ʻIa Faalatalata Atu i le Atua, Ona Ia Faalatalata Mai Lea’

Le Olaga Muamua ma Mulimuli Ane Ai—Talaaga Leaga i Aso ua Mavae, ma se Lumanaʻi Matagofie

“O LOO ola le afioga a le Atua, o loo matuā galue foʻi, o loo sili foʻi lona maai i pelu uma e faatau maai itu . . . o loo faamasino foʻi i manatu ma filifiliga o le loto.” (Eperu 4:12) O le faamatalaga lenā a Paulo e uiga i le malosi o le feʻau a le Atua. I le uluaʻi senituri T.A. na faamaonia faapitoa mai ai lava le malosi o le feʻau e oo atu ai i loto o tagata. E ui lava i aafiaga leaga i na taimi, ae o i latou na avea ma Kerisiano na suia o latou uiga ma avea ma tagata fou.—Roma 1:28, 29; Kolose 3:8-10.

E pei ona faamauina i le Tusi Paia, ua faamaonia foʻi i aso nei le mana o le Afioga a le Atua. Mo se faaaʻoaʻoga, seʻi o tatou iloiloina se mea na tupu i se tamāloa maualuga ma malosi e suafa iā Richard. Ona o ia o se tagata e vave tele ona ita, po o le a lava sina mea e tulaʻi mai e fusu ai lava. Sa aafia lona olaga i faiga sauā. Na oo lava ina auai atu o ia i se kalapu fusu. Sa toleni malosi ma avea ai ma siamupini o le paga mamafa i fusuaga i Westphalia i Siamani. Sa malosi tele le inu ʻava malosi o Richard ma sa masani ona oo atu ai ina faamisa. I se tasi o mea faapena na tupu, na fasiotia ai se tasi, ma na toetoe lava a falepuipui ai Richard.

Ae e faapefea le faaipoipoga a Richard? E manatuaina e Richard e faapea: “A o ma leʻi suʻesuʻeina ma Heike le Tusi Paia, sa alu lava le tagata i le mea e manaʻo i ai o ia. E faaaluina e Heike le tele o lona taimi ma ana uō teine, a o aʻu e faaalu le tele o lou taimi i mea ou te fiafia i ai aemaise lava fusuaga, faasee i galu ma le maulu.”

Ina ua amata ona suʻesuʻeina e Richard ma Heike le Tusi Paia ma Molimau a Ieova, na faateʻia o ia i le manatu e faapea, e tatau ona ia faia ni suiga, lea e foliga mai e lē mafai ona ia faia ina ia faaliliuina ai lona olaga ia ogatasi ma tapulaa maualuluga ua faatulaga i le Afioga a le Atua. Ae ina ua ia iloa lelei Ieova le Atua, sa atiina aʻe loa e Richard se faanaunauga malosi e faafiafia lona finagalo. Na iloa e Richard e lē fiafia le finagalo o le Atua i ē fiafia i le faasauā po o i latou e faaaogāina faiga sauā e faafiafia ai. Na aʻoaʻoina foʻi e Richard e faapea: “E . . . inosia e lona finagalo [Ieova] lē fai amio leaga, ma lē fiafia i le faasauā.”—Salamo 11:5.

Ae le gata i lenā, na maofa Richard ma Heike i le faamoemoe o le ola e faavavau i le lalolagi parataiso. Sa la mananaʻo ia la iai faatasi i inā! (Isaia 65:21-23) Na matuā pāʻia le loto o Richard i le valaaulia: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) Na ia iloa le tāua o le utagiaina o lenei fautuaga faagaeeina e faapea: “Aua e te mataʻua i le tagata faasauā; aua foʻi e te filifili i se tasi o ona ala. Auā e inosia e Ieova le tagata agapiʻopiʻo; a e fefaauōaʻi o ia ma ē ua sao a latou amio.”—Faataoto 3:31, 32.

E ui lava i le iai o se faanaunauga malosi e suia ona ala, ae na iloa e Richard e lē mafai ona ia faia faapea i sona lava malosi. Na oo ina ia iloa le manaʻomia ona saʻili atu i le fesoasoani a le Atua e ala i le tatalo. Sa ia gaoioi ai loa e tusa ma upu a Iesu i Ona aposetolo e faapea: “Ia outou . . . tatalo, ina neʻi oo mai le faaosoosoga iā te outou; ua manaʻo i ai le loto, a o le tino ua vaivai.”—Mataio 26:41.

Ina ua aʻoaʻoina le silafaga a le Atua i faiga sauā ma le lotoa, na mautinoa ai e Richard o le fusuaga o se taaloga e lē taliaina e le Atua. Na taofia e Richard le auai i faiga sauā ona o le fesoasoani mai iā Ieova  ma faalaeiauga mai iā i latou sa latou suʻesuʻe i le Tusi Paia. Sa ia lē toe auai i fusuaga ma ua lē toe faamisa foʻi ae ua ia filifili e faaleleia le tulaga o lona aiga. Ua faapea mai Richard o lē ua avea nei ma se ovasia agamalu i se tasi o faapotopotoga o Molimau a Ieova: “O le aʻoaʻoina o le upu moni mai i le Tusi Paia, ua fesoasoani lea iā te aʻu ina ia ou nofo ma mafaufau muamua a o leʻi faia se gaoioiga.” Ua ia toe faaopoopo mai: “Ua faavae aʻe nei laʻu faiā ma laʻu avā ma laʻu fanau i mataupu silisili o le alofa ma le faaaloalo. O le iʻuga, ua oo ina māfana ai la matou faiā i le aiga.”

O manatu lē saʻo o tagata, ua tuuaʻisesēina ai i nisi taimi ia Molimau a Ieova e faapea ua latou faaleagaina aiga. Ae peitaʻi, o faaaʻoaʻoga a tagata taʻitoʻatasi e pei o Richard, ua faamaonia ai le sesē o a latou tuuaʻiga. O le mea moni, e mafai ona iʻu upu moni o le Tusi Paia i se tulaga mautū o aiga ma se lumanaʻi matagofie, mo i latou o ē na iai se talaaga leaga i aso ua mavae.—Ieremia 29:11.

[Faamatalaga faaopoopo i le itulau 9]

“O le faamoemoe i le lalolagi parataiso na aumaia ai iā te aʻu se uunaʻiga ia faia ni suiga”

[Pusa i le itulau 9]

Mataupu Silisili o le Tusi Paia e Aogā

E mafai e le Tusi Paia ona iai sana taaʻiga malosi i olaga o tagata. O nisi nei o mataupu silisili faale-Tusi Paia ua fesoasoani i tagata sauā taʻitoʻatasi ina ia faia ni suiga:

“E sili ona lelei o lē ua gesegese i le ita i lē ua malosi; e sili foʻi lē ua pule i lona loto i lē na te aʻea le aai.” (Faataoto 16:32) O le lē pulea o le ita o se faailoga lenā o le vaivai ae lē o le malosi.

“O le mafaufau o le tagata e faagesegese ai lona ita.” (Faataoto 19:11) O le mauaina o le malamalama ma le faautaga e faatatau i se mea, o le a fesoasoani lea i se tasi e iloa ai le māfuaaga o feteenaʻiga ma e mafai ona puipuia ai se tasi mai le oso faafuaseʻi o le ita.

“Aua neʻi fefaauōaʻi ma le tagata itagofie . . . ina neʻi e faaaʻoaʻo i ona ala.” (Faataoto 22:24, 25) E ʻalofia ma le atamai e Kerisiano le aumea atu iā i latou o ē itagofie.