Ia “Vaevaetonuina le Upu Moni”

“Ia e taumafai ina ia avea oe ma lē ua fiafia mai i ai le Atua, o lē faigaluega e leai se mea e mā ai, na te vaevaetonuina le upu moni.”—2 TIMOTEO 2:15, LT.

1, 2. (a) Aiseā e manaʻomia ai e le ʻaufaigaluega ia meafaigaluega? (e) O le ā le galuega o loo faia e Kerisiano, ma e faapefea ona latou faaalia o loo latou muaʻi saʻili le Malo?

E MANAʻOMIA e le ʻaufaigaluega ia meafaigaluega ina ia fesoasoani iā i latou e faia a latou galuega. E lē lava le tau ina iai o so o se meafaigaluega. E manaʻomia e se tagata faigaluega le meafaigaluega saʻo, ma e ao ona ia faaaogāina i le auala saʻo. O se faaaʻoaʻoga, pe a fausia se tamaʻi faleoo, e te manaʻo e tutuʻi faatasi ni laupapa se lua, e iai la ma isi mea e te manaʻomia na i lo le na o le samala ma fao. E ao ona e iloa le auala e tutuʻi ai le fao i se laupapa e aunoa ma le piʻo o le fao. O le taumafai e tuʻituʻi se fao i se laupapa e aunoa ma le iloaina o le auala e faaaogā ai le samala, e faigatā ma e oo ai lava ina e fiu. Peitaʻi o meafaigaluega e saʻo ona faaaogā, e fesoasoani iā i tatou e faia ai galuega ma maua ai iʻuga e faamalieina ai.

² I le avea o ni Kerisiano, ua iai se galuega tatou te faia. O se galuega e sili ona tāua. Na faalaeiau Iesu Keriso i ona soo ina ia ‘muaʻi saʻili le malo.’ (Mataio 6:33) E faapefea ona tatou faia lenā mea? O le tasi o auala, o le maelega lea i le talaʻiga o le Malo ma le faia o soo. O le isi auala, o le faavae mausalī lea o la tatou faiva i le Afioga a le Atua. O le auala lona tolu, o le amio lelei. (Mataio 24:14; 28:19, 20; Galuega 8:25; 1 Peteru 2:12) Ina ia uigā ma fiafia i lenei tofiga faa-Kerisiano, e tatou te manaʻomia ai meafaigaluega talafeagai ma ia poto i le auala e taulimaina ai. Na faataatia e Paulo, o ia o se Kerisiano faigaluega lelei se faaaʻoaʻoga mataʻina i lenei vala, ma sa ia faalaeiau i le ʻauuso talitonu ina ia faaaʻoaʻo iā te ia. (1 Korinito 11:1; 15:10) O lea la, o le ā ua tatou aʻoaʻoina mai iā Paulo, o la tatou aumea faigaluega?

Paulo—O Sē Maelega e Faalauiloa le Malo

3. Aiseā e mafai ai ona faapea atu, o Paulo o se tagata faigaluega maelega o le Malo?

³ O le ā le ituaiga o tagata faigaluega e iai Paulo? E mautinoa lava o ia o se tagata faigaluega maelega. Sa matuā filigā Paulo i le faasalalauina atu o le tala lelei i le tele o nofoaga i le vaipanoa o le Metitirani. O le māfuaaga o lona folafola atu ma le aasa o le Malo, na faapea mai ai lenei aposetolo e lē faavaivai: “Auā afai ou te  folafola le tala lelei, e lē se mea lea ou te mitamita ai, auā ua leai saʻu faitalia i lea mea. Oi talofa foʻi iā te aʻu, pe a ou lē folafolaina le tala lelei.” (1 Korinito 9:16) Pe sa naunau Paulo i le faasaoina na o lona lava ola? E leai. E lē o ia o se tagata e manatu faapito. Na i lo lea, na ia faanaunau ina ia maua e isi aogā mai le tala lelei. Na ia tusi mai e faapea: “Ou te faia foʻi le mea nei ona o le tala lelei, ina ia tatou tofutofusia faatasi ma aʻu.”—1 Korinito 9:23, LT.

4. O le ā le meafaigaluega e sili ona faatāuaina e Kerisiano?

⁴ O Paulo o se tagata faigaluega lotomaulalo o lē na ia iloa e lē mafai ona ia faalagolago i lona lava tomai. E pei lava ona manaʻomia e se kamuta se samala, e faapena foʻi ona manaʻomia e Paulo se meafaigaluega talafeagai e faaoo atu ai le upu moni i loto o lana ʻaufaalogologo. O le ā le meafaigaluega autū na ia faaaogāina? O le Afioga a le Atua, le Tusi Paia. E faapena foʻi ona tatou faaaogāina le meafaigaluega autū, o le Tusi Paia, e fesoasoani ai iā i tatou ina ia faia tagata ma soo.

5. Ina ia avea ma faifeʻau uigā, o le ā e manaʻomia ona tatou faia e faaopoopo i le siiina atu o mau?

⁵ Na silafia e Paulo o le vaevaetonuina o le Afioga a le Atua e aofia ai le sili atu i le na o le siiina atu o mau. Na ia “pulunaunau atu” i isi. (Galuega 28:23) E faapefea? Sa taulau Paulo i le faaaogāina o le Afioga tusia a le Atua e faatalitonu ai le toʻatele ina ia taliaina le upu moni o le Malo. Na ia fefulifulisaʻi ma i latou. I masina e tolu i le sunako i Efeso, sa ia “lauga faamalosi atu, ma tautalatala, ma faaoleole iā i latou i mea a le malo o le Atua.” A ua “loto fatu nisi, ma ua lē talitonu,” ae o nisi sa latou faalogo. O le iʻuga o le faiva a Paulo i Efeso, “ua matuā tupu tele ai ma ua manumalo le afioga a le Alii.”—Galuega 19:8, 9, 20.

6, 7. O le ā le auala na vivii ai Paulo i lana faiva, ma e faapefea ona tatou faia faapena?

⁶ Talu ai o ia o sē e maelega e faalauiloa le Malo, na ‘vivii ai Paulo i lana faiva.’ (Roma 11:13) E faapefea? E leʻi fia sili o ia, pe mā e iloa o ia e le lautele o se tasi o le ʻaufaigaluega a le Atua. Na i lo lea, na ia manatu i lana faiva o se faaeaga e sili ona faamamaluina. Sa vaevaetonuina e Paulo le Afioga a le Atua ma le atamai ma le uigā. Sa fua tele mai lana galuega ma sa avea ma faalaeiauga mo isi, ma na uunaʻia ai i latou ia atili maelega i la latou faiva. I lenei foʻi auala, na viia ai lana faiva.

⁷ I le pei o Paulo, e mafai foʻi ona tatou vivii i la tatou galuega o ni faifeʻau e ala i le faaaogāina e lē aunoa ma le uigā o le Afioga a le Atua. E ao ona avea ma o tatou sini le tufa atu o se manatu mai le Tusi Paia i le tele o tagata e mafai ai, i vala uma o la tatou faiva i le fanua. E mafai faapefea ona tatou faatalitonuina isi? Ia iloilo auala tāua nei e tolu: (1) Ia taulaʻi atu i le Afioga a le Atua i se auala e mafai ai ona fiafia mai i ai tagata. (2) Ia faamatala ma le faautauta ma faatatau mea o fai mai ai le Tusi Paia. (3) Ia fefulifulisaʻi mai le Tusi Paia i se auala e faatalitonuina ai le tagata.

8. O ā meafaigaluega ua tatou maua i aso nei mo le talaʻiga o le Malo, ma e faapefea ona e faaaogāina?

⁸ I aso nei, ua iai meafaigaluega a ē faalauiloa le Malo ae e leʻi mauaina e Paulo i le taimi o lana faiva. E aofia ai i nei mea ia tusi, mekasini, polosiua, tamaʻi pepa, savali, lipine ma vitiō. I le amataga o le senituri ua mavae, sa faaaogā ai pepa e avatu ai se molimau, fonokalafi, taavale na iai mea e tāina ai lauga ma faasalalauga a le leitiō. Ae o le mea moni, o la tatou meafaigaluega sili ona lelei o le Tusi Paia, ma e manaʻomia ai ona tatou faaaogā ma le talafeagai lelei lenei meafaigaluega tāua.

E Tatau Ona Faavaeina la Tatou Faiva i le Afioga a le Atua

9, 10. O le ā ua tatou aʻoaʻoina mai le fautuaga a Paulo iā Timoteo e tusa ai ma le faaaogāina o le Afioga a le Atua?

⁹ E faapefea ona tatou faaaogāina le Afioga a le Atua o se meafaigaluega aogā? E ala i le utagiaina o upu nei a Paulo lea sa taulaʻi atu i lana aumea faigaluega o Timoteo e faapea: “Ia e taumafai ina ia avea oe ma lē ua fiafia mai i ai le Atua, o lē faigaluega e leai se mea e mā ai, na te vaevaetonuina le upu moni.” (2 Timoteo  2:15, LT) O le ā e aofia ai i le ‘vaevaetonuina o le upu moni’?

¹⁰ O le upu Eleni ua faaliliuina i le “vaevaetonuina” o lona uiga moni o le “saʻo ona tipiina” po o le “ia tipi saʻo.” E pau le taimi ua maua ai le faaupuga lenā i Tusitusiga Kerisiano Eleni, o le taimi na fautua atu ai Paulo iā Timoteo. E mafai ona faaaogāina le upu lava lenā e faamatalaina ai le sasaʻo o laina o le suaina o se fanua. A piʻo le suaina e mautinoa o le a māsiasi ai se tasi ua leva ona faifaatoʻaga. I le avea ma sē e “faigaluega e leai se mea e mā ai,” na faamanatu atu ai iā Timoteo e faapea e lē faatagaina le see ese mai aʻoaʻoga saʻo a le Afioga a le Atua. Sa lē tatau ona aʻoaʻo atu Timoteo e tusa ma ona lava manatu. Sa tatau ona faavae lana talaʻiga ma ana aʻoaʻoga i le Tusi Paia. (2 Timoteo 4:2-4) I lenei auala, sa maua ai e tagata loto faamaoni le fesoasoani ina ia latou vaai e pei ona silasila Ieova i mataupu, ae lē o le taliaina o filosofia faalelalolagi. (Kolose 2:4, 8) Ua moni foʻi lenā i aso nei.

Ia Lelei a Tatou Amio

11, 12. O le ā le sootaga o a tatou amio ma le vaevaetonuina o le Afioga a le Atua?

¹¹ E iai se isi mea e ao ona tatou faia i lo le na o le vaevaetonuina o le Afioga a le Atua, e ala i le faalauiloaina ma le saʻo o ana upu moni. E tatau foʻi ona talafeagai a tatou amio ma lana Afioga. E lē tatau ona avea i tatou ma ni tagata faigaluega pepelo talu ai ‘o le ʻau faigaluega i tatou faatasi ma le Atua.’ (1 Korinito 3:9) Ua faapea mai le Afioga a le Atua: “[O] lenei foʻi, o oe lē aʻoaʻo atu i le tasi tagata, e te lē aʻoaʻo ea oe iā te oe? o oe lē lauga atu, Aua le gaoi, e te gaoi ea oe? o oe lē fai ane, Aua le mulilua, e te mulilua ea oe? o oe lē matuā ʻinoʻino i tupua, e te faoa ea mea sa?” (Roma 2:21, 22) O lea la, i le avea o se ʻaufaigaluega a le Atua i aso nei, o se tasi o auala tatou te  vaevaetonuina ai le Afioga a le Atua o le utagiaina lea o le lapataʻiga lenei: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6.

¹² O ā iʻuga tatou te faatalitalia ona o le vaevaetonuina o le Afioga a le Atua? Seʻi tatou iloiloina le mana o le Afioga a le Atua i olaga o tagata loto faamaoni.

E Mafai Ona Suia Tagata e le Afioga a le Atua

13. O le ā e mafai e le faatatauina o le Afioga a le Atua ona ati aʻe i se tasi?

¹³ O le a tele se aafiaga i olaga o tagata pe afai latou te taliaina le maufaatuatuaina o le feʻau a le Afioga a Atua lea e fesoasoani iā i latou e faia suiga mataʻina i o latou olaga. Na silafia e Paulo le aogā o le Afioga a le Atua i tagata ma na ia molimauina aafiaga lelei iā i latou o ē na avea ma Kerisiano i Tesalonia anamua. O lea na ia faapea atu ai iā i latou: “Matou te faafetai ai i le Atua e lē aunoa, auā na talia e outou le afioga a le Atua na outou faalogo mai ai iā i matou, ua lē talia e outou o le upu a tagata, a e peitaʻi o le upu a le Atua, (e moni lava lea,) ua matuā galue foʻi lea i totonu iā te outou o ē faatuatua.” (1 Tesalonia 2:13) O le mea moni, sa iloa e na Kerisiano, ma soo moni uma o Keriso, e lē mafai ona faatusaina manatu faatauvaa o tagata i le atamai silisili o le Atua. (Isaia 55:9) O tagata Tesalonia sa latou “talia le upu i le puapuaga tele, ma le olioli mai le Agaga Paia,” ma avea ma faaaʻoaʻoga i isi tagata talitonu.—1 Tesalonia 1:5-7.

14, 15. E faapefea ona matuā galue le feʻau o le Afioga a le Atua, ma aiseā?

¹⁴ E malosi le Afioga a le Atua e pei foʻi o lona Pogai, o Ieova lea. E sau mai “le Atua soifua” o lē o lana upu na “faia ai le lagi,” ma e ‘manuia foʻi le mea e auina atu ai.’ (Eperu 3:12; Salamo 33:6; Isaia 55:11) Na faapea mai se tasi o tagata atamai o le Tusi Paia: “E lē faaesea e le Atua o ia mai i lana Afioga. E lē faafitia e ia lana Afioga e pei o se mea e ese iā te ia. . . . O lea, o loo ola pea lana Afioga ma e aogā; ma e autasia ai ma le Atua soifua.”

¹⁵ E faapefea ona matuā galue le feʻau mai le Afioga a le Atua? E iai sona malosi uigaese. Na talafeagai ona tusi mai Paulo e faapea: “Auā o loo ola le afioga a le Atua, o loo matuā galue foʻi, o loo sili foʻi lona maai i pelu uma e faatau maai itu, o loo vaevae foʻi e oo lava i le vavaeeseina o le loto ma le agaga, o gaugātino foʻi ma aano o ivi, o loo faamasino foʻi i manatu ma filifiliga o le loto.”—Eperu 4:12.

16. O le ā le tele e mafai ona suia ai e le Afioga a le Atua se tasi?

¹⁶ O le feʻau o loo i le Afioga tusia a le Atua e “sili foʻi lona maai i pelu uma e faatau maai itu.” O lea la, e iai sona malosi uigaese e sili atu na i lo meafaigaluega a tagata. O le Afioga a le Atua e mafai ona oo i totonu o le tagata i le loto ma le mafaufau ma suia ai le tagata i totonu, e aafia ai le auala e mafaufau ai ma mea e fiafia i ai ma avea ai o ia o se tagata faigaluega ua finagalo malie i ai le Atua. Maeu le malosi o le Afioga a le Atua!

17. Ia faamatala le malosi o le Afioga a le Atua e suia ai tagata.

¹⁷ E faaalia e le Tusi Paia po o le ā moni lava le tagata i totonu, e ese mai i le manatu o le tagata iā te ia lava, po o le auala o loo ia manaʻo e vaai atu ai isi iā te ia. (1 Samuelu 16:7) E oo foʻi i le tagata amioleaga e mafai ona natia ona uiga o le tagata i totonu ae faafoliga o se tagata agalelei pe toʻaga i le lotu. E amio faatagāfai ia tagata amioleaga mo māfuaaga leaga. O tagata faamaualuluga e faafoliga e lotomaulalo ae i le taimi e tasi e mananaʻo e maua viiga mai tagata. O lea la, e ala i le faaalia o le mea moni o i le loto, e mafai ona matuā galue le Afioga a le Atua e uunaʻia le tagata lotomaulalo e tō ese le tagata tuai, ae ‘oofu i le tagata fou ua faia e foliga i le Atua, i le amiotonu ma le amio lelei e faamaoni.’ (Efeso 4:22-24) O aʻoaʻoga a le Afioga a le Atua e mafai foʻi ona suia tagata matamumuli ia avea ma Molimau a Ieova loto tetele ma maelega e faalauiloa le Malo.—Ieremia 1:6-9.

18, 19. E faavae i nei palakalafa po o se mea na tupu totino i se tasi i le faiva i le fanua, ia faaalia mai le auala ua mafai ai e le upu moni o le Tusi Paia ona suia uiga o se tasi.

¹⁸ Ua iai aafiaga lelei i tagata i so o se mea ona  o le mana o le Afioga a le Atua e suia ai. O se faaaʻoaʻoga, o ē faalauiloa le Malo mai i Phnom Penh, Cambodia, na faalua i le masina ona talaʻi i le itumalo o Kompong Cham. Ina ua faalogo se faifeʻau tamaʻitaʻi o se tasi nuu o talanoa faasagatau isi faifeʻau i Molimau a Ieova, na ia faatulaga ai se feiloaʻiga ma Molimau i le isi taimi e toe asiasi ane ai i le itumalo. Sa ia tuu fesili iā i latou e uiga i le faamanatuina o aso mālōlō ma sa ia faafofoga lelei atu a o latou fefulisaʻi ma ia mai le Tusi Paia. Na ia faapea atu: “O lea ua ou iloa nei, e lē saʻo le mea na fai mai ai a matou faifeʻau e uiga iā te outou! Ua latou fai mai tou te lē faaaogāina le Tusi Paia, peitaʻi e na o le Tusi Paia lava lea tou te faaaogāina i le taeao lenei!”

¹⁹ Na faaauau le talanoaga a lenei tamaʻitaʻi ma Molimau ma e leʻi avea faamataʻuga o le faateʻa o ia o se faifeʻau e taofia ai o ia. Na ia faamatalaina lana talanoaga faale-Tusi Paia i sana uō tamaʻitaʻi, o lē na amata ona ia suʻesuʻe ma Molimau. Na matuā fiafia lana uō i mea sa ia aʻoaʻoina o lea i se tasi o a latou sauniga lotu sa ia auai ai, na uunaʻia ai o ia e faapea atu, “Ō mai, e suʻesuʻe le Tusi Paia ma Molimau a Ieova!” E leʻi umi lava, ae amata ona suʻesuʻe le Tusi Paia e le tamaʻitaʻi lea sa avea muamua ma faifeʻau, ma isi faatasi ai ma Molimau a Ieova.

20. E faapefea i se mea na tupu i se fafine i Ghana ona faaalia ai le mana o le Afioga a le Atua?

²⁰ Na faaalia foʻi le malosi o le Afioga a le Atua i se mea na tupu iā Paulina, o se fafine mai i Ghana. Sa faia e sē e faalauiloa le Malo faataimi atoa se suʻesuʻega faale-Tusi Paia ma ia i le tusi o Le Poto e Taʻitaʻiina ai i le Ola e Faavavau. * Sa tele avā a le tane a Paulina ma sa ia iloa le manaʻomia ona ia faia ni suiga, peitaʻi na matuā tetee lana tane ma ona tauaiga. Sa taumafai le tamā o lona tinā o se faamasino sili ma o se toeaina o le lotu, e taofia o ia mai i lea gaoioiga e ala i le faatatauina sesē o le Mataio 19:4-6. Na foliga mai e saʻo o ia, peitaʻi na vave ona iloa e Paulina e faapea foʻi le auala na mimilo sesē ai e Satani le Tusi Paia ina ua ia tofotofoina Iesu Keriso. (Mataio 4:5-7) Na ia manatua le fetalaiga manino a Iesu e faatatau i faaipoipoga, e faapea na foafoaina e le Atua tagata o le tane ma le fafine, ae lē o le tane ma fafine, ona avea ai lea o i laʻua e toʻalua, ae lē toʻatolu, ma tino e tasi. Sa ia maumauaʻi pea i lana filifiliga ma mulimuli ane tatalaina lana faaipoipoga. E leʻi umi, ae avea o ia o sē e papatisoina e faalauiloa ma le fiafia le Malo.

Ia Faaauau Pea Ona Vaevaetonuina le Afioga a le Atua

21, 22. (a) O le ā le faanaunauga tatou te mananaʻo ia iā i tatou o ē faalauiloa le Malo? (e) O le ā o le a tatou iloiloina i le mataupu o sosoo mai?

²¹ E moni lava o se meafaigaluega malosi le Afioga tusia a le Atua, lea e mafai ona tatou faaaogā e fesoasoani ai i isi ia faia ni suiga i o latou olaga, ma faalatalata atu ai iā Ieova. (Iakopo 4:8) E pei lava ona faaaogā e tagata faigaluega tomai ia meafaigaluega ina ia maua ai ni iʻuga lelei, seʻi faapena foʻi lo tatou faanaunauga e faia taumafaiga e faaaogā ai ma le atamai le Afioga a le Atua le Tusi Paia, i la tatou galuega ua tuuina mai e le Atua o ē faalauiloa le Malo.

²² E mafai faapefea ona atili uigā ona tatou vaevaetonuina le Tusi Paia i la tatou galuega o le faia o soo? O se tasi o auala e ala lea i le ati aʻe o o tatou tomai o ni faiaʻoga e faatalitonuina isi. Faamolemole, seʻi uaʻi atu i le isi mataupu o loo sosoo mai, auā o loo fautuaina ai auala e aʻoaʻo ma fesoasoani ai i isi ina ia talia le feʻau o le Malo.

[Faamatalaga pito i lalo]

Pe E te Manatua?

• O ā meafaigaluega ua maua e ē faalauiloa le Malo?

• I ā auala na avea ai Paulo o se faaaʻoaʻoga o se tagata faigaluega o le Malo?

• O le ā e aofia ai i le vaevaetonuina o le Afioga a le Atua?

• E faapeʻī le malosi o le Afioga tusia a Ieova?

[Fesili mo le Suʻesuʻega]

[Ata i le itulau 10]

O nisi o meafaigaluega o loo faaaogā e Kerisiano i le galuega o le faalauiloaina o le Malo