Pe Talafeagai Lou Talitonu i se Lalolagi Parataiso?

E TOʻAITIITI tagata e talitonu e faapea, o le a avea lenei lalolagi ma parataiso. E manatu le toʻatele o le a lē faaauau pea ona iai le lalolagi. E tusa ai ma le tusi The Sacred Earth na tusia e Brian Leigh Molyneaux e faapea, na māfua ona iai le lalolagi ona sa tupu faafuaseʻi se pa telē i le vateatea i le faitau miliona o tausaga ua mavae. Afai e lē faaumatia le lalolagi e faiga a tagata lava latou, e toʻatele ua talitonu faapea, o le lalolagi ma le vateatea aoao e ono “toe fai ifo i totonu ma avea o se polo aasa.”

E leʻi talitonu i ai le fatu solo o John Milton i le senituri lona 17, i na manatu lē saʻo. I lana solo taʻutaʻua o le Paradise Lost, na ia tusia ai e faapea na foafoaina e le Atua le lalolagi ina ia avea ma aiga parataiso o tagata. Ae na leiloa le uluaʻi parataiso. Peitaʻi, na talitonu Milton o le a toe faafoʻisia lea parataiso, ona ua avea Iesu ma togiola ma i se aso o le a ia “tauia ai ona tagata faamaoni ma avatu iā i latou faamanuiaga o le ola i le Lagi po o le Lalolagi.” Na faalauiloa ma le mautinoa mai e Milton e faapea: “Ona avea ai lea o le Lalolagi ma Parataiso.”

Parataiso—I le Lagi po o le Lalolagi?

E toʻatele tagata lotu e manatu e pei o Milton e faapea, o le a tauia i latou ona o puapuaga ma tigā na latou onosaia i inei i le lalolagi. Peitaʻi, o fea o le a latou olioli ai i lenā taui? Pe “i le Lagi po o le Lalolagi”? E lē o manatu nisi i le faamoemoe i le taui i le lalolagi. Ua latou faapea mai, o le a faatoʻā olioli tagata i le “manuia” pe a latou tuua le lalolagi ma soifua i le nofoaga agaga i le lagi.

Na faapea mai tusitala o C. McDannell ma B. Lang i le tusi Heaven—A History e faapea, i le senituri lona lua na talitonu ai le failotu e suafa iā Irenaeus e faapea o le a toe faafoʻisia le parataiso “e lē i le nofoaga agaga i le lagi, ae i luga o le lalolagi.” E tusa ai ma lenā tusi, e ui lava na faamoemoe taʻitaʻi lotu e pei o Ioane Kalavini ma Matini Luteru e ō i le lagi, ae sa la talitonu foʻi e faapea “o le a toe faafouina e le Atua le lalolagi.” Sa faapena foʻi le talitonuga a tagata o isi lotu. Ua faapea mai foʻi McDannell ma Lang e talitonu isi tagata Iutaia e faapea i le taimi atofaina a le Atua, o puapuaga uma o tagata o le a “aveesea ma o le a mafai ona ola i se olaga faamalieloto i le lalolagi.” Ua faapea mai le The Encyclopaedia of Middle Eastern Mythology and Religion, e tusa ai ma le talitonuga faaanamua a tagata Peresia anamua, “o le a toe faafoʻisia le tulaga sa iai muamua le lalolagi ma o le a ola fiafia ai tagata.”

O le ā na tupu i le faamoemoe o le ola i se lalolagi parataiso? Pe ua avea le lalolagi ma se mea e tau ina nonofo ai mo se taimi lē tumau? E tusa ai ma le manatu o se faifilosofia Iutaia o Philo na soifua i le uluaʻi senituri, pe o lenei olaga ua na o se “taimi puupuu e tumu i mea faigatā” a o faimalaga atu i le nofoaga o agaga? Pe na iai se isi fuafuaga a le Atua ina ua ia foafoaina le lalolagi ma tuu i ai tagata e ola i se olaga i le parataiso? Pe e mafai ona faamalieina faaleagaga tagata i se olaga manuia i lenei lalolagi? Aiseā e lē iloilo ai le mea ua fai mai ai le Tusi Paia e faatatau i lenei mataupu? Atonu e te ono manatu e pei ona manatu i ai le faitau miliona o tagata e faapea, e talafeagai ona faamoemoe e toe faafoʻisia le lalolagi parataiso.

[Ata i le itulau 3]

Na talitonu le fatusolo o John Milton e faapea, o le a toe faafoʻisia le parataiso

 [Faamatalaga i Ata i le itulau 2]

FAAVAA: Lalolagi: U.S. Fish & Wildlife Service, Washington, D.C./NASA

[Faamatalaga i Ata i le itulau 3]

Lalolagi: U.S. Fish & Wildlife Service, Washington, D.C./NASA; John Milton: Leslie’s