Talaaga o le Soifuaga

O ni Faataulaga Itiiti na Faaʻoa ai i Maʻua i Faamanuiaga

FAAMATALAINA E GEORGE MA ANN ALJIAN

E ma te leʻi mafaufauina lava ma laʻu avā e faapea, o le a iai se aso o le a ma feaveaʻia ai le faaaogāina o le upu “faiaʻoga” ma le upu “imoa.” Ma te leʻi mafaufauina foʻi ma laʻu avā e faapea pe a sili i le taʻi 60 o ma tausaga, o le a ma aʻoaʻoina ai ni tusitusiga i ni mataʻitusi e lē masani ai ma taumafai e fesootaʻi atu i tagata mai Sasaʻe Mamao. Peitaʻi, o mea nei na ma faia ma Ann i le tusa o le 1985-1989. Seʻi o ma faamatalaina atu le auala na avea ai ni faataulaga itiiti na ma faia a o faagasolo tausaga e avea ma mea na aumaia ai le tele o faamanuiaga.

OU TE sau mai i se aiga i Armenia ma ou te lotu i le lotu Armenia. O Ann o ia o se Katoliko Roma. Na ma faia ni fetuutuunaʻiga i o ma talitonuga faalotu ina ua ma faaipoipo i le 1950. E 27 oʻu tausaga a o Ann e 24. Na ma nonofo i le fogāfale i luga o se fale mautotogi a o le pito i lalo sa fai ai laʻu pisinisi dry-cleaning i le Jersey City, New Jersy, i le Iunaite Setete o Amerika. E oo ane i le taimi lenā ua fā tausaga talu ona ou umia lenei pisinisi.

I le 1955, na ma faatauina ai se fale manaia lava e tolu potu moe i Middletown, New Jersey. E 40 maila (60 kilomita) le mamao o le fale lenā mai i laʻu pisinisi lea ou te galue ai i le ono aso o le vaiaso. Ou te tuai mai lava i le fale i pō uma. Na pau le fesootaʻiga na ou maua ma Molimau a Ieova, o taimi na latou ō mai ai i laʻu pisinisi ma tuu mai iā te aʻu lomiga faale-Tusi Paia. Sa ou matuā naunau i le faitauina o lomiga. E ui lava na tele loʻu taimi na alu ma ou uaʻi atu i laʻu pisinisi, ae na ou atiaʻe se faaaloalo loloto mo le Tusi Paia.

 E leʻi umi ae ou iloaina, o loo faasalalau mai e le alāleo o le leitiō a le Watchtower, o le WBBR, lauga faale-Tusi Paia i taimi ia ou te malaga ai i laʻu pisinisi ma toe foʻi ai i le fale. Sa ou faalogologo ma le faaeteete i nei lauga, ma na faatupuina ai loʻu naunau ma ou fai atu ai i se Molimau e asiasi mai iā te aʻu. Iā Novema 1957, na asiasi mai ai George Blanton i loʻu fale ma amata ai la ma suʻesuʻega faale-Tusi Paia.

Ua Autasia lo Matou Aiga i le Tapuaʻiga Mamā

Na faapefea ona manatu Ann i lenei mea? Seʻi tuu atu e na te faamatalaina atu iā te outou.

“O loʻu uiga muamua lava i lenei suʻesuʻega, o le matuā tetee lea. Na avea aʻu ma faalavelave i taimi o suʻesuʻega a George o lea, na ia filifili ai loa e fai le suʻesuʻega i se isi nofoaga, ma sa faia faapea mo le valu masina. A o faagasolo lenā taimi, na amata ona auai George i sauniga i Aso Sa i le Maota o le Malo. Na ou iloa i le taimi lenā, ua matuā tāua iā te ia lana suʻesuʻega faale-Tusi Paia, auā e na o le pau lenā o lona aso e lē faigaluega ai. Ioe, na tumau pea ona avea o ia o se tane ma se tamā lelei—na atili ai ona lelei ma na amata ai ona suia oʻu uiga. O le mea moni, i nisi taimi a o oʻu soloina le tamaʻi laulau i le potu mālōlō ae lē o tilotilo mai se isi, ou te aveina ai le mekasini o le Awake! lea e masani ona tuu e George i inā ma ou faitauina. I isi taimi, e faitau mai ai e George mataupu o le Awake! ia e lē o faasino tuusaʻo atu i aʻoaʻoga peitaʻi, e masani ona faatāuaina ai Lē na Foafoaina Mea.

“I se tasi afiafi a o alu George i le la suʻesuʻega ma le uso o Blanton, na ou faitauina ai se lomiga na tuu e la ma tama o George e lua tausaga i autafa o loʻu moega. Sa talanoaina i le lomiga le faamoemoe mo ē maliliu. E ui ina sa ou vaivai, ae na amata ona ou faitauina le lomiga talu ai e leʻi leva ona maliu le tinā o loʻu tinā ma sa ou matuā mafatia ai. Na vave lava ona ou iloa ma talisapaia upu moni o le Tusi Paia e faapea, e lē o mafatia ē maliliu i se isi mea ma o le a toe soifua mai i latou i le toetū i le lumanaʻi. Na ou nofo tatā aʻe i luga o le moega, ma faitau ma le naunau le lomiga ma vasevase manatu ou te manaʻo e faasino iā George pe a foʻi mai i le fale mai lana suʻesuʻega faale-Tusi Paia.

“Sa faigatā ona talitonu laʻu tane i le suiga lea ua ou iai. Ina ua ia tuua le fale, sa ou tetee, ao lenei ua ou matuā fiafia lava i upu moni matagofie o le Tusi Paia ua ou aʻoaʻoina! Na ma talanoa e uiga i le Tusi Paia seʻia oo i le vaveao. Na faamatala e George le fuafuaga a le Atua mo le lalolagi. O le pō lava lenā na ou fai ai i laʻu tane pe mafai ona fai lana suʻesuʻega i le fale ina ia ou auai foʻi ma aʻu.

Na fautua mai le uso o Blanton e tatau foʻi ona auai ma tamaiti i la ma suʻesuʻega. Na ma manatu e fai si laiti tele, talu ai e na o le lua le isi ae fa tausaga o le isi. Peitaʻi, na faasino mai e le uso o Blanton iā i maʻua le Teuteronome 31:12 e faapea: “Ia e faapotopotoina le nuu, o tane, ma  fafine, ma tama iti . . . , ina ia latou faalogologo ai, ma ia aʻoaʻoina i latou.” Na ma talisapaia lenā faatonuga ma faatulaga ai foʻi tamaiti ina ia faia ni a la tali i le suʻesuʻega faale-Tusi Paia. E matou te sauniuni faatasi a matou tali, peitaʻi e lē taitai ona ma taʻuina iā i laʻua le tali e fai atu. E ma te manatu e faapea e fesoasoani lenei mea i la ma fanau ina ia avea ai le upu moni o se la meatotino. E ma te talisapaia le taʻitaʻiga na aumaia e le uso o Blanton e fesoasoani i lo matou aiga ina ia tutupu aʻe ai faaleagaga.”

O Luʻi sa Manaʻomia ai se Faataulagaina

O lenei ua autasi i matou i le suʻesuʻeina o le Tusi Paia, ma ua iai foʻi ma ni luʻi fou e faafetaiaʻia. Talu ai e mamao tele laʻu pisinisi, e masani ai la ona ou taunuu i le fale i le 9:00 i le pō. Ona o lenā tulaga, e lē mafai ai ona ou auai i sauniga i aso o le vaiaso sei vaganā ai Aso Sa. I lenā taimi, ua auai Ann i sauniga uma ma ua vave ona agaʻigaʻi i luma. Na ou manaʻo foʻi ou te agaʻigaʻi i luma faapea ai ma le faia o suʻesuʻega uigā faaleaiga. Na ou iloa e manaʻomia ona ou faia ni faataulagaina. O lea na ou filifili ai loa e faaitiitia itula o laʻu pisinisi, tusa lava pe e maumau ai aʻu tagata faatau.

Sa sologa lelei lea fuafuaga. E matou te manatu i le suʻesuʻega faale-Tusi Paia a le aiga e tāua, e pei foʻi o isi sauniga e lima faalevaiaso i le Maota o le Malo. E matou te taʻua o le sauniga lona ono. O lea na matou faatulaga ai se aso ma se taimi faapitoa— o le Aso Lulu i vaiaso taʻitasi i le 8:00 i le pō. I nisi taimi pe a māeʻa la matou tausiga o le afiafi, ma ua uma ona faamamā ipu, e faapea mai se tasi o i matou, “Ua toeitiiti oo i le taimi o le ‘sauniga’!” E amata e Ann le suʻesuʻega pe a ou tuai atu i le fale ma ou te faaauauina pe a ou taunuu.

O le isi mea na faaauau ai ona matou malolosi ma autasi o se aiga, o le faitauina faatasi lea o le mau o le aso i taeao. Peitaʻi, sa iai se faafitauli i lea tulaga. E eseese uma lava taimi e feala ai tagata uma. Na matou talanoaina lenei tulaga ma filifili ai e feala faatasi i le taimi e tasi, fai le mālū o le taeao i le 6:30, ma talanoaina faatasi ai le mau o le aso. Na matuā aogā lenei fuafuaga mo i matou. Ina ua matutua la ma fanau, na la filifili ai e ulu atu i le auaunaga i Peteli. Na ma manatu o nei talanoaga lē aunoa na saosaolaumea i lo la itu faaleagaga.

Faaeaga Ina ua Uma le Papatisoga na Manaʻomia ai Nisi Faataulagaina

Na ou papatiso i le 1962, ma ina mavae le 21 tausaga o ou umia laʻu pisinisi, na ou faatauina atu ma ou faigaluega ai i le vaipanoa lava lenā e latalata i loʻu aiga ina ia mafai ona matou auauna faatasi iā Ieova. Na tatala ai se auala mo le tele o faamanuiaga. Na faatū lo matou sini ina matou auauna uma i le faiva faataimi atoa. O tausaga e tusa o le 1970—1975, na amata ai lenā sini ina ua avea la ma tama matua o Edward ma se faifeʻau faataimi atoa po o le paeonia sauatoa ina ua uma lana aʻoga maualuga. E leʻi leva mulimuli ane ai, ae amata ona paeonia la ma tama o George ona sosoo atu ai lea ma Ann. Na matuā faalaeiauina aʻu e i latou uma e toʻatolu, auā e latou te faamatala mai iā te aʻu mea e tutupu i le auaunaga i le fanua. Na matou talanoaina o se aiga le auala e ono faafaigofie ai o matou olaga ina ia mafai ai e i matou uma ona auauna i le faiva faataimi atoa. Na matou filifili ai loa e faatau atu lo matou fale. Na matou nonofo i lenā fale mo le 18 tausaga ma tausia aʻe lo matou aiga i inā. Na matou fiafia i lo matou fale, peitaʻi na faamanuia Ieova i la matou faaiʻuga e faatau atu.

Na valaaulia Edward i Peteli i le 1972, a o George i le 1974. E ui lava na ma misia ma Ann i laʻua, ae ma te leʻi mafaufau faapea maʻeu le lelei pe a nonofo ma i laʻua i lo matou vaipanoa ma faaipoipo ma fai ni a la fanau. Na i lo lea, na ma olioli ona ua auauna la ma fanau iā Ieova i  Peteli. * Na ma ioe i le Faataoto 23:15 e faapea: “Loʻu atalii e, afai e poto lou loto, ona fiafia ai lea o loʻu nei lava loto.”

Ua Ma Ulu Atu i le Auaunaga Paeonia Faapito

Ona ua iai uma la ma fanau i Peteli, na ma faaauau ai le auaunaga paeonia. I se tasi aso i le 1975, na ma mauaina ai se tusi o loo valaaulia ai maʻua i se galuega paeonia faapito i se oganuu e leʻi tofia i ai se faapotopotoga i Clinton County, Illinois. Maʻeu le faateʻia ai o i maʻua! O lona uiga, e tatau ona ma tuua New Jersey, o i inā lea sa ma latalata ai i la ma fanau i Niu Ioka ma o i inā foʻi e iai a ma uō ma aiga. Peitaʻi, na ma manatu i ai o se tofiga mai iā Ieova ma faia ni faataulagaina lea na iʻu i ni faamanuiaga fou.

Ina ua mavae ni nai masina o ma galueaʻiina lenei oganuu, na amata ona fai a matou sauniga i se tasi o maota i Carlyle, Illinois. Peitaʻi, na matou mananaʻo i se nofoaga tumau e fai ai a matou sauniga. Na maua e se uso ma lana avā i le vaipanoa lava lea se fanua e iai se tamaʻi fale lea na mafai ona matou totogia e fai ai sauniga. Na matou faamamāina le fale atoa ma avea o se tamaʻi nofoaga e fai ai sauniga. Matou te manatuaina lava si solofanua lea e na te fia iloaina i matou. E masani ona tuu mai lona ulu i totonu o le faamalama e vaai po o ā mea o loo fai i le sauniga!

Mulimuli ane, na faatūina le faapotopotoga i Carlyle, na ma fiafia e faia ai so ma sao. Na fesoasoani mai iā i matou se ulugalii talavou paeonia, o Steve ma Karil Thompson, o ē na ō mai foʻi e galulue i le oganuu e leʻi tofia i ai se faapotopotoga. Na la nonofo ai i inā mo ni tausaga ma mulimuli ane auai i le Aʻoga Faale-Tusi Paia a le Olomatamata o Kiliata, ma siitia atu ai i se tofiga faamisionare i Aferika i Sasaʻe, o i inā lea na la auauna ai i le galuega femalagaaʻi.

E leʻi umi lava ae tumu le tamaʻi nofoaga lea e fai ai a matou sauniga ma ua matou manaʻomia ai se maota telē. Na toe foʻia foʻi e le uso lava lea ma lana avā i lo matou vaipanoa le faafitauli, ma faatauina ai se fanua e talafeagai lelei mo se Maota o le Malo. Maʻeu lo ma olioli i nai tausaga mulimuli ane ai, na valaaulia ai maʻua i le faapaiaina o le Maota o le Malo fou i Carlyle! Na ou maua le faaeaga e faia ai le lauga o le faapaiaga. Na iai ni mea mananaia na oo iā i maʻua i lo ma tofiga i inā, ma o se faamanuiaga mai iā Ieova.

Ua Tatala se Oganuu Fou iā i Maʻua

I le 1979, na ma maua ai se tofiga fou i Harrison, New Jersey. Na ma auauna i inā pe tusa ma le 12 tausaga. I lenā taimi na amata ai sa matou suʻesuʻega ma se fafine Saina, ma taʻitaʻiina atu ai i nisi suʻesuʻega se tele faatasi ma tagata Saina. I le taimi lenā, na ma iloaina ai e faitau afe tagata  aʻoga Saina ma aiga Saina o loo nonofo i lo matou vaipanoa. Ona o lenei tulaga, na faalaeiauina ai i maʻua ia aʻoaʻoina le gagana Saina. E tusa lava pe o le uiga o lenei mea e alu ai le taimi i aso taʻitasi i le aʻoaʻoina o le gagana, ae na iʻu i ni suʻesuʻega mananaia faale-Tusi Paia ma tagata Saina i lo matou vaipanoa.

I na tausaga, na tutupu ai ni mea malie aemaise lava i a ma taumafaiga e tautatala i le gagana faa-Saina. I se tasi aso na faailoa atu ai e Ann o ia e faapea o se “imoa” o le Tusi Paia na i lo se “faiaʻoga” o le Tusi Paia. E foliga tutusa lava upu. Na soisoi lē ona le fale ma faapea mai: “Susū mai i totonu. Ou te leʻi talanoa muamua lava i se imoa o le Tusi Paia.” O loo faigatā pea ona ma aʻoaʻoina le gagana.

Ona toe tofia lea o i maʻua i se isi nofoaga i New Jersey o i inā na faaauau ai ona ma galulue i le oganuu e tautala i le gagana Saina. Mulimuli ane na valaaulia i maʻua e siitia atu i Boston, Massachusetts, o i inā lea na faatūina ai se vaega faa-Saina pe tusa ma le tolu tausaga. O se faaeaga iā i maʻua le lagolagosua i lenei vaega mo tausaga e fitu ma o se fiafiaga le vaai atu ua avea ma faapotopotoga iā Ianuari 1, 2003.

Faamanuiaga Mai se Olaga Faataulagaina

I le Malaki 3:10, tatou te faitau ai i le valaaulia a Ieova i ona tagata ina ia aumaia a latou taulaga ina ia mafai ona ia sasaa atu ana faamanuiaga seʻia silisili ona tele. Na ma tuua se pisinisi na ou fiafia lava i ai. Na ma faatauina atu lo ma fale, sa ma manumanu i ai. Na ma lafoaʻia foʻi isi mea. Ioe, pe a faatusatusa atu i faamanuiaga, sa itiiti ni faataulagaina na ma faia.

O le mea moni, maʻeu le tele o le sosia o faamanuiaga na foaʻi mai e Ieova iā i matou! Ua faamalieina i maʻua i le vaai atu i la ma fanau ua tali atu i le upu moni, ua ma maua foʻi le fiafia i le faia o le galuega faasaoola i le faiva faataimi atoa ma ua ma iloaina o loo tausia pea i maʻua e Ieova. O le mea moni lava, o nai faataulagaina itiiti na ma faia ae na faaʻoaina ai i maʻua i faamanuiaga!

[Faamatalaga pito i lalo]

[Ata i le itulau 25]

O Louise ma George Blanton ma Ann, i le 1991

[Ata i le itulau 26]

O le Maota o le Malo i Carlyle, na faapaiaina iā Iuni 4, 1983

[Ata i le itulau 27]

Matou ma le faapotopotoga fou faa-Saina i Boston

[Ata i le itulau 28]

Matou ma Edward, Connie, George ma Grace