Ia Faamāfanafana iā i Latou o Faanoanoa

“Ua faauuina aʻu e Ieova . . . e faamatalaloto [po o le faamāfanafana] i ē faanoanoa uma lava.”—ISAIA 61:1, 2.

1, 2. O ai e tatau ona tatou avatu i ai le faamāfanafanaga, ma aiseā?

O IEOVA, o le Atua o faamāfanafanaga moni uma, ua ia aʻoaʻo i tatou ina ia manatu mamafa pe a oo mala i isi. Ua ia aʻoaʻo i tatou ina ia “faamāfanafana i ē loto iti” ma ia faalaeiau i tagata uma ua faanoanoa. (1 Tesalonia 5:14) E tatou te saunia lenā fesoasoani mo o tatou uso tapuaʻi pe a manaʻomia. E tatou te faaalia foʻi le alofa iā i latou i fafo atu o le faapotopotoga, e oo lava iā i latou e leʻi faaalia lava se alofa iā i tatou i aso ua mavae.—Mataio 5:43-48; Kalatia 6:10.

² Sa faitau ma faatatauina e Iesu Keriso iā te ia lava le feʻau faavaloaga e faapea: “Ua i oʻu luga le Agaga o le Alii o Ieova; auā ua faauuina aʻu e Ieova e talaʻi le tala lelei i ē ua tigāina, ua ia auina mai aʻu e fufusi i ē loto momomo, . . . e faamatalaloto [po o le faamāfanafana] i ē faanoanoa uma lava.” (Isaia 61:1, 2; Luka 4:16-19) Ua loa ona silafia e Kerisiano faauuina i aso nei e faapea, o lea feʻau o loo faatatau iā i latou, ma o loo aufaatasi atu ma le fiafia iā i latou “isi mamoe.”—Ioane 10:16.

3. Pe a fesili tagata, “Aiseā ua faataga ai e le Atua faalavelave?” o le a faapefea ona tatou fesoasoani iā i latou?

³ Pe a aafia tagata i ni mala ma ua oo i le loto nutimomoia, e masani lava ona latou fesili,  “Aiseā ua faataga ai e le Atua nei faalavelave e tutupu?” Ua manino le tali a le Tusi Paia i lenā fesili. Peitaʻi, atonu e umi se taimi mo se tasi e lē o se tagata aʻoga o le Tusi Paia, ona faatoʻā malamalama atoatoa lea i le tali o le fesili. E maua le fesoasoani i lomiga a Molimau a Ieova. * Muamua lava, ua faamaonia le avea ma faamāfanafanaga i nisi tagata le tau lava ina vaai i se mau i le Tusi Paia, e pei o lea e maua i le Isaia 61:1, 2, ona o loo faaalia ai i inā le finagalo o le Atua ia mauaina e tagata le faamāfanafanaga.

4. Na faapefea ona fesoasoani se Molimau i Polani i se teine aʻoga lotomafatia, ma e faapefea i le mea na tupu ona fesoasoani iā te oe e fesoasoani ai i isi?

⁴ E manaʻomia e tagata talavou ma tagata matutua le faamāfanafanaga. Sa fesili se talavou lotomafatia i Polani i se tagata e masani ai mo se fautuaga. I le fesili atu pea i se auala agamalu, na iloa ai e lana uō o se tasi o Molimau a Ieova e faapea, sa tele ni fesili a le teine ma ni mea sa ia lē mautinoa ai: “Aiseā ua tele ai le leaga? Aiseā ua mafatia ai tagata? Aiseā ua mafatia ai loʻu uso lea e pē le isi vaega o lona tino? Aiseā ua maʻi ai loʻu fatu? Ua faapea mai le Lotu, ona ua pau lava o le finagalo o le Atua. Ae afai o le tulaga lenā, o le a ou lē toe talitonu loa iā te ia!” Sa tatalo lē leoa le Molimau iā Ieova ona faapea atu lea: “Ua ou fiafia ona ua e fesili mai iā te aʻu i na mea. O le a ou taumafai e fesoasoani atu iā te oe.” Sa taʻu atu e le uō Molimau e faapea, sa iai mea sa lē mautinoa ai a o laʻitiiti ma sa fesoasoani Molimau a Ieova iā te ia. Sa ia faamatala e faapea: “Na ou aʻoaʻoina e lē o le Atua ua mafatia ai tagata. E alofa o ia iā i latou, e finagalo i mea e sili ona lelei mo i latou, ma e lē o toe mamao ae aumaia loa suiga tetele i luga o le lalolagi. O le a lē toe iai ni maʻi, faafitauli ona o le tino matua, o le a lē toe iai le oti, ma o le a ola e faavavau tagata usiusitai—i inei lava i le lalolagi.” Sa faaali atu e le Molimau i le tamaʻitaʻi talavou le Faaaliga 21:3, 4; Iopu 33:25; Isaia 35:5-7 ma le 65:21-25. Ina ua uma se talanoaga umi lava, ona faapea mai lea o le tamaʻitaʻi ma ona foliga fiafia: “Ua ou iloaina nei le fuafuaga o loʻu olaga. Pe e mafai ona ou toe sau e vaai oe?” Sa faia lana suʻesuʻega faale-Tusi Paia e faalua i le vaiaso.

Ia Faamāfanafana Isi i le Faamāfanafanaga Mai le Atua

5. Pe a tatou faaalia le tigā alofa, o le ā o le a aumaia ai le faamāfanafanaga moni?

⁵ Pe a tatou faamāfanafana atu i isi, e mautinoa lava le talafeagai ona avatu ni upu o le tigā alofa. E tatou te taumafai e faailoa atu i le tagata o loo lotomafatia e ala i upu ma le leo o loo avatu ai, e tatou te manatu mamafa tele i lona tulaga o loo iai. E lē faataunuuina lenā tulaga pe afai e tatou te faaaogāina ni faaupuga e leai ni uiga. Ua taʻu mai e le Tusi Paia iā i tatou e faapea “ia tatou maua le faamoemoe e tupu mai i le onosai, ma le faamāfanafana mai o Tusi.” (Roma 15:4) I le mafaufauina o lenei tulaga, e mafai ona tatou faamatalaina i se taimi talafeagai le uiga o le Malo o le Atua, ma e mafai ona tatou faaalia mai le Tusi Paia le auala o le a foʻia ai e lea Malo faafitauli o loo iai i le taimi nei. Ona tatou fefulifulisaʻi lea o le manatu i le māfuaaga ua avea ai ma faamoemoe maufaatuatuaina. O le faia faapea, e tatou te avatu ai le faamāfanafanaga.

6. O le ā e tatau ona tatou fesoasoani i tagata ina ia latou malamalama i ai, ina ia latou maua ai aogā atoatoa mai le faamāfanafana mai o Tusi?

⁶ Ina ia maua aogā atoatoa mai faamāfanafanaga  o loo tatou ofoina atu, e manaʻomia ona iloa e le tagata le Atua moni, le ituaiga o Atua e iai o ia, ma le maufaatuatuaina o ana folafolaga. Pe a tatou fesoasoani atu i se tagata e leʻi avea ma tagata tapuaʻi a Ieova, e lelei pe a faamatala manatu o loo mulimuli mai. (1) O faamāfanafanaga o loo maua i le Tusi Paia e mai iā Ieova, le Atua moni. (2) O Ieova o le Silisili Ese, o Lē na Foafoaina le lagi ma le lalolagi ma e tumu i le alofa ma le faamaoni. (3) E mafai ona faamalosia i tatou e onosaia ia tulaga, pe afai tatou te faalatalata atu i le Atua e ala i le mauaina o le poto saʻo mai lana Afioga. (4) Ua iai i le Tusi Paia mau e mafai ona fesootaʻi atu i ni tofotofoga patino ua fesagaʻia ma tagata taʻitoʻatasi.

7. (a) O le ā e mafai ona faataunuuina e ala i le faamamafaina faapea o le faamāfanafanaga mai le Atua e ‘tele e ala i le Keriso’ ? (e) E faapefea ona e faamāfanafanaina se tasi ua ia iloa sa leaga lana amio?

⁷ Ua avatu e nisi se faamāfanafanaga faaleagaga iā i latou o loo faanoanoa o loo malamalama i le Tusi Paia, e ala i le faitau i ai o le 2 Korinito 1:3-7. O le faia faapea, ua latou faamamafaina ai le faaupuga, ‘ua faapea foʻi ona tele o le faamāfanafanaina o i matou e ala iā Keriso.’ Ua fesoasoani lenei mau i le tagata e iloa ai faapea o le Tusi Paia o le puna o faamāfanafanaga lea e manaʻomia ona manatunatu atili i ai. E mafai foʻi ona fai ma faavae o nisi talanoaga, pe atonu i nisi avanoa e maua. Afai e lagona e le tagata o ona faafitauli e māfua mai i mea leaga na ia faia, aua tatou te faamasino, ae atonu e tatou te fai atu iā te ia o se faamāfanafanaga le iloa o mea o loo faamauina i le 1 Ioane 2:1, 2 ma le Salamo 103:11-14. O nei auala e tatou te faamāfanafana moni ai lava i isi i le faamāfanafanaga mai le Atua.

Faamāfanafana Ē ua Aafia i Sauāga po o Faigatā Tau Tamaoaiga

8, 9. E faapefea ona avatu ma le talafeagai faamāfanafanaga i tagata ua mafatia i sauāga?

⁸ Ua matuā aafia olaga o le faitau miliona i sauāga—faiga sauā a tagata solitulafono i se oganuu, po o sauāga e aumaia e taua. E faapefea ona tatou faamāfanafanaina i latou?

⁹ E faaeteete Kerisiano moni ia latou lē faia se mea e ala i upu po o gaoioiga e lagolagoina ai se tasi o itu po o le isi i feteenaʻiga a le lalolagi. (Ioane 17:16) Ae e latou te faaaogā ma le talafeagai le Tusi Paia e faaalia ai faapea o tulaga sauā o loo iai nei o le a lē faaauau ai pea. E latou te ono faitauina le Salamo 11:5 e faaalia ai lagona o Ieova e faatatau iā i latou e fiafia i le sauā, po o le Salamo 37:1-4 e faasino i ai faalaeiauga a le Atua e aua neʻi o tatou taui ma sui ae faalagolago i le Atua. O upu i le Salamo 72:12-14 ua faaalia ai le auala o loo lagona ai le Solomona Sili, o Iesu Keriso, lea ua avea nei ma Tupu faalelagi, e faatatau i tagata e lē sala ua mafatia i sauāga.

10. Afai na e soifua i le taimi o taua, e faapefea la ona fesoasoani mau ua siiina mai e faamāfanafanaina ai oe?

¹⁰ O nisi tagata ua soifua aʻe i le taimi o loo faia ai feteenaʻiga a vaega o tagata mo le mauaina o le pule. Ua latou manatu faapea o taua ma ona āuga o se vaega lava o le olaga. E na o le pau lava le faamoemoe e latou te iloa, o le sosola atu lea i se isi atunuu. Ae o le toʻatele lava o i latou e lē taulau i le faia faapea, ma e toʻatele i latou sa taumafai e sosola, na maumau ai o latou ola i a latou taumafaiga. O i latou sa mafai ona ō atu i se isi atunuu na latou iloa faapea, ua na o se faafesuiaʻiga o nisi o faafitauli mo isi faafitauli. E mafai ona faaaogā le Salamo 146:3-6 e fesoasoani ai i na tagata e tuu atu lo latou faamoemoe i se mea e sili atu ona maufaatuatuaina na i lo le ō atu i se isi atunuu e nonofo ai. E mafai foʻi ona fesoasoani le valoaga i le Mataio 24:3, 7, 14 po o le 2 Timoteo 3:1-5 iā i latou ina ia latou malamalama atoatoa ai i le tulaga o mea o loo iai ma le uiga o tulaga o loo latou onosaia, faapea o loo tatou ola i le faaiʻuiʻuga o le faiga tuai o mea. O mau e pei o le Salamo 46:1-3, 8, 9 ma le Isaia 2:2-4 e mafai ona fesoasoani iā i latou e iloa ai o loo iai moni se faamoemoe mo se lumanaʻi filemu.

11. O ā mau o le Tusi Paia na faamāfanafanaina ai se fafine i Aferika i Sisifo, ma aiseā?

¹¹ A o faagasolo se vaitaimi o taua i Aferika i Sisifo, na sola ese ai se fafine mai lona aiga a o pāpā fana o le taua. Na faatumulia lona olaga i le fefe, faanoanoa, ma le loto nutimomoia. Mulimuli ane, a o nonofo le aiga i se isi atunuu, na filifili ai lana tane e susunu le la pepa faaipoipo,  ma tuli ese lana avā o loo maʻitō ma le la tama tama e sefulu tausaga, ina ia avea o ia ma patele. Ina ua faailoa atu i ai le Filipi 4:6, 7 ma le Salamo 55:22 iā te ia, faatasi ai ma mataupu faale-Tusi Paia mai Le Olomatamata ma le Ala Mai!, na ia mauaina ai se faamāfanafanaga ma se fuafuaga o le olaga.

12. (a) O le ā se mapusaga o loo aumaia e le Tusi Paia iā i latou ua oo i tulaga faigatā tau tamaoaiga? (e) Na faapefea ona fesoasoani se Molimau i Asia i se tagata faatau?

¹² O tulaga leaga tau tamaoaiga ua faaleagaina ai olaga o le faitau miliona o tagata. I nisi taimi ua māfua nei tulaga ona o taua ma āuga ua oo mai ai. Ae o isi taimi, o faatulagaga lē atamai a faigāmalo, le matapeʻapeʻa ma le lē faamaoni o i latou o loo i tulaga pule, o na mea ua leiloloa ai tupe teu a tagata ma faamalosia ai i latou e lafoaʻi a latou meatotino. O isi, e lē tele lava se tamaoaiga sa iā i latou. O i latou uma na e mafai ona faamāfanafanaina i le iloa faapea, ua faamautinoa mai e le Atua se mapusaga mo ē faamoemoe iā te ia ma faamautinoa se lalolagi amiotonu o le a olioli ai tagata i galuega a o latou lima. (Salamo 146:6, 7; Isaia 65:17, 21-23; 2 Peteru 3:13) Ina ua faalogo atu se Molimau i se tagata faatau i se tasi atunuu o Asia o faaalia lona popole i le tulaga tau tamaoaiga i inā, na faamatala atu e le Molimau e faapea, o mea o loo tutupu i inā o se vaega lava e tasi o mea o loo tutupu i le lalolagi atoa. Sa la talanoaina le Mataio 24:3-14 ma le Salamo 37:9-11 lea na taʻitaʻia atu ai i le faia o se suʻesuʻega faale-Tusi Paia.

13. (a) Pe a lē fiafia tagata i folafolaga lē saʻo, e faapefea ona tatou faaaogā le Tusi Paia e fesoasoani ai iā i latou? (e) Afai e manatu tagata faapea o tulaga leaga o faamaoniga lenā o le leai o se Atua, e faapefea ona e taumafai e fefulifulisaʻi ma i latou?

¹³ Pe a mafatia tagata mo le tele o tausaga po o le lē fiafia i le tele o folafolaga lē saʻo, e ono pei i latou o tagata Isaraelu i Aikupito o ē “ona o lo latou loto tigā” sa latou leʻi faalogo ai. (Esoto 6:9) I na tulaga, atonu e aogā le faamatilatila o auala e mafai ona fesoasoani ai le Tusi Paia iā i latou e faafetaiaʻia ai ma le manuia faafitauli o loo iai ma ʻalofia faigatā ia sa lē tatau ona faaleagaina ai le olaga o le toʻatele o tagata. (1 Timoteo 4:8) E manatu nisi i tulaga leaga o loo latou ola ai o se faamaoniga o le leai o se Atua, pe e lē o manatu mamafa mai foʻi iā i latou. E mafai ona e fefulifulisaʻi ma i latou i ni mau talafeagai e fesoasoani e iloa ai, ua saunia e le Atua se fesoasoani, peitaʻi e toʻatele latou te lē taliaina.—Isaia 48:17, 18.

Faamāfanafana i Ē Fesagaʻi ma Afā ma Mafuiʻe

14, 15. Ina ua faateʻia le toʻatele i se faalavelave na tupu, na faapefea ona faaalia le manatu mamafa o Molimau a Ieova?

¹⁴ E ono tulaʻi mai puapuaga ona o se afā, se mafuiʻe, se afi, po o se mea ua pasae aʻe. E ono tulaʻi mai ai se tulaga faanoanoa i le toʻatele. O le ā le mea e fai e faamāfanafanaina ai i latou ua faasaoina mai?

¹⁵ E manaʻomia ona iloa e tagata o loo iai se tasi o loo manatu mai. Ina ua uma se osofaʻiga a tagata faatupu faalavelave i se tasi o atunuu, e toʻatele na oo i se tulaga o le matuā faateʻia lava. E toʻatele na maliliu tagata o o latou aiga, i latou e tausia se aiga, ma uō. Na maumau galuega a nisi, ma o le toʻatele na mou atu lo latou lagona saogalemu lea na latou manatu sa iai. Sa faasafua atu le fesoasoani a Molimau a Ieova i tagata o lo latou oganuu, i le faaalia o latou agaga faamaisega mo ē ua toesea ma avatu iā i latou ni upu faamāfanafana mai le Tusi Paia. E toʻatele sa latou matuā lotofaafetai i le manatu mamafa na faaalia iā i latou.

16. Ina ua tupu se faalavelave i se vaipanoa o El Salvador, aiseā na taulau manuia ai le auaunaga i le fanua a Molimau i lenā lava vaipanoa?

¹⁶ Sa lūlū se mafuiʻe malosi i El Salvador i le 2001, sosoo ai ma le solo ifo o se mauga palapala lea na maumau ai soifua o le toʻatele o tagata. Na maliliu ai le tama tama e 25 tausaga a se Molimau ma uso e toʻalua e laiti ifo a le uō teine a le tama lea. Sa vave ona toe pisi le tinā o le tama lea ma le uō teine a lana tama tama i le auaunaga i le fanua. E toʻatele na fai atu iā i laʻua o le Atua na ia aveesea i latou ua feoti, pe faapea foʻi, ona o le finagalo o le Atua. Na sii atu e Molimau le Faataoto 10:22 e faaalia ai faapea, e lē finagalo le Atua ia oo iā i tatou tigā. Na la faitauina le Roma 5:12 e faaalia ai faapea na oo mai le oti ona o le  agasala a le tagata, ae lē ona o le finagalo o le Atua. Na la faasino atu foʻi i le feʻau o faamāfanafanaga o loo i le Salamo 34:18, Salamo 37:29, Isaia 25:8, ma le Faaaliga 21:3, 4. Sa uaʻi atu le faalogo a tagata, aemaise lava ona o nei māfine e toʻalua, na maliliu tagata o la aiga i le faalavelave na tulaʻi mai, ma e tele ni suʻesuʻega faale-Tusi Paia na amataina ai.

17. I taimi o faalavelave, o ā ituaiga o fesoasoani tatou te tuuina atu?

¹⁷ Pe a tulaʻi mai se faalavelave, e te ono fetaiaʻi ma se tasi o loo manaʻomia vave lava se fesoasoani faaletino. Atonu e aofia ai le faafesootaʻia o se fomaʻi, fesoasoani e ave le tagata i le falemaʻi, po o le ā lava le mea e mafai e saunia ai se meaʻai ma se mea e nofo ai. I se faalavelave na tupu i Italia i le 1998, na mātauina ai e se tagata tusitala faapea o Molimau a Ieova e “gaoioi i se auala talafeagai, e faasafua atu le fesoasoani iā i latou o loo mafatia, e aunoa ma le popole po o le ā le lotu a ia tagata.” I nisi o vaipanoa, o mea na valoia e tutupu i aso e gata ai, ua faapogaia ai le tele o puapuaga. I na nofoaga, e faailoa atu ai e Molimau a Ieova valoaga a le Tusi Paia ma e latou te faamāfanafanaina tagata i faamautinoaga a le Tusi Paia faapea, o le a aumaia e le Malo o le Atua le saogalemu moni i tagata.—Faataoto 1:33; Mika 4:4.

Faamāfanafana pe a Maliu se Tagata o le Aiga

18-20. Pe a iai sē ua maliu i se aiga, o le ā e te fai atu ai po o le faia foʻi, e avatu ai le faamāfanafanaga?

¹⁸ I aso taʻitasi e faitau miliona tagata e faavauvau i le maliu o sē e pele. Atonu e te feiloaʻi iā i latou na a o e auai i le faiva faa-Kerisiano po o le feagai ai ma galuega fai o le olaga. O le ā e te fai atu ai po o le faia foʻi, e avatu ai le faamāfanafanaga?

¹⁹ Po o iloa atu foliga atuatuvale o le tagata? Po o tumu le fale i tauaiga faanoanoa? Atonu e tele ni upu o loo e fia faia atu, ae e tāua ona iā te oe le faautaga poto. (Failauga 3:1, 7) Atonu e talafeagai ona e fai atu ni upu o faamaisega, ia tuu atu se lomiga faale-Tusi Paia talafeagai (se polosiua, se mekasini, po o se sāvali), ma pe a mavae ni nai  aso ona toe asiasi lea e vaai pe e mafai ona avatu se isi fesoasoani. I se taimi talafeagai, taumafai e faailoa atu ni manatu faalaeiau mai le Tusi Paia. O le faia faapea, e mafai ona faatoʻafimālie ma toe faaleleia ai faalogona o le tagata. (Faataoto 16:24; 25:11) E lē mafai ona e faatūina se tagata ua maliu e pei o Iesu. Ae e mafai ona e tufa atu mea o loo taʻua i le Tusi Paia e faatatau i le tulaga o ē maliliu, e ui atonu e lē o le taimi lea e taumafai e faasaʻo ai ni talitonuga sesē o loo iā te ia. (Salamo 146:4; Failauga 9:5, 10; Esekielu 18:4) E mafai ona lua faitauina faatasi le folafolaga a le Tusi Paia e faatatau i le toetū. (Ioane 5:28, 29; Galuega 24:15) E te ono talanoaina le uiga o nei folafolaga i le faaaogāina o se toetū o loo faamatalaina i le Tusi Paia. (Luka 8:49-56; Ioane 11:39-44) Ia faasino atu foʻi i uiga o le Atua alofa, lea e aumaia le faamoemoe iā i tatou. (Iopu 14:14, 15; Ioane 3:16) Faamatala pe na faapefea ona e maua aogā mai i nei aʻoaʻoga ma le māfuaaga ua e mautinoa ai.

²⁰ O le valaaulia o le tagata i le Maota o le Malo atonu e fesoasoani ai i lē o loo faanoanoa e iloa lelei ai tagata e alolofa moni i o latou tuaoi ma iloa le auala e faalaeiau ai e le tasi le isi. Na iloa e se fafine i Suetena faapea o le mea lenei ua leva ona ia saʻilia i lona olaga.—Ioane 13:35; 1 Tesalonia 5:11.

21, 22. (a) O le ā e moomia mai iā i tatou pe a avatu ni faamāfanafanaga? (e) E faapefea ona e avatu faamāfanafanaga i se tasi ua ia iloa lelei le Tusi Paia?

²¹ Pe a e iloa o loo faavauvau se tasi, pe e i le faapotopotoga Kerisiano pe leai, pe e te lagona le lē mautonu po o ā upu po ni mea foʻi e te faia? O le upu Eleni e masani ona faasino atu i le “faamāfanafana” i le Tusi Paia o lona uiga moni “o le valaaulia ia iai i tafatafa o se tasi.” O le avea ma sē e faamāfanafana moni e aofia ai le faaavanoaina o oe mo ē o loo faavauvau.—Faataoto 17:17.

²² Ae faapefea pe afai o le tagata o loo e manaʻo e faamāfanafana ua uma ona ia iloa mea ua fai mai ai le Tusi Paia e faatatau i le oti, le togiola, ma le toetū? O le iai o se uō e tutusa talitonuga, e mafai ona avea ma faamāfanafanaga. Afai e manaʻo le tagata e talanoa, ia e faalogologo lelei. Aua neʻi e manatu e tatau ona fai atu sau lauga. Afai e faitauina mau o le Tusi Paia, ia vaai i ai i mau o loo faitauina, o afioga a le Atua e faamalosia ai o oulua loto. Ia faamatala faamautinoaga malolosi o loo iā te oulua i le mautinoa o mea ua folafola mai e le Tusi Paia. O le mafaufau i le alofa o le Atua ma le tufaina atu o upu moni tautele o loo i lana Afioga, e mafai ona e fesoasoani atu ai iā i latou o loo faavauvau, e maua le faamāfanafanaga ma le malosi mai ‘le Atua e ana faamāfanafanaga uma,’ o Ieova.—2 Korinito 1:3.

[Faamatalaga pito i lalo]

O le ā Sou Manatu?

• O ai o loo tuuaʻia e le toʻatele o tagata mo faalavelave, ma e faapefea ona tatou fesoasoani iā i latou?

• O le ā e tatou te ono fai e fesoasoani ai i isi ia maua aogā atoatoa mai faamāfanafanaga ua ofoina mai e le Tusi Paia?

• O ā tulaga ua aumaia ai faanoanoaga i le toʻatele o tagata i lou vaipanoa, ma e faapefea ona e faamāfanafana atu iā i latou?

[Fesili mo le Suʻesuʻega]

[Ata i le itulau 23]

Tufa atu se feʻau o faamāfanafanaga moni i taimi o mafatiaga

[Faamatalaga i Ata]

Nofoaga o tagata sulufaʻi: UN PHOTO 186811/J. Isaac

[Ata i le itulau 24]

O le iai o se uō e mafai ona avea ma faamāfanafanaga