O le ā Lou Talaaga?
O le ā Lou Talaaga?
PE SA e faitau i se faaaliga o loo i se nusipepa e uiga i ē ua maliliu, pe iloaina ni faamatalaga e uiga i le talaaga o se tagata ua maliu ma mea na ia faia? Pe na e fesili ifo iā te oe, ‘O le ā atonu o le a fai mai ai tagata e uiga iā te aʻu?’ E toʻafia tagata e masani ona mafaufau pe o le a faapefea ona manatuaina i latou pe a maliliu? O lea, ia iloilo nei fesili tāua: Afai na e maliu ananafi, o le ā o le a fai mai ai tagata e faatatau iā te oe i le asō? E faapeʻī lou talaaga? O le ā se talaaga e te manaʻo e manatua ai oe e i latou o ē e iloaina oe ma ia manatua ai oe e le Atua?
Na faapea mai le tusitala poto o le tusi o Failauga: “E sili ona lelei o le taʻuleleia i le suāuu lelei; ma le aso e oti ai e sili i le aso e fanau mai ai.” (Failauga 7:1) Aiseā e sili ai le aso na maliu ai se tasi na i lo le aso na soifua mai ai? Talu ai o le taimi na soifua mai ai se tasi sa leai sona talaaga. E lē o iai ni faamatalaga e uiga i lona olaga. A lē o se talaaga lelei o se talaaga lē lelei o le a iʻu i ai lona olaga. O i latou o ē na iai se talaaga lelei i le tele o tausaga, o le a sili le aso e maliliu ai na i lo le aso na soifua mai ai.
O lea, ua iā i tatou le avanoa e filifili ai. O le mea moni, tatou te faia le tele o filifiliga i aso taʻitasi lea o le a māfua ai ona maua so tatou talaaga i le aso tatou te feoti ai, aemaise lava le auala o le a manatuaina ai i tatou e le Atua. Na tusi le tusitala atamai Eperu e faapea: “O le faamanatuina o lē amiotonu, e viia lava lea; a o igoa o ē amio leaga, e pala ia.” (Faataoto 10:7) Maʻeu se faaeaga o le manatuaina o se tasi e le Atua ma o se faamanuiaga!
O lea, pe afai tatou te atamamai, o lo tatou sini o le faafiafiaina lea o le finagalo o le Atua e ala i le ola e ōgatusa ai ma ana tapulaa. O le uiga o lenā mea o le mulimuli lea i mataupu silisili autū na faaalia e Keriso: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaʻiga muamua lenā ma le sili. E faapena foʻi lona lua, E te alofa atu i lē lua te tuaoi, ia pei o oe lava iā te oe. O nā poloaʻiga e lua ua autū ai le tulafono uma ma le ʻau perofeta.”—Mataio 22:37-40.
E manatuaina nisi ona o ē e faia mea lelei i tagata, o ē o loo taumafai e faaleleia tulaga o tagata, faaauiluma aiā tatau o tagata, po o mea latou te faia i pisinisi, le faasaienisi, faafomaʻi ma isi gaoioiga. O lea, o le ā se talaaga e te manaʻo e manatua ai oe?
Na faamatalaina e le tusitala Sikotilani o Robert Burns (1759-1796) le faanaunauga o le aumaia e le Atua o le tomai e malamalama ai iā i tatou e pei o le auala o loo vaai mai ai isi iā i tatou. Pe e mafai ona e tagaʻi ma le faamaoni iā te oe lava ma faapea mai o loo lelei lou talaaga i isi tagata ma le Atua? O le mea moni, e sili ona tāua la tatou faiā ma isi na i lo se tulaga manuia lē tumau tatou te ono maua i taaloga po o pisinisi. O le fesili la: E faapefea i a tatou feutagaʻiga ma isi i le auala tatou te talanoa ai, o o tatou uiga faaalia ma gaoioiga tatou te faia—ona aafia ai i latou? Pe tatou te foliga māfana pe fia tagata? Pe tatou te agalelei pe sauā? Pe tatou te fetuutuunaʻi pe pulepuletutū? Pe tatou te alolofa pe lē manatu mamafa? Pe o se tasi e faatigā loto po o sē e fautua lelei? Seʻi o tatou iloiloina nisi o faaaʻoaʻoga i aso ua mavae ma aso nei po o le ā e mafai ona tatou aʻoaʻoina mai ai.
[Ata i le itulau 3]
Na faanaunau Roberts Burns o le a aumaia e le Atua le tomai e malamalama ai iā i tatou e pei o le auala o loo vaai ma ai isi iā i tatou
[Faamatalaga i Ata]
Mai le tusi ua taʻua A History of England