Ua Atili Matitiva Tagata Matitiva

“E lē mafai ona fiafia ma lauolaola se atunuu, pe afai e matitiva ma mafatia le toʻatele o ona tagata.”

O LE tala lenā a se alii poto i mataupu tau tamaoaiga, i tuā i le senituri lona 18. Ua ioe le toʻatele o tagata i le moni o le manatu o lenā alii, aemaise lava i aso nei. Ua matuā iloagofie le eseesega o tagata mauʻoa ma tagata matitiva. E tasi vae tolu o le aofaʻi o tagata i Filipaina o loo ola i le itiiti ifo i le $1 Amerika i le aso, ae o le totogi lenā o tagata i atunuu tamaoaiga mo ni nai minute. O loo taʻua e se lipoti a Malo Aufaatasi e faapea “e 114 taimi e faatele ai totogi a le 5% o tagata e sili ona matitiva o le lalolagi, ona faatoʻā maua lea o totogi a le 5% o tagata e sili ona mauʻoa o le lalolagi.” (Human Development Report 2002)

E ui lava e lelei le tamaoaiga o isi, ae e faitau miliona tagata o loo nonofo fua i fanua o isi ma fai o latou tamaʻi fale lē lelei i so o se mea e tau i ai. Ae e sili atu ona leaga tulaga o isi tagata ia o loo nonofo i tafatafa o auala ma momoe i luga o pepa iila po o pepa malō. O le toʻatele o i latou o loo taumafai e ola i so o se mea latou te mauaina—e ala i le suʻeina o lapisi, le laʻuina o uta mamafa po o le aoaoina o atigi fagu ma isi mea e mafai ona faatau atu, ma faaputu i tamaʻi taavale toso.

E lē faapea e na o atunuu tauatiaʻe ua maua ai se eseesega tele i le va o tagata mauʻoa ma tagata matitiva. Peitaʻi ua faapea mai le Faletupe o le Lalolagi, “e tele ‘vaipanoa e nonofo ai tagata matitiva’ i so o se atunuu lava.” O se atunuu tauatiaʻe e pei o Bangladesh po o se atunuu atiaʻe e pei o Amerika, ma po o le ā foʻi le tele o tamaoaiga o isi, ae o loo iai pea tagata ua tau leai ni a latou meaʻai ma fale e nonofo ai. Na taʻua e le mekasini o le New York Times se faamatalaga mai le Matagaluega o Numera ma Faamaumauga a le Iunaite Setete i le 2001, e faailoa ai le faatuputeleina o le eseesega i le va o ē mauʻoa ma ē matitiva i lenā atunuu. Na faapea mai: “O le ʻafa o le totogi o tagata uma o le atunuu, na mauaina e le tasi vae lima o le aofaʻi o tagata e sili ona mauʻoa o le atunuu i le tausaga ua teʻa . . . Peitaʻi, e na o le 3.5% o lea totogi na maua e le tasi vae lima o le aofaʻi o tagata e sili ona matitiva.” E faapena foʻi le tulaga o le tele o isi atunuu pe e sili atu foʻi ona leaga. Na faaalia e se lipoti a le Faletupe o le Lalolagi e faapea, e 57 pasene o le aofaʻi o le lalolagi o loo ola i le itiiti ifo i le $2 Amerika i le aso.

E lē gata i lea, i le tausaga e 2002, e leʻi malilie ai le faitau miliona o tagata ina ua faalogo i tala i le tele o le tamaoaiga o nisi o  faatonusili ona o ni faiga faalēlelei. E tusa lava pe e leʻi solia ai le tulafono i mea na latou faia, ae ua manatu nisi e faapea o tagata maualuluga o kamupani nei, e pei ona taʻua e le mekasini o le Fortune “ua matuā leaga tele le auala ua latou faatuputeleina ai lo latou tamaoaiga aemaise le lē manatu mamafa i isi tagata.” Pe a tagaʻi atu i mea o loo tutupu i le lalolagi i aso nei, ua taumānatu ai nisi tagata i le māfuaaga ua lē afāina ai le mauaina e isi tagata o le faitau miliona o tupe, a o lenei o loo ola matitiva le toʻatele o tagata.

Pe o le a Tumau ea le Mativa?

E lē faapea ai la, e lē o iai ni tagata o taumafai e fesoasoani i tagata matitiva. Ua iai tagata lotofesoasoani o le malo ma faalapotopotoga ua faia ni fuafuaga ina ia taumafai e suia le tulaga o tagata. Ae o loo faaauau pea lenei tulaga pagatia. Ua faapea mai se lipoti i le 2002: “Ua sili atu ona matitiva le tele o atunuu pe a fua atu i tausaga e 10 pe 20 ua teʻa, ma e 30 tausaga i isi atunuu,” e ui i taumafaiga lelei auā le faaleleia o lenei faafitauli. (Human Development Report 2002)

Po o lona uiga ea, ua leai se faamoemoe mo tagata matitiva? Matou te valaaulia oe ina ia faitau i le mataupu o loo sosoo mai. O loo aumai ai ni fautuaga lelei e aogā i le taimi nei, ma o loo iai foʻi ma fesoasoani atonu e te leʻi tōmanatu i ai.