Pe Tuuaʻia le Atua i o Tatou Faafitauli?

INA ua aafia le tama teine matua a Mariana i se faafitauli matuiā i le faiʻai, na faia ai e Mariana le mea na faia foʻi e le toʻatele o i tatou. * Sa ia tatalo atu i le Atua mo se fesoasoani. Fai mai Mariana: “Ou te lē manatua se isi taimi na ou lagona ai le leai o soʻu faamoemoe ma le tuua toʻatasi. Mulimuli ane, ina ua faasolo ina tulaga leaga le maʻi o lana tama, na amata ai ona ia fesiligia le Atua. Na ia fesili atu: “Aiseā ua tupu ai lenei mea?” Sa lē malamalama o ia po ua faapefea i se Atua alofa ma e manatu alofa mai ona tuulafoaʻia o ia.

E lē na o Mariana ua oo i ai se mea faapena. E lē mafaitaulia tagata i le lalolagi aoao ua lagona e faapea, ua tuulafoaʻiina i latou e le Atua i taimi ua latou manaʻomia ai se fesoasoani. Ina ua mavae le fasiotia o le tama a lana tama, na faapea mai Lisa: “O loo ou tauivi pea ina ia maua se tali i le fesili, ‘⁠pe aiseā ua lē taofi ai e le Atua nei mea leaga e tutupu. Ae e leʻi mou atu ai atoa loʻu faatuatua, sa na ona tau vaivai.” Na faapea mai foʻi se fafine ina ua mavae se faalavelave matuiā na aafia ai fua lana pepe tama: “E leʻi faamāfanafana mai le Atua iā te aʻu i le mea na tupu. E na te leʻi faailoa mai lava po o manatu alofa mai iā te aʻu.” Sa ia toe faapea mai: “E lē taitai ona ou faamagaloina le Atua.”

O isi foʻi, ua matuā feita lava i le Atua pe a latou mafaufau i le tulaga o loo iai le lalolagi. Ua latou vaai atu i atunuu o lofitūina i le mativa ma le fia taumamafa, i tagata sulufaʻi ua atuatuvale ona o taua, le lē mafaitaulia o tamaiti ua āumatuā ona o le AIDS, ma le faitau miliona o tagata ua aafia i isi faamaʻi. I le fesagaʻia o nei mala ma isi mala faapena, ua tuuaʻia ai e le toʻatele o tagata le Atua ona e foliga mai e lē o faia lava sana gaoioiga.

Ae o le mea moni, e lē tuuaʻia le Atua i faafitauli ia e malaia ai tagata. E iai māfuaaga tāua e tatau ai ona talitonu, ua lē o toe umi se taimi ona faaleleia lea e le Atua mafatiaga ia ua oo i le aiga faaletagata. Matou te fautuaina oe ina ia suʻe i le isi mataupu lea e sosoo mai ma iloa ai o loo manatu moni mai lava le Atua iā i tatou.

[Faamatalaga pito i lalo]