Le Amataga o le Finauga a le Faasaienisi Ma Lotu

INA UA latalata ina oti se tagata suʻesuʻe i le vateatea ua 70 ona tausaga, sa taumafai o ia e faitau le tusi na ia tusia, ma ua sauni e lomia. Pe na ia iloaina pe leai, a o lana tusi, o le a suia ai manatu o tagata e uiga i le vateatea. O le a faapogaia ai foʻi se finauga aasa ma lotu ua taʻua o Kerisiano, seʻia oo mai i aso nei.

O le tamāloa lea ua pulapula lāgoto lona soifua, o Nicolaus Copernicus, o se tagata Katoliko mai Polani, i le 1543. I lana tusi On the Revolutions of the Heavenly Spheres, na faapea mai ai Copernicus, o le lalolagi e taamilo ae lē o le lā. I lenā tusi e tasi, na suia ai e Copernicus le aʻoaʻoga lavelave muamua, i se aʻoaʻoga faigofie.

I le taimi muamua, na te leʻi iloaina le finauga lea o le a tupu ona o lana tusi, auā sa faautauta lelei Copernicus i le faaalia mai o ona manatu. E lē gata i lea, e ui ina talitonu le Lotu Katoliko i le manatu o loo tū le lalolagi, ae sa talia e le Lotu aʻoaʻoga a isi saienitisi i lenā taimi. Sa faalaeiauina foʻi e le pope ia Copernicus ina ia lomia ma faasalalauina lana tusi. Ina ua lomia e Copernicus lana tusi, na tusi ai e se faatonu fefevale ana lava upu tomua, e faapea, o le aʻoaʻoga i le taamilo o le lalolagi, o se taofi e faavae i faamatematika, ae lē o se faamaoniga o suʻesuʻega i le vateatea.

Ua Oo Ina Vevela Fefinauaʻiga

O le isi tagata na ioe iā Copernicus, o Galileo Galilei (1564-1642) mai Italia, o se tagata suʻesuʻe i le vateatea, ma le faamatematika, o ia foʻi o se Katoliko. Na iloa atu ai e Galileo i le lagi, ni mea e leʻi vaaia muamua e se tasi e ala i le faata vaai mamao na ia faia, e iai ni tioata fou. O ana suʻesuʻega, na talitonu ai o ia e saʻo manatu o Copernicus. Na vaaia ai foʻi e Galileo ni togitogi i le lā, i lea, na finauina ai foʻi se isi talitonuga faasaienisi ma faalotu i lenā taimi e faapea, e lē mafai ona suia pe faaleagaina le lā.

E leʻi pei Galileo o Copernicus, sa loto tele ma maelega o ia i le faalauiloaina atu o ona manatu. Sa ese foʻi le tulaga faalelotu i  le taimi o Galileo, auā na matuā tetee le Lotu Katoliko i aʻoaʻoga a Copernicus. O lea, ina ua finau atu Galileo, e lē gata e saʻo le aʻoaʻoga a Copernicus, ae e ōgatusa foʻi ma le Tusi Paia, sa manatu le lotu o ia o se tasi e tetee iā i latou. *

Na alu atu Galileo i Roma ina ia faamaonia ona manatu, ae leʻi taulau manuia. I le 1616, na poloaʻia ai o ia e le lotu ina ia aua neʻi ona toe lagolagoina Copernicus. Na lē toe faalauiloa atu ai e Galileo ona taofi mo se taimi. Peitaʻi i le 1632, na ia lomia ai se isi tusi e lagolagoina ai aʻoaʻoga a Copernicus. Ae o le tausaga na sosoo ai, na faasalaina ai e taʻitaʻi lotu ia Galileo i lona olaga atoa i le falepuipui. Ae ona ua matua o ia, na latou vave suia ai i le faasalaina o ia i lona lava fale i le vaavaaiga a leoleo.

E toʻatele ua manatu i le tetee o Galileo i le lotu o se manumalo o le faasaienisi i le lotu ma o le manumalo foʻi lea o le Tusi Paia. Ae peitaʻi, e pei ona taʻua i le mataupu o sosoo mai, o lenei faaiʻuga, ua lē amanaʻia ai le tele o mea moni.

[Faamatalaga pito i lalo]

[Ata i le itulau 3]

Copernicus

[Faamatalaga i Ata]

Mai i le tusi a Giordano Bruno ma Galilei (tusi faa-Siamani)

[Ata i le itulau 3]

Ua molimau atu Galileo i luma o le Faamasinoga Faalelotu a Roma

[Faamatalaga i Ata]

Mai i le tusi, The Historian’s History of the World, Tusi IX, 1904

[Faamatalaga i Ata i le itulau 3]

Siata i tua atu o loo faaatagia ai manatu o Copernicus e uiga i le vateatea