Se Faamanatuga e Aafia ai Oe

A O IAI Iesu Keriso i le lalolagi, na ia faavaeina ai se faamanatuga e faamamaluina ai le Atua. E na o le pau lava lenei o le sauniga faalotu na ia poloaʻiina saʻo lava ona soo ina ia faamanatuina. O le Talisuaga Afiafi lea a le Alii, e taʻua foʻi o le Talisuaga Mulimuli.

Seʻi faapea sa e vaaitino i mea na tutupu a o leʻi faia lenā sauniga. O loo faapotopoto faatasi Iesu ma ona soo i se potu i luga o se fale i Ierusalema mo le faamanatuina o le Paseka a Iutaia. Ua uma ona taumafa le tausamiga masani o le Paseka, ua iai le tamaʻi mamoe tunu, o laau oona, le areto e lē faafefeteina, ma le uaina mūmū. Ua alu ese le aposetolo lē faamaoni o Iuta le Sekara ma ua lē o toe umi ona ia faalataina lea o lona Matai. (Mataio 26:17-25; Ioane 13:21, 26-30) E na o Iesu lava ma ona aposetolo faamaoni e toʻa 11 o loo iai. O Mataio, o se tasi o i latou.

O le auala lenei na faia ai e Iesu le Talisuaga Afiafi a le Alii, e tusa ma le faamatalaga a le molimau vaaitino o Mataio: Ua “tago Iesu i le areto [e lē faafefeteina], ua faafetai, ona tofitofi ai lea, ma avatu i le ʻausoo, ua faapea atu, “Inā tago ia, inā aai; o loʻu tino lenei.” Ua tago foʻi o ia i le ipu, ua faafetai, ona avatu ai lea e ia iā te i latou, ua faapea atu, “Inā inu ia outou uma i ai; auā o loʻu toto lenei, o le toto o le feagaiga ua faamaligiina mo tagata e toʻatele e faamagalo aʻi agasala.”—Mataio 26:26-28.

Aiseā na faavaeina ai e Iesu le Talisuaga Afiafi a le Alii? A o faia lenei mea, aiseā na ia faaaogāina ai se areto e lē faafefeteina ma se uaina mūmū? Pe sa tatau i soo uma o Keriso ona taumamafa i le areto ma le uaina? E faafia ona faamanatuina lenei talisuaga? Pe e iai moni sona uiga mo oe?