Talitonu i se Atua Atonu Tatou te Lē Iloa Lelei

E TOʻALUA mai le toʻatolu tagata Siamani e talitonu i le Atua. Ae peitaʻi, ina ua uma ona fesiligia le sili atu i le toʻaafe mo le faamatalaina o se Atua o loo latou talitonu iai, e toeitiiti lava o tagata uma e eseese a latou tali. Na lipotia mai e se mekasini o le FOCUS: “E pei lava ona eseese tagata taʻitoʻatasi o Siamani, e faapena foʻi le eseese o manatu o tagata e uiga i le Atua.” E ui o se uiga lelei lo latou talitonu i le Atua, pe e lē o se mea ea e faanoanoa ai ona o le talitonu iā te ia e aunoa ma le iloaina lelei o ia?

O lenei lē iloaina lelei o le Atua e lē na o Siamani e maua ai; o loo tupu foʻi i isi atunuu o Europa. O se suʻesuʻega sa faia i Oseteria, Peretania ma Holani na iloa ai se manatu taatele faapea o le Atua o se “malosi sili ona maualuga po o se mea lilo e faigatā ona faamatalaina.” Aemaise lava i le ʻautalavou, e oo lava iā i latou e talitonu i le Atua, o ia o sē e lē mailoa.

Pe E te Iloa Lelei le Atua?

E telē le eseesega o le tau ina iloa o se tasi ma le iloa lelei o ia. O le iloa o se tasi—o se tupu e faigatā ona feiloaʻi i ai, o se tagata taʻutaʻua i taaloga ma tifaga—e na ona faamaonia lava e iai se tagata faapena. Peitaʻi, ina ia iloa lelei se tasi e iai sona uiga e sili atu. E aofia ai le masani i ona uiga, lana amio, o ona faalogona, o mea e fiafia ma lē fiafia i ai, o ana fuafuaga mo le lumanaʻi. O le iloa lelei o se tasi e faigofie ai ona maua se faiā vavalalata ma ia.

E faitau selau afe tagata taʻitoʻatasi ua manatu faapea e lē lava tau o sina iloa e uiga i le Atua, pe na ona faapea foʻi o loo soifua o ia. Ua latou faia nisi mea e sili atu i le fia iloaina atili o ia. Pe na latou iloa le aogā o a latou taumafaiga? O se tamāloa e suafa iā Paulo, sa nofo i le itu i mātū o Siamani ma sa iā te ia le manatu taatele e uiga i le Atua, ae na manatu o ia e fia malamalama lelei e uiga iā te Ia. Na faamatala mai e Paulo: “Ina ia iloaina lelei e se tasi le Atua e faaaluina ai se taimi ma ni taumafaiga, ma e sili atu le tele o aogā e maua mai ai. E sili atu ai le uigā o le olaga pe a iai se faiā vavalalata ma Lē na Foafoaina Mea.”

Pe e alu aogā le taimi ma taumafaiga lea e manaʻomia ina ia iloa atili le Atua? Faamolemole faitau le mataupu e sosoo mai ai.

[Faamatalaga faaopoopo i le itulau 3]

E telē le eseesega o le tau ina iloa o se tasi ma le iloa lelei o ia