Se Aferika Lotomaulalo o Lē e Naunau i le Afioga a le Atua

E MASANI lava ona maofa tagata e asiasi atu i Aferika, ona o le faigofie ona amataina ni talanoaga ma tagata o le atunuu i ni mataupu mai le Tusi Paia. O fesili e pei o le, “O le ā le Malo o le Atua?” po o le “Pe e iai se vaifofō i faafitauli e pei o le lē lava o mea taumafa, faamaʻi, taua, ma le solitulafono?” e uaʻi mai ai tagata. E toʻatele lava e fiafia e faalogo i se tagata mai se isi atunuu o faailoa atu iā i latou tali mai le Tusi Paia. O lenei mea, e masani ona iʻu atu ai i le faia o ni suʻesuʻega faale-Tusi Paia e lē aunoa. A o agaʻigaʻi i luma faaleagaga tagata suʻesuʻe, na oo ina avea i latou o ni Kerisiano papatisoina.

O se tasi o tagata Aferika na muamua tali atu faapena, lea o loo taʻua i le Tusi Paia i le Galuega 8:26-40. O se tamāloa Aitiope o lē na malaga atu i Ierusalema e tapuaʻi iā Ieova le Atua.

E pei ona faaalia i le ata o loo i lalo, ua toe foʻi atu le tamāloa Aitiope i lona fale i lana kariota, o loo faitau se tusi tāʻai. Na faalatalata atu se tagata ese iā te ia ma fesili atu: “Po ua e lagona ea i mea ua e faitauina?” Sa faailoa atu ma le lotomaulalo e le Aitiope, na ia manaʻomia se fesoasoani, ma talosaga atu iā Filipo, ina ia oso atu i luga o le kariota. Ona ia fai atu lea iā Filipo e faamatala atu iā te ia fuaitau o le Tusi Paia ia sa na faitauina. Na faamatala atu e Filipo e faapea, o se valoaga lenei e faatatau i le maliu o le Mesia, o Iesu Keriso. Na faamatala atu foʻi e Filipo ma isi mea e faatatau “i le tala lelei iā Iesu,” e lē taumatea na aofia ai ma le toe tū mai o Iesu.

I le faalogo atu i nei upu moni ofoofogia, na manaʻo ai loa le Aitiope ia avea o ia ma soo o Iesu ma fesili atu: “Se ā ea se mea e vaoia ai aʻu e aua le papatisoina o aʻu?” Ina ua uma ona papatisoina o ia, ona alu ai lea o lenei tagata Aferika loto maulalo i lona ala ma le fiafia tele, ma e leʻi toe taʻua o ia i le Tusi Paia.

I aso nei, o loo fesoasoani atu ai Molimau a Ieova i le faitau miliona o tagata i le lalolagi aoao ina ia iloa e uiga i lea lava “tala lelei.” E tusa ma le ono miliona suʻesuʻega faale-Tusi Paia o loo faia nei i aiga e aunoa ma se totogi.