Pe e Lava le Tau Ina Faamaoni?

PE E manaʻomia moni lava le faamaoni i o tatou olaga i aso taʻitasi? O le faamaoni, o lona uiga o le “saʻoloto mai le pepelo.” E mautinoa, o lenei uiga e aogā mo le faamalosia o faiā lelei ma isi. Na timaʻi le aposetolo o Paulo e faapea: “Ia outou faalogo i mea uma i o outou matai i la le tino, aua neʻi faatagā auauna, faapei o ē faafiafia i tagata, a ia faia ma le loto faamaoni, o loo matataʻu i le Atua.” (Kolose 3:22) O ai se o le a lē fiafia e avea lenā tagata faamaoni e faigaluega mo ia? I aso nei, atonu e sili atu ona telē le avanoa mo tagata faamaoni latou te maua ma tumau ai i a latou galuega.

O le māfuaaga e matuā manaʻomia tele ai le faamaoni, ona e aafia ai la tatou faiā ma le Atua. Sa olioli tagata Isaraelu i faamanuiaga a le Atua ona o lo latou tausia ma le faamaoni o tulafono ma tausamiga. A o talanoaina le tulaga mamā o le faapotopotoga, na timaʻi ai Paulo i Kerisiano e faapea: “Aua tatou te faia le tausamiga ma le mea faafefete tuai, o le loto leaga ma le amio leaga; a ia faia ma le mea e lē faafefeteina, o le loto lelei ma le faamaoni.” (1 Korinito 5:8) Ina ia taliaina la tatou tapuaʻiga e le Atua, e lē gata ina aogā le faamaoni ae e tāua foʻi. O lea la, ia mātau e lē lava le tau ina faamaoni. E tatau ona ō lua ma le upu moni.

Atonu na matuā talitonu ma le faamaoni i latou na fausiaina le Titanic, faatasi ai ma le pasese e faapea o le a lē mafai ona goto lenei vaa telē laʻu pasese. Ae ui lava i lea, i lana uluaʻi malaga i le 1912, na taia ai i se poloka aisa ma maliliu ai tagata e 1,517. E mautinoa sa matuā talitonu ma le faamaoni tagata Iutaia i le uluaʻi senituri i le auala o loo latou tapuaʻi ai i le Atua, peitaʻi o lo latou maelega sa “lē tusa ma le poto saʻo.” (Roma 10:2, NW) Ina ia taliaina i tatou e le Atua, e tatau ona faavae aʻe a tatou talitonuga moni i faamatalaga saʻo. O le a fiafia Molimau a Ieova i lou vaipanoa e fesoasoani iā te oe, e iloiloina po o le ā e aofia ai i le auauna iā Ieova i le faamaoni ma le upu moni.