ai le pulea o ia lava, le lē faailoga tagata, lotomaulalo, tigā alofa ma le faautauta. O ona mafaufauga e māmā, o ana upu e faalaeiau, ma ana gaioioiga e tonu ma aogā. O le vaega muamua o le mataupu e 12 o le tusi o Faataoto, o loo faaalia ai pe faapefea e le amiolelei ona aafia ai o tatou olaga i aso taʻitasi, ma o loo faasino atu i aogā tatou te maua e ala i le faaalia o lea uiga. Mātau, o loo taʻua o le a aumaia iā i tatou le “faautauta ma le amio lelei.” (Salamo 36:3) O le faatatauina o ana fautuaga atamai o le a fesoasoani ai iā i tatou e mauaina le faamaoniga a Ieova.

E Tāua Aʻoaʻiga

Ua faapea mai Solomona: “O lē ua fiafia ina aʻoaʻoina, ua fiafia o ia i le poto; a o lē ʻinoʻino i le aʻoaʻiga, o le vale lea.” (Faataoto 12:1) O le tagata e naunau e faia ni faaleleiga totino, o ia lenā o loo fiafia i aʻoaʻiga. E vave lava ona ia faatatauina fautuaga na te maua mai i sauniga faa-Kerisiano po o talanoaga ma isi. O mau o loo maua i le Tusi Paia ma lomiga e faavae mai ai, ua pei o ni tui e taʻitaʻia ai o ia e mulimuli i se ala saʻo. Na te saʻili atu i le poto ma faaaogā e faasaʻo ai ona ala. Ioe, o lē fiafia i le aʻoaʻiga e fiafia foʻi o ia i le poto.

Maʻeu le tāua o aʻoaʻiga i tagata tapuaʻi moni— aemaise lava le puleaina o i latou lava! Atonu tatou te moomoo ina ia faateleina lo tatou poto i le Afioga a le Atua. Atonu tatou te faanaunau ina ia sili atu ona uigā la tatou faiva faa-Kerisiano ma avea o ni faiaʻoga lelei. (Mataio 24:14; 28:19,20) Peitaʻi, e manaʻomia le puleaina o oe lava ina ia mafai ai ona faataunuu na faanaunauga. E manaʻomia foʻi le puleaina o oe lava i isi vala o le olaga. Mo se faataʻitaʻiga, ua taatele i aso nei faiga ua faagaee ai tuʻinanauga lē tatau. Pe e lē avea ai ea la le puleaina o oe lava e taofia ai ou fofoga mai le taulaʻi atu i vaaiga lē talafeagai? Aemaise foʻi, talu ai le “leaga o manatu o loto o tagata e afua mai ina o tama iti,” ma o mafaufauga lē mamā e faapogaia mai i manatunatuga lililo o le  mafaufau. (Kenese 8:21) E manaʻomia ai la le pulea o oe lava ina ia lē mafai ai ona iā i tatou na mafaufauga.

O lē inoino i faasaʻoga, i se isi itu, e lē fiafia i le aʻoaʻiga po o le poto. O le lolo atu i faanaunauga agasala o le tetee i aʻoaʻiga, ua tusa ai se tasi ma se manu feʻai e lē iloa le saʻo ma le sesē tau amio. E tatau ona tatou matuā teena na faanaunauga leaga.

‘O Aa e Lē Mafai Ona Liaiina’

O le tagata amio lelei, e lē mafai ona amiolētonu. E manaʻomia foʻi la le amiotonu mo le mauaina o le faamaoniga a Ieova. Na pese le tupu o Tavita e faapea: “O oe, Ieova e, e te faamanuia i lē ua amiotonu, e puipuia o ia e oe i le alofa, e pei o le tali pupuni.” (Salamo 5:12) Na taʻua e Solomona le eseesega o lē amiotonu ma lē amioleaga e faapea: “E lē faatumauina le tagata i le amio leaga; a o le pogai o ē amiotonu, e lē faagaeetia lea.”—Faataoto 12:3.

Atonu e foliga mai e taulau manuia ē amioleaga. Mātau le mea na tupu i le faisalamo o Asafo. Ua ia faapea mai: “A o aʻu nei, e toe ina papeva oʻu vae, e toetoe lava ina see oʻu vae.” Aiseā? Na tali Asafo: “Na ou matauʻa i ē vālea; na ou vaai i le manuia o ē ua amio leaga.” (Salamo 73:2, 3) A o faaauau ona ia alu i le malumalu o le Atua, na ia iloa ai na tuuina i latou e Ieova i mea maseesee. (Salamo 73:17,18) O so o se manuia lava e foliga mai e ausia e ē amioleaga e mo na o sina taimi. Aiseā la tatou te matauʻa ai fua iā i latou?

O le eseesega, e tumau le tagata e alofagia e Ieova. I le faaaogāina o aa malolosi o se laau e faia ai se tala faatusa, na faapea mai Solomona: “O tagata amio lelei e lē mafai ona liaiina o latou aa.” (Faataoto 12:3, The New English Bible) O aa e lē iloa atu o se laau telē lava, e pei o le sequoia i Kalifonia, e mafai ona ufitia ai se vaega eleele e sili atu i le 1.5 eka, ma e mafai ona taofiofia ai e pei o se taula malosi pe a oo mai lologa ma matagi malolosi. E mafai foʻi e se sequoia ona tatali se mafuiʻe sili ona malosi.

E pei o na aa i se eleele lelei, e manaʻomia ona tatou matuā suʻesuʻe loloto i le Afioga a le Atua ma utufia mai ai le vai o le ola. O le a mausali ma malosi ai lo tatou faatuatua, e mautinoa ma tumau ai lo tatou faamoemoe. (Eperu 6:19) O le a lē ‘feaveaʻiina ai tatou e matagi uma o mataupu pepelo.’ (Efeso 4:14) O le mea moni, o le a tatou tofo i aafiaga o tofotofoga ogaoga ma atonu tatou te matataʻu ai i taimi tatou te faafesagaʻi ai ma faigatā. Ae peitaʻi, o lo tatou ‘pogai o le a lē faagaeetia lea.’

“O le Avā Amio Lelei o le Pale Lea i Lana Tane”

E toʻatele tagata e iloa, “e taulau manuia se tamāloa ona o le lagolagosua a se fafine amio lelei.” I le faasino atu i le tāua o se fafine e lagolagosua, na faapea mai Solomona: “O le avā amio lelei, o le pale lea i lana tane; a o lē faamā, e tusa o ia ma le mea e pala ai ona ivi.” (Faataoto 12:4) O le faaupuga “amio lelei” ua taaofaʻi uma ai vala o le agalelei. O uiga o le avā amio lelei, e pei ona faamatala auiliili mai i le Faataoto mataupu e 31, e aofia ai le toʻaga, faamaoni, ma le atamai. O se avā e maua ai uiga ia o se pale lea i lana tane, auā o lana amio lelei e faaaloalogia ai lana tane i le vaaiga a isi. E lē gaoioi o ia ma le fiasili pe faatavā i le tane ina ia faatāua ai o ia. Na i lo lea, e galue soosootauau o ia o se fesoasoani i lana tane.

E ono faia faapefea e se fafine se gaioioiga matagā, ma o ā ni iʻuga? O nei amioga matagā atonu e amata mai i le faamisa e oo atu lava i le mulilua. (Faataoto 7:10-23; 19:13) O na gaioioiga a le avā e taʻuvalea ai lana tane. E tusa o ia ma le “mea e pala ai ona ivi” i se uiga faapea e pei ona taʻua e se tasi tusi “ua ia faaleagaina o ia, e pei o se faamaʻi ua faavaivaia ai le tino.” Ua taʻua foʻi i se tasi tusi e faapea: “O se faamatalaga fetaui faaonapōnei atonu o ‘se kanesa’—o nisi faamaʻi ua matuā faavaivaia ai le malosi o se tasi.” E faamoemoe o loo faia taumafaiga a avā Kerisiano ina ia maua le  faamaoniga a le Atua, e ala i le faaatagia mai o uiga o se avā amio lelei.

Mai i Mafaufauga i Gaioioiga i Aafiaga

O mafaufauga e taʻitaʻia atu i gaioioiga, ma o gaioioiga e iʻu i aafiaga. Na toe faaali mai e Solomona le faagasologa mai o mafaufauga i gaioioiga, i le faatusatusaina o le tagata amiotonu ma le amio leaga. Na ia taʻua: “O mafaufauga a ē amiotonu, ua tonu ia; o pulega a ē amio leaga, ua pepelo ia. O upu a ē amio leaga e lamalama i le toto; a o gutu o ē ua sao a latou amio, e laveaʻiina ai i latou.”—Faataoto 12:5, 6.

E oo lava i mafaufauga o tagata amio lelei e mamā ma e taʻitaʻiina atu ai i le mea saʻo ma le amiotonu. Talu ai e uunaia ē amiotonu e le alofa mo le Atua ma o latou uso a tagata, o o latou faanaunauga la e lelei. I le isi itu, o le tagata amioleaga e uunaia e le manatu faapito. O le iʻuga, o a latou fuafuaga—o le auala e faataunuuina ai mea—e tau faasesē. O a latou gaioioiga e tau faaʻoleʻole. Latou te faavave ona faia ni togafiti leaga e maileia ai ē e lē sala, atonu i faamasinoga, e ala i ni moliaga pepelo. O a latou upu e “lamalama i le toto” talu ai latou te mananaʻo e faaleagaina ē e lē sala. O ē amio lelei, latou te iloa auala o faufauga leaga a ē amioleaga ma e manaʻomia le atamai ina ia mataala ma ʻalofia ai nei tulaga faigatā. Atonu e mafai foʻi ona latou lapataʻia ē e lē o mataala ma laveaʻiina i latou mai faufauga tau faaʻoleʻole a ē amioleaga.

O le ā o le a tupu i le tagata amiotonu ma le tagata amio leaga? Ua tali mai Solomona e faapea: “Ua faaumatia ē amio leaga, ua leai lava i latou; a o le fale o ē amiotonu, e tumau lava lea.” (Faataoto 12:7) Ua taʻua e se tasi o tusi, o le fale, “e faasino atu i le fale ma mea uma o iai ma mea tāua uma a le tagata, lea e mafai ona ia soifua ai.” E mafai foʻi ona faatatau atu i le aiga ma ē amiotonu na tupuga mai ai. Po o le ā lava le tulaga, o loo manino le manatu o le faataoto: O le a tumau le tagata amiotonu i lalo o tulaga faigatā.

E Sili Ona Lelei le Tagata Lotomaulalo

Na taʻua e le tupu o Isaraelu le aogā o le faautaga mamao e faapea: “E viia le tagata, e tusa ma lona poto; a o lē ua loto faapiʻopiʻo, e inosia lava o ia.” (Faataoto 12:8) O le tagata faautauta e lē faavave ona ia tautala. E mafaufau muamua a o leʻi tautala atu ma e olioli i se faiā filemu ma isi talu ai o “lona poto” na te filifili ai ma le faaeteete upu e tautala ai. Pe a fesagaʻi ma ni fesili valea pe suʻesuʻevale foʻi, o le tagata e faautauta “e taofia e ia ana upu.” (Faataoto 17:27) E viia lenā tagata ma e faafiafiaina ai le finagalo o Ieova. Maʻeu le eseese o ia mai le tagata e faapiʻopiʻo ona manatu e māfua mai i le “loto faapiʻopiʻo”!

Ioe, e viia le tagata mafaufau, ae peitaʻi ua aʻoaʻo mai e le isi faataoto iā i tatou le tāua o le lotomaulalo. Ua faapea mai: “E lelei lē ua taʻufaatauvaaina, a e fai lona tautua; a e leaga lē na te vivii o ia iā te ia, a e fia ʻai.” (Faataoto 12:9) O loo faapea mai Solomona e lelei le lotomaulalo o se tasi e itiiti ana mea, ae fai lana auauna, na i lo le faaalu uma o mea e manaʻomia i le olaga ona o se taumafaiga ina ia maua se tulaga maualuga. Maʻeu le talafeagai o nei fautuaga mo i tatou—ia ola e tusa ma mea ua tatou maua!

O le Olaga Faifaatoʻaga e Mafai Ona Aʻoaʻoina ai ni Lesona i le Agalelei

I le faaaogāina o le olaga faifaatoʻaga e fai ma talafaatusa, na aʻoaʻo mai ai e Solomona ni lesona se lua o le agalelei. Na ia faapea mai, “Ua faapelepele le tagata amiotonu i lana manu; a o le alofa o ē amio leaga, o le sauāga lea.” (Faataoto 12:10) E tausia ma le agalelei e le tagata amiotonu ana manu. Na te silafia lelei o latou manaʻoga ma e manatu mamafa mo lo latou lelei. Atonu e faapea mai le tagata amio leaga o loo ia manatu mamafa i ana manu, ae peitaʻi e lē o iai ni ona faalogona moni mo o latou manaʻoga. O ona uunaʻiga e manatu faapito, ma o lana tausiga o manu e faavae aʻe i le mauaina mai ai o ni tupe faasili. E manatu lenā tagata o loo ia tausia lelei  manu ae o le mea moni o se matuā tausiga sauā lava.

O taʻiala mo le tausia ma le agalelei o meaola e faatatau atu foʻi i le vaaia o fagafao. Pagā le sauā o lo tatou aveina o meaola ia tausia o ni fagafao ae toe faapogaia le tigā i le lē faia lelei o i latou! Pe afai ua matuā tigāina se meaola i se maʻi po o se manuʻa, o se faiga alofa le faaumaina lea o lona ola.

O le faaaogāina o se isi vala o le olaga faifaatoʻaga —le galueaʻiina o le fanua—na faapea mai Solomona: “O lē galue i lona fanua, e maʻona o ia i mea e ʻai.” O le mea moni, o le galue mamafa e selesele mai ai aogā. “A o lē mulimuli i tagata faatauvaa, ua leai sona mafaufau.” (Faataoto 12:11) O le leai o se filifiliga lelei po o se malamalama, o lē “ua leai sona mafaufau” ua tuliloaina e ia mea lē aogā e pei o le faatuina o se pisinisi ma le manatu e maua mai ai ni tupe ae mulimuli ane gau. O loo manino lesona i fuaiupu ia e lua: Ia alofa mutimutivale ma toʻaga.

E Taulau Manuia le Tagata Amiotonu

Ua faapea mai le tupu poto: “E manaʻo lē amio leaga i mea ua maua e tagata amio leaga.” (Faataoto 12:12a) E faapefea ona faia e le tagata amio leaga lenā mea? Na te faia e ala i le manaʻo i mea ua maua ona o faiga faapiʻopiʻo.

O le ā e mafai ona fai atu e uiga i le tagata amio lelei? E fiafia lenā tagata i aʻoaʻiga ma e tumau ai i le faatuatua. E amiotonu o ia, faautauta ma lotomaulalo, e agaalofa ma filigā. Ma na taʻua e Solomona, “a o le pogai o ē amiotonu e fua mai,” pe taulau manuia. (Faataoto 12:12e) Ua faapea mai le An American Translation: “O aa o le tagata amiotonu o le a tumau e faavavau.” E mausalī ma saogalemu lenā tagata. O le mea moni, ‘o le tagata amio lelei e alofa i ai le Atua.’ O lea la, seʻi o tatou ‘faatuatua iā Ieova, ma faia le amio lelei.’—Salamo 37:3.

[Ata i le itulau 31]

E pei o se laau e ola lauusiusi, e faapena le mausalī o le faatuatua o le tagata amiotonu