Uluaʻi Kerisiano ma le Tulafono a Mose

“Ua fai mo tatou taʻitaʻitama le tulafono, na te taʻitaʻiina i tatou iā Keriso.”—KALATIA 3:24.

1, 2. O ā nisi o aogā na maua e tagata Isaraelu ona o le usiusitai i le Tulafono a Mose?

I LE 1513 T.L.M., na tuuina atu ai e Ieova tulafono i tagata Isaraelu. Na ia fetalai atu faapea o le a ia faamanuia iā i latou ma olioli ai i ni olaga faamalieina, pe afai latou te faalogo i lona siʻufofoga.—Esoto 19:5, 6.

² Na taʻua lenā Tulafono, o le Tulafono a Mose po o “le tulafono,” ma e “paia, e tonu, ma ua lelei.” (Roma 7:12) Na faalaeiau e le tulafono le faaalia o uiga lelei e pei o le agalelei, faamaoni, amiolelei ma le alofa i tuaoi. (Esoto 23:4, 5; Levitiko 19:14; Teuteronome 15:13-15; 22:10, 22) Na uunaʻia foʻi e le Tulafono tagata Iutaia ina ia fealofani. (Levitiko 19:18) E lē gata i lea, na faasā ona latou faifaimea faatasi pe faiavā atu foʻi, i tagata o Nuu Ese e leʻi ola i lalo o le Tulafono. (Teuteronome 7:3, 4) Na avea le Tulafono a Mose o se “pa” e faaesea ai tagata Iutaia mai tagata o Nuu Ese, ma o lea na puipuia ai tagata o le Atua mai le faaleagaina i tū ma aga faapaupau.—Efeso 2:14, 15; Ioane 18:28.

3. Talu ai e leai se tasi na mafai ona tausisia atoatoa le Tulafono, o le ā na iʻu i ai?

³ Peitaʻi, e oo lava i tagata Iutaia e sili ona faamaoni, e leʻi mafai ona latou tausisia atoatoa le Tulafono a le Atua. Faamata na tele naʻuā mea na faatalitalia mai e Ieova latou te faia? E leai. O se tasi o māfuaaga na tuuina atu ai le Tulafono iā Isaraelu, “ona o solitulafono.” (Kalatia 3:19) Na faailoa atu e le Tulafono i tagata Iutaia faamaoni lo latou matuā moomia o se Togiola. O le a olioli tagata Iutaia faamaoni pe a afio mai le Togiola. Ua toe o se aga ona faasaʻolotoina lea o  i latou mai āuga leaga o le agasala ma le oti!—Ioane 1:29.

4. O le ā le auala na avea ai le Tulafono ma ‘taʻitaʻitama na te taʻitaʻiina iā Keriso’?

⁴ E leʻi fuafuaina le Tulafono a Mose ina ia tumau pea ona iai. A o tusi atu i uso Kerisiano, na faamatala ai e Paulo le Tulafono faapea o le ‘taʻitaʻitama na te taʻitaʻiina iā Keriso.’ (Kalatia 3:24) I aso anamua, na taʻitaʻiina e le taʻitaʻitama tamaiti i le aʻoga ma toe ō i le fale. Na pau le mea e fai e le taʻitaʻitama, o le taʻitaʻi atu lea o tamaiti i le faiaʻoga peitaʻi, e lē o ia o se faiaʻoga. I se tulaga talitutusa, na fuafuaina le Tulafono a Mose ina ia taʻitaʻiina ai tagata Iutaia e matataʻu i le Atua, iā Keriso. Na folafola atu e Iesu i ona soo faapea, o le a latou faatasi “i aso uma lava, e oo lava i le gataaga o le lalolagi.” (Mataio 28:20) O lea la, ina ua faavaeina le faapotopotoga Kerisiano, na lē toe moomia ai le “taʻitaʻitama,” po o le Tulafono. (Roma 10:4; Kalatia 3:25) Peitaʻi, na faigatā ona talia e isi Kerisiano Iutaia lenei upu moni tāua. O le iʻuga, na faaauau pea ona latou tausiaina nisi vaega o le Tulafono, e oo mai lava i le taimi na toetū ai Iesu. Peitaʻi, na toe fetuutuunaʻi manatu o isi. O lea, na latou faia se faaaʻoaʻoga lelei mo i tatou i aso nei. Seʻi tatou vaai i auala na latou faia ai se faaaʻoaʻoga lelei.

O Malamalamaaga Fou e Mataʻina i Aʻoaʻoga Faa-Kerisiano

5. O ā faatonuga na maua e Peteru i se faaaliga, ma aiseā na faateʻia ai?

⁵ I le 36 T.A., na maua ai e le aposetolo Kerisiano o Peteru se faaaliga mataʻina. Na faatonuina Peteru e se siʻufofoga mai le lagi, ina ia fasimateina manu ma manufelelei e leaga i le Tulafono, ma taumafa i ai. Sa faateʻia Peteru! E leʻi ‘ʻai lava Peteru i se mea e sā, po o se mea e leaga.’ Peitaʻi, na faapea mai le siʻufofoga iā Peteru: “O mea ua faamamāina e le Atua, aua e te taʻua e sā.” (Galuega 10:9-15) Na i lo le usiusitai maumaututū la i le Tulafono, na toe fetuutuunaʻi manatu o Peteru. O lea na maua ai e Peteru se malamalamaaga ofoofogia e faatatau i fuafuaga a le Atua.

6, 7. Aiseā na mafai ona fai ai le faaiʻuga a Peteru faapea, e mafai ona ia talaʻi atu i tagata o Nuu Ese, ma o ā nisi faaiʻuga na ia faia?

⁶ O le mea lenei na tupu. Na ō atu ni tamāloloa se toʻatolu i le fale na iai Peteru ma talosaga atu iā te ia e latou te ō faatasi i le fale o se tamāloa e leʻi peritomeina ma e mataʻu i le Atua, e suafa iā Konelio. Na valaaulia e Peteru tamāloloa i le fale ma talimālō ai iā i latou. Ona o lea ua malamalama Peteru i le uiga o le faaaliga, na ō ai loa ma tamāloloa i le aso na sosoo ai i le fale o Konelio. O inā na molimau māeʻaeʻa atu ai Peteru e uiga iā Iesu Keriso. Na faapea atu Peteru: “E moni, ua ou iloa e lē faailogaina tagata e le Atua; a e peitaʻi o lē mataʻu iā te ia i nuu uma lava, ma fai le amiotonu, ua talia i latou e ia.” Na faatuatua Konelio, o lona ʻauaiga ma ana aumea mamae iā Iesu, ma o lea na “afio ifo le Agaga Paia iā te i latou uma lava o ē ua faalogo i le upu.” Talu ai sa malamalama Peteru o Ieova na māfua ai ona tupu lea tulaga, na ‘fai atu loa ia papatisoina i latou i le suafa o Iesu Keriso.’—Galuega 10:17-48.

⁷ Aiseā na mafai ai ona fai le faaiʻuga a Peteru faapea, e mafai ona avea tagata o Nuu Ese e leʻi ola i lalo o le Tulafono a Mose, ma soo o Iesu Keriso? O le malamalamaaga faaleagaga. Talu ai na faaalia e Ieova lona finagalo malie i tagata o Nuu Ese e leʻi peritomeina, e ala i le liligi ifo o lona agaga iā i latou, na malamalama ai Peteru faapea e mafai ona papatisoina i latou. I le taimi lenā, atonu na iloa ai e Peteru e leʻi faatalitalia e le Atua ina ia tausia e Kerisiano mai Nuu Ese le Tulafono a Mose, ina ia mafai ai ona papatiso. Ana faapea na e soifua i le taimi lenā, faamata e te naunau e fetuutuunaʻi lau vaai e pei o Peteru?

Na Faaauau Pea Ona Mulimuli Isi i le “Taʻitaʻitama”

8. O le ā le manatu e ese mai le manatu o Peteru, sa faaauilumaina e nisi Kerisiano e faatatau i le peritome, ma aiseā?

⁸ Na alu atu Peteru i Ierusalema ina ua tuua le fale o Konelio. Ua logotala le faapotopotoga i inā e faatatau i tagata o Nuu Ese o ē e leʻi  peritomeina faapea ua latou ‘taliaina le afioga a le Atua,’ ma e leʻi fiafia ai isi soo i Iutaia. (Galuega 11:1-3) Na finau mai “le ʻau peritome” faapea, e ui lava e mafai ona avea tagata o Nuu Ese ma soo o Iesu, ae e tatau i tagata e lē o ni Iutaia ona tausi i le Tulafono, ina ia faasaoina ai. Peitaʻi, o i latou na alaala i vaipanoa e toʻatele ai tagata o Nuu Ese ae toʻalaiti Kerisiano Iutaia, latou te leʻi finau faapena e uiga i le peritomeina o tagata. Sa faaauau pea mo le isi 13 tausaga ona iai nei manatu eseese e lua. (1 Korinito 1:10) O se tulaga na matuā tofotofoina ai le faamaoni o uluaʻi Kerisiano—aemaise Kerisiano mai Nuu Ese na alaala i vaipanoa sa iai le toʻatele o tagata Iutaia!

9. Aiseā na tāua ai ona foʻia le mataupu e faatatau i le peritome?

⁹ I le 49 T.A., na oo ai le mataupu lenā i sona ooooga ina ua ō atu Kerisiano mai Ierusalema i le nofoaga o fai ai le talaʻiga a Paulo, i Suria Anetioka. Na latou aʻoaʻo atu faapea e tatau ona peritomeina tagata o Nuu Ese ia na liliu mai i le Faa-Kerisiano, e tusa ai ma le Tulafono. Na matuā aasa a latou fefinauaʻiga ma Paulo ma Panapa! Pe ana lē foʻia le faafitauli, e mautinoa o le a tausuai ai nisi o Kerisiano mai Iutaia ma Nuu Ese. O lea na faia ai se fuafuaga mo Paulo ma isi soo ina ia malaga i Ierusalema, e talosaga atu i le vaega pule o le ʻau Kerisiano, ina ia fai sa latou faaiʻuga mausalī e tusa ai ma lea mataupu.—Galuega 15:1, 2, 24.

Autasia Ina ua Māeʻa Feeseeseaʻiga!

10. O ā vala na iloiloina e le vaega pule a o leʻi faia le faaiʻuga e faatatau i le tulaga o tagata o Nuu Ese?

¹⁰ I se fono na tauaofia ai, na finau ai isi e lagolago le peritomeina o tagata, ae na manatu isi e lē toe moomia ona faia lenā tulaga. Peitaʻi, e leʻi faatagaina o latou faalogona e puleaina la latou fono. Ina ua māeʻa le tele o fefinauaʻiga, na faamatala ai e le aposetolo o Peteru ma Paulo faailoga na faia e Ieova i tagata talitonu e leʻi peritomeina. Na la faamatala atu faapea na liligi ifo e le Atua le agaga paia i luga o tagata o Nuu Ese e leʻi peritomeina. I se isi faaupuga, na la fesili atu faapea, ‘Faamata e saʻo pe a teena e le faapotopotoga Kerisiano ē ua talileleia e le Atua?’ Ona faitauina lea e le soo o Iakopo le mau mai le Tusi Paia e fesoasoani i ē na tauaofia ai, ina ia malamalama i le finagalo o Ieova i lea mataupu.—Galuega 15:4-17.

11. O le ā le vala e leʻi aafia ai le faaiʻuga na fai e faatatau i le peritome, ma o le ā sa faaalia ai na faamanuia e Ieova lea faaiʻuga?

¹¹ Ua uaʻi totoʻa uma atu nei i le vaega pule. Ona o i latou o ni tagata Iutaia, faamata la o le a faaituʻau la latou filifiliga ma lagolago ai le peritomeina o tagata? E leai. Na maumauaʻi nei tane faamaoni ina ia mulimuli i le Tusi Paia ma le taʻitaʻiga a le agaga paia o le Atua. Ina ua māeʻa ona faafofoga atu i faamaoniga tāua uma, na malilie faatasi ai le vaega pule faapea e lē moomia ona peritomeina Kerisiano o Nuu Ese ma tausiaina le Tulafono a Mose. Ina ua  logotala uso i le faaiʻuga na fai, na olioli ai ma faapea ona “faatoʻateleina i lea aso ma lea aso” faapotopotoga. Na faamanuiaina Kerisiano na taliaina lea taʻiala mai le Atua, e ala i le mauaina o se tali mausalī faale-Tusi Paia. (Galuega 15:19-23, 28, 29; 16:1-5) Peitaʻi, o loo iai pea se fesili tāua e leʻi taliina.

Ae Faapefea Kerisiano Iutaia?

12. O le ā le fesili e leʻi taliina?

¹² Na faaali manino mai e le vaega pule, e lē moomia ona peritomeina Kerisiano o Nuu Ese. Peitaʻi, ae faapefea Kerisiano Iutaia? E leʻi faaali maia e le faaiʻuga a le vaega pule se tali maʻoti i lea tulaga.

13. Aiseā e sesē ai le faapea atu e moomia ona tausia le Tulafono a Mose, ina ia faaolaina ai?

¹³ Na faaauau pea e nisi Kerisiano Iutaia o ē ‘maelega i le tulafono,’ ona peritomeina a latou fanau ma tausisi i isi vaega o le Tulafono. (Galuega 21:20) Ae e sili atu mea na fai e isi tagata, ma na latou finau foʻi faapea e moomia ona tausia e Kerisiano Iutaia le Tulafono, ina ia faaolaina ai. Peitaʻi, na matuā sesē lava o latou manatu. O se faaaʻoaʻoga, e mafai faapefea e se taulaga o manu ona faamagaloina agasala a se Kerisiano? Na faalēaogāina e le taulaga a Keriso na taulaga. Ae faapefea le tulafono lea na faasāina ai tagata Iutaia, mai le aumea atu i tagata o Nuu Ese? E faigatā tele ona tausia e Kerisiano faievagelia maelega tapulaa na, a o le taimi e tasi e tatau ona ō atu e aʻoaʻoina tagata o Nuu Ese i mea uma na fetalai i ai Iesu. (Mataio 28:19, 20;  Galuega 1:8; 10:28) * E leai se faamaoniga e iloa ai, na faamalamalama e le vaega pule le mataupu lenā i sa latou fono. E ui i lea, na maua pea e le faapotopotoga le fesoasoani.

14 O ā taʻiala na aumaia e tusi faagaeeina a Paulo e faatatau i le Tulafono?

¹⁴ Na maua le taʻitaʻiga e ala i tusi faaopoopo na tusiaina e le ʻauaposetolo, ae e leʻi ala mai i se tusi a le vaega pule. O se faaaʻoaʻoga, na tusia e le aposetolo o Paulo se feʻau malosi i Kerisiano Iutaia ma Kerisiano o Nuu Ese na alaala i Roma. Na tusi atu Paulo iā i latou faapea o le tagata Iutaia moni ‘o lē ua lē vaaia, o le peritome foʻi, ua i le loto lea o loo la i le agaga.’ (Roma 2:28, 29) Na fai e Paulo se tala faatusa i lana tusi lava lenā, e faamaonia ai e lē o toe i lalo Kerisiano i le Tulafono. Na taʻua e Paulo, e lē mafai e se fafine ona faaipoipo atu i ni tamāloloa se toʻalua i le taimi e tasi. Peitaʻi, e saʻoloto le fafine e toe faaipoipo atu pe afai ua maliu lana tane. Ona faatatauina lea e Paulo lenā tala faatusa e faaalia ai, e lē mafai ona iai Kerisiano faauuina i lalo o le Tulafono a Mose, ae i le taimi e tasi o loo faatasi ma Keriso. E tatau ona ‘oti i latou i le tulafono,’ ina ia mafai ona latou faatasi ai ma Keriso.—Roma 7:1-5.

Na Telegese Ona Malamalama

15, 16. Aiseā e leʻi malamalama ai isi Kerisiano Iutaia e uiga i le Tulafono, ma o le ā ua faaalia ai e tusa ma le manaʻoga ia mataalia pea faaleagaga?

¹⁵ E leʻi mafai e se tasi ona fesiligia māfuaaga na tusiaina e Paulo e uiga i le Tulafono. Aiseā la,  na lē malamalama ai isi Kerisiano Iutaia i na māfuaaga? O se tasi o māfuaaga, auā e leʻi malamalama i mataupu faaleagaga. O se faaaʻoaʻoga, latou te leʻi ave i fale meaʻai aano faaleagaga. (Eperu 5:11-14) Na masani ona lē auai i sauniga. (Eperu 10:23-25) O se isi māfuaaga e leʻi malamalama ai isi, atonu o le tulaga o le Tulafono. Sa faaautū atu le Tulafono i mea e vaaia i mata ma meafaitino, e pei o le malumalu ma le faiva faaositaulaga. Na faigofie la ona talia e se tagata e vaivai faaleagaga le Tulafono, na i lo mataupu silisili loloto faa-Kerisiano lea na faaautū atu i mea e lē vaaia.—2 Korinito 4:18.

¹⁶ Na taʻua e Paulo i lana tusi i le faapotopotoga i Kalatia, se isi māfuaaga na naunau ai i latou na faapea mai o Kerisiano, e tausia pea le Tulafono. Na faapea mai Paulo na mananaʻo tane nei ina ia faaaloalogia i latou o ni sui o le lotu autū. Na i lo le ese mai i isi, na lotomalilie e latou te faia toetoe lava o so o se mea, ina ia talia ai i latou e tagata. Na faanaunau e taʻuleleia i latou e tagata na i lo le taʻuleleia e le Atua.—Kalatia 6:12.

17. O anafea na faatoʻā malamalama lelei ai, e uiga i le vaaiga saʻo i le tausiaina o le Tulafono?

¹⁷ Na saʻo faaiʻuga na faia e Kerisiano malamalama e faatatau i le Tulafono, ona na latou matuā suʻesuʻeina tusitusiga a Paulo ma isi, ia na faagaeeina e le Atua. Peitaʻi ane, na faatoʻā malamalama lelei uma Kerisiano Iutaia ina ua mavae le 70 T.A., i le vaaiga saʻo e faatatau i le Tulafono a Mose. Na tupu lenā tulaga ina ua faatagaina e le Atua le faaumatiaga o Ierusalema, o lona malumalu ma faamaumauga o le faiva faaositaulaga. Ua lē toe mafai la e se tagata ona tausiaina atoatoa vaega uma o le Tulafono.

Le Faatatauga o le Lesona i Aso Nei

18, 19. (a) O ā uiga e tatau ona tatou mauaina ma o ā foʻi uiga e tatau ona tatou ʻalofia, ina ia tumau ai i le malosi faaleagaga? (e) O le ā e mafai ona tatou aʻoaʻoina mai le faaaʻoaʻoga a Paulo e faatatau i le mulimuli atu i le taʻitaʻiga tatou te maua mai i uso agavaa? (Tagaʻi i le pusa i le itulau e 24.)

¹⁸ Atonu ua e taumānatu nei, aemaise lea ua faatoʻā uma ona tatou iloiloina mea na tutupu i aso ua teʻa: ‘Ana faapea na ou iai i lenā taimi, o ā ni oʻu faalogona a o faailoa faasolosolo mai le finagalo o le Atua? Faamata ou te maumaututū i talitonuga ua leva ona iai? Pe ou te onosai seʻi faaali manino mai le malamalamaga saʻo? Afai la e faaali mai, faamata ou te lagolagoina atoatoa lenā malamalamaga saʻo?’

¹⁹ E moni tatou te lē mautinoa pe faapeʻī ni o tatou faalogona, pe ana faapea na tatou iai i na aso. Peitaʻi, e mafai ona tatou fesili ifo iā i tatou lava: ‘O ā ni oʻu faalogona pe a faamanino mai malamalamaaga faale-Tusi Paia, e tauaaoina mai i aso nei? (Mataio 24:45) Pe afai e tauaaoina mai taʻiala faale-Tusi Paia, faamata ou te taumafai e tausisi i vaega laiti uma o le tulafono ma galo ai le agaga moni o le tulafono? (1 Korinito 14:20) Faamata ou te faatali ma le onosai iā Ieova pe a lē iai ni tali i aʻu fesili ua leva ona iai?’ E tāua tele ona tatou faaaogā tatau meaʻai faaleagaga lea ua maua i aso nei, “neʻi teʻa ese i tatou.” (Eperu 2:1) Seʻi o tatou faalogologo lelei a o tauaaoina mai e Ieova taʻiala e ala i lana Afioga, o lona agaga ma lana faalapotopotoga i le lalolagi. O le tatou faia faapea, o le a faamanuia ai i tatou e Ieova i le ola e lē uma lea e fiafia ma faamalieloto.

[Faamatalaga pito i lalo]

E Faapefea Ona E Tali?

• O le ā le auala sa avea ai le Tulafono e pei o se ‘taʻitaʻitama na te taʻitaʻiina iā Keriso’?

• E faapefea ona e faamatalaina le eseesega o faalogona o Peteru ma “le ʻau peritome,” i suiga fou e faatatau i le malamalamaga o le upu moni?

• O le ā ua e aʻoaʻoina e tusa ai ma le auala ua faailoa mai ai e Ieova le upu moni i aso nei?

[Fesili mo le Suʻesuʻega]

[Pusa/Ata i le itulau 24]

Na Talia ma le Lotomaulalo e Paulo se Tofotofoga

Na taunuu Paulo i Ierusalema i le 56 T.A., ina ua māeʻa ma le manuia lana malaga faa-misionare. Na iai se mea na tofotofoina ai Paulo i inā. Ua logotala le faapotopotoga faapea na aʻoaʻo atu Paulo e lē toe moomia le Tulafono. Na popole toeaina neʻi tausuai Kerisiano Iutaia ia faatoʻā liliu mai, i lauga tuusaʻo a Paulo e faatatau i le Tulafono ma atonu o le a manatu ai nei tagata fou faapea e lē faaaloalo Kerisiano i faatulagaga a Ieova. Na iai ni tane e toʻafā i le faapotopotoga na faia sa latou tautōga, atonu o se tautōga o tagata Naseri. Sa tatau ona latou ō atu i le malumalu ina ia faamāeʻa ai mea e moomia e le tautōga.

Na talosaga atu toeaina iā Paulo ina ia ō faatasi ma tamāloloa nei e toʻafā i le malumalu ma totogi mea latou te moomia. Ae na faagaeeina Paulo e tusia ni tusi se lua e faaalia ai e lē moomia ona tausiaina le Tulafono, ina ia faaolaina ai. Peitaʻi, sa manatu mamafa Paulo i lotofuatiaifo o isi. Na ia tusi muamua e faapea: “Ua ou faapei o sē nofo i le tulafono i ē nonofo i le tulafono, ina ia ou maua ni ē nonofo i le tulafono.” (1 Korinito 9:20-23) E maumauaʻi Paulo i taimi uma e tausisia mataupu silisili autū o le Tusi Paia, peitaʻi na ia taliaina le fautuaga a le ʻautoeaina. (Galuega 21:15-26) E leai se mea e sesē ai le faia e Paulo o lenā mea. Sa ōgatusa ma le Tusi Paia le faatulagaga mo tautōga, ma na faaaogāina foʻi le malumalu mo le tapuaʻiga mamā na i lo ifoga tupua. Na faatino e Paulo le fautuaga a le ʻautoeaina ina ia lē tausuai ai se tasi. (1 Korinito 8:13) E mautinoa lava, na moomia ai ona faaalia e Paulo le lotomaulalo ina ia taliaina lenā fautuaga, ma o se manatu lenā e atili ai ona tatou talisapaia uiga o Paulo.

[Ata i le itulau 22, 23]

I le tele o tausaga, na faaauau ai ona eseese manatu o Kerisiano e faatatau i le Tulafono a Mose