Fesili Mai le ʻAufaitau

O le ā ua faaatagia e le fuafuaga o le tausaga faa-Iupeli lea e taʻua i le Levitiko mataupu e 25?

Ua faatulaga mai i le Tulafono a Mose e faapea, “o le fitu o tausaga, e fai ma sapati lea e mapu ai le laueleele.” Na poloaʻiina tagata Isaraelu e faatatau i lenā tausaga e: “aua e te lūlū ai ni saito i lou fanua, aua foʻi e te teuteu ai lou tovine. O mea e tutupu fua nai lau seleselegasaito, aua e te seleseleina, aua foʻi e te tau ni fua o lou vine ua lē teua; o le tausaga lea e mapu ai le laueleele.” (Levitiko 25:4, 5) I lea, o tausaga taʻifitu uma lava, sa avea ma tausaga o le Sapati mo le laueleele. Sa avea ma Iupeli le tausaga lona 50 lea na sosoo ma le tausaga o le Sapati lona fitu. O le ā na tupu i lenā tausaga?

Na taʻu atu e Ieova i tagata Isaraelu e ala iā Mose e faapea: “Ia outou faasāina le tausaga e limagafulu, ma talaʻi ai le saʻolotoga i lo outou nuu i ē nonofo ai uma lava; e fai lea ma iupeli ia te outou, ma ia outou toe foʻi atu taʻitoʻatasi i lona lava fanua, ia outou toe foʻi atu foʻi taʻitoʻatasi i lona lava aiga. O le tausaga e limagafulu e fai lea ma iupeli iā te outou; aua tou te lūlū ai ni saito, pe selesele ai mea e tutupu fua, pe tau ai ni fua o lou vine ua lē teua.” (Levitiko 25:10, 11) O se iupeli, o lona uiga, o le tausaga lona lua o le faagasologa o Sapati mo le laueleele. Ae sa faasaʻolotoina ai foʻi tagata o le nuu. So o se Iutaia na faatauina atu o se pologa, sa faasaʻolotoina. O le fuafuaga masani pe afai na faatauina faamalosi atu se tagata, sa tatau ona toe faafoʻi atu i lona aiga i le iupeli. O le Iupeli, o se tausaga o le toefaafoisia ma le faasaʻolotoina i Isaraelu anamua. O le ā ua faaatagia ai mo Kerisiano?

O le fouvalega a le uluaʻi tagata o Atamu, na faapologaina ai le fanau a tagata i le agasala. O le sauniuniga a le Atua ina ia faasaʻoloto mai ai tagata mai le noataga o le agasala, o le taulaga  togiola lea a Iesu Keriso. * (Mataio 20:28; Ioane 3:16; 1 Ioane 2:1, 2) O afea o le a faasaʻolotoina ai tagata uma mai le tulafono o le agasala? I le talanoa atu i Kerisiano faauuina, na faapea atu le aposetolo o Paulo: “O le tulafono a le Agaga, o le ola ua iā Keriso Iesu ua tuusaunoa mai lea ia te aʻu, nai le tulafono a le agasala ma le oti.” (Roma 8:2) O i latou o iai le faamoemoe e ola i le lagi, e latou te maua lenei saʻolotoga pe afai e faauuina i latou i le agaga paia. E ui lava o loo i le tino e lē lelei atoatoa, ae ua taʻuamiotonuina i latou e le Atua, ma ua vaetamaina i latou e avea ma ona atalii faaleagaga. (Roma 3:24; 8:16, 17) Na amata le Iupeli faa-Kerisiano mo le vaega faauuina i le Penetekoso i le 33 T.A.

Ae faapefea “isi mamoe,” o loo faamoemoe e ola e faavavau i le lalolagi? (Ioane 10:16) Mo isi mamoe, ua faamaonia, o le pulega a Keriso mo le Afe o Tausaga, o le taimi lenā mo le toe faafoʻisiaga ma le faasaʻolotoina o i latou. I le Iupeli o le Afe Tausaga, o le a faatatauina ai e Iesu le aogā o lana taulaga togiola mo le fanau a tagata talitonu ma aveesea ai āuga o le agasala. (Faaaliga 21:3, 4) E oo ane i le faaiʻuga o le Pulega a Keriso mo le Afe o Tausaga, o le a oo uma ai tagata i le lelei atoatoa faaletagata ma saʻoloto atoatoa ai mai le agasala tuufaasolo ma le oti. (Roma 8:21) Pe a faataunuuina lenā mea o le a iʻu ai foʻi ma le Iupeli faa-Kerisiano.

[Faamatalaga pito i lalo]

[Ata i le itulau 26]

Le Iupeli i le Afe o Tausaga; o se taimi o le toe faafoʻisiaga ma le faasaʻolotoina o “isi mamoe”