E Mafai Ona E Faafiafia le Atua

PE E mafai ona aafia faalogona o le Atua i a tatou gaoioiga? Pe e mafai ona fiafia le Atua? O le faamatalaga a se tasi lomifefiloi e uiga i le upu “Atua,” o “sē e silisili ona maualuga, ma e silisili ona moni.” Ae faapefea pe ana faapea o lenā silisili ona moni ua na o se mana malosi? Pe e mafai e se mana malosi ona fiafia? O le mea moni, e leai. Seʻi iloilo le manatu ua taʻua i le Tusi Paia e faatatau i le Atua.

Na fetalai Iesu Keriso: “O le Atua o le agaga lava ia.” (Ioane 4:24) O se agaga, o se ituaiga o olaga e ese mai i tagata. E ui lava e lē mafai ona vaaia e mata o tagata, ae e iai se tino o le agaga—o se “tino faaleagaga.” (1 Korinito 15:44; Ioane 1:18) I le faaaogāina o se gagana faafaatusa, o loo tautala le Tusi Paia e faapea, e iai fofoga ma aao o le Atua. * E iai foʻi le suafa o le Atua; o Ieova. (Salamo 83:18) O le Atua la o le Tusi Paia, o se agaga. (Eperu 9:24) “O ia lava le Atua soifua, ma le Tupu e faavavau.”—Ieremia 10:10.

Ona o sē e soifua moni lava, e iā Ieova le tomai e mafaufau ma gaoioi ai. E iai foʻi ona uiga ma faalogona. O le mea moni, e anoanoaʻi faamatalaga i le Tusi Paia e faaalia ai po o ā mea e fiafia ma mea e lē fiafia i ai o ia. O faatusa ma tupua ua faia e tagata, ua na ona faaatagia atu ai uiga o tagata na faia na mea, a o le Atua e ona le malosi uma lava o Ieova, o Ia moni lava o le Puna o faalogona na ia tuuina i tagata.—Kenese 1:27; Isaia 44:7-11.

O le mea moni, o Ieova o “le Atua fiafia.” (1 Timoteo 1:11, NW) E lē gata ina fiafia o Ia i ana galuega o le foafoaga, ae fiafia foʻi e faataunuuina lana fuafuaga. Ua faalauiloa mai e Ieova e ala i le perofeta o Isaia e faapea: “Ou te faia foʻi mea uma ou te loto i ai. . . . Na ou fai atu ai, ou te faaooina ai lava; na ou fuafuatia, ou te faia lava.” (Isaia 46:9-11) Na pese le faisalamo: “E fiafia Ieova i ana mea na fai.” (Salamo 104:31) Ae e iai foʻi se isi pogai o le fiafia o le Atua. Ua fetalai mai o ia: “Loʻu atalii e, ia poto oe, ma e faafiafia loʻu loto.” (Faataoto 27:11) Seʻi manatu i le uiga o lenā faaupuga; e mafai ai ona tatou faafiafia le finagalo le Atua!

Le Auala Tatou te Faafiafia ai le Finagalo o le Atua

Seʻi manatu i le auala na faafiafia ai e Noa, le ulu o se aiga, le finagalo o Ieova. O Noa, “ua alofagia o ia e Ieova” auā sa ‘sao o ia i ē tupulaga ma ia.’ O se matuā eseesega lava ma tagata amio leaga i na aso, sa matuā fiafia le Atua iā Noa ona o lona faatuatua ma lona usiusitai na mafai ai ona faapea atu, “sa la  feooaʻi o le Atua ma Noa.” (Kenese 6:6, 8, 9, 22) “O le faatuatua na fausia ai e Noa le vaa ina ua mataʻu, e ola ai lona aiga.” (Eperu 11:7) Sa fiafia Ieova iā Noa ma faamanuia iā te ia ma lona aiga e ala i le faasaoina o i latou mai i lenā vaitaimi fesouaʻiina o le tala faasolopito o le tagata.

Sa matuā iloa lelei foʻi e le tamā matua o Aperaamo ia faalogona o Ieova. O lona iloa loloto o mafaufauga o le Atua, sa faaalia manino mai ina ua faailoa atu e Ieova iā te ia e faapea, o le a faaumatia ia Sotoma ma Komoro ona o a latou amioga leaga. O le iloa lelei e Aperaamo o Ieova, na ia manatu ai e faapea, ia mamao lava iā Ieova ona ia fasiotia o ē amiotonu faatasi ma tagata amioleaga. (Kenese 18:17-33) I tausaga mulimuli ane, ona o le usiusitai o Aperaamo i le poloaʻiga a le Atua, ‘ua ia avatu ai ma taulaga o lona atalii e toʻatasi o Isaako,’ auā ‘ua manatu o ia, e mafaia e le Atua ona toe faatū mai o ia nai ē ua oti.’ (Eperu 11:17-19; Kenese 22:1-18) Sa malamalama lelei Aperaamo i faalogona o le Atua ma faaalia lona faatuatua malosi ma le usiusitai, o lea, ‘na taʻua ai o ia o le uō a le Atua.’—Iakopo 2:23.

O le isi tagata na taumafai e faafiafia le finagalo o Atua, o le tupu o Isaraelu anamua o Tavita. Na fetalai Ieova e faatatau iā te ia e faapea: “Ua ou maua Tavita le atalii o Iese, o le tagata e tusa ma loʻu nei loto, na te faia o mea uma lava ou te manaʻo i ai.” (Galuega 13:22) A o leʻi fesagaʻi ma le tagata tinoese o Koliata, na faatuatua atoatoa atu Tavita i le Atua ma taʻu atu i le tupu o Isaraelu o Saulo: “O Ieova na ia laveaʻi iā te aʻu nai le lima o le leona ma le lima o le urosa, o ia lava na te laveaʻi iā te aʻu ai le lima o lenā Filisitia.” Na faamanuia e Ieova le mautinoa o Tavita iā te Ia, ma mafai ai ona fasia e Tavita ia Koliata. (1 Samuelu 17:37, 45-54) Sa manaʻo Tavita ‘ia mālie ia Ieova upu a lona gutu, ma mafaufauga o lona loto.’—Salamo 19:14.

Ae faapefea i tatou? E mafai faapefea ona tatou faafiafia Ieova? O le tele o lo tatou aʻoaʻoina o faalogona o le Atua, o le tele foʻi lenā o lo tatou iloa o le mea e mafai ona tatou faia e faafiafia ai le finagalo o le Atua. A o tatou faitauina le Tusi Paia, ua tatau ai ona tatou taumafai e aʻoaʻo e uiga i faalogona o le Atua ina ia ‘atoatoa ona tatou iloa lelei o lona finagalo i le poto uma atoa ma le mafaufau faaleagaga, ina ia savavali e tusa ma le Alii, ma ia fiafia mai o ia iā i tatou i mea uma.’ (Kolose 1:9, 10) I le isi itu, ua fesoasoani le poto iā i tatou e atiina aʻe ai le faatuatua. E tāua tele lenei mea, auā ‘a leai se faatuatua, e lē mafai ona fiafia mai le Atua.’ (Eperu 11:6) Ioe, o le faia o ni taumafaiga ina ia atiina aʻe se faatuatua malosi, ma ia faaōgatusa o tatou olaga ma le finagalo o Ieova, ona mafai lea ona tatou faafiafia lona finagalo. Ae i le taimi e tasi, ia aua neʻi faatigā i le finagalo o Ieova.

Aua Neʻi Faatigā i le Atua

O se faaaʻoaʻoga i le auala e mafai ona faatigā ai faalogona o Ieova, o loo maua i le tala e uiga i aso o Noa. I lenā taimi, “ua tumu le lalolagi i le sauā. Ua silasila mai le Atua i le lalolagi, faauta foʻi, ua leaga lava; auā o tagata uma ua leaga iā i latou a latou amio i le lalolagi.” O ā lagona o le Atua a o ia silasila atu i a latou amioga leaga ma le sauā? Fai mai le Tusi Paia: “Ua salamō foʻi Ieova ina ua faia e ia tagata i le lalolagi, ma ua tigā ai lona finagalo.” (Kenese 6:5, 6, 11, 12) Na salamō le Atua ina ua matuā leaga lava amio a tagata ma ua suia ai lona finagalo e faatatau i tagata amio leaga i taimi a o leʻi oo mai le Lolo. Na suia le finagalo o le Atua mai Lē na Foafoaina tagata i lē e faaumatia i latou, ona o lona lē fiafia i a latou amioga leaga.

 Na matuā tigā foʻi Ieova ina ua lē amanaʻia e lona lava nuu o Isaraelu ona faalogona ma lana taʻitaʻiga alofa. Na auē le faisalamo e faapea: “Na faalasi naʻuā ona latou faaonoono iā te ia i le vao; na latou faalili lava iā te ia i le vao. Na latou toe tofotofo lava i le Atua; ma latou faaonoono i le Paia o Isaraelu.” Peitaʻi, “o ia, ua alofa mutimuti vale, ua ia faamagaloina a latou amio leaga; na ia lē faaumatia ai i latou; ua liliu ese faalasi e ia lona toʻasā, na ia lē faatupuina foʻi lona toʻatamaʻi atoatoa.” (Salamo 78:38-41) E ui lava sa tonu le auala na puapuagatia ai Isaraelu fouvale ona o a latou lava agasala, ae ua taʻu mai e le Tusi Paia iā i tatou e faapea, ‘o latou puapuaga uma,’ na puapuagatia ai foʻi le Atua.—Isaia 63:9.

E ui lava i le tele o faamaoniga o le mutimuti alofa o le Atua mo i latou, a o tagata Isaraelu, “ua latou faatauemu i ē na aauina mai e le Atua, ma ua ʻinoʻino i ana afioga, ma ua ula i ana perofeta, ua oo ina tupu le toʻasā o Ieova i lona nuu, ua oo ina leai se fofō.” (2 Nofoaiga a Tupu 36:16) O le iʻuga, o latou auala faauamaʻaʻa ma le fouvale, na latou ‘faatigā ai lona Agaga Paia’ ma oo ai ina lē maua le finagalo malie o Ieova. (Isaia 63:10) O le ā le iʻuga? Na aveesea ai ma le tonu e Ieova lana puipuiga, ma oo ai iā i latou ia mala ina ua faatoʻilaloina e Papelonia Iuta, ma faaumatia Ierusalema. (2 Nofoaiga a Tupu 36:17-21) Pagā le faanoanoa pe a mulimuli atu tagata i se olaga agasala lea e matuā faasagatau ma faatigā ai i Lē na Foafoaina i latou!

E lē o natia e le Tusi Paia iā i tatou e faapea, e matuā tigā lava le finagalo o le Atua i amioga lē amiotonu. (Salamo 78:41) O mea e taʻusalaina ma inosia e le Atua e aofia ai le faamaualuga, pepelo, fasioti tagata, faia o faiga faataulāitu, valovaloga mo le lumanaʻi, tapuaʻi i tuaā, amioga lē mamā, tauatane, mulilua, mata i fale, ma le lē alolofa i tagata matitiva.—Levitiko 18:9-29; 19:29; Teuteronome 18:9-12; Faataoto 6:16-19; Ieremia 7:5-7; Malaki 2:14-16.

O le ā le lagona o Ieova e faatatau i le ifo i tupua? Ua taʻu mai i le Esoto 20:4, 5: “Aua e te fai mo oe se tupua ua tā, po o se faatusa lava o se mea o i le lagi i lugā, po o i le fanua i lalo, po o i le sami o i lalo o le fanua; aua e te ifo i ai, aua foʻi e te auauna i ai.” Aiseā? Auā o se tupua, “o le mea e inosia lea e Ieova.” (Teuteronome 7:25, 26) Na lapataʻi mai foʻi le aposetolo o Ioane: “Le fanau e, ia leoleo outou iā te outou ia taumamao i tupua.” (1 Ioane 5:21) Na tusi le aposetolo o Paulo e faapea: “Aʻu pele e, ia outou sosola ese ai i le ifo i tupua.”—1 Korinito 10:14.

Saʻili le Finagalo Malie o le Atua

O le Atua, “e fefaauoaʻi o ia ma ē ua sao a latou amio.” “O ē ua sao a latou amio, e fiafia i ai o ia.” (Faataoto 3:32; 11:20) I le tuufaafeagai ai, o i latou e tetee pea i le Atua i lo latou lē amanaʻia pe faatigā i ona faalogona amiotonu, ua lē o toe umi ona tauia lea o i latou ona o le lē faafiafiaina o lona finagalo. (2 Tesalonia 1:6-10) Ioe, ua lē pine ona ia aumaia lea o le iʻuga o amio leaga uma ia o loo salalau i le lalolagi i aso nei.—Salamo 37:9-11; Sefanaia 2:2, 3.

Ae peitaʻi, ua matuā faamanino mai e le Tusi Paia e faapea, “ua lē finagalo [Ieova] ia fano se tasi, a ia oo uma lava i le salamō.” (2 Peteru 3:9) E sili atu lona fiafia i tagata amiotonu o ē alolofa iā te ia, na i lo o le faaalia o lona lē fiafia iā i latou e lē mananaʻo e suia o latou ala. E “lē fiafia lava [Ieova] i le oti o lē amio leaga, a ia liliu mai lē amio leaga ai lona ala, ma ola ai.”—Esekielu 33:11.

 O lea, e lē manaʻomia ona avea se tasi ma taulaʻiga o le toʻasā o Ieova. “Ua mutimuti vale tele [o Ieova] ma le alofa naunau.” (Iakopo 5:11) I le mautinoa atoatoa e uiga i faalogona o le Atua, e mafai ai ona e “tuuina atu iā te ia mea uma [e] te popole ai, auā o loo manatu mai o ia iā te [oe].” (1 Peteru 5:7) Ia mautinoa, o i latou o ē faafiafia le finagalo o le Atua, e maua le faamoemoe ofoofogia o le olioli i lana faamaoniga ma se faauōga ma ia. I lea, ua sili atu nei ona faanatinati na i lo o se isi lava taimi ina “ia suʻesuʻe outou pe se ā se mea e fiafia i ai le Alii.”—Efeso 5:10.

Maʻeu le ofoofogia o le alofa tunoa o le Atua, ua ia faaalia mai ai ona uiga matagofie ma faalogona! O lea, e mafai lava la ona e faafiafia le finagalo o le Atua. Afai e te manaʻo e faia faapea, ua matou faalaeiauina oe ina ia faafesootaʻi Molimau a Ieova o i lou vaipanoa. O le a fiafia i latou e faailoa atu iā te oe mea aogā ua mafai ona maua i a latou taumafaiga e faafiafia le Atua.

[Faamatalaga pito i lalo]

[Pusa i le itulau 7]

Aiseā ua Faamatala ai e le Tusi Paia le Atua i Faaupuga Faaletino?

Talu ai “o le Atua o le agaga lava ia,” e lē mafai ona tatou vaai iā te ia i o tatou mata faaletino. (Ioane 4:24) O le mea lea ua faaaogā ai e le Tusi Paia ia faamatalaga faafaatusa, e pei o faatusatusaga, o talafaatusa ma faamatalaga faaletino e fesoasoani ai iā i tatou ia malamalama i le malosi, mamalu, ma gaoioiga a le Atua. O faaupuga faaletino (faa-Eleni, “i foliga o le tagata”) o le tuuina atu lea o uiga faaletino i se mea e leai se tino. O lea, e ui lava tatou te lē iloa po o ā foliga o le tino faaleagaga o le Atua, ae o loo taʻua i le Tusi Paia e faapea, e iai fofoga ma aao o le Atua.—Kenese 8:21; Esoto 3:20; 31:18; Iopu 40:9; Salamo 18:9; 34:15.

O na faamatalaga faaletino, e lē uiga faapea, e iai i le tino agaga o le Atua ia vaega e pei ona iai i le tino o le tagata. O faamatalaga faaletino, e tatau ona manatu i ai e pei o ni talafaatusa. E na ona fesoasoani ai i tagata ina ia malamalama lelei i le Atua. Auā a aunoa ma na faamatalaga faafaatusa, o le a faigatā la ona malamalama tagata faatauvaa i so o se faamatalaga e uiga i le Atua. Ae peitaʻi, e lē o le uiga o lenā mea e faapea, na faia e tagata uiga o le Atua. Ua faamatala manino mai e le Tusi Paia, o le tagata, na faia i foliga o le Atua; ae lē o le Atua i foliga o le tagata. (Kenese 1:27) Talu ai, na osofia tusitala o le Tusi Paia e le “Agaga o le Atua,” o a latou faamatalaga la ia e atagia mai ai uiga o le Atua. O le mea moni, o faamatalaga lava na a le Atua e faatatau i ona uiga; o uiga moni lava na sa ia tuuina i vala eseese o ana foafoaga faaletagata. (2 Timoteo 3:16, 17) Na i lo o le iai o uiga faaletagata i le Atua, o le mea moni, e iai uiga o le Atua i le tagata.

[Ata i le itulau 4]

Na finagalo malie le Atua iā Noa

[Ata i le itulau 5]

Na logo i tino o Aperaamo ia faalogona o le Atua

[Ata i le itulau 6]

Na faatuatua atoatoa atu Tavita iā Ieova

[Ata i le itulau 7]

A o e faitauina le Tusi Paia, e te aʻoaʻoina ai auala e faafiafia ai le finagalo o le Atua

[Faamatalaga i Ata i le itulau 4]

Faaaloaloga a le Anglo-Australian Observatory, ata na puʻeina e David Malin