Le Talisuaga Afiafi a le Alii—Pe Faapefea Ona Faamanatuina?

I LE faamalamalamaina o le faamanatuina o le Talisuaga Afiafi a le Alii, ua tusi mai ai le aposetolo Kerisiano o Paulo e faapea: “O aʻu, na ou maua mai le Alii le mea na ou tuuina atu foʻi iā te outou, O lea lava pō na faalataina ai le Alii o Iesu, na ia tago ai i le areto; ua ia faafetai, ona tofitofi ai lea, ma fai atu, ‘O loʻu tino lenei mo outou, ia outou faia lenei mea ma faamanatuga iā te aʻu.’ Ua ia faapea foʻi i le ipu ina ua uma ona aai, ua faapea atu, ‘O le ipu lenei o le feagaiga fou lea i loʻu toto; ia outou faia lenei mea ma faamanatuga iā te aʻu i aso uma tou te feinu ai.’ Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seʻia afio mai o ia.”—1 Korinito 11:23-26.

E pei ona fai mai Paulo, na faia e Iesu le Talisuaga Afiafi a le Alii ‘i le pō o le a tuuina atu ai Iesu’ e Iuta le Sekara i taʻitaʻi lotu Iutaia, o ē na uunaʻia ia tagata Roma ina ia faasatauro le Keriso. O lenā talisuaga, na faia i le pō o le Aso Tofi, Mati 31, 33 T.A. Na maliu Iesu i se laau faaoosala i le aoauli o le Aso Faraile, iā Aperila 1. Talu ai, o aso o le kalena faa-Iutaia e amata mai i le pō o le tasi aso e oo i le pō o le isi aso e sosoo ai, o le Talisuaga Afiafi la a le Alii ma le maliu o Iesu Keriso, na faia uma lava i le aso lenā—Nisani 14, 33 T.A.

E tatau iā i latou e aai i le areto ma inu i le uaina ona ‘⁠faia lenei mea ma faamanatuga iā’ Iesu. Ua taʻua foʻi le Talisuaga Afiafi a le Alii o le Faamanatuga o le maliu o Keriso.

Aiseā e Faamanatu ai le Maliu o Iesu?

E maua le tali pe afai e malamalama i le māfuaaga o lona maliu. Sa maliu Iesu a o avea ma sē e aupito sili i le lagolagoina o le pule silisili ese a Ieova. Ona o lea, na ia faamaonia ai le pepelo o Satani i le faia o se tuuaʻiga e faapea, e na o faanaunauga manatu faapito lava e ala ai ona auauna tagata i le Atua. (Iopu 2:1-5; Faataoto 27:11) E ala i lona maliu o se tagata lelei atoatoa, na ‘foaʻiina atu ai e Iesu lona ola e fai ma togiola e sui aʻi tagata e toʻatele.’ (Mataio 20:28) Ina ua agasala Atamu faasaga i le Atua, na ia melea ai le ola lelei atoatoa faaletagata ma ona faamoemoega i le lumanaʻi. Ae “ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia le fano se tasi e faatuatua iā te ia, a ia maua e ia le  ola e faavavau.” (Ioane 3:16) E moni, “o le oti, o le totogi lea o le agasala; a o le ola e faavavau, o le mea foaʻifuaina mai lea e le Atua, i lo tatou Alii o Keriso Iesu.”—Roma 6:23.

I lea, ua fesootaʻi atu ai le maliu o Iesu Keriso i faailoaga aupito sili e lua o le alofa—o le alofa ua faaalia e Ieova mo le fanau a tagata i le foaʻiina mai o lona Alo, faapea le alofa faataulagaina na faaalia e Iesu mo le fanau a tagata e ala i le foaʻiina mai ma le loto malie o lona soifua faaletagata e fai ai le taulaga. O le Faamanatuga o le maliu o Iesu, ua matuā faamaualugaina ai nei faailoaga e lua o le alofa. Talu ai o i tatou o loo taliaina lenei alofa, pe tatou te lē faaalia ea lo tatou lotofaafetai mo lea mea? O le tasi o auala e faia ai faapea, o lou auai lea i le faamanatuina o le Talisuaga Afiafi a le Alii.

Faatusa o le Areto ma le Uaina

Ina ua faavaeina le Talisuaga Afiafi a le Alii, sa faaaogā e Iesu se areto ma se ipu uaina mūmū e fai ma faatusa. Na tago Iesu i le areto, “ua ia faafetai, ona tofitofi ai lea, ma fai atu, [o le areto lenei], o le faatusa o loʻu tino ua tofitofi ma sui o outou.” (1 Korinito 11:24, NW) E tatau ona tofitofi le areto ina ia mafai ona tufatufa atu ma taumafaina, talu ai o se areto manutinuti na faia i le falaoamata ma le vai e aunoa ma se fefete. I le Tusi Paia, o le fefete ua faaatagia ai le agasala. (Mataio 16:11, 12; 1 Korinito 5:6, 7) E leʻi agasala Iesu. O le mea lea, ua talafeagai ai ona avea lona tino faaletagata lelei atoatoa e fai ma taulaga togiola mo le fanau a tagata. (1 Ioane 2:1, 2) Maʻeu le matuā talafeagai ona lē faafefeteina le areto lea ua fai ma sui o le tino faaletagata e lē agasala o Keriso!

Na faafetai foʻi Iesu mo le ipu uaina mūmū e leʻi suia, ma faapea atu: “O le ipu lenei o le [“faatusa,” NW] o le feagaiga fou lea i loʻu toto.” (1 Korinito 11:25) O le uaina mūmū i le ipu, ua fai ma sui o le toto o Iesu. E pei lava ona aogā le toto o taulaga na osia i povi poʻa ma oti i le feagaiga o le Tulafono i le va o le Atua ma le nuu o Isaraelu i le 1513 T.L.M., ua faapena foʻi ona aogā le feagaiga fou ona o le toto maligi o Iesu ina ua maliu.

O Ai e Taumamafa Ai?

Ina ia faailoa mai po o ai moni e tatau ona taumamafa i le areto ma le uaina o le Faamanatuga, e manaʻomia ona tatou malamalama po o le ā le feagaiga fou ma o ai foʻi e aofia ai. Ua taʻua i le Tusi Paia e faapea: “O loo fetalai mai Ieova, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta. . . . Ou te tuuina laʻu tulafono i totonu iā te i latou, ma ou tusi ai i o latou loto; e fai foʻi aʻu mo latou Atua, o i latou foʻi e fai moʻu nuu. . . . auā ou te faamagalo i a latou amio leaga, ma ou lē toe manatua a latou agasala.”—Ieremia 31:31-34.

O le feagaiga fou, ua mafai ai ona faia se faiā faapitoa ma Ieova le Atua. E ala i lenei feagaiga, ua avea ai se vaega patino o ni tagata ma ona nuu ma avea ai o ia ma o latou Atua. Ua tusia tulafono a Ieova i totonu iā te i latou, ma o latou loto. E oo foʻi i tagata e lē o i le lotoā o tagata Iutaia ua peritomeina i le tino, e mafai ona aofia ai i se faiā ma le Atua ona o lea feagaiga. (Roma 2:29) Ua taʻua e le tusitala o le Tusi Paia o Luka e uiga i le fuafuaga a le Atua e ‘silasila atu i nuu ese, e maua ai se nuu mo lona suafa.’ (Galuega 15:14) E tusa ai ma le faamatalaga i le 1 Peteru 2:10, o ē “na lē fai ma nuu anamua, a o ona pō nei, ua fai ai ma nuu o le Atua.” Ua taʻua i latou i le Tusi Paia o “le Isaraelu o le Atua,” le Isaraelu faaleagaga lea.  (Kalatia 6:16; 2 Korinito 1:21) O le feagaiga fou la, o le feagaiga lea i le va o Ieova le Atua ma le Isaraelu faaleagaga.

I lona pō mulimuli ma ona soo, na faia ai foʻi e Iesu se isi feagaiga ma i latou. Na ia fetalai atu iā i latou e faapea: “E faapei ona tofia mai e loʻu Tamā o le malo iā te aʻu, e faapea foʻi ona ou tofia outou.” (Luka 22:29) O le feagaiga lea o le Malo. O le aofaʻi o tagata lē lelei atoatoa ua aveina atu mo lea feagaiga o le Malo, e 144,000. Pe a uma ona toe faatutūina i latou i le lagi, o le a pule faatasi i latou ma Keriso e avea ma tupu ma ositaulaga. (Faaaliga 5:9, 10; 14:1-4) I lea, o i latou o loo aofia i le feagaiga fou ma Ieova le Atua, o loo aofia ai foʻi i le feagaiga mo se Malo faatasi ma Iesu Keriso. E na o i latou lava na ua talafeagai ona taumafaina le areto ma le uaina i le Talisuaga Afiafi a le Alii.

E faapefea ona iloa e i latou o taumafaina le areto ma le uaina o le Faamanatuga o loo iai i latou i se faiā tutasi ma le Atua, ma o ni suli faatasi ma Keriso? Ua faamatala mai e Paulo: “O loo molimau mai lea lava Agaga [paia] i o tatou agaga [mafaufau], o fanau i tatou a le Atua. Afai foʻi o fanau i tatou, o suli foʻi, o suli lava o le Atua, o suli faatasi ma Keriso; pe afai tatou te tigā faatasi ma ia, ina ia faamanuiaina foʻi i tatou faatasi ma ia.”—Roma 8:16, 17.

E ala i lona agaga paia, po o le mana galue, ua faauuina ai e le Atua ia suli faatasi ma Keriso. O lenei mea ua faamautinoa atu ai iā i latou, o i latou o suli o le Malo. E faatupuina ai e le agaga i totonu o Kerisiano faauuina se faamoemoe faalelagi. E latou te manatu, o mea uma o loo fai mai ai le Tusi Paia e uiga i le ola faalelagi, o loo faasino atu lea iā i latou. E lē gata i lea, ua latou loto malilie e faataulagaina a latou fesootaʻiga uma faalelalolagi, e aofia ai le olaga faalelalolagi ma faiā uma faaletagata. E ui lava ua silafia e Kerisiano faauuina le matagofie o le olaga i le lalolagi Parataiso, ae e lē o lo latou faamoemoe lenā. (Sala 37:11) E lē pogai lenei mea ona o aʻoaʻoga a lotu sesē, ae ona o le gaoioiga a le agaga o le Atua, ua iā i latou se faamoemoe faalelagi e lē toe mafai ona suia, o le mea lea, ua talafeagai ai ona latou taumafaina le areto ma le uaina o le Faamanatuga.

Seʻi faapea e lē o mautinoa e se tagata o ia e aofia ai i le feagaiga fou ma le feagaiga o le Malo. Ae faapefea foʻi la pe afai e lē o molimau atu le agaga o le Atua e faapea, o ia o se suli faatasi ma Keriso? E lē tatau la mo ia ona ʻai ma inu i le areto ma le uaina o le Faamanatuga. O le mea moni, o le a lē fiafia le Atua i lenā tagata pe afai e ʻai ma inu o ia ma le faalētatau ma manatu e faapea, o ia o se tupu ma o se ositaulaga faalelagi ae e leʻi valaauina moni o ia.—Roma 9:16; Faaaliga 22:5.

E Faafia Ona Fai?

Pe e tatau ona faamanatuina faalevaiaso pe atonu foʻi i aso uma le maliu o Iesu? Na faavaeina e Iesu le Talisuaga Afiafi a le Alii ma fasiotia ai ma le lē tonu i le aso o le Tausamiga o le Paseka. I le na o le faatasi i le tausaga ona faia o le Paseka iā Nisani 14, sa faamanatuina ai le laveaʻiina o Isaraelu mai le faapologaina i Aikupito. (Esoto 12:6, 14; Levitiko 23:5) O lea, o le maliu o “Keriso la tatou paseka” e tatau ona faamanatuina e na o le faatasi i tausaga taʻitasi, ae lē o vaiaso taʻitasi. (1 Korinito 5:7) O lea, e pei ona faia e Iesu, e ao i Kerisiano ona mulimuli i le taualumaga lava lea na faia ai e Iesu le Talisuaga Afiafi a le Alii.

O le ā la le uiga o upu a Paulo e faapea: “O aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seʻia afio mai o ia”? (1 Korinito 11:26) I lea, na ia faapea mai, e so o se taimi e taumafa ai e  Kerisiano faauuina le areto ma inu i le uaina, e latou te faailoa atu ai lo latou faatuatua i le taulaga togiola a Iesu.

E faamanatuina pea e Kerisiano faauuina le maliu o Keriso “seʻia afio mai o ia.” O le a faaauau pea ona faia o lenei faamanatuga seʻia afio mai Keriso e talia i le lagi ona soo faauuina i le toetū i le ola faaleagaga i le taimi o lona faatasi mai. (1 Tesalonia 4:14-17) E ōgatusa lenei mea ma fetalaiga a Iesu i ona aposetolo faamaoni e toʻa 11: “Afai foʻi ou te alu ma sauni se mea e nonofo ai outou, ou te toe sau, ou te talia foʻi outou ia faatasi ma aʻu; ina ia i ai outou i le mea ou te i ai aʻu.”—Ioane 14:3.

O le ā le Uiga o Lenei Mea mo Oe?

Pe e talafeagai ona e ʻai ma inu i le areto ma le uaina o le Faamanatuga ina ia e maua ai aogā mai le taulaga a Iesu ma e ola ai e faavavau i le lalolagi? E leai. E leai se mea i le Tusi Paia o taʻua mai ai e faapea, pe a toe faatutūina i le lalolagi ia tagata matataʻu i le Atua e pei o Noa, Aperaamo, Sara, Isaako, Repeka, Iosefa, Mose, ma Tavita, o le a latou taumamafa i le areto ma feinu i le uaina. Peitaʻi, e tatau iā i latou uma ma isi o loo naunau e ola e faavavau i le lalolagi ona faatuatua i le Atua ma Keriso faapea le sauniuniga a Ieova i le taulaga togiola a Iesu. (Ioane 3:36; 14:1) E tatau foʻi ona e faatuatua ina ia maua le ola e faavavau. O lou auai i le faamanatuina faaletausaga o le maliu o Keriso, ua faamanatu mai ai iā i tatou e uiga i lenā taulaga aupito sili ma e tatau ona matuā faaalia lou lotofaafetai mo lea sauniuniga.

Ua faamamafa mai e le aposetolo o Ioane le tāua o le taulaga a Iesu i lona faapea mai: “Ou te tusi atu nei mea iā te outou, ina neʻi agasala outou [oʻu uso faauuina]; pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea, o lē amiotonu. O le togiola foʻi o ia mo a tatou agasala, e lē gata foʻi i a tatou, a e atoa foʻi ma agasala a le lalolagi uma lava.” (1 Ioane 2:1, 2) Ua mafai ai ona faapea mai le vasega faauuina, o le taulaga a Iesu o le togiola talafeagai lea mo a latou agasala. Ae o se taulaga foʻi mo agasala a le lalolagi uma, ua mafai ai ona maua e le fanau a tagata usiusitai le ola e faavavau.

Po o le a e auai i le faamanatuina o le maliu o Iesu i le aso 4 o Aperila, 2004? O le a faia lenei faamanatuga e Molimau a Ieova i le lalolagi aoao i nofoaga e fai ai a latou sauniga. Afai e te auai, o le a e maua la aogā mai lou faalogologo atu i se lauga e sili ona tāua e faavae mai le Tusi Paia. O le a faamanatu atu ai iā te oe le tele o mea lelei ua faia e Ieova le Atua ma Iesu Keriso mo i tatou. O le a tauia ai faaleagaga i tatou pe a tatou faapotopoto faatasi ma i latou o ē o manatu mamafa mo le Atua ma Keriso faapea le taulaga togiola a Keriso. O le a faamalosia ai e lenei sauniga lou faanaunauga ina ia maua le alofa tunoa o le Atua, ma iʻu ai i le ola e faavavau. Aua neʻi iai se mea e faalavelavea ai oe mai lou auai i lenei sauniga faamāfanafana loto e faamamaluina ma faafiafia ai le finagalo o lo tatou Tamā faalelagi, o Ieova le Atua.

[Ata i le itulau 5]

E fesootaʻi le maliu o Iesu ma faailoaga aupito sili e lua o le alofa

[Ata i le itulau 6]

O le areto e lē faafefeteina ma le uaina, o ni faatusa talafeagai ia o le tino e leai se agasala ma le toto maligi o Iesu