Aiseā e Faamanatu ai le Talisuaga Afiafi a le Alii?

“Na ou maua mai le Alii le mea na ou tuuina atu foʻi iā te outou.”—1 KORINITO 11:23.

1, 2. O le ā le mea na faia e Iesu i le pō o le Paseka o le 33 T.A.?

SA I INĀ le Alo pele e toʻatasi o Ieova. Na iai foʻi ma tane e toʻa 11 na ‘tumau iā te ia i ona tofotofoga.’ (Luka 22:28) O le afiafi lea o le Aso Tofi, Mati 31, i le 33 T.A., ma e foliga mai na faamatagofieina le lagi i luga aʻe o Ierusalema e le masina atoa i lenā afiafi. Faatoʻā uma lava le faamanatuina o le Paseka e Iesu Keriso ma ona aposetolo. Sa faatonuina le tagata lē faamaoni o Iuta e alu ese, ae sa lē o se taimi lea mo isi e ō ese ai. Aiseā? Talu ai ona ua toeitiiti lava ona faia lea e Iesu se mea e silisili ona tāua. O le ā lenā mea?

² Ona sa iai i inā Mataio o le tusitala o le Evagelia, seʻi tuu atu la iā te ia e faamatala mai. Na ia tusi e faapea: “[Ua] tago Iesu i le areto, ua faafetai, ona tofitofi ai lea, ma avatu i le ʻau soo, ua faapea atu, ‘Inā tago ia, inā aai; o loʻu tino lenei.’ Ua tago foʻi o ia i le ipu, ua faafetai, ona avatu ai lea e ia iā te i latou, ua faapea atu, ‘Inā inu ia outou uma i ai; auā o loʻu toto lenei, o le toto o le feagaiga ua faamaligiina mo tagata e toʻatele e faamagalo aʻi agasala.’” (Mataio 26:26-28) Po o lenei ea mea na tupu e na o le faatasi ona fai? O le ā lona uiga? Pe e iai ea se uiga iā i tatou i aso nei?

‘Ia Outou Faia Lenei Mea i Aso Uma’

3. Aiseā na tāua tele ai le mea na faia e Iesu i le pō o Nisani 14, i le 33 T.A.?

³ O le mea na faia e Iesu i le pō o Nisani 14, i le 33 T.A., sa lē o se mea na tupu fua i lona olaga. Sa faamatalaina e le aposetolo o Paulo lenei mea ina ua ia tusi atu i Kerisiano faauuina i Korinito, lea na latou tausisia pea le faatulagaga na faavaeina e Iesu i le silia i le 20 tausaga mulimuli ane ai. E ui lava sa leʻi faatasi Paulo ma Iesu faapea ma aposetolo e toʻa 11 i le 33 T.A., ae mautinoa lava na ia aʻoaʻoina mai i nisi o aposetolo le mea na tupu i lenā pō. E lē gata i lea, e manino mai na mauaina e Paulo faamautinoaga o vala o lenā mea na tupu e ala i faaaliga faagaeeina. Na taʻua e Paulo e faapea: “Na ou maua mai le Alii le mea  na ou tuuina atu foʻi iā te outou, O lea lava pō na faalataina ai le Alii o Iesu, na ia tago ai i le areto; ua ia faafetai, ona tofitofi ai lea, ma fai atu, ‘O loʻu tino lenei mo outou, ia outou faia lenei mea ma faamanatuga iā te aʻu.’ Ua ia faapea foʻi i le ipu ina ua uma ona aai, ua faapea atu, ‘O le ipu lenei o le feagaiga fou lea i loʻu toto; ia outou faia lenei mea ma faamanatuga iā te aʻu i aso uma tou te feinu ai.’”—1 Korinito 11:23-25.

4. Aiseā e tatau ai ona faamanatu e Kerisiano le Talisuaga Afiafi a le Alii?

⁴ Sa faamaonia e Luka o le tusitala o le Evagelia faapea na faatonuina e Iesu: “Tou te faia le mea nei e fai ma faamanatuga iā te aʻu.” (Luka 22:19) O nei upu ua faaliliuina foʻi faapea: “Ia faia lenei mea e manatua ai aʻu.” (Today’s English) O le mea moni, o lenei faamanatuga o loo faasino atu i le Faamanatuga o le maliu o Keriso. Ua taʻua foʻi e Paulo o le Talisuaga Afiafi a le Alii—o se faaupuga e talafeagai lelei, ona na faavaeina lenei Talisuaga i le pō. (1 Korinito 11:20) Ua faatonuina Kerisiano e faamanatu le Talisuaga Afiafi a le Alii. Ae aiseā na faavaeina ai lenei faamanatuga?

Le Māfuaaga na Faavaeina Ai

5, 6. (a) O le ā se tasi o māfuaaga na faavaeina ai e Iesu le Faamanatuga? (e) Aumai le isi māfuaaga na faavaeina ai le Talisuaga Afiafi a le Alii.

⁵ O se tasi o māfuaaga na faavaeina ai le Faamanatuga ona sa aofia ai le fuafuaga na faataunuuina e le maliu o Iesu. Na maliu o ia ina ia faamaonia le tonu o le pule silisili ese a lona Tamā faalelagi. Na faamaonia e Keriso le pepelo o Satani le Tiapolo, lea na ia tuuaʻia ma le sesē tagata faapea e na o le pau le māfuaaga e auauna ai tagata i le Atua ona o lo latou manatu faapito. (Iopu 2:1-5) O le maliu o Iesu ma le faamaoni na faamaonia ai le sesē o lenei tuuaʻiga ma faafiafiaina ai le finagalo o Ieova.—Faataoto 27:11.

⁶ O le isi māfuaaga na faavaeina ai le Talisuaga Afiafi a le Alii ina ia faamanatu mai ai iā i tatou, e ala i lona maliu o se tagata e lelei atoatoa e leai se agasala, na ‘foaʻiina mai ai lona ola e fai ma togiola e sui aʻi tagata e toʻatele.’ (Mataio 20:28) Ina ua agasala le uluaʻi tagata i le Atua, na leiloa ai i inā lona ola lelei atoatoa ma ona faamoemoega uma sa iai. Peitaʻi na fetalai Iesu e faapea: “Auā ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” (Ioane 3:16) O le mea moni, “o le oti, o le totogi lea o le agasala; a o le ola faavavau, o le mea foaʻifuaina mai lea e le Atua, i lo tatou Alii o Keriso Iesu.” (Roma 6:23) O le faamanatuina o le Talisuaga Afiafi a le Alii e faamanatu mai ai iā i tatou, le tele o le alofa na faaalia e Ieova ma lona Alo e fesootaʻi atu i le maliu faataulaga o Iesu. Maʻeu le tatau ona tatou lotofaafetai mo lenā alofa!

O Afea e Tatau Ona Faamanatu Ai?

7. E faapefea ona taumamafa Kerisiano faauuina i le Faamanatuga i “aso uma”?

⁷ E tusa ai ma le Talisuaga Afiafi a le Alii, na taʻua e Paulo e faapea: “O aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seʻia afio mai o ia.” (1 Korinito 11:26) E taumamafa Kerisiano faauuina i le areto ma le uaina o le Faamanatuga seʻia oo i lo latou maliu. O lea, i luma o Ieova le Atua ma le lalolagi, o le a faalauiloa atu ai pea lava pea lo latou faatuatua i sauniuniga a le Atua i le taulaga togiola a Iesu.

8. O le ā le umi o le a faamanatuina ai e le vaega faauuina le Talisuaga Afiafi a le Alii?

⁸ O le ā le umi o le a faamanatuina ai e le vaega o Kerisiano faauuina le maliu o Keriso? “Seʻia afio mai o ia,” o le faamatalaga lea a Paulo, e manino mai o le a faaauau pea nei faamanatuga seʻia oo i le afio mai o Iesu e aveina aʻe ona soo faauuina i le lagi e ala i le toetū i le taimi o lona “faatasi mai. ” (NW) (1 Tesalonia 4:14-17) Ua ōgatasi lea ma fetalaiga a Iesu i aposetolo faamaoni e toʻa 11 e faapea: “Afai foʻi ou te alu ma sauni se mea e nonofo ai outou, ou te toe sau, ou te talia foʻi outou ia faatasi ma aʻu; ina ia i ai outou i le mea ou te i ai aʻu.”—Ioane 14:3.

9. O le ā le uiga o fetalaiga a Iesu o loo faamauina i le Mareko 14:25?

⁹ Ina ua faavaeina e Iesu le Faamanatuga, na ia faasino atu i le ipu uaina ma faapea atu i ona aposetolo faamaoni: “Ou te lē toe inu lava i le  fua o le vine, seʻia oo i lea lava aso ou te inu ai le uaina fou i le malo o le Atua.” (Mareko 14:25) Ona o le a lē toe taumafaina e Iesu le uaina moni lava i le lagi, e manino mai la sa i lona manatu le olioli lea e faaataina e le uaina i nisi taimi. (Salamo 104:15; Failauga 10:19) O le faatasi ai i le Malo o le a avea ma mea e olioli ai, lea na ia moomoo atu iai ma le naunautaʻi faapea ma ona soo na mulimuli i ona tulagāaao.—Roma 8:23; 2 Korinito 5:2.

10. E faafia ona faamanatuina le Faamanatuga?

¹⁰ Pe tatau ea ona faamanatuina le maliu o Iesu faalemasina, faalevaiaso, po o aso uma? E leai. Na faavaeina e Iesu le Talisuaga Afiafi a le Alii ma fasiotia ai foʻi o ia i le aso o le Paseka lea na fai ma “faamanatuga” mo le laveaʻiina o Isaraelu mai le nofo pologa i Aikupito i le 1513 T.L.M. (Esoto 12:14) Sa faatasi ona faia le Paseka i le tausaga, i le aso 14 o Nisani i le masina faa-Iutaia. (Esoto 12:1-6; Levitiko 23:5) Ua faailoa mai ai i inei o le maliu o Iesu e tatau ona faamanatuina e pei lava o le Paseka—e faatasi i le tausaga—e lē faalemasina, faalevaiaso, po o aso uma.

11, 12. O le ā ua faaalia e talafaasolopito e faatatau i uluaʻi faamanatuina o le Faamanatuga?

¹¹ O lea, e talafeagai ona faamanatuina le Faamanatuga e faatasi i le tausaga iā Nisani 14. Ua faapea mai se tasi o tusi: “Na taʻua Kerisiano i Asia Itiiti i le upu Latina faapea, o le ʻau Kuatatesimane [Ē Faamanatuina le Aso 14] ona o le latou masani o le faamanatuina o le pascha [Talisuaga Afiafi a le Alii] lea e lē mafai lava ona suia le aso 14 o Nisani . . . E mafai ona paʻū lea aso i le Aso Faraile po o se isi lava aso o le vaiaso.”—The New Schaff-Herzog Encyclopedia of Religious Knowledge, Tusi IV, itulau 44.

¹² Na taʻua e le tusitala o talafaasolopito o J. L. von Mosheim e tusa ai ma mea na faia i le senituri lona lua T.A. e faapea, e faamanatuina e le ʻau Kuatatesimane le Faamanatuga iā Nisani 14 ona “sa latou manatu faapea e iai se malosi faaletulafono i le faaaʻoaʻoga a Keriso.” Na taʻua e le isi tusitala o talafaasolopito e faapea: “O tū a lotu Kuatatesimane i Asia sa tutusa ma lotu i Ierusalema. I le senituri lona lua na faamanatuina ai e nei lotu i a latou Pascha i le aso 14 o Nisani, le togiola lea na faavaeina i le maliu o Keriso.”—Studia Patristica, Tusi V, 1962, itulau 8.

Le Uiga o le Areto

13. O le ā le ituaiga o areto na faaaogāina e Iesu ina ua ia faavaeina le Talisuaga Afiafi a le Alii?

¹³ Ina ua faavaeina e Iesu le Faamanatuga na “tago Iesu i le areto, ua faafetai, ona tofitofi lea, ma avatu ai [i aposetolo].” (Mareko 14:22) O le areto na iai i lenā pō o se ituaiga o areto lava e tasi lea na faaaogāina i le Paseka. (Esoto 13:6-10) Ona sa leʻi faafefeteina le areto i le taimi na taoina ai, sa mafolafola ma manutinuti ma sa tatau ona tofitofi mo le tufatufaina atu. Ina ua faateleina faavavega e Iesu le areto mo le faitau afe o tagata, sa mafolafola foʻi ma manutinuti, lea na ia tofitofiina ina ia mafai ona tufatufaina atu. (Mataio 14:19; 15:36) O lea o le tofitofiina o le areto o le Faamanatuga, e manino mai e leai sona uiga faaleagaga.

14. (a) Aiseā e talafeagai ai le lē faafefeteina o le areto o le Faamanatuga? (e) O le ā le ituaiga o areto e mafai ona faatau mai pe taoina e faaaogā i le Talisuaga Afiafi a le Alii?

¹⁴ Na fetalai Iesu e faatatau i le areto na faaaogāina i le taimi na ia faavaeina ai le Faamanatuga e faapea: “O loʻu tino lenei mo outou.” (1 Korinito 11:24; Mareko 14:22) Sa fetaui lelei le lē faafefeteina o le areto. Aiseā? Ona o le fefete e mafai ona fai ma sui o le leaga, amioleaga, po o le agasala. (1 Korinito 5:6-8) O le areto na fai ma sui o le tino lelei atoatoa o Iesu, e leai se agasala, lea na ofoina atu ma le talafeagai e fai ma taulaga togiola. (Eperu 7:26; 10:5-10) E manatua e Molimau a Ieova lenā tulaga ma mulimuli i le faataʻitaʻiga na faataatia e Iesu i le faaaogāina o le areto e lē faafefeteina i le Faamanatuga. I nisi o tulaga, e latou te faaaogāina ai le masi e lē faafefeteina e faaaogā e tagata Iutaia i le taimi o le Paseka, e leai ni mea e faaopoopo i ai pei o aniani po o fuāmoa. A lē o lenā, e mafai ona faia le areto e lē faafefeteina i sina falaoamata enaena (whole-grain) ae (afai e mafai, o le falaoamata e fai mai le saito) e palu faatasi ma sina vai. E tatau ona olo faamanifinifi le potoi falaoamata ma e  mafai ona taoina i se ʻapa e faamaseesee laʻitiiti i sina gaʻo seʻia vela ma manutinuti.

Le Uiga o le Uaina

15. O le ā sa i totonu o le ipu na faaaogā e Keriso ina o ia faavaeina le Faamanatuga o lona maliu?

¹⁵ Ina ua uma ona tufa le areto e lē faafefeteina, ona tago lea o Iesu i le ipu, “ua faafetai, ma avatu ai [i aposetolo], ua latou inu uma i ai.” Na faamatalaina e Iesu e faapea: “O loʻu toto lenei, o le toto o le feagaiga, ua faamaligiina mo tagata e toʻatele.” (Mareko 14:23, 24) O le ā sa i totonu o le ipu? O le uaina ua faaaava, ae lē o le sua o le vine e leʻi faaaavaina. Pe a faasino atu le Tusi Paia i le uaina, e leʻi uiga atu i le sua o le vine e leʻi faaaavaina. Mo se faataʻitaʻiga, na fetalai Iesu, o le uaina ua faaaava, ae lē o le sua o le vine, e mafai ona pāpā ai “fagu paʻu tuai.” Ma na tuuaʻia Keriso e ona fili faapea o ia o “le inu uaina.” O le a leai se uiga o lenā tuuaʻiga pe ana faapea sa na o se sua o le vine. (Mataio 9:17; 11:19) Sa inuina le uaina i le faamanatuina o le Paseka, ma na faaaogāina e Keriso le uaina ina ua ia faavaeina le Faamanatuga o lona maliu.

16, 17. O ā ituaiga o uaina e talafeagai mo le Faamanatuga, ma aiseā?

¹⁶ E na o le uaina mūmū o se faailoga talafeagai e fai ma sui o le mea sa i totonu o le ipu, le toto masaa o Iesu. Na ia fetalai e faapea: “O loʻu toto lenei, o le toto o le feagaiga, ua faamaligiina mo tagata e toʻatele.” Ae na tusi le aposetolo o Peteru e faapea: “Ua outou [Kerisiano faauuina] iloa e leʻi togiolaina outou i mea e pala, o le ario po o le auro, nai la outou amio lē aogā na tuuina mai e o outou tamā; a o le toto tāua o Keriso pei o lo le tamaʻi mamoe e lē pona lava, e leai foʻi sona ila.”—1 Peteru 1:18, 19.

¹⁷ O le uaina mūmū e fai mai i le sua o le vine, e lē taumatea o le ituaiga lea na faaaogā e Iesu ina ua faavaeina le Faamanatuga. Peitaʻi, o nisi o uaina mūmū i aso nei, e lē taliaina ona o loo iai ni mea malosi pei o sipili ua faaopoopo i ai, po o le brandy po o le faaopoopo foʻi iai o ni mea e faamanogi ai. Sa atoatoa ona lelei le toto o Iesu, e lē manaʻomia se isi mea e faaopoopo atu i ai. O lea, o uaina e pei o le port, sherry, ma le vermouth e lē talafeagai foʻi. O le ipu o le Faamanatuga e tatau ona iai le uaina mūmū e leʻi faasuamalieina ma e leʻi suia. E mafai ona faaaogā le uaina e faia lava i le fale, lea e fai i le sua o le vine e lē faasuamalieina, faapea ma uaina e pei o le burgundy ma le claret.

18. Aiseā na leʻi faia ai e Iesu se vavega e aafia ai le areto ma le uaina i le Faamanatuga?

¹⁸ Ina ua faavaeina lea talisuaga, sa leʻi faia e Iesu se vavega e suia ai le areto ma le uaina i lona tino ma lona toto moni. O le taumafaina o le aano ma le inuina o le toto o se tagata (seʻi tulou) o le solia lea o le tulafono a le Atua. (Kenese 9:3, 4; Levitiko 17:10) Sa iai lava le tino atoa o Iesu ma lona toto i lenā pō. Na ofoina atu lona tino e fai ma taulaga lelei atoatoa, ma sa faamaligiina lona toto i le afiafi na sosoo ai i le aso 14 lava o Nisani i le masina faa-Iutaia. O lea, o le areto ma le uaina o le Faamanatuga o se faatusa e fai ma sui o le tino ma le toto o Keriso. *

Le Faamanatuga—E Talisua Faatasi

19. Aiseā e ono sili atu ai i le tasi le ipu uaina ma le ipu mafolafola e faaaogā i le faamanatuga o Talisuaga Afiafi a le Alii?

¹⁹ Ina ua faavaeina e Iesu le Faamanatuga, na ia faapea atu i ona aposetolo faamaoni ia feinu  i le ipu e tasi. Ua faapea mai le Evagelia a Mataio: “Ua tago foʻi [Iesu] i le ipu, ua faafetai, ona avatu ai lea e ia iā te i latou, ua faapea atu, ‘Inā inu ia outou uma i ai.’” (Mataio 26:27) O le faaaogā o “le ipu,” e lē o ni ipu se tele ae tasi lava, sa leai se faafitauli i le faia o lenā tulaga, ona sa na o le toʻa 11 i latou na iai i se laulau e tasi ma e faigofie lava ona pasi atu le ipu e lē tasi i le isi. O le tausaga lenei, e faitau miliona tagata o le a faapotopoto mo le Faamanatuina o le Talisuaga Afiafi a le Alii i le silia i le 94,000 faapotopotoga a Molimau a Ieova i le lalolagi aoao. Ona o le toʻatele o i latou o le a auai mo lenei faamanatuga i lea lava pō, e lē mafai la ona faaaogāina e tagata uma se ipu se tasi. Peitaʻi, o loo tausia i faapotopotoga tetele le manatu autū faapea o le ipu, o loo fai ma sui o le toto o Keriso ma o le faaaogāina o ni nai ipu e mafai ona tufaina atu ai le uaina i le aofia i se taimi talafeagai. I se tulaga foʻi faapena, e mafai ona faaaogā ni nai ipu mafolafola mo le areto. E leai se faamatalaga a le Tusi Paia e faaalia ai faapea e tatau ona faapitoa ni foliga o le ipu uaina. Peitaʻi, o le ipu uaina ma le ipu mafolafola e tatau ona atagia mai ai le mamalu o le sauniga o loo fai. E lelei pe a ʻalofia le faatumu o le ipu uaina i se tulaga e faigofie ai ona masaa pe a pasi atu.

20, 21. Aiseā e tatou te faapea atu ai o le Faamanatuga o se talisuaga e talisua faatasi ai?

²⁰ E ui lava e sili atu i le tasi se ipu mafolafola o le areto ma ipu uaina e ono faaaogā, ae o le Faamanatuga o se talisuaga e talisua faatasi ai. I Isaraelu anamua, e mafai ona saunia e se tagata se talisuaga e talisua faatasi ai e ala i le aumaia o se manu i le malumalu o le Atua, lea e fasia ai. E faamūina se vaega o le manu i le fatafaitaulaga, e avatu se vaega i le faitaulaga ma o le isi vaega e avatu i atalii faitaulaga o Arona, ma e taumamafa faatasi ai ma lē e ana le taulaga ma lona aiga. (Levitiko 3:1-16; 7:28-36) O le Faamanatuga foʻi la, o se talisuaga e talisua faatasi ai ona o loo auai faatasi ai tagata.

²¹ O loo aofia ai Ieova i lenei talisuaga e talisua faatasi ai ona o ia o Lē na Uluaʻi Fuafuaina le faatulagaga. O Iesu o le taulaga, ma o Kerisiano faauuina o loo taumafaina le areto ma le uaina o ni ē e talisua faatasi. O le taumamafa i le laoʻai a Ieova e faaalia ai faapea o loo latou iai i se faiā filemu ma Ieova. E tusa ai ma lenā tulaga, na tusi Paulo e faapea: “O le ipu o le faafetai o tatou o faafetai ai, e lē o le auai faatasi ea lea i le toto o Keriso? O le areto tatou te tofitofi ai, e lē o le auai faatasi ea lea i le tino o Keriso? Ona ua tasi lava le areto, o lea ua tino e tasi ai i tatou, e ui ina toʻatele, auā ua tofusia i tatou uma i le areto e tasi.”—1 Korinito 10:16, 17.

22. O ā fesili e faatatau i le Talisuaga e tatau ona tatou iloiloina?

²² O le Talisuaga Afiafi a le Alii e na o le pau lenā o se faamanatuga faalelotu faaletausaga e faia e Molimau a Ieova. E talafeagai lenei mea ona na faatonuina e Iesu ona soo: “Ia outou faia lenei mea ma faamanatuga iā te aʻu.” I le Faamanatuga, e tatou te faamanatuina ai le maliu o Iesu, le maliu lea na faamaonia ai le tonu o le pule silisili ese a Ieova. E pei ona tatou mātauina, o lenei talisuaga e talisua faatasi ai, o le areto e fai ma sui o le tino faaletagata faataulagaina o Keriso ma o le uaina e fai ma sui o lona toto masaa na faataulagaina. Peitaʻi, e toʻaitiiti lava e taumafaina le areto ma le uaina. Aiseā ua faapea ai? Pe e iai ea se uiga moni o le Faamanatuga mo le faitau miliona o tagata e lē o taumafaina le areto ma le uaina? O lea, o le ā le uiga o le Talisuaga Afiafi a le Alii iā te oe?

[Faamatalaga pito i lalo]

O ā Au Tali?

• Aiseā na faavaeina ai e Iesu le Talisuaga Afiafi a le Alii?

• E faafia ona faamanatuina le Faamanatuga?

• O le ā le uiga o le areto e lē faafefeteina i le Faamanatuga?

• O le ā o loo fai ma sui o le uaina i le Faamanatuga?

[Fesili mo le Suʻesuʻega]

[Ata i le itulau 15]

Na faavaeina e Iesu le Talisuaga Afiafi a le Alii