“Po o Ai ua Fanaua le Suāsau?”

NA FAAMATALAINA e se tusitala o se mekasini i le lona 19 o senituri le suāsau e faapea “o se maatāua faasuavai i le lalolagi, na faia aʻe i le ʻea.” Na fesili atu Lē na Faia i tatou i le tamā matua anamua o Iopu: “Po o ai ua fanaua le suāsau?” (Iopu 38:28) Na faamanatu e le Atua iā Iopu le amataga tauatua o le suāsau tāua.

E lē gata i lona feilafi mai, a o lona matagofie e pei o se maatāua, lea ua faatusaina ai e le Tusi Paia le suāsau i le faamanuiaga, fanau tama, le anoanoaʻi, ma le faasaoina o le ola. (Kenese 27:28; Teuteronome 33:13, 28; Sakaria 8:12) I le taimi o le tau vevela ma le leai o ni uaga i Isaraelu, “o le sau mai Heremoni” sa faasaoina ai laau iti o le laueleele, faapea foʻi ma ona tagata. O le vaomatua o le Mauga o Heremoni ma ona tumutumu mauga e ufitia i le kiona na maua ai pea le āusa i le pō na faia aʻe ai le anoanoaʻi o suāsau. Na faatusaina e le faisalamo o Tavita le faafouina na maua mai lenei suāsau i se mea matagofie e oo i ai pe a nonofo faatasi ma le autasi uso tapuai iā Ieova.—Salamo 133:3.

O faatonuga na tuuina atu e le perofeta o Mose iā Isaraelu, sa mālū ma faafouina ai, e pei o ni suāsau. Na faapea mai o ia: “O laʻu tautalaga e totō ifo lea e pei o le sau; e pei o timuga i le vao muʻa, e pei o uaga foʻi i le vao iti.” (Teuteronome 32:2) I aso nei, ua folafola atu ai e Molimau a Ieova le tala lelei e maua ai le ola e uiga i le Malo o le Atua i tuluʻiga o le lalolagi. (Mataio 24:14) Ua faalautele atu e le Atua le valaaulia: “ʻInā sau ia; inā fai atu foʻi ia o lē faalogo, Inā sau ia; o lē fia inu, inā sau ia, atoa ma lē manaʻo i ai, inā ave fua ia le vai o le ola.” (Faaaliga 22:17) E faitau miliona tagata mai atunuu uma o loo latou talia lenei ofo o mea e faafouina ai faaleagaga mai le Atua, lea e mafai ona maua ai le ola e faavavau.