Lipoti o Ē Faalauiloa le Malo

Saʻili mo Ē ua Tatau ai i Nuu i Tua o Ausetalia

O SE vaega maouta o Ausetalia ua lauiloa o nuuāuta. I nisi vaega o lenei nofoaga maotua, ua 12 tausaga e leʻi oo i ai se talaʻiga. O lea, na faamaopoopo ai e Molimau a Ieova i Darwin, se tauiviga tele ina ia talaʻi i inā mo aso e iva i le saʻilia o ē ua tatau ai.—Mataio 10:11.

E 12 masina na fuafuaina ai lenei tauiviga, na aofia ai ma le faia o faafanua mo le sili atu i le 300,000 maila faatafafā [800,000 kilomita faatafafā]; o se oganuu e faatolu ona tele atu i lo o Niu Sila. Ina ia iloa le mamao tele o lenei oganuu, seʻi manatu i le mamao masani o le auala e alu i le fale i se faatoʻaga, e sili atu i le 20 maila [30 kilomita] mai le auala tele i le alatatala i le fale! E lē gata i lea, o nisi faatoʻaga e tusa ma le 180 maila [300 kilomita] pe sili atu le va ma le isi faatoʻaga.

E 145 Molimau na tauofo ina ia faia se sao i lenei tauiviga. O nisi na ō mai mamao lava mai Tasemania. O nisi na ō mai i taavale ua tutumu i mea e nonofo ai, o vaega faaleoleo o taavale, ma penisini mo taavale. O isi na aumai a latou mea i taavale toso. E lē gata i lea, na totogi foʻi pasi e taʻi 22 nofoa e ave ai i latou e leʻi iai ni taavale talafeagai mo le oganuu. O i latou na malaga i pasi, na molimau atu i tagata e nonofo i aai laiti i le oganuu.

A o leʻi malaga atu, na faia ai e uso ni talanoaga ma ni faataʻitaʻiga i le auala e talaʻi atu ai le tala lelei i lenei oganuu e lē masani ai. O se faaaʻoaʻoga, ina ia fai se talaʻiga aogā i oganuu o tagata uli i Ausetalia, e manaʻomia ai ona ōgatasi ma nisi o tulafono ma ia malamalama i a latou tū masani. Sa talanoaina ai foʻi le manatu mamafa i le siʻosiʻomaga ina ia fesoasoani i le puipuia o meaola o le vao.

E tele ni mea mataʻina na fiafia ai le ʻautalaʻi. O se faataʻitaʻiga, i se tasi nuu o tagata uli, na fuafua ai se uso e fai atu se lauga lautele faale-Tusi Paia. Na alu atu se tamaʻitaʻi e faauluulu i ai le nuu ma faailoa atu i tagata  lea fuafuaga. Mulimuli ane, na tuua ai iā i latou na auai ni tusi se 5, ma polosiua e 41. I se isi nuu, na faafeiloaʻi atu ai i se tagata uli sa iai lana lava Tusi Paia, o le King James Version, ae ua tuai ma masaesae. Ina ua fesili atu pe na te iloa le suafa o le Atua, na fai mai ioe, ma seʻi aʻe mai le taga o lona peleue se kopi tuai o Le Olomatamata. Na ia faitau mai i le mekasini le Mareko 12:30 (NW), lea e faapea mai: “Ia e alofa foʻi iā Ieova lou Atua ma lou loto atoa.” Na ia faapea mai, “E ese loʻu fiafia i le mau lenā.” Ina ua uma se talanoaga umi faale-Tusi Paia, na ia talia ai se Tusi Paia fou ma isi lomiga faale-Tusi Paia.

I le latalata i le Fagaloa o Carpentaria, na faaalia ai e le fomeni o se faatoʻaga povi e tusa ma le miliona eka [400,000 ha] le fiafia i le feʻau o le Malo. Ina ua faaali atu i ai le tusi, O Laʻu Tusi o Tala o Le Tusi Paia ma le tusi, Le Poto e Taʻitaʻia ai i le Ola e Faavavau, * na ia fesili mai pe e iai ni lomiga i le gagana Kriol. E lē masani ai ona fai mai se talosaga faapenei, auā e ui lava e toʻatele tagata uli e tautala i le gagana Kriol, ae toʻaitiiti e faitauina. Na iloa ane o tagata faigaluega uma e toʻa 50 i lenā faatoʻaga, e iloa faitau i le gagana Kriol. Sa fiafia lava le fomeni ona ua maua lomiga faale-Tusi Paia i le gagana Kriol, ma na ia fiafia foʻi e tuuina mai le numera o lana telefoni e faafesootaʻi atu ai o ia.

I le faagasologa o le iva aso o le tauiviga tele, na tufaina atu ai Tusi Paia e 120, e 770 tusi, 705 mekasini, ma polosiua e 1,965. E lē gata i lea, e 720 toe asiga na faia ma e 215 suʻesuʻega faale-Tusi Paia na amataina.

O le mea moni, ua oo ina faamalieina le matelāina faaleagaga o le toʻatele o i latou ua tatau ai na o loo salalau solo i lenā oganuu matuā telē.—Mataio 5:6.

[Faamatalaga pito i lalo]

[Ata i le itulau 30]

(Tagaʻi i le lomiga mo le ata atoa)

AUSETALIA

LAUFANUA I MATU

Darwin

Fagaloa o Carpentaria

Sini

TASEMANIA