Fesili Mai le ʻAufaitau

Pe e tatau i se Kerisiano ona avatu se tupe po o se meaalofa i se tagata faigaluega i le malo mo lana auaunaga, po o lenā mea o se faiga faatogafalea?

I so o se vaipanoa o loo nonofo ai Kerisiano, e ao ona latou faaalia le faautauta i le feagai ai ma tulaga o loo iai i le atunuu. Ia latou manatua, o mea e faia ma e faatulafonoina i le tasi atunuu, e ono lē talia lava pe lē tusa ma le tulafono i isi atunuu. (Faataoto 2:6-9) E moni, e tatau ona manatua pea e se Kerisiano e faapea, e so o se tasi lava e fia “nofo i le fale fetafaʻi [o Ieova]” e tatau ona teena faiga faatogafalea.—Salamo 15:1, 5; Faataoto 17:23.

O le ā le faiga faatogafalea? E tusa ai ma le faamatalaga i le tusi, The World Book Encyclopedia, “o le uiga o le faatogafalea, o le avatu po o le ofo atu o se mea aupito sili ona tāua i se . . . tagata e i se tulaga maualuga aloaʻia, o lē na te lē faia ona tiute pe solia le tulafono ina ia maua ai e lē na foaʻi atu le tupe se aogā.” O lea, e tusa lava po o fea e te nofo ai, o se faiga faatogafalea le avatu o se tupe po o se meaalofa i se faamasino, po o se leoleo, ina ia faia se mea lē tonu, po o se taʻitaʻi leoleo ina ia lē amanaʻia ai le mea sesē po o se solitulafono. O se faiga faatogafalea foʻi le avatu o se meaalofa po o se tupe ina ia e maua ai se auaunaga faapitoa mo oe, e pei o le faamuamua o oe ae o loo faatali le toʻatele o tagata i se laina umi. E lē o se faiga alofa lenā.—Mataio 7:12; 22:39.

Ae, o le faatogafalea ea le avatu o se tupe po o se meaalofa i se tasi e faigaluega i le malo, ina ia maua ai se auaunaga faalemalo pe ina ia ʻalofia ai faiga lē tonu? O se faaaʻoaʻoga, i nisi atunuu, atonu e mumusu ai tagata faigaluega e tusia igoa o tamaiti i se aʻoga, pe talia se tagata i se falemaʻi, pe fai se faailoga i ni pepa o femalagaaʻiga seʻiloga e avatu se tupe. Po o le faiaga foʻi i le faagaoioia o tusi talosaga mo le toe faafouina o laisene ma pemita.

E eseese lava faiga i le foaʻi atu o ni tupe, ma vaaiga a tagata i na mea, mai lea atunuu i lea atunuu. I atunuu e masani ona faatalitalia le totogia ai o na tupe, e ono lagona ai e nisi Kerisiano e faapea, e tusa ai ma le tulafono, e latou te lē o solia ai mataupu silisili o le Tusi Paia pe a latou foaʻi atu se tupe i se tagata faigaluega maualuga ina ia faia ai ona tiute. I nisi o atunuu, e manatu ai foʻi nisi i foaʻi faapena o se meaalofa e faaopoopo i le totogi o le tagata faigaluega, talu ai e laʻitiiti lona totogi. Ia manatua, e iai le eseesega i le ofo atu o se meaalofa e faia ai se auaunaga faalemalo ma le ofoina atu o se tupe e faia ai se faiga faatogafalea.

I le isi itu, i atunuu ia e fai ma masani ona foaʻi atu ai ni meaalofa po o ni tupe pe a talosagaina ni pepa faale-tulafono, o nisi Molimau a Ieova e leʻi tuuina atu se tupe i ni tagata asiasi, tagata faigaluega i le tiute, po o isi. Talu ai ua iloa i le atunuu o Molimau e lē gata i lo latou amio lelei, faapea lo latou faamaoni, o lea i nisi taimi, e fai lelei ai Molimau i se auala e lē o faia i le toʻatele o tagata seʻiloga ua latou avatu se tupe po o se meaalofa.—Faataoto 10:9; Mataio 5:16.

I se aotelega, e tatau i auauna taʻitoʻatasi a Ieova ona filifili pe na te foaʻi atu se tupe ina ia maua ai se auaunaga faalemalo pe ina ia ʻalofia ai le faiga lē tonu. I mea uma lava, e tatau ona ia fai se filifiliga e tumau ai pea ona lelei lona loto fuatiaifo, e lē faalumaina ai le suafa o Ieova, ma e lē tausuai ai isi.—Mataio 6:9; 1 Korinito 10:31-33; 2 Korinito 6:3; 1 Timoteo 1:5.