Pe E te Naunau i le “Tulafono a Ieova”?

“Amuia ia le tagata e . . . naunau o ia i le tulafono a Ieova.”—SALAMO 1:1, 2.

1. Aiseā ua tatou fiafia ai o ni auauna a Ieova?

E LAGOLAGOINA ma faamanuia i tatou e Ieova o ana auauna faamaoni. E moni tatou te fesagaʻi ma le tele o tulaga faigatā. Ae peitaʻi, o loo tatou olioli i le fiafiaga moni. E lē faateʻia ai i lenei mea, auā o loo tatou auauna i le “Atua manuia” po o le Atua fiafia ma ona o lona agaga paia ua olioli ai o tatou loto. (1 Timoteo 1:11; Kalatia 5:22) O le olioli, o le fiafiaga moni lea e māfua ona o le tulimataʻia o se mea lelei po o le mauaina foʻi. Ua foaʻi mai e lo tatou Tamā o i le lagi iā i tatou meaalofa lelei. (Iakopo 1:17) E lētioa la a tatou fiafia!

2. O ā salamo o le a tatou talanoaina?

² Ua faamatilatila mai e le tusi o Salamo le tulaga amuia po o le tulaga fiafia. O se faaaʻoaʻoga, o loo faamatilatila mai lea tulaga i le Salamo 1 ma le 2. Na faailoa atu e soo o Iesu Keriso i le uluaʻi senituri e faapea, na tusia e le tupu o Isaraelu o Tavita le salamo lona lua. (Galuega 4:25, 26) O lē na fatuina le salamo muamua e lē o mailoa lona suafa, na amata lana pese faagaeeina i upu nei: “Amuia le tagata e lē savali i le filifiliga a ē amio leaga.” (Salamo 1:1) I lenei mataupu ma lea e sosoo mai, seʻi o tatou vaai pe o faapefea i le Salamo 1 ma le 2 ona aumaia iā i tatou māfuaaga e olioli ai.

Le Auala e Maua ai le Fiafia

3. E tusa ai ma le Salamo 1:1, o ā nisi o māfuaaga e fiafia pe faaamuia ai i le tagata amioatua?

³ Ua faailoa mai e le Salamo 1 le māfuaaga e fiafia pe faaamuia ai i le tagata amioatua. Na pese le faisalamo e tusa ai ma ni māfuaaga o lenā fiafia: “Amuia le tagata e lē savali i le filifiliga a ē amio leaga, e lē tu foʻi o ia i le ala o ē agasala, e lē nofo foʻi i le nofoa o ē tauemu.”—Salamo 1:1.

4. O le ā le ala sili ona lelei na mulimuli ai Sakaria ma Elisapeta?

⁴ Ina ia maua le fiafia moni, e ao ona tatou usiusitai i tapulaa amiotonu a Ieova. Na maua e Sakaria ma Elisapeta le faaeaga o le avea ma mātua o Ioane le Papatiso, sa “amiotonu i laʻua i luma o le Atua, o savavali i poloaʻiga ma tulafono uma a le Alii e lē mataʻuleagaina.” (Luka 1:5, 6) E tatou te maua foʻi le fiafia pe a mulimuli i se ala faapena ma matuā teena le “savali i le filifiliga a ē amio leaga” po o le taʻitaʻia e a latou fautuaga leaga.

5. O le ā e fesoasoani iā i tatou e ʻalofia le “ala o ē agasala”?

⁵ Pe afai tatou te teena mafaufauga a ē amioleaga, o le a tatou lē ‘tutū ai i ala o ē agasala.’ O le mea moni, tatou te lē ō i mea o loo latou iai e pei o nofoaga o faafiafiaga lē mamā po o nofoaga leaga. E faapefea pe afai e tofotofoina  i tatou e aufaatasi ma ē agasala i a latou amioga e lē faale-Tusi Paia? Seʻi o tatou tatalo mo le fesoasoani a le Atua ina ia gaoioi e talafeagai ma upu a le aposetolo o Paulo: “Aua tou te amo faalēgatasi ma ē lē faatuatua; auā pe faapefea ona faatasi o le amiotonu ma le amio leaga? Pe faapefea foʻi ona mafuta o le malamalama ma le pōuliuli?” (2 Korinito 6:14) Pe afai tatou te faalagolago i le Atua ma maua le “loto mamā,” o le a tatou teena le agaga ma amioga a tagata agasala, o le a iai ni uunaʻiga mamā ma faanaunauga saʻo, faatasi ai ma le “faatuatua faamaoni.”—Mataio 5:8; 1 Timoteo 1:5.

6. Aiseā e ao ai ona leoleo i tatou i ē tauemu?

⁶ Ina ia faafiafia le finagalo o Ieova, e ao ona tatou ‘lē nonofo i nofoa o ē tauemu.’ Ua tauemu nisi i le tausia o tulafono a le Atua peitaʻi, i nei “aso e gata ai” ua faamaonia le matuā tauemu o ē na avea muamua ma Kerisiano ae ua liliuese mai le upu moni. Na lapataʻia e Peteru le ʻauuso talitonu e faapea: “Le ʻau pele e, . . . ua muamua ona iloa o lenei mea, e ō mai i ona aso e gata ai o ē tauemu, latou te savavali e tusa ma o latou lava tuʻinanau; e faapea mai, Ofea nei le folafolaga o lona afio mai? auā talu ona momoe o le augātamā, ua tutumau pea o mea uma pei ona faatoʻā faia.” (2 Peteru 3:1-4) Pe afai tatou te lē ‘nonofo i nofoa o ē tauemu,’ o le a tatou ʻalofia ai mala ia e oo iā i latou.—Faataoto 1:22-27.

7. Aiseā e ao ai ona tatou utagia upu o le Salamo 1:1?

⁷ Pe afai tatou te lē utagia upu amata o le Salamo 1, e mafai ona faavaivaia ai i tatou i le itu faaleagaga lea na maua e ala i le suʻesuʻeina o le Tusi Paia. O le mea moni, e mafai ona oo atu o tatou olaga i se tulaga sili ona leaga. O le uluaʻi laasaga e faavaivaia i tatou i le itu faaleagaga, pe afai tatou te savavali i filifiliga a ē amioleaga. Atonu tatou te auaumea faatasi ma i latou. Mulimuli ane, e ono oo ina avea i tatou ma ē liliu ese mai le upu moni ma tauemu i ai. E mautinoa, o le faauō ma ē amioleaga e fafau aʻe ai se agaga faalēmataʻu iā i tatou ma faaleagaina ai la tatou faiā ma Ieova le Atua. (1 Korinito 15:33; Iakopo 4:4) Ia aua lava neʻi tupu lenā mea iā i tatou!

8. O le ā o le a fesoasoani iā i tatou e taulaʻi atu o tatou mafaufau i mea faaleagaga?

⁸ O le a fesoasoani le tatalo ia taulaʻi atu o tatou mafaufau i mea faaleagaga ma ʻalofia le auaumea ma ē amioleaga. Na tusi Paulo: “Aua neʻi popole outou i se mea e tasi, a ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai. O le manuia foʻi mai le Atua, o loo silisili lava i  mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” Na faalaeiau e Paulo le iloiloina o mea ua moni, o mea ua taʻuleleia, o mea ua tonu, mea ua mamā, mea ua matagofie, mea ua logoleleia, amio lelei ma mea e viia. (Filipi 4:6-8) Seʻi o tatou gaoioi e talafeagai ma fautuaga a Paulo ma aua lava neʻi faataʻitaʻi i ē amioleaga.

9. E ui lava tatou te ʻalofia amioga leaga, e faapefea ona tatou fesoasoani i tagata eseese uma?

⁹ E ui tatou te teena amioga leaga, ae tatou te molimau atu ma le faautauta i tagata, e pei ona talanoa atu le aposetolo o Paulo i le kovana Roma o Filiki e faatatau i le “amiotonu, ma le amio mamā, ma le faamasinoga atalī.” (Galuega 24:24, 25; Kolose 4:6) E tatou te talaʻia le tala lelei o le Malo i tagata eseese uma ma tatou te feutagaʻi ma le faaaloalo ma i latou. E tatou te mautinoa, o i latou “ua saunia i le ola faavavau,” o le a avea ma ē talitonu ma naunau i le tulafono a le Atua.—Galuega 13:48.

E Naunau o Ia i le Tulafono a Ieova

10. O le ā o le a fesoasoani iā i tatou e tāmau manatu i o tatou mafaufau ma loto a o faia a tatou lava suʻesuʻega?

¹⁰ Ua faapea atili mai le faisalamo e faatatau i le tagata fiafia: “E naunau o ia i le tulafono a Ieova; e mafaufau foʻi o ia i lana tulafono i le ao atoa ma le pō.” (Salamo 1:2) I le avea o ni auauna a le Atua, tatou te ‘⁠naunau ai i le tulafono a Ieova.’ I taimi e fai ai a tatou lava suʻesuʻega ma mafaufau loloto ai, tatou te ono faitau leotele ai le Tusi Paia. O le taʻu leotele o upu pe a tatou faitauina se vaega o le Tusi Paia, o le a fesoasoani iā i tatou e tāmau i o tatou mafaufau ma loto mea ua faitauina.

11. Aiseā e ao ai ona tatou faitau le Tusi Paia i le “ao ma le pō”?

¹¹ Ua faalaeiauina i tatou e le “auauna faamaoni ma le mafaufau” ia faitau le Tusi Paia i aso taʻitasi. (Mataio 24:45) Talu ai o se faanaunauga malosi ina ia masani lelei i le feʻau a Ieova mo tagata, e talafeagai ai iā i tatou ona faitau le Tusi Paia i le “ao ma le pō,” e oo lava i se pō e lē mafai ona tatou momoe ai. Ua timaʻi mai Peteru i upu nei: “Faapei o tama meamea faatoʻā fanau mai, ia naunau outou i le suāsusu faaleagaga e lē suia, ina ia outou tutupu ai i le faaolataga.” (1 Peteru 2:1, 2) Po o e naunau e faitau le Tusi Paia i aso uma ma mafaufau loloto i Afioga a le Atua ma ana fuafuaga i le pō? Na faia faapena e le faisalamo.—Salamo 63:6.

12. O le ā o le a tatou faia pe afai tatou naunau i le tulafono a le Atua?

¹² E faalagolago lo tatou fiafiaga e faavavau i lo tatou naunau i le tulafono a le Atua. E sili ona lelei ma tonu tulafono a le Atua ma e tauia i tatou pe a tausia. (Salamo 19:7-11) Na tusi le soo o Iakopo: “O lē matuā matamata i le tulafono o le saʻolotoga ua atoatoa ona lelei, ma ua tumau i ai o ia, e lē se faalogologo ma le faagalogalo lenā tagata, a o le anaana i le galuega, e manuia o ia i lona lava anaana.” (Iakopo 1:25) Pe afai tatou te naunau moni i le tulafono a Ieova, o le a tatou uaʻi atu  i mea faaleagaga i aso uma. E mautinoa, o le a uunaʻia i tatou e ‘suʻesuʻe i uiga loloto o le Atua’ ma faamuamua manaʻoga o le Malo i le olaga.—1 Korinito 2:10-13; Mataio 6:33.

O Ia ua Faapei o le Laau

13-15. O le ā le uiga ua pei ai i tatou o se laau e totō i tafatafa o le vai?

¹³ Ua faamatala atili mai e le faisalamo le tagata amio saʻo: “O ia foʻi e faapei o le laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.” (Salamo 1:3) E pei lava o isi tagata uma lē lelei atoatoa, e oo foʻi iā i tatou o auauna a Ieova ia faafitauli o le olaga. (Iopu 14:1) Atonu tatou te mafatia i sauāga ma faafitauli eseese ona o lo tatou faatuatua. (Mataio 5:10-12) Ae peitaʻi, o le fesoasoani a le Atua ua tatou tumau ai i nei tofotofoga, e pei o se laau ola lelei e mafai ona mausalī e ui e fai si malosi o le matagi.

¹⁴ O se laau e totō i tafatafa o se puna o vai e lē mate i tau vevela po o se lāmala. Pe afai o i tatou o tagata matataʻu i le Atua tatou te maua le malosi mai le Puna e lē gata mai o Ieova le Atua. Na faalagolago Paulo i le Atua mo le fesoasoani ma māfua ai ona faapea mai: “Ou te mafaia mea uma lava ona o ia [Ieova] ua faamalosi mai iā te aʻu.” (Filipi 4:13) Pe a taʻitaʻia ma tausia i tatou faaleagaga e le agaga paia o Ieova, tatou te lē solomuli ese ai ma lē fua mai pe oti ai faaleagaga. O loo tatou fua mai i le auaunaga a le Atua ma faaalia foʻi fua o lona agaga.—Ieremia 17:7, 8; Kalatia 5:22, 23.

¹⁵ E ala i le faaaogāina o le upu Eperu ua faaliliuina “e pei” ua faia ai e le faisalamo se faatusatusaga. O loo ia faatusatusaina ni tulaga se lua e eseese, ae e iai uiga e tutusa ai. E eseese tagata ma laau, ae peitaʻi, o le ola lauusiusi o se laau e totō i autafa o le vai, na faamanatu mai ai e le faisalamo le tamaoaiga faaleagaga o i latou o ē e ‘naunau i le tulafono a Ieova.’ Pe afai tatou te naunau i le tulafono a le Atua, o le a pei o tatou aso o aso o le laau. O le mea moni, e mafai ona tatou ola e faavavau.—Ioane 17:3.

16. Aiseā ma e faapefea ona ‘manuia mea uma tatou te faia’?

¹⁶ A o tatou saʻilia le ala saʻo, e fesoasoani Ieova iā i tatou e tumau i faafitauli ma faigatā. O loo tatou olioli ma fua tele mai i le auaunaga a le Atua. (Mataio 13:23; Luka 8:15) ‘E manuia mea uma tatou te faia’ ona o lo tatou sini autū o le faia o le finagalo o Ieova. E faaʻoaina faaleagaga i tatou talu ai e taulau manuia ana folafolaga ma tatou te naunau i ana poloaʻiga. (Kenese 39:23; Iosua 1:7, 8; Isaia 55:11) Ua matuā moni lenei manatu e tusa lava pe tatou te fesagaʻi ma faigatā.—Salamo 112:1-3; 3 Ioane 2.

E Foliga Taulau Manuia Ē Amioleaga

17, 18. (a) O le ā ua faatusa i ai e le faisalamo tagata amioleaga? (e) E tusa lava pe taulau manuia faaletino tagata amioleaga, aiseā e lē tumau ai lo latou saogalemu?

¹⁷ E matuā ese lava le tulaga o tagata amioleaga ma tagata amiotonu! Atonu mo se taimi e foliga mai o loo taulau manuia tagata amioleaga i le itu faaletino ae peitaʻi, e lē taulau manuia i le itu faaleagaga. Ua iloa atili lenei mea mai isi upu a le faisalamo: “E lē faapea o ē amio leaga; a e pei o aputi o saito i latou ua lelea i le matagi. O le mea lea e lē tutū ai o ē amio leaga i le faamasinoga, e lē tutū foʻi tagata agasala i le faapotopotoga o ē amiotonu.” (Salamo 1:4, 5) Ia mātau le mea ua fai mai ai le faisalamo, “e lē faapea o ē amioleaga.” O le uiga o lana faamatalaga, e lē pei i latou o tagata amioatua, o ē ua faatusaina i laau fuatele mai ma tumau.

¹⁸ E tusa lava po o le ā le foliga taulau manuia mai o tagata amioleaga, ae lē taitai tumau lo latou saogalemu. (Salamo 37:16; 73:3, 12) Ua pei i latou o le tamāloa mauʻoa lē faautauta lea na taʻua e Iesu i se tala faatusa ina ua fesiligia o ia e faia se faaiʻuga i se mataupu e aofia ai se tofi. Na fetalai atu Iesu iā i latou e faapea: “Ia outou, ia leoleo outou iā te  outou aua le matapeʻapeʻa; auā e lē ola se tasi i le tele o ana mea ua iā te ia.” Na faataʻitaʻia e Iesu lenei manatu e ala i le fetalai e faapea, na fua tele mai le fanua o se tamāloa mauʻoa ma manatu ai e tala i lalo ana fale teuoloa ae toe fausia nisi fale tetelē e teu ai ana mea lelei uma. Na manatu le tamāloa o le a ia ʻai ma inu ma fiafia ai. Ae peitaʻi, na fetalai le Atua e faapea: “O oe na le vale, e aamiina atu lou agaga nai iā te oe i le pō nanei; a e fai ma ai mea ia ua e saunia?” Ina ia faamamafa lenei manatu na toe fetalai Iesu: “O loo faapea foʻi lē faaputu ʻoa iā te ia, a e lē mauʻoa i le Atua.”—Luka 12:13-21.

19, 20. (a) Ia faamatala le auala e sasa ai o le saito ma suō ai. (e) Aiseā ua faatusa ai tagata amioleaga i aputi o saito?

¹⁹ O tagata amioleaga e lē “mauʻoa i le Atua.” O lea la, ua tutusa lo latou saogalemu ma le tulaga lē mautū o aputi o saito o lona uiga, o le mea manifinifi lea e ufiufi ai le saito. I aso anamua, pe a māeʻa le seleselega o le saito, ona ave lea i le mea e sasa ai le saito, e masani lava o se vaega laugatasi o le fanua. O i inā sa iai se tamaʻi taavale e iai ni mea maamaʻai i le pito i lalo, e toso i luga o le saito e ni manu ina ia nuti ʻau o saito ma matala ai aputi. Ona faaaogā lea o se suō e asu ai le mea atoa ma lafo i le matagi. (Isaia 30:24) E paʻūʻū i lalo ia fatu i le mea e sasa ai le saito, a o aveese e le matagi ʻau o le saito i le isi pito ae lelea ese aputi o le saito. (Ruta 3:2) Pe a uma ona faamamā le saito ma aveese maamaa ona sauni loa lea e teu pe ave e olo. (Luka 22:31) Ae ua lelea ese aputi o le saito.

²⁰ E pei lava ona paʻūʻū saito i le eleele ma faasao ae lelea aputi o saito, o le a faapena ona tumau tagata amiotonu ae mou atu tagata amioleaga. E mautinoa, tatou te fiafia ona ua lē o toe umi ona aveesea lea e faavavau ē amioleaga. Pe a mou atu i latou, o le a manuia tagata e naunau i le tulafono a Ieova. O le mea moni, o le a maua e tagata usiusitai le meaalofa a le Atua o le ola e faavavau.—Mataio 25:34-46; Roma 6:23.

E Manuia “le Ala o Ē Amiotonu”

21. E faapefea iā Ieova ona ‘⁠silafia le ala o ē amiotonu’?

²¹ Ua faaiʻu mai le salamo muamua i upu nei: “Ua silafia e Ieova le ala o ē amiotonu; a e fano lava le ala o ē amio leaga.” (Salamo 1:6) E faapefea i le Atua ona ‘⁠silafia le ala o ē amiotonu’? Pe afai o loo tatou savavali i le ala saʻo,  e mautinoa o loo silasila mai lo tatou Tamā o i le lagi i le auala o tatou tausia ai ana tulafono i o tatou olaga, o i tatou o ni ana auauna ua ia faamaonia. O lea la, e ao ona tatou lafo uma atu o tatou popolega iā te ia ma le mautinoa o loo ia manatu mai iā i tatou.—Esekielu 34:11; 1 Peteru 5:6, 7.

22, 23. O le ā o le a tupu i tagata amioleaga ma tagata amiotonu?

²² O le a tumau e faavavau le “ala o ē amiotonu” peitaʻi, o le a fano tagata amioleaga o ē mumusu e suia a latou amioga i le sala faafaamasinoga a Ieova. O le a muta o latou “ala” o le olaga. Ua tatou mautinoa i le faataunuuina o upu a Tavita: “E toe itiiti, ona leai lea o le tagata amio leaga; e te mafaufau foʻi i le mea sa i ai o ia, a e leai lava. A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele. E fai lava le nuu mo tagata amiotonu, e nonofo ai pea i latou.”—Salamo 37:10, 11, 29.

²³ O le a matuā faafiafiaina i tatou pe a maua le avanoa e ola ai i le lalolagi parataiso ae ua lē o toe iai tagata amioleaga! O le a olioli ē agamalu ma ē amiotonu i le filemu moni talu ai lo latou naunau pea i le “tulafono a Ieova.” Ae peitaʻi, a o lumanaʻi lenā e ao ona faataunuu ‘le tulafono a Ieova’ po o lana poloaʻiga. (Salamo 2:7a) O le a fesoasoani le mataupu o sosoo mai iā i tatou e iloa po o le ā lenā tulafono ma le uiga mo i tatou ma tagata uma.

O le a Faapefea Ona E Tali?

• Aiseā e fiafia pe taʻu amuia ai le tagata amioatua?

• O le ā e faaalia ai tatou te naunau i le tulafono a Ieova?

• E faapefea ona pei se tasi o se laau e faasūsūina lelei?

• E faapefea ona ese ala o tagata amiotonu mai ala o tagata amioleaga?

[Fesili mo le Suʻesuʻega]

[Ata i le itulau 11]

O le a fesoasoani le tatalo iā i tatou e ʻalofia le auaumea ma tagata amioleaga

[Ata i le itulau 12]

Aiseā ua pei ai le tagata amiotonu o se laau?