Se Tala e Faapogaia ai le Faatuatua ma le Loto Tele—Molimau a Ieova i Ukraine

UA SAUĀINA tagata o le Atua i aso nei e pei foʻi ona sauāina Kerisiano i le uluaʻi senituri. (Mataio 10:22; Ioane 15:20) E lē tele ni atunuu e pei o Ukraine lea na matuā ogaoga ma faaumiumi ai sauāga, ma na faasāina ai le galuega talaʻi mo le 52 tausaga.

Na faamatalaina e le tusi 2002 Yearbook of Jehovah’s Witnesses le tala e uiga i tagata o le Atua i Ukraine. O se tala e uiga i le faatuatua, loto tele ma le malosi i se siʻomaga na matuā puapuagatia ai. O faaupuga o mulimuli mai, o nisi na o faamatalaga e faaalia ai le talisapaia na mauaina e le ofisa o le lālā o Molimau a Ieova i Ukraine.

“Ua uma ona ou faitau i le 2002 Yearbook. Sa lē mafai ona taofia oʻu loimata a o oʻu faitau e uiga i la outou galuega i Ukraine. Ou te fia faailoa atu, ua matuā faalaeiauina aʻu i la outou faaaʻoaʻoga maelega ma le malosi o lo outou faatuatua. O se mitamitaga iā te aʻu lo tatou iai faatasi uma i se aiga faaleagaga. E momoli atu laʻu faafetai tele lava!”—Andrée i Falani.

“E lē lava ni upu e faailoa atu ai loʻu lototalisapaia iā te outou atoa ai foʻi ma Ieova mo le tusi 2002 Yearbook. Na maligi oʻu loimata a o oʻu faitau i le tele o mea na tutupu i uso na autausagā o iai i falepuipui ma nofoaga o faasalaga. O se mea mataʻina iā te aʻu lo latou loto tetele. E ui lava ua 27 tausaga talu ona avea aʻu ma Molimau, ae e mafai pea ona ou aʻoaʻoina ni lesona mai i na uso ma tuafāfine. Ua latou faamalosia loʻu faatuatua i lo tatou Tamā i le lagi o Ieova.”—Vera i le atunuu na avea muamua ma Yugoslavia.

“O se fiafiaga iā te aʻu le tusi atu o lenei tusi ona o la outou faaaʻoaʻoga lelei i le tutumau ma le faamaoni i le tele o tausaga o teteega. Ua faaaloalogia outou ona o lo outou faalagolago atoatoa iā Ieova ma le naunautaʻiga ina ia tumau i le faamaoni. E lē gata i lea, o lo outou lotomaulalo a o fetaiaʻi ma luʻi, ua faamalosia ai loʻu talitonuga e faapea e lē tuulafoaʻia e Ieova ona tagata. Ona o la outou faaaʻoaʻoga lelei o le loto tele, tutumau ma le onosai ua faigofie ai ona faafetaiaʻia o matou faafitauli faatauvaa.”—Tuteirihia i French Polynesia.

“E ao lava ona ou tusi atu auā o lea ua uma ona ou faitau i le Yearbook. Sa matuā pāʻia loʻu loto i mea na tutupu e matuā faalaeiauina ai. O se mitamitaga iā te aʻu loʻu iai i se faalapotopotoga e faamaoni ma autasi o loo taʻitaʻia e se Tamā alofa e lagolagosua mai, ma e na te aumaia le malosi i le taimi tatau. O se mea na ou faanoanoa ai ona o le puapuagatia o le toʻatele o auauna maelega a Ieova ma oo ina maliliu ai foʻi isi. Ae na ou olioli auā foʻi o lo latou maelega ma le loto tetele, na ala ai ona aʻoaʻoina e le toʻatele o tagata le upu moni ma latou iloaina ai lo tatou Tamā alofa.”—Colette i Holani.

“E ao ona ma tusi atu pea ma laʻu avā e faailoa atu le faagaeetia o o ma loto ina ua ma faitau i le tala iā Ukraine i le Yearbook. E maoaʻe la outou faaaʻoaʻoga faamaoni a o tou fesagaʻi ma puapuaga ogaoga ma faaumiumi. Ua moni ai upu o i le  Faataoto 27:11, auā maʻeu se faafiafiaina o Ieova i le anoanoaʻi o uso faamaoni i Ukraine o ē na tutumau pea e ui i mea leaga na faia e le Tiapolo.”—Alan i Ausetalia.

“Na maligi oʻu loimata ina ua ou faitau e uiga i uso i Ukraine. E tele mea na latou onosaia—o le umi na iai i le falepuipui, sauāina, faileagaina ma le vavae ese mai aiga. Ou te manaʻo e taʻu atu i uso o loo auauna pea i a outou faapotopotoga, ou te alofa ma faaaloalo tele iā i latou. O se fiafiaga iā te aʻu lo latou loto tetele ma le tutumau. Ou te iloa na ala ona latou malolosi ona o le agaga o Ieova. E latalata mai Ieova iā i tatou ma e naunau e fesoasoani mai.”—Sergei i Rusia.

“Na ou faitau i le 2002 Yearbook, ma na ou tagi ai. E toʻatele uso ma tuafāfine i la matou faapotopotoga o loo talatalanoa e uiga iā te outou. E tāua tele outou. O se fiafiaga iā te aʻu le iai i se aiga toʻatele faaleagaga faapena.”—Yeunhee i Korea i Saute.

“Ua matuā faagaeetia aʻu ona o lo outou talaaga o le faatuatua, onosai ma le loloto o lo outou alofa mo Ieova ma lona Malo. E iai taimi e matou te manatu māmā ai i le saʻolotoga o loo matou mauaina ma le sosia o taumafataga faaleagaga o loo saunia e Ieova mo i matou. Ae e leʻi faapena outou. O la outou faaaʻoaʻoga faamaoni ua fesoasoani iā i matou ina ia iloa e faapea, pe a iai sa tatou mafutaga lelei ma le Atua, o le a ia foaʻi maia le malosi iā i tatou e faafetaiaʻia ai so o se ituaiga o luʻi.”—Paulo i Pasili.

“Na ou mauaina le avanoa e faitau ai i mea na tutupu iā te outou i le 2002 Yearbook. O se mea na matuā faagaeetia ai aʻu, aemaise le tala faamomoiloto e uiga i le tuafafine o Lydia Kurdas. Ua avea o ia o sē e pele iā te aʻu.”—Nidia i Costa Rica.

“Sa māeʻa ona ou faitau i le 2002 Yearbook i le asō. O se mea na faamalosia ai loʻu faatuatua iā Ieova. E lē galo iā te aʻu le tala i le taimi na taumafai ai tagata e faapogaia le masalosalo o le ʻauuso agaʻi i uso na taʻimua. Ua ou iloa ai e lē tatau ona ou masalosalo i uso o loo taʻimua. Faafetai tele lava! E ese le faamalosiau o nei meaʻai faaleagaga ma ua saunia ai tatou i se taimi o le a tofotofoina ai lo tatou faatuatua.”—Leticia i le Iunaite Setete.

“Matou te faafetai atu mo le tusi matagofie o le Yearbook. O le toʻatele o le ʻautalaʻi, ua faatoʻā faitau lea i galuegafai a uso i Ukraine. Na faamalosia ai uso i inei. O le toʻatele o le ʻautalaʻi aemaise le ʻautalavou, ua faateleina mea latou te faia i le auaunaga. Ua avea nisi ma paeonia sauatoa po o paeonia lagolago foʻi. Na faalaeiauina i latou uma ona o tala e uiga i uso ma tuafāfine na auauna iā Ieova i lalo o faasāsāga.”—O se komiti o le auaunaga i se faapotopotoga i Ukraine.

Ua avea le faamaoni o o tatou uso i Ukraine o se faalaeiauga mo tagata o Ieova i le lalolagi aoao. O le mea moni, o le faitauina e lē aunoa o tala faagaeeloto o i le Yearbook i tausaga taʻitasi, o se auala lelei lenā e faamalosia ai lo tatou faatuatua ma le onosai i nei taimi tāua.—Eperu 12:1.