Pe Taofia e le Solitū le Alofa Faa-Kerisiano?

I LE avea ma Kerisiano e sili atu mea e aofia ai na i lo le faitauina o le Tusi Paia, tatalo ma le usuina o pese i Aso Sa. E aofia ai le faia o mea mo le Atua ma tagata. Ua faapea mai le Tusi Paia: “Aua neʻi tatou alolofa tau o le upu ma le gutu, a o le amio ma le faamaoni.” (1 Ioane 3:18) Na manatu mamafa moni Iesu mo isi ma e mananaʻo Kerisiano e faaaʻoaʻo iā te ia. Na faalaeiau Paulo i aumea talitonu ina ia “faamalosi i le galuega a le Alii.” (1 Korinito 15:58) Peitaʻi, o le ā le galuega a le Alii? Pe e aofia ai le taumafai e suia faatulagaga a le malo ina ia fai mea lelei mo tagata matitiva ma ē o loo mafatia? Po o le mea lenā na faia e Iesu?

E ui lava sa uunaʻia Iesu e faia sana vaega i mataupu faapolotiki, ae na ia teena le faia faapea. Na ia teena le ofo a Satani o le pule i  malo uma o le lalolagi, e na te leʻi faia ni finauga i le totogiina o lafoga, ma sa tuumuli ese ina ua mananaʻo se vaega o tagata e fai o ia ma tupu. (Mataio 4:8-10; 22:17-21; Ioane 6:15) Peitaʻi, o lona solitū e leʻi taofia ai o ia mai le galue mo le lelei o isi.

Na uaʻi atu Iesu i le faia o le mea e aumaia ai le lelei tumau i isi. O lona fafagaina faavavega o tagata e lima afe ma le faamālōlōina o maʻi, na aumaia ai se mapusaga lē tumau mo nisi, ae na faaavanoa ai e ana aʻoaʻoga faamanuiaga e faavavau mo tagata uma. Sa lauiloa Iesu e lē o sē e faatulagaina fesoasoani faaletino, ae o le “Aʻoaʻo.” (Mataio 26:18; Mareko 5:35; Ioane 11:28) Na ia fetalai: “O le mea lenei na fanau mai ai aʻu, o le mea foʻi lenei na ou sau ai i le lalolagi, ina ia ou molimau i le upu moni.”—Ioane 18:37.

E Sili Atu Ona Lelei le Talaʻiga na i lo Faiga Faapolotiki

O le upu moni na aʻoaʻoina e Iesu e lē o se mataupu faapolotiki. Na i lo lea, na faaautū atu i le Malo lea o le a avea ai o ia ma tupu. (Luka 4:43) O lenei Malo o se pulega faalelagi, o le a suia pulega uma faaletagata ma aumaia le filemu tumau i tagata. (Isaia 9:6, 7; 11:9; Tanielu 2:44) O lea la, o le malo ua na o le pau lea o le faamoemoe moni o tagata. Pe lē o se alofa le faalauiloa atu o lenā faamoemoe mautinoa i le lumanaʻi na i lo le faalaeiau o tagata e faatuatua i tagata e aumaia ai se lumanaʻi saogalemu? Ua faapea mai le Tusi Paia: “Aua tou te faatuatua i alii, po o le fanau a tagata, e lē o i ai se olataga. E alu ese lona agaga, e foʻi atu i le eleele na i ai o ia; e faaumatia i lea lava aso ona manatunatu. Amuia le tagata o i ai le Atua o Iakopo e fai mona fesoasoani; o i ai lona faamoemoe iā Ieova lona Atua.” (Salamo 146:3-5) O lea la, na i lo le auina atu o ona soo e talaʻia se auala lelei e faatulaga ai pulega faaletagata, na aʻoaʻo e Iesu i latou e talaʻi le “tala lelei o le malo.”—Mataio 10:6, 7; 24:14.

O lea la, o le “galuega a le Alii,” o le galuega talaʻi lenei ua faatonuina Kerisiano e fai. Talu ai e manaʻomia ona fealofani tagatānuu o le Malo o le Atua, o le a taulau la le Malo i le aveesea o le mativa e ala i le tufatufaina o punāʻoa ina ia tofusia uma ai tagata. (Salamo 72:8, 12, 13) O se tala lelei lenei ma e mautinoa e ao ona talaʻia.

I aso nei, ua faamaopoopoina Molimau a Ieova mo le “galuega a le Alii” i atunuu e 235. Ina ia talafeagai ma le faatonuga a Iesu, ua latou faaaloalo ai i faigāmalo uma. (Mataio 22:21) Peitaʻi, latou te faaaloalo ma usitai i lana fetalaiga i ona soo: “E lē ni o le lalolagi outou, a ua ou filifilia outou nai le lalolagi.”—Ioane 15:19.

O nisi sa auai i faiga faapolotiki ua suia ina ua uma ona suʻesuʻeina le Tusi Paia. Na faapea mai se faipule mai Italia na avea muamua ma sui o se faalapotopotoga e pulea e le lotu e taʻua o “Gaoioiga Faa-Katoliko”: “Sa ou auai i faiga faapolotiki, i loʻu lagona faapea e ao i se tasi ona fai se sao i le atiaʻe o le nuu i le itu tau polotiki ma mataupufai a tagata.” Ina ua faamavae mai le avea o se pulenuu  ina ia talaʻia le Malo o le Atua o se tasi o Molimau a Ieova, na ia faamatala ai le māfuaaga e lē taulau ai taumafaiga a tagata faamaoni i faiga faapolotiki. “E ui i taumafaiga lelei a nai tagata o ē ua faia mea tonu, ae ua iai le lalolagi i lenei tulaga ona o mea leaga a le toʻatele o tagata.”

O le leai o se vaega i meafai faalemalo ina ia talaʻia le faamoemoe moni o le fanau a tagata, e lē taofia ai Kerisiano moni mai le fesoasoani i isi i auala aogā. O i latou na fesoasoani i ai ina ia avea ma tagatānuu o le Malo o le Atua ua suia o latou uiga sauā, ua mafai ona usitai atu i le pule, faaleleia olaga o latou aiga ma iai se vaaiga lelei i le tamaoaiga faaletino. Ae sili atu ona tāua, ua fesoasoani Molimau a Ieova i tagata ina ia olioli i se faiā vavalalata ma le Atua.

Ua aogā tagata talaʻi o le Malo o le Atua i tagata o le vaipanoa o loo latou alaala ai. Ae peitaʻi e sili atu i lenā, ua latou faasino tagata ina ia faatuatua i se pulega moni o le a aumaia le filemu tumau iā i latou uma e alolofa i le Atua. O lea la, o le iʻuga o lo latou solitū, ua saʻoloto ai nei Kerisiano e saunia fesoasoani tumau ma aogā i aso nei.

[Pusa/Ata i le itulau 7]

Sa Auai i Faiga Faapolotiki ae ua Talaʻia Nei le Malo o le Atua

Na aʻoaʻoina e Atila a o laititi i Belém i Pasili se aʻoaʻoga a le lotu Katoliko e faapea, e ao i le lotu ona faia gaoioiga ia foʻia ai faigatā o le olaga. Na fiafia o ia e faalogo o le a saʻoloto tagata mai puapuaga ma faigatā uma ma na ia auai atu i se vaega o tagata, o i inā na ia iloa ai ona faatulaga solo tetee ma isi faiga tetee i le malo.

Ae peitaʻi, na fiafia foʻi Atila e aʻoaʻo fanau a ia tagata e faaaogā ai le tusi, Listening to the Great Teacher. * Ua aʻoaʻoina e le tusi le amio lelei ma le usitai i le pule. Na tomānatu Atila pe aiseā na lē mulimuli ai i latou o ē lagolagoina lea aʻoaʻoga faa-Katoliko i tapulaa maualuluga tau amio a Iesu, ma aiseā e galo ai i nisi ia tagata matitiva pe a oo ina maua le pule. Na lē toe auai o ia i lea vaega. Mulimuli ane, na tuʻituʻi atu Molimau a Ieova i lona faitotoʻa ma talanoa atu iā te ia e uiga i le Malo o le Atua. E leʻi umi ae ia suʻesuʻeina le Tusi Paia ma aʻoaʻoina le vaifofō moni o puapuaga o tagata.

I lenā taimi, na auai ai Atila i se seminā a le lotu Katoliko e uiga i le faatuatua ma faiga faapolotiki. Na faamatalaina e se faiaʻoga e faapea: “O le faatuatua ma faiga faapolotiki o ni auala se lua e vaavaai ai i se tulaga e tasi.” Na ia auai foʻi i se sauniga i le Maota o le Malo. Māʻeu se eseesega! E leai se isi e ulaula, e leai foʻi se tasi e onā pe faia ni tausuaga matagā. Na ia filifili ai loa e faatasi atu i Molimau a Ieova i la latou galuega talaʻi, ma e leʻi umi ae papatiso loa o ia. O lea la ua ia iloa nei le māfuaaga ua lē avea ai lea aʻoaʻoga faa-Katoliko o se vaifofō moni i faafitauli o tagata matitiva.

[Faamatalaga pito i lalo]

[Ata i le itulau 6]

O le solitū o faifeʻau Kerisiano e lē taofia ai i latou mai le fesoasoani i isi