Fesili Mai le ʻAufaitau

O le ā na tupu i le taimi o le taualumaga lea o loo faamauina i le Esoto 4:24-26, ma o le ola o ai na lamatia ai?

Sa ō atu Mose ma lana avā o Sepora, ma ona atalii o Keresoma ma Eliasa i Aikupito, ae tupu ai loa le taualumaga lenei: “Sa i le ala o ia, ona fetaiaʻi lea o Ieova ma ia, ina o i le mea e moe ai, ua fia fasioti iā te ia. Ona tago lea o Sepora i le fatu, ua tipi ese ai le paʻu o le tino o lana tama, ua lafo atu i ona vae, ua faapea atu, E moni, o le tane toto lima lava oe iā te aʻu. Ona tuu atu lea o ia iā te ia; ona faapea atu ai lea o le fafine, O le tane toto lima lava oe, ona o le peritomega.” (Esoto 4:20, 24-26) E ui e lē o manino mai lenei fuaitau, ma e lē mafai ona mautinoa i lona uiga, ae ua faamalamalama mai e le Tusi Paia le uiga o nei fuaiupu.

E lē o taʻu patino maia e le Tusi Paia po o le ola o ai na lamatia. Ae peitaʻi, e mafai ona tatou faia se faaiʻuga saʻo e faapea, e lē o le ola o Mose na lamatia, auā o lea faatoʻā uma ona ia maua se tofiga mai le Atua na te taʻitaʻieseina le nuu o Isaraelu mai Aikupito. (Esoto 3:10) E foliga mai la, e lē o le ola o Mose lea na faamataʻuina e le agelu a le Atua, a o alu atu e faataunuuina lenā tofiga. Atonu o le ola o se tasi o ona atalii. Ua faapea mai le tulafono lea na tuuina atu iā Aperaamo e uiga i le peritomeina: “A o le tane foʻi ua lē peritomeina, o lē ua lē peritomeina i le paʻu o lona tino e vavaeeseina lea tagata i lona nuu; ua tuumavaega ia i le feagaiga.” (Kenese 17:14) Talu ai, e leʻi peritomeina e Mose lona atalii, na faamataʻuina ai e le agelu a Ieova le ola o le tama.

O vae o ai na paʻi atu i ai le paʻu ina ua peritomeina e Sepora le paʻu o le tino o lana tama ona o le taumafai ina ia faasaʻoina le mataupu? O le agelu a Ieova lea sa iai le mana e faaoo ai le oti i le atalii e leʻi peritomeina. Ua talafeagai ai la ona lafo atu e Sepora le paʻu o le tino na peritomeina o lana tama ma paʻi atu i vae o le agelu, e fai ma faamaoniga o lona gauaʻi atu i le feagaiga.

O le faaupuga a Sepora e faapea, “o le tane toto lima lava oe iā te aʻu” o se faaupuga e lē masani ona faia e se tasi. Ae o le ā ua faaalia ai i lenei faaupuga e uiga iā Sepora? O lona gauaʻi atu i mea na manaʻomia e le feagaiga o le peritomeina, na faailoa atu ai e Sepora se faiā faale-feagaiga ma Ieova. O le feagaiga o le Tulafono lea na osia mulimuli ane ma le nuu o Isaraelu, na faaalia ai e faapea, i se faiā faale-feagaiga, ua manatu ai iā Ieova o se tane, ma i le isi vaega o se avā. (Ieremia 31:32) I lea, i le taʻua o Ieova (e ala i lana agelu) o se “tane toto lima,” e foliga mai na faailoa atu ai e Sepora lona lava gauaʻi atu i faaupuga o lenā feagaiga. E peiseaī na ia talia le tulaga e pei o se avā i le feagaiga o le peritomeina, ae pei Ieova o se tane. Po o le ā lava le tulaga, ae o lana gaoioiga maumauaʻi o le usiusitai i mea na manaʻomia e le Atua, na lē toe lamatia ai le ola o lana tama.