Le Aso e Tatau Ona Manatua

O LE aso lea na suia atoatoa ai le lumanaʻi o tagata mo lo latou lelei e faavavau. E leai lava se isi aso i le talafaasolopito na faapea ona aafia ai le lumanaʻi o tagata. O le aso lea na faataunuuina atoatoa ai e Iesu mea uma na ia afio mai ai i le lalolagi e faia. Na tuʻituʻiina i se laau faaoosala, ina o le a tō lana manava, na ia alaga atu: “Ua taunuu.” (Ioane 19:30) O le ā le fuafuaga na ia afio mai ai i le lalolagi?

Ua faapea mai le Tusi Paia: “O le Atalii o le tagata e leʻi sau ia ina ia auauna mai tagata iā te ia, a ia auauna atu ia, ma foaʻiina atu lona ola e fai ma togiola e sui aʻi tagata e toʻatele.” (Mataio 20:28) Na foaʻi atu e Iesu lona soifua ina ia mafai ai ona laveaʻiina le fanau a tagata mai le agasala tuufaasolo ma le oti. E moni, “ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola e faavavau.” (Ioane 3:16) Maʻeu le tāua o lea sauniuniga alofa, le taulaga a Iesu!

E iai le isi māfuaaga e tatau ai ona manatua le aso o le maliu o Iesu. O le aso lenā na aʻoaʻo ai e le Alo o le Atua i ona aposetolo ni lesona tāua, e fesoasoani iā i latou ina ia tumau ai i le faamaoni. Maʻeu le pāʻia ai o loto o na aposetolo i ana toe fetalaiga! O ā mea na ia aʻoaʻo atu? E faapefea ona aogā mo i tatou mea na aʻoaʻo ai i latou e Iesu? O le a talanoaina nei fesili i le mataupu lea e sosoo mai.