Fesili Mai le ʻAufaitau

Po ua faaalia i le ʻaina e Tavita ma ona tagata o areto sā e laulauina i luma, ua faapea ai, e mafai ona solia le tulafono a le Atua e aunoa ma se faasalaga i tulaga faigatā?—1 Samuelu 21:1-6.

E tusa ai ma le faamatalaga i le Levitiko 24:5-9, o areto ia e laulauina i luma, na e suia i Sapati taʻitasi, sa faasāina, e na o ositaulaga e aai ai. O le mataupu silisili i lenei mea e faapea, o areto, e paia ma e tatau ona avea ma mea e ʻai ma tagata o loo faia le auaunaga i le Atua; o ositaulaga ia. E matuā sesē lava pe afai e ʻai e so o se tagata areto sā. Ae peitaʻi, e leʻi faia e le ositaulaga o Apimeleka se mea sesē ina ua ia avatu areto sā e aai ai Tavita ma ona tagata.

E foliga mai sa faia e Tavita se feʻau faapitoa mai le tupu o Saulo. Ae, na fia aai Tavita ma ona tagata. Sa manatu Apimeleka, o loo mamā i latou e tusa ai ma lea tulaga. E ui lava e sā lo latou ʻaina o areto e laulauina atu e tusa ai ma le tulafono, ae i le taimi e tasi, sa ōgatasi lo latou ʻaina ma le fuafuaga o le areto e laulauina atu. O lea, na faia ai e Apimeleka se gaoioiga e ese mai i le tulafono e tusa ai ma lea tulaga. Na taʻua e Iesu Keriso lenei mea na tupu, e faaalia ai le lē saʻo o le faatatauina ma le maumaututū o le tulafono o le Sapati, e tusa ai ma manatu sesē o le ʻau Faresaio.—Mataio 12:1-8.

Ae peitaʻi, i lenei mea na tupu e pei ona muaʻi taʻua, e lē o lona uiga e faapea, e mafai lava ona solia le tulafono a le Atua pe a oo ina faigatā tulaga o mea. O se faaaʻoaʻoga, sa iai se tulaga matuiā lava ina o tau fitafita Isaraelu ma tagata Filisitia. Na faapea mai le tupu o Saulo: “Ia malaia le tagata na te ʻai se mea seʻia oo i le pō, ina ia ou taui atu i oʻu fili.” Ua faapea mai le Tusi Paia: “Ua latou fafasi i lea aso iā Filisitia.” Sa matuā lailoa lava fitafita i le fia aai, ‘ona fafasi lea e le nuu o manu ma latou aai ai faatasi ma le toto.’ (1 Samuelu 14:24, 31-33) Na latou agasala ai iā Ieova ona o le solia o lana tulafono e faatatau i le toto. Sa lē ōgatusa a latou gaoioiga ma le faatonuga a le Atua i le faaaogāina o le toto, lea e faapea mai “e fai aʻi le togiola” mo agasala. (Levitiko 17:10-12; Kenese 9:3, 4) Ae na talia ma le alofa mutimutivale e Ieova taulaga na faia mo i latou na agasala.—1 Samuelu 14:34, 35.

O le mea moni, e faatalitalia e Ieova i tatou ia usiusitai i ana tulafono i mea uma. Ua faapea mai le aposetolo o Ioane: “O lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.—1 Ioane 5:3.

[Ata i le itulau 30]

I Sapati taʻitasi e tuu ai areto fou e laulauina i totonu o le fale fetafaʻi