Le Māfuaaga e Lē Mafai ai Ona Tatou Ola e Aunoa ma Isi

“E sili ona lelei o le toʻalua i le toʻatasi . . . afai e paʻū le tasi e faatūina o ia i luga e lē la te toʻalua.”—Tupu o Solomona

NA FAAILOA mai e le tupu o Isaraelu anamua o Solomona e faapea: “E sili ona lelei o le toʻalua i le toʻatasi; auā ua iā te i laʻua le taui lelei i la la galuega. Auā afai e paʻū le tasi e faatūina o ia i luga e lē la te toʻalua; oi talofa foʻi i lē ua toʻatasi pe a paʻū, auā e leai se la te toʻalua e faatū iā te ia i luga.” (Failauga 4:9, 10) Na faamamafa mai e lenei tagata atamai e mātauina amio a tagata, lo tatou manaʻomiaina o ni uō ma le tāua o le lē faaesea o i tatou lava. Ae peitaʻi, e lē na o tagata e taofi faapea. O le faamatalaga a Solomona e māfua mai le atamai ma le faagaeega tauatua.

E lē o se faiga atamai le faaesea o i tatou lava. E manaʻomia e le tasi tagata le isi tagata. E manaʻomia e i tatou uma lava le malosi ma le fesoasoani mai i isi tagata. Ua faapea mai se faataoto o le Tusi Paia: “O lē ua vavae ese, ua saʻili o ia i lona manaʻo; e finau o ia i le poto uma lava.” (Faataoto 18:1) O lea, e lē o se mea fou i saienitisi e gafa ma mataupu tau i olaga o tagata ona faalaeiau tagata taʻitoʻatasi ina ia aufaatasi atu i se vaega o tagata ma faaalia le naunau i isi.

O se tasi o fautuaga a le polofesa o Robert Putnam e faaleleia ai olaga o tagata, o le “faamalosia lea o aafiaga o talitonuga faalelotu.” Ua mataʻina Molimau a Ieova i lenei vala ona ua latou olioli i le puipuiga a faapotopotoga e pei o ni aiga i le lalolagi. Ina ia talafeagai ai ma upu a le aposetolo o Peteru, ua latou “alolofa atu i le ʻau uso” o ē e migao ma “matataʻu i le Atua.” (1 Peteru 2:17) E ʻalofia foʻi e Molimau aafiaga leaga o le faaesea o le tagata lava ia, ona o le tele o gaoioiga lelei e fesootaʻi atu ma le tapuaʻiga moni lea o loo faaauau ai ona latou auai i le fesoasoani atu i o latou tuaoi ia aʻoaʻoina le upu moni o loo i le Afioga a le Atua, le Tusi Paia.—2 Timoteo 2:15.

Na Suia e le Alofa ma Faauōga o Latou Olaga

Ua faia aʻe Molimau a Ieova i se vaega o tagata autasi lea e faataunuuina e ona sui taʻitasi se matafaioi tāua. Mo se faaaʻoaʻoga, seʻi mātau mea na tutupu iā Miguel, Froylán ma Alma Ruth, o ni sui se toʻatolu mai i se aiga se tasi i Amerika Latina. Na soifua mai i latou ma se maʻi e lē tutupu ponaivi lea ua faapei ai i latou o ni saa. O i latou uma ia e toʻatolu e ō i nofoa faataavalevale. Na faapefea i le aufaatasi atu i Molimau ona aafia ai o latou olaga?

 Ua taʻua e Miguel e faapea: “Na ou oo i se vaitaimi o faigatā, ae ina ua ou aufaatasi ma tagata o Ieova, na suia ai loʻu olaga. O le faaesea o se tasi e matuā mataʻutia tele. O le auaufaatasi ma uso talitonu i sauniga faa-Kerisiano, o le iai faatasi ma i latou i vaiaso taʻitasi na matuā fesoasoani lea iā te aʻu e maua ai le lotomalie.”

Ua faaopoopo mai Alma Ruth: “E masani ona iai taimi ou te matuā mafatia ai, ou te lagona ai le faanoanoa. Ae ina ua aʻoaʻoina aʻu e uiga iā Ieova, na ou iloa ai e mafai ona ou maua se faiā vavalalata ma ia. Na avea lenā ma mea e sili ona tāua i loʻu olaga. E lagolagosua malosi lo matou aiga iā i matou ma ua atili ai ona autasi i matou.”

Na aʻoaʻoina ma le alofa e le tamā o Miguel o ia ina ia iloa faitau ma tusitusi. Ona fesoasoani loa lea o Miguel iā Froylán ma Alma Ruth ina ia faia faapea. E tāua tele lenei mea mo lo latou itu faaleagaga. Ua faapea mai Alma Ruth: “Na matuā aogā iā i matou le aʻoaʻo ina ia iloa ona faitau talu ai e mafai ona fafagaina faaleagaga i matou e ala i le faitauina o le Tusi Paia ma lomiga faale-Tusi Paia.”

I le taimi nei, o loo auauna Miguel o se toeaina Kerisiano. Ua faaiva ona faitau e Froylán le Tusi Paia atoa. Talu mai le 1996, ua faateleina ai e Alma Ruth lana auaunaga iā Ieova e ala i le auauna o se faifeʻau paeonia po o sē e faalauiloa le Malo faataimi atoa. Ua ia taʻua e faapea: “Ua ou ausia lenei sini ona o le faamanuiaga a Ieova, e pei ona ou maua le lagolagosua a oʻu uso Molimau, o ē e fesoasoani iā te aʻu e lē gata ina ia talaʻi ae ia aʻoaʻo atu foʻi e ala i le faia o ni suʻesuʻega faale-Tusi Paia e 11 lea ua mafai ona ou amataina.”

O se isi faaaʻoaʻoga lelei na faataatia e Emelia, o lē na tupu ai se faalavelave lea ua manaʻomia ai e ia ona faaaogāina se nofoa faataavalevale ona o ni manuʻa i ona vae ma lona tuasivi. Na ia suʻesuʻeina le Tusi Paia ma Molimau a Ieova i le aai o Mekisikō ma na papatisoina ai i le 1996. Ua faapea mai Emelia: “Ae a o oʻu leʻi iloaina le upu moni, na ou manaʻo ai e pule i loʻu ola; ou te leʻi manaʻo ou te toe ola. Na lofitūina aʻu i faalogona mafatia ma ou te tagi i le pō ma le ao. Ae ina ua ou aufaatasi ma tagata o Ieova, na ou lagona le alofa faaleuso. Na avea o se faalaeiau iā te aʻu le naunau totino na latou faaalia mai iā te aʻu. Ua pei se tasi o toeaina o se tuagane po o se tamā iā te aʻu. O ia ma isi auauna o le faiva e latou te avea aʻu i sauniga ma galuega talaʻi i loʻu nofoa faataavalevale.”

 O se tamā matua nofo toʻatasi e suafa i José, na papatisoina e avea o se Molimau a Ieova i le 1992. Ua 70 tausaga o lona soifua ma na litaea mai i lana galuega i le 1990. Na oo iā José le lotomafatia, ae ina ua talaʻi atu i ai se Molimau iā te ia, na vave lava ona ia auai i sauniga faa-Kerisiano. Na ia fiafia i mea na faalogo ma vaai i ai. Mo se faaaʻoaʻoga, na ia mātauina faauōga a uso ma na ia iloa lo latou manatu mamafa iā te ia. Ua tausia nei o ia e toeaina ma auauna o le faiva o lana faapotopotoga. (Filipi 1:1; 1 Peteru 5:2) O na uso talitonu ua avea o ni “faamatalaloto” iā te ia. (Kolose 4:11) E latou te aveina o ia e vaai le fomaʻi, asiasi atu i lona fale ma lagolagosua iā te ia i taimi na fai ai ona taotoga e fā. Ua ia faapea mai: “E latou te faaalia le manatu mamafa iā te aʻu. O i latou moni lava o loʻu aiga. Ua ou olioli i la latou faauōga.”

E Sili le Fiafia o lē Foaʻi Atu

Ina ua faapea mai le tupu o Solomona “e sili ona lelei o le toʻalua i le toʻatasi,” na ia tautala e faatatau i le lē aogā o le tuutoina uma atu o le malosi o se tasi e saʻilia ai le tamaoaiga faaletino. (Failauga 4:7-9) O le mea tonu lenā o loo matuā saʻilia e le toʻatele i aso nei, e ui lava e faataulagaina ai le faiā ma isi e lē gata i totonu a o fafo atu o le aiga.

O le uiga matapeʻapeʻa ma le manatu faapito ua faaesea ai e le toʻatele i latou lava. Ua aumaia ai iā i latou le lē fiafia ma le lē faamalieina i le olaga, o le fenuminumiaʻi ma le leai o se faamoemoe ua taatele iā i latou o ē ua lolo atu i na uiga. I lona tuufaafeagai, ua faaalia i olaga o tagata sa taʻua muamua, iʻuga lelei o le aufaatasi atu iā i latou o auauna iā Ieova ma o ē ua uunaʻia e le alofa mo ia ma o latou tuaoi. O le auai e lē aunoa i sauniga faa-Kerisiano, o le lagolagosua ma le manatu mamafa o uso Kerisiano ma gaoioiga maelega i le faiva, o vala tāua ia na fesoasoani ai i nei tagata taʻitoʻatasi e foʻia ni manatu lē lelei e fesootaʻi atu ma le faaesea o i latou.—Faataoto 17:17; Eperu 10:24, 25.

Talu ai e faalagolago le tasi i le isi e masani lava o le faia o mea lelei mo isi e maua ai le faamalieina. Na faapea mai Albert Einstein, o lē na aogā ana galuega i isi: “E iloa le tāua o le tagata . . . i le mea na te avatu ae lē o mea e mafai ona ia mauaina mai.” E ioe lenei manatu ma upu nei a lo tatou Alii o Iesu Keriso e faapea: “E sili le manuia o lē na te foaʻi atu, i le manuia o lē na te talia mai.” (Galuega 20:35, LT ) O lea la, a o faaalia mai e isi le alofa iā i tatou, o se mea lelei foʻi le faaalia atu o le alofa i isi.

Ua faaalia mai e se ovasia ona faalogona o lē na asiasia faapotopotoga mo le tele o tausaga, ina ia ofo atu le fesoasoani faaleagaga ma o lē na fesoasoani i le faatūina o nofoaga o sauniga mo Kerisiano e lima vaivai e faapenei: “O le olioli e auauna i oʻu uso ma vaaia lo latou talisapaia, ua uunaʻia ai aʻu e faaauau pea ona saʻilia avanoa e fesoasoani ai. Ua faaalia i mea na oo iā te aʻu, o le naunau totino i isi o le ki lenā o le fiafia. Ma ua ou iloa ai o le avea o ni toeaina, e tatau ona tatou ‘pei o se lafitaga i le matagi . . . , e pei o vaitafe i le nuu naumati, e pei o le paolo foʻi o le papa tele i le nuu ua lē o i ai se vai.’”—Isaia 32:2.

Maʻeu le Fiafia pe a Nonofo Faatasi!

E mautinoa le mauaina o aogā ma le fiafiaga moni pe a fesoasoani i isi ma saʻilia foʻi faauōga  ma i latou e auauna iā Ieova. Na alaga le faisalamo e faapea: “Faauta, o le mea e matuā lelei ma le matagofie lava, pe a nonofo faatasi lava o uso.” (Salamo 133:1) E pei ona faaalia i mea na tutupu iā Miguel, Froylán ma Alma Ruth o le autasi faaleaiga o se vala tāua lea e lagolagosua ai le tasi i le isi. Maʻeu se faamanuiaga o le autasi ma isi i le tapuaʻiga moni! Ina ua uma ona avatu fautuaga i tane ma avā Kerisiano, na tusi Paulo e faapea: “O le iʻuga lenei, ia loto gatasi outou uma, ia fealofani, ia alolofa i le ʻau uso, ia mutimuti vale i le alofa, ia agalelei.”—1 Peteru 3:8.

E aumaia e uō moni aogā tau i faalogona ma le faaleagaga. I le talanoa atu i ana uō i le faatuatua, ua lapataʻi mai le aposetolo o Paulo e faapea: “Ia faamāfanafana i ē loto iti, ia fesoasoani i ē o vaivai, ia outou onosai i tagata uma lava. . . . Ia outou tausisi e lē aunoa i le mea lelei, o le tasi i le tasi, atoa ma tagata uma lava.”—1 Tesalonia 5:14, 15.

O lea, ia vaai i ni auala aogā e faia ai mea lelei i isi. “Ia tatou agalelei . . . i tagata uma lava, a e faasili i le aiga o le faatuatua,” o le a faaopoopo atu e lenei mea le uiga moni o le olaga ma o le a avatu ai iā te oe le faamalieina. (Kalatia 6:9, 10, LT) Na tusi le soo o Iesu o Iakopo e faapea: “Afai ua lē ofu se uso po o se tuafafine, ua leai foʻi sana mea e ʻai i lea aso ma lea aso, a fai atu so outou iā te i latou, ‘Inā ō ia outou ma le manuia, ia māfanafana, ma ia maoona,’ a ua lē foaʻi atu iā te i latou ni mea e tatau i le tino, se ā lona aogā?” (Iakopo 2:15, 16) E manino le tali i lenā fesili. E tatou te manaʻomia ona “aua neʻi taʻitasi ma vaavaai i ana lava mea, a ia taʻitasi ma vaavaai i mea a isi.”—Filipi 2:4.

I le faaopoopo atu i le fesoasoani faaletino i isi pe afai ua iai se manaʻoga faapitoa po o ua tupu se mala, ua pisi ai Molimau a Ieova e fesoasoani i uso a tagata i se auala tāua, o le talaʻia o le tala lelei o le Malo o le Atua. (Mataio 24:14) O le auai o le sili atu i le 6,000,000 Molimau i le faalauiloaina o lenei feʻau o le faamoemoe ma le faamāfanafanaga, o le faamaoniga lea o le moni o lo latou alofa naunau i isi. Peitaʻi o le aumaia o se fesoasoani mai le Tusi Paia e fesoasoani foʻi ina ia faafetaiaʻia se isi manaʻoga o tagata. O le ā lenā manaʻoga?

Faataunuuina o se Manaʻoga Tāua

Ina ia olioli i le fiafiaga moni, e manaʻomia ai le iai o sa tatou faiā lelei ma le Atua. Ua faapea mai se faamatalaga: “O le mea moni talu mai le amataga seʻia oo mai i aso nei, o mea uma i so o se taimi e lagona ai e le tagata le manaʻomia ona talitonu i sē e sili atu ona maualuga ma malosi na i lo ia, ua faamaonia ai o se mea masani le fia tapuaʻi ma e a o ona amanaia e saienisi. . . . E tatau ona tatou maofa i le vaavaai atu i saʻiliʻiliga a tagata i le lalolagi aoao ma le talitonu i sē ua silisili ese.”—Man Does Not Stand Alone, na tusia e Cressy Morrison.

Na faailoa e Iesu Keriso e faapea: “Amuia i latou e manatu mamafa i o latou manaʻoga faaleagaga.” (Mataio 5:3, NW) E lē lelei ona faaesea e tagata i latou lava i se taimi faaumiumi mai i isi tagata. Ae peitaʻi, e matuā sili ona mataʻutia le faaesea o i tatou mai i Lē na Foafoaina Mea. (Faaaliga 4:11) O le mauaina ma le faatatauina o le “poto i le Atua” e tatau ona avea ma vala tāua i o tatou olaga. (Faataoto 2:1-5) O le mea moni, e tatau ona tatou naunau e faamalie o tatou manaʻoga faaleagaga, ona e lē mafai ona tatou ola e aunoa ma isi ma faaesea mai i le Atua. O se olaga fiafia ma le tauia moni e faalagolago i se faiā lelei ma Ieova, “le Silisili ese i le lalolagi uma.”—Salamo 83:18.

[Ata i le itulau 5]

Miguel: “Na ou oo i se vaitaimi o faigatā, ae ina ua ou aufaatasi ma tagata o Ieova, na suia ai loʻu olaga”

[Ata i le itulau 5]

Alma Ruth: “Ina ua aʻoaʻoina aʻu e uiga iā Ieova, na ou iloa ai e mafai ona ou maua se faiā vavalalata ma ia”

[Ata i le itulau 6]

Emelia: “A o oʻu leʻi iloaina le upu moni, . . . na lofitūina aʻu i faalogona mafatia”

[Ata i le itulau 7]

O le auaumea ma tagata tapuaʻi moni e fesoasoani lea e faamalieina ai o tatou manaʻoga faaleagaga