Faaaogā Sini Faaleagaga e Viia ai Lē na Faia Oe

“AFAI e lē iloa e se ʻauvaa le uafu o loo latou agaʻi atu i ai, e leai la se matagi e mafai ona fesoasoani atu iā i latou.” O upu nei a se faifilosofia Roma o le uluaʻi senituri, sa faasino atu i le mea moni e faapea, ina ia iai ni taʻiala o le olaga, e manaʻomia ona iai ni sini.

O loo aumaia i le Tusi Paia ni faaaʻoaʻoga o ni tagata na faatutū ni sini. E tusa ma le 50 tausaga o galue Noa i le ‘⁠fauina o le vaa e ola ai lona aiga.’ O le perofeta o Mose, “sa faanaunau o ia i le taui.” (Eperu 11:7, 26) Na faataunuuina e Iosua o lē na sui iā Mose, le sini na tuuina mai e le Atua o le faatoʻilaloina lea o le nuu o Kanana.—Teuteronome 3:21, 22, 28; Iosua 12:7-24.

I le uluaʻi senituri T.A., e mautinoa lava, na matuā taaʻina sini o le aposetolo o Paulo i fetalaiga a Iesu e faapea, “e talaʻiina atu foʻi lenei tala lelei o le malo i le atu laulau uma.” (Mataio 24:14) Sa faamalosia Paulo i feʻau ma faaaliga mai le Alii o Iesu, e aofia ai le tofiga ‘e momoli le suafa o Iesu i luma o nuu ese.’ Na ia faia foʻi se vaega tāua i le faatutūina o le tele o faapotopotoga Kerisiano i Asia Itiiti ma oo atu ai i Europa.—Galuega 9:15; Kolose 1:23.

Ioe, na faatutūina e auauna a Ieova i le faagasologa o tausaga ni sini maualuluga ma faataunuuina, ma faamamaluina ai le Atua. E faapefea ona tatou faia ni sini faaleagaga i aso nei? O ā ni sini e mafai ona tatou faatutūina, ma o ā ni laasaga aogā e tatou te uia ina ia mafai ai ona ausia na sini?

E Tāua Uunaʻiga Saʻo

Talu ai e mafai lava ona faataatitia ni sini i so o se vala o le olaga, o lea, ua iai i lenei lalolagi ni tagata ua fiafia tele e faatutū ni sini. Ae peitaʻi, e lē tutusa ia sini faale-Atua ma sini faalelalolagi. O le autū lava o le tele o sini o lenei lalolagi, o le naunau tele i le tamaoaiga ma le tuʻinanau e lē faamalieina mo tulaga fia lauiloa ma le ʻoa o le lalolagi. Pagā se matuā sesē pe afai e avea ma sini le fia pule ma le fia lauiloa! O sini e viia ai Ieova le Atua, e fesootaʻi saʻo lava ma la tatou tapuaʻiga iā te ia ma manaʻoga o le Malo. (Mataio 6:33) O sini faapena, e faapogai mai i le alofa i le Atua ma uso a tagata, aemaise le amioatua.—Mataio 22:37-39; 1 Timoteo 4:7.

Tau ina ia lē ʻaluʻalua uunaʻiga o o tatou loto a o tatou faataatitia ma taumafai ia ausia ia sini faaleagaga. Po o e sini ia faateleina ia faaeaga o le auaunaga, po o lou agaʻigaʻi i luma faaleagaga. Ae peitaʻi, e oo lava i sini e uunaʻia i faanaunauga saʻo, e lē ausia i nisi taimi. E faapefea ona tatou faataatitia ni sini ma taumafai malosi ina ia ausia?

E Tatau Ona Iai se Faanaunauga Malosi

Seʻi manatu i le auala na faaiʻuina ai e Ieova le foafoaina o le vateatea i upu nei, “O le afiafi ma le taeao,” na faamaʻoti mai ai e Ieova le uumi o vaitaimi o le foafoaga. (Kenese 1:5, 8, 13, 19, 23, 31) I le amataga o aso taʻitasi o le foafoaga, sa ia silafia lelei lava lona sini, po o le manulauti o lenā aso. Sa faaauau pea ona foafoaina mea e le Atua. (Faaaliga 4:11) Na faapea mai le augātamā o Iopu: ‘Ua faia e Ieova le mea ua ia finagalo i ai.’ (Iopu 23:13) Maʻeu le faamalieina atonu na iā Ieova i le silasila atu “i mea uma ua na faia,” ma faapea mai, “ua matuā lelei lava”!—Kenese 1:31.

Ina ia ausia moni o tatou sini, e tatau foʻi ona tatou matuā faanaunau ina ia ausia na sini. O le ā e fesoasoani iā i tatou e atiina aʻe sea faanaunauga malosi? E ui lava sa soona  nunumi ma gaogao le lalolagi, ae sa mafai ona silafia e Ieova le iʻuga; ona o le iai o se lalolagi matagofie i le vateatea e pei o se maa tāua, lea o le a viia ma faamamaluina ai o ia. E faapena foʻi lo tatou faanaunau e faataunuuina mea na tatou fuafuaina e fai, pe afai tatou te manatunatu loloto i iʻuga ma aogā o le ausiaina o se sini. O le mea lenā na oo iā Toni e 19 ona tausaga. E lē mafai ona galo le uluaʻi lagona na oo iā te ia ona o se asiasiga i se ofisa o le lālā o Molimau a Ieova i Europa i Sisifo. E mai lava i lenā taimi, sa mafaufau pea Toni e faapea, ‘Pe faapei le olaga pe afai e nofo ma auauna ai i se nofoaga faapena?’ Sa mafaufau pea Toni i se avanoa e mafai ai, ma sa faaauau pea ona ia aapa atu mo lenā sini. Maʻeu lona fiafia ina ua oo i ni nai tausaga mulimuli ane, na talia ai lana talosaga e fia auauna i le lālā!

O lo tatou auaufaatasi foʻi ma isi ua ausia nisi o sini, e mafai foʻi ona faatupu ai iā i tatou se faanaunauga ina ia maua lea sini. O Jayson, e 30 ona tausaga, sa lē fiafia e auai i le faiva i le fanua a o talavou lava. Ae ina ua uma lana aʻoga maualuga, sa ia naunau ai e ulu atu i le auaunaga faapaeonia, ma avea ai o sē folafola faataimi atoa o le Malo. O le ā na fesoasoani iā Jayson e faatupuina ai se faanaunauga e paeonia? Ua tali mai o ia e faapea: “O le talanoa atu i isi na paeonia ma galulue faatasi ma i latou i le faiva, na matuā taaʻina malosi ai aʻu.”

E Fesoasoani le Tusia i Lalo o o Tatou Sini

E mafai ona malamalama i se manatu e faalēmanino pe a filifilia lelei upu e faamatala ai. Na iloa e Solomona e faapea, o upu saʻo e malolosi ia e pei o tui i le taʻitaʻiina o le olaga. (Failauga 12:11) Pe a tusia la i lalo na upu, e mafai ona matuā mau i le loto ma le mafaufau. E lētioa la na faatonuina e Ieova ia tupu o Isaraelu ina ia tusia sana ia lava kopi o le Tulafono. (Teuteronome 17:18) O le mea lea, atonu o le a tatou mananaʻo loa e tusia i se api o tatou sini ma fuafuaga ina ia mafai ai ona ausia. Ia fai se lisi o ni toʻatugā o loo tatou faatalitalia, faatasi ma ni auala e foʻia ai. E fesoasoani foʻi le faailoa o mataupu e tatou te iloa lelei ai tomai e manaʻomia ona tatou maua, ma tagata e mafai ona fesoasoani mai pe lagolagosua iā i tatou.

O le faataatitiaina o ona lava sini faaleagaga, na faatoʻafilemuina ai ia Geoffrey, o se paeonia faapito ua loa ona galue i se atunuu tu mamao ese o Asia. Na matuā faavauvau o ia ina ua maliu faafuaseʻi lona faletua. Ina ua mavae sina taimi, na manatu ai Geoffrey e faapisi atoatoa o ia i lana faiva faapaeonia e ala i le faataatitia o ni sini. Ina ua uma ona tusia o ana fuafuaga i se pepa, sa fesoasoani iā te ia le tatalo ma amata ai loa ona ia faia ni suʻesuʻega faale-Tusi Paia se tolu i le faaiʻuga o le masina. E na te iloiloina lava ana gaoioiga i le faaiʻuga o aso taʻitasi, ma i aso taʻisefulu uma lava, na te tilofaʻia ai lona agaʻigaʻi i luma. Pe na ia ausia lona sini? Ona sa ia lipotia ni suʻesuʻega faale-Tusi Paia fou se fā, na ia tali mai ai ma le fiafia tele, ioe!

Ia Faataatitia ni Sini mo ni Taimi Pupuu e Amata Ai

O nisi o sini, e foliga mai e faigatā ona ausia i le amataga. Iā Toni lea na taʻua i le amataga, o le auauna i se ofisa o le lālā o Molimau a Ieova, sa pei o se miti iā te ia. Talu ai ona sa matuā ese mamao lava lona olaga ma e leʻi tuuina atu foʻi  o ia i le Atua. Peitaʻi ane, na filifili Toni ina ia ola i se olaga e ōgatusa ma ala o Ieova, ma avea ma ona sini ina ia agavaa mo le papatisoga. Ina ua uma ona ausia lenā sini, na aapa atu loa o ia mo le paeonia lagolago faapea le paeonia sauatoa, ma faailoga i lana kalena le aso e amata ai. Ina ua mavae sina taimi talu ona paeonia, sa avea loa le auaunaga i le ofisa o le lālā ma ona sini moni.

E lelei foʻi ona faʻifaʻi o tatou sini mo taimi uumi, i ni sini mo ni taimi pupuu. O sini mo taimi pupuu, e mafai ona avea ma amataga o le ausiaina o se sini mo se taimi e umi atu. O le iloiloina e lē aunoa o lo tatou agaʻigaʻi i luma e tusa ai ma na manulauti, e mafai ona fesoasoani ina ia taulaʻi atu ai pea o tatou mafaufau i na sini. O le tatalo pea iā Ieova e uiga i a tatou fuafuaga, o le a fesoasoani iā i tatou e faaauau ai pea i lea lava auala. Ua apoapoaʻi mai le aposetolo o Paulo: “Ia tatalo e lē aunoa.”—1 Tesalonia 5:17.

E Manaʻomia le Maumauaʻi ma le Finafinau

E ui lava ua uma ona fai lelei a tatou fuafuaga, ma se faanaunauga malosi ina ia faataunuuina, ae e lē mafai lava ona ausia nisi o sini. Pagā se lē fiafia o le soo o Ioane Mareko ina ua lē manaʻo le aposetolo o Paulo e ave o ia i lana malaga faamisionare lona lua. (Galuega 15:37-40) Na aʻoaʻo mulimuli ane e Mareko se mea mai lona lē fiafia lea na iai, ma fetuunaʻi lona sini ina ia faateleina lana auaunaga. E mautinoa lava na ia faia faapea. O le iʻuga, na taʻuleleia Mareko e Paulo ma olioli ai i se aufaatasiga māfana fiafia ma le aposetolo o Peteru i Papelonia. (2 Timoteo 4:11; 1 Peteru 5:13) Atonu o se faaeaga sili mo ia le tusia o se evagelia e uiga i le soifuaga o Iesu ma lana faiva.

I lo tatou tuliloaina o sini faaleagaga, e mafai ai foʻi ona tatou tofo i mea e faavaatuʻia ai. Na i lo la o le faavaivai, e tatau ona tatou iloiloina, ma toe fuafua lelei, ma faia fetuunaʻiga. Pe a tulaʻi mai ni toʻatugā, e manaʻomia ona tatou tauivi maumauaʻi ma finafinau ina ia agaʻigaʻi i luma. Ua faamautinoaina i tatou e le tupu poto o Solomona e faapea: “Ia e tuuina atu iā Ieova o au galuega; ona faamauina ai lea o ou manatunatuga.”—Faataoto 16:3.

Ae peitaʻi, ona o tulaga e tulaʻi mai i nisi taimi, ua lē mafai ai ona faataulauina nisi o sini. O se faaaʻoaʻoga, o le lē lelei o le soifua mālōlōina po o tiute tauave i le aiga, e ono lē mafai ai ona tatou ausia nisi o sini. Ae aua lava neʻi galo iā i tatou le mea moni e faapea, o le taui sili, o le ola e faavavau; a lē o le lagi, o le Parataiso i le lalolagi. (Luka 23:43; Filipi 3:13, 14) E faapefea ona maua o lenei mea? Na tusi le aposetolo o Ioane e faapea: “A o lē fai le finagalo o le Atua, e tumau lea e faavavau.” (1 Ioane 2:17) E ui e lē mafai e o tatou tulaga ona ausia ai se sini patino, ae ia tatou ‘matataʻu i le Atua, ma anaana i ana poloaʻiga.’ (Failauga 12:13) O sini faaleagaga, e fesoasoani iā i tatou e tepa taulaʻi atu ai i le faia o le finagalo o le Atua. O le mea lea, seʻi o tatou faaaogā o tatou sini e faamamaluina ai Lē na Foafoaina i tatou.

[Pusa i le itulau 22]

Sini Faaleagaga e Manatunatu i Ai

○ Faitau le Tusi Paia i aso uma

○ Faitau lomiga taʻitasi o Le Olomatamata ma le Ala Mai!

○ Ia faaleleia le uiga o au tatalo

○ Ia faaalia fua o le agaga

○ Ia aapa atu e faateleina lau auaunaga

○ Ia e matuā uigā i le talaʻi ma le aʻoaʻo atu

○ Ia atiina aʻe ia tomai e molimau atu ai i telefoni, molimau lē fuafuaina, ma molimau atu i oganuu o pisinisi