Pe E te Manatua?

Pe na e olioli i le faitauina o mataupu o Le Olomatamata talu ai nei? Ia, vaai pe e mafai ona e taliina fesili o loo mulimuli mai:

• O le ā e ono faia e se Kerisiano pe a lē lavā tau faalogona ma lē lavā faaleagaga?

E manaʻomia ona tatou iloa le māfuaaga o lo tatou lē lavā. E fesoasoani le faia o se iloiloga o mea o loo tatou fiafia i ai ma a tatou meatotino, ma tuu ese mea e lē manaʻomia. Faatulaga sini e talafeagai ma o tatou tulaga. E tāua le tausia o lo tatou mālōlōina faaleagaga ma e ao ona aofia ai le tatalo ma le mafaufau loloto e lē aunoa.—8/15, itulau 23-26.

• Aiseā e manatu ai Molimau a Ieova o le numera 144,000 o se numera moni lava?

Ina ua uma ona taʻu atu i le aposetolo o Ioane se vaaiga e faatatau i lenei vaega o le 144,000, ona ia vaaia lea, o le ‘motu o tagata e toʻatele, e lē ma faitaulia e se tasi.’ (Faaaliga 7:4, 9) Afai o le numera 144,000 e faafaatusa ma e faasino atu i se vaega e lē iloa le aofaʻi, o lona uiga la e leai se eseesega o nei fuaiupu e lua. Na fetalai Iesu iā i latou o le a pule faatasi ma ia faapea o le “lafu mamoe itiiti.” (Luka 12:32)—9/1, itulau 30, 31.

• Aiseā na mafai ai e se tagata Isaraelu ona faatau atu se manu mate e leʻi faaaluina le toto i se tagata ese?

E leʻi nofo se tagata ese po o se tagata aumau e leʻi liulotu i lalo o le Tulafono. Sa faatagaina se tagata Isaraelu e avatu pe faatau atu na manu iā i te ia. (Teuteronome 14:21) I le isi itu, o le tagata liulotu, sa noanoatia i le Tulafono ma sa lē mafai ona ia ʻaia aano o se manu e leʻi faaaluina le toto. (Levitiko 17:10)—9/15, itulau 26.

• E faapefea ona faataʻitaʻi e tagata fausaga o mea faalenatura, ma aiseā e naunau i ai Kerisiano?

O loo taumafai le faasaienisi e faataʻitaʻi i fausaga o mea faalenatura. O se faataʻitaʻiga, na faia e le ʻauuso e faaiʻu iā Wright se vaalele ina ua māeʻa ona suʻesuʻeina manufelelei lapopoʻa a o felelei. O lea, o le faataʻitaʻi i le fausaga o mea faalenatura e uunaʻia ai se Kerisiano e avatu le viiga i Lē na Foafoaina Mea.—10/1, itulau 9.

• O ai o loo taʻua i le 2 Korinito 12:2-4 faapea na segia i le parataiso?

O na upu, na sosoo i fuaiupu na taʻutonuina ai e Paulo le avea o ia ma aposetolo. Ona e lē o taʻua e le Tusi Paia se isi lava tagata na segia i le parataiso ma talu ai o Paulo lava ia o loo taʻu maia lenā mea, e foliga mai la o Paulo sa ia vaaia lenei faaaliga.—10/15, itulau 8.

• O ā nisi o uiga o Iesu ua agavaa ai o ia e auauna o le Taʻitaʻi na filifilia e le Atua?

Sa tausisia pea e Iesu le faamaoni atoatoa ma le amio saʻo. Sa tuuina atoatoa o ia i le Atua. Sa manatu mamafa Iesu i tagata ma naunau e galue. —11/1, itulau 6-7.

• O fea o le a iai temoni i le Afe Tausaga?

E mafai ona tatou faia se faaiʻuga saʻo e faapea, i le taimi o le Afe Tausaga o le Nofo Tupu o Keriso, o le a saisaitia i latou i le tō e lē gata faatasi ma Satani. (Faaaliga 20:1-3) O loo valoia i le Kenese 3:15 le tuʻimomomoina o le ulu o le gata, lea e aofia ai ma lona fusifusia i le Afe o Tausaga. O lana fanau, e aofia ai agelu leaga, po o temoni. O lo latou fefefe i le tō e lē gata po o le fafā, ua faaalia ai faapea o loo latou iloa lelei e uiga i lenei taofiofia o i latou. (Luka 8:31)—11/15, itulau 30-31.

• Aiseā e tatau ai ona faaeteete se tagata i le inuina o le ʻava malosi, e tusa lava pe taofia le inu a o leʻi oo atu i le tulaga ua iloa e isi ua onā?

E itiiti ni faailoga e faaalia e nisi e iloa ai ua onā e tusa lava po o le a le tele o fagu ua ia inuina. Ae peitaʻi, e faasolosolo mālie lava ona faalagolago se tasi i le ʻava malosi ma oo ina ‘faapologaina ai i le uaina.’ (Tito 2:3) Na lapataʻi Iesu i le soona aai ma le soona inu ma le “onā.” (Luka 21:34, 35) E lē faapea seʻiloga e onā se tasi ona faatoʻā avea lea ma sē paiē ma matamoe i le faaletino ma le faaleagaga.—12/1, itulau 19-21.