Faamāfanafanaga mo Ē o Loo Manaʻomia se Fesoasoani

O LE Tusi Paia e lē o se tusi e faatonutonuina ai le soifua mālōlōina o le mafaufau. Peitaʻi, ua avea o se tusi e aumaia ai faamāfanafanaga ma fesoasoani iā i tatou ina ia faatāuaina le olaga e ui lava i faafitauli o loo tatou fesagaʻia. O le mea moni ua faapea mai le Tusi Paia: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) O o tatou lava tulaga lē lelei atoatoa ua māfua ai ona tatou fesagaʻia nisi o tofotofoga. Ae o ai e tuuaʻia i le puapuagatia o tagata?

O loo faaalia mai e le Tusi Paia o ia o se agaga leaga ua taʻua o le Tiapolo ma Satani. Ua ia “faasesē i le lalolagi uma” ma faapogaia le tele o faafitauli o loo pagātia ai tagata. Ae ua toe taʻua mai foʻi e le Tusi Paia iā i tatou e faapea, ua saasaa ona pō. (Faaaliga12:9, 12) O le a lē pine ae faaumaina loa e le Atua puapuaga uma na faapogaia e Satani i luga o le lalolagi. E tusa ai ma le faamatalaga a le Tusi Paia, ua folafola mai e le Atua le lalolagi fou o le a iai le amiotonu lea o le a faamutaina ai le atuatuvale.—2 Peteru 3:13.

Maʻeu se faamāfanafanaga i le iloaina faapea e lē tumau le tulaga mafatia o loo iai tagata! I lalo o le pulega a le Malo faalelagi o le Atua i aao o Iesu Keriso, o le a aveesea ai le lē faamasinotonu ma puapuaga. E tusa ai ma le Tupu faauuina a le Atua, ua faapea mai le Tusi Paia: “E laveaʻi e ia o lē mativa i lona alaga mai; atoa ma lē ua puapuagatia, ma lē ua leai sona fesoasoani. E alofa atu ia i lē ua vaivai ma lē ua mativa; e faaola lava e ia ē ua matitiva. E laveaʻi o ia iā i latou ai le sauā ma le faamalō; e silisili foʻi o latou toto i lona manatu.”—Salamo 72:12-14.

Ua lata mai le taimi e faataunuuina ai nei upu faavaloaga. O le a mafai ona tatou fiafia i le ola e faavavau i le lalolagi parataiso i lalo o tulaga matagofie. (Luka 23:43; Ioane 17:3) O le iloaina o nei faamāfanafanaga faale-Tusi Paia ua folafola mai, e aumaia ai le faamoemoe ma le faamāfanafanaga mo ē o loo manaʻomia se fesoasoani.

[Faamatalaga i Ata i le itulau 32]

Se teine lotomafatia: Photo ILO/J. Maillard