“Ia Mataala”

I ASO anamua, na auauna ai leoleo faitotoʻa i le aai ma le malumalu, ma i faitotoʻa i fale o aiga. E lē gata e faamautinoa ua loka faitotoʻa i le pō, ae auauna foʻi nei leoleo faitotoʻa o ni tagata vaai. O se tofiga mamafa, ona e faalagolago le saogalemu o le aai i lo latou alaga atu e lapataʻia tagata e faatatau i se lamatiaga ua latalata mai.

Na masani lelei Iesu Keriso ma le galuega o le leoleo faitotoʻa. I se tasi aso, na ia faatusaina ai ona soo i leoleo faitotoʻa, ma faalaeiau i latou ina ia mataala e tusa ai ma le faaiʻuga o le faiga o mea a Iutaia. Na ia fetalai: “Ia outou, inā mataala ia, auā tou te lē iloa pe oo mai afea ia aso. Faapei o se tagata na alu malaga, na ia tuua lona fale ma . . . fai atu i le leoleo faitotoʻa ina ia mataala o ia. O lea, ia mataala ai outou; auā tou te lē iloa po o afea e sau ai le alii o le aiga.”—Mareko 13:33-35.

E silia i le 125 tausaga seʻia oo mai i aso nei, ua faaalia e Le Olomatamata, le faalaeiauga a Iesu “ia mataala.” E faapefea? E pei ona faaalia i le itulau e 2 o lenei mekasini, “E mataala pea lenei mekasini i mea tutupu i le lalolagi ma le faataunuuga o valoaga o le Tusi Paia e ia mea. E faamāfanafana i tagata uma i le tala lelei o le Malo o le Atua, lea ua toe o se aga ona faaumatia lea o ē o loo faasauā i o latou uso a tagata ma mulimuli ane ai ona suia lea o lenei lalolagi e avea ma parataiso.” O Le Olomatamata, o le mekasini faale-Tusi Paia lea ua sili atu lona faasalalauina i le lalolagi, ma ua sili atu i le 26,000,000 kopi o mekasini taʻitasi i gagana e 150. E ala i Le Olomatamata, ua pei ai Molimau a Ieova o leoleo faitotoʻa i aso anamua, e faalaeiauina tagata i so o se mea ina ia “mataala” faaleagaga, auā ua toeitiiti ona toe afio mai lea o le Matai, o Iesu Keriso, ma aumaia le iʻuga o lenei lalolagi.—Mareko 13:26, 37.