Ave i Fale le Poto i le Taimi Nei e Oo i le Faavavau

NA TUSIA e se fomaʻi Siamani e suafa iā Ulrich Strunz se faasologa o tusi e faaulutalaina, Forever Young. Na ia faapea mai, e mafai ona faaleleia ma umi le soifua mālōlōina, i faamalositino, taumafa talafeagai, ma amioga lelei. Peitaʻi, na te leʻi taʻuina atu i ana tagata faitau, o le a mafai ona latou ola e faavavau e ala i le mulimuli i ana fautuaga.

Ae peitaʻi, ua folafolaina mai e iai se mea e mafai ona iloa e maua ai le ola e faavavau. Ae i le isi itu, afai e te ola e faavavau, e mafai ona e ave i fale le poto e faavavau. Na tatalo Iesu i le Atua: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Seʻi o tatou iloiloina muamua le faaupuga “ola e faavavau” ona iloilo lea po o le ā le poto po o le iloa e aofia ai ma pe faapefea ona e mauaina.

E tusa ai ma le Tusi Paia, o le a faaliliuina e le Atua le lalolagi i se parataiso, lea o le a saunia ai tulaga lelei mo le ola e faavavau. O le aumaia o lenā parataiso o le a manaʻomia ai se suiga tele, e pei lava o le lolo i aso o Noa. Ua faaalia e le Mataio 24:37-39, na faatusatusa e Ieova o tatou aso i “o ona pō o Noa” na “lē iloa” pe lē ano tagata i latou tulaga faigatā. Na latou lē amanaʻia foʻi le feʻau na talaʻia e Noa. Na “oo lava i le aso na ulu atu ai Noa i le vaa,” ma faaumatia ai i  latou uma lava o ē na tetee i lenei poto. Na faasaoina Noa ma i latou sa i le vaa.

Na faaalia e Iesu o le a oo mai se “aso” faapena i o tatou taimi. O i latou o ē utagia le poto e fesootaʻi atu ma lenei mea, e lē gata o le a faasaoina, ae maua foʻi le faamoemoe o le ola e faavavau. E lē gata i lea, o ē na maliliu o loo manatua e le Atua, o le a toe faatūina i latou ma le faamoemoe e lē toe oti. (Ioane 5:28, 29) Ia mātau le auala na faaalia ai e Iesu nei manatu e lua. Ina ua fetalai atu iā Mareta e faatatau i le toe tutū o ē ua maliliu: “O lē faatuatua mai iā te aʻu, e ui lava ina oti, a e ola lava ia. O tagata ola uma o ē faatuatua mai iā te aʻu, e lē oti lava e oo i le faavavau.” Ua faaalia e faamaoniga uma, ua latalata lenei “aso,” o lona uiga atonu o le a lē toe “oti lava e oo i le faavavau.”—Ioane 11:25-27.

Na fesili Iesu iā Mareta: “Ua e talitonu mai ea i lenā mea?” Na ia tali atu: “Ioe, le Alii e.” Seʻi faapea e fesili atu Iesu iā te oe i le fesili lava lenā i aso nei, o le ā lau tali? Atonu e faigatā ona e talitonu i le tulaga o le lē toe oti. Peitaʻi, e tusa lava pe o lau tali lenā, ae lē masalomia lou manaʻo e talitonu i ai. Ia mafaufau i le tele e mafai ona e aʻoaʻoina pe afai e te lē toe “oti lava e oo i le faavavau”! Seʻi mafaufau foʻi i lou olioli i mea uma lava o e moomoo e aʻoaʻoina, peitaʻi e lē mafai ona e faia i le taimi nei. Ma ia manatunatu i le toe aufaatasi ma i latou o ē pele iā te oe na maliliu! O le ā le poto lea ua mafai ai ona tatou iloa nei mea, ma e faapefea ona e maua?

E Mafai Ona Tatou Maua le Poto e Oo Atu ai i le Ola e Faavavau

Pe o le aveina i fale o le poto o le Atua ma Keriso e lē oo i ai lou tomai? E leai. E moni e lē gata mai le poto e uiga i mea na faia e le Atua. Peitaʻi, e leʻi faasino atu e Iesu i suʻesuʻega o le vateatea ma isi mea ina ua ia fetalai i mea e ao ona tatou “iloa” ma le “ola e faavavau.” Ua taʻua i le Faataoto 2:1, 5, o “upu” ma “poloaʻiga” o loo i le Tusi Paia, o mea autū ia o le “poto i le Atua.” Ua faaalia i le Ioane 20:30, 31 o mea uma e ao ona tatou iloa e faatatau iā Iesu, ua tusia i le Tusi Paia ina ia ‘maua ai le ola.’

O lea la, ua lava faamatalaga e uiga iā Ieova ma Iesu Keriso lea o loo i le Tusi Paia, e faaali atu ai iā te oe le auala e maua ai le ola e faavavau. O le Tusi Paia, o se tusi tutasi. Na faagaeeina e le Atua, tagata e tusia le Tusi Paia i se auala e mafai ai e tagata e lē lelei aʻoaʻoga, ona suʻesuʻe ina ia maua ai le ola e faavavau. E faapena foʻi i se tasi e vave ona ia aʻoaʻoina se mea, ua iai le taimi ma faamatalaga e mafai ona ia aʻoaʻoina se mea fou mai le Tusi Paia. Afai e mafai ona e faitauina lenei mataupu o se faamaoniga lenā o le tomai e aʻoaʻo ai, ae pe o le a e faaaogā lenā tomai?

Ua faaalia i mea tutupu i le lalolagi, o le auala sili e maua ai lenei poto, e ala i le faia o sau suʻesuʻega o le Tusi Paia e se tasi ua malamalama i le mataupu. E pei ona taumafai Noa e faailoa atu le poto tāua i ē na ola i na aso, e faapena foʻi ona naunau Molimau a Ieova e ō atu i lou maota e talanoa i le Tusi Paia faatasi ma oe. E latou te ono faaaogā le polosiua, O le ā e Manaomia e le Atua Mai ia i Tatou? po o le tusi, Le Poto e Taʻitaʻia ai i le Ola e Faavavau. * E tusa lava  pe e faigatā ona e talitonu i le manatu e faapea, i le parataiso i le lalolagi, o ē faamaoni o le a “lē oti e oo lava i le faavavau,” ae e mafai ona e talitonu i nei folafolaga e ala i nei talanoaga. O lea, pe afai e te fia ola e faavavau po o le manaʻo e iloa pe talafeagai ona talitonu pe mafai ona e ola e faavavau, o le ā e ao ona e faia? E ao ona e talia lenei avanoa e suʻesuʻe ai le Tusi Paia.

O le ā le umi e faia ai na suʻesuʻega? O le polosiua e 32 ona itulau lea na taʻua, ua lomia nei i le faitau selau o gagana, ma e 16 lesona pupuu o loo aofia ai. Ae afai e mafai ona e faatulaga se itula i le vaiaso, e na o ni nai masina lava e suʻesuʻe ai mataupu tāua o le Tusi Paia i le tusi o Le Poto e Taʻitaʻia ai i le Ola e Faavavau. Ua fesoasoani nei lomiga i le toʻatele ina ia maua le poto ma atiina aʻe se alofa loloto mo le Atua. O le a tauia e le Atua i latou e alolofa moni iā te ia, ma maua le ola e faavavau.

E mafai ona tatou ave i fale le poto e ola ai auā e faigofie ona maua. Ua faaliliuina le Tusi Paia po o ni vaega foʻi, i gagana e sili atu i le 2,000. E fiafia Molimau a Ieova i atunuu e 235, e fesoasoani i tagata ma saunia lomiga faale-Tusi Paia ina ia atili malamalama ai.

Suʻesuʻega a le Tagata Lava Ia

O la oulua faiā ma le Atua, o se mataupu lenā e fitoitonu iā te oe lava ma le Atua. E na o oe e mafai ona tausisia ma faamalosia lenā faiā, ae na o ia e mafai ona avatu iā te oe le ola e faavavau. O lea la, e ao ona faaauau ona faia au lava suʻesuʻega i lana Afioga. O le iai o se tasi e asiasi atu e lē aunoa i lou maota, o le a faigofie ai iā te oe ona faatulaga se taimi mo suʻesuʻega.

Talu ai ua aofia i le Tusi Paia ma lomiga faale-Tusi Paia le “poto i le Atua,” e matuā talafeagai ai le tausia lelei o na mea. (Faataoto 2:5) O lenā auala o le a iai iā te oe na lomiga mo se taimi umi. Afai o e soifua i se atunuu tauatiaʻe, atonu e lē o aʻoaʻoina oe e ala i le faitauina o tusi, ae e aʻoaʻoina oe e ala i le faalogo ma le vaai. O se faaaʻoaʻoga, i Benin, e sili atu i le 50 gagana e tautatala ai tagata. O se mea e masani ai le faigofie ona tautatala o tagata i gagana e fā pe lima, e ui lava e leai ni a latou tusi i nei gagana. O se meaalofa le tomai e aʻoaʻo ai e ala i le faalogo, vaai ma le uaʻi atu. Peitaʻi, e mafai ona fesoasoani tusi iā te oe i lau suʻesuʻega.

E tusa lava pe toʻatele tou te nonofo faatasi i lou fale, ia taumafai e faatulaga se vaega e teu ai lau Tusi Paia ma lomiga faale-Tusi Paia. Ia teu i se mea e faigofie ai ona maua, ma o le a lē faaleagaina ai.

Suʻesuʻega a le Aiga

Afai o oe o se matua, e ao ona e naunau e fesoasoani i lau fanau ina ia maua le poto lea ua e mauaina. I atunuu tauatiaʻe, e masani ona aʻoaʻoina ai e mātua a latou fanau i le tele o tomai talafeagai i le olaga. Atonu e aofia ai le kuka, aoaoina o fafie, asuina o vai, faatoʻaga, faiga faiva ma le faatauina o mea i le maketi. O se aʻoaʻoga moni lava mo le tausia o le olaga. Ae peitaʻi, e toʻatele mātua latou te lē o faaaofia ai ma le aʻoaʻoina o le poto e maua ai le ola e faavavau.

Po o le ā lava lou tulaga, atonu e te lagona e lē o tele sou taimi avanoa. O loo silafia e le Atua lenei tulaga. Ia mātau le mea na ia fetalai mai i se taimi ua leva, i le auala e aʻoaʻo ai le fanau i ona ala: “Ia e matuā aʻoaʻo soo ai i lau fanau, ma ia e tautalatala aʻi, pe a e nofo i lou fale, pe a e savali foʻi i le ala, pe a e taoto, pe a e tulaʻi foʻi.” (Teuteronome 6:7) E tusa ma nei manatu, o se mea lelei le faia o sau lava polokalame tauaʻoaʻoga e pei o nei e mulimuli mai:

1. “Pe a e nofo i lou fale”: Ia taumafai e talanoa e lē aunoa i le Tusi Paia, atonu e faia faalevaiaso faatasi ma lau fanau i le fale, e  pei lava ona faia e se tasi iā te oe. Ua saunia e Molimau a Ieova lomiga faale-Tusi Paia e talafeagai mo le aʻoaʻoina o fanau i so o se matua.

2. “Pe a e savali foʻi i le ala”: Ia talanoa i lau fanau i taimi faasamasamanoa e uiga iā Ieova, e pei lava ona e aʻoaʻoina i latou e faatatau i mea talafeagai i le olaga po o le avatu foʻi o taʻiala.

3. “Pe a e taoto”: Ia tatalo faatasi ma lau fanau i pō uma.

4. “Pe a e tulaʻi”: Ua maua e le toʻatele o aiga ni iʻuga lelei mai le talanoaina o le mau i taeao uma. Ua faia faapea e Molimau a Ieova e ala i le tamaʻitusi Iloiloina o le Tusi Paia i Aso Taʻitasi. *

I atunuu tauatiaʻe, e faia ai e mātua le tele o taumafaiga ina ia faamautinoa ua maua e se tasi o le fanau ni aʻoaʻoga lelei. I lenā auala, o le a mafai ai e le tamaitiiti ona tausia ona mātua pe a matutua. Ae peitaʻi, afai e te suʻesuʻeina le Tusi Paia ma fesoasoani i lau fanau e faia faapea, o le a atili fesoasoani iā te oe ma lou aiga e maua ai le ola e faavavau.

Pe o le a iai ea se aso o le a tatou iloa ai mea uma lava? E leai. A o faaauau le faataamilosaga a le lalolagi i le vateatea, o le a faaauau foʻi ona tatou aʻoaʻoina le poto. Ua taʻua i le Failauga 3:11: “Ua faia e [le Atua] mea uma lava e matagofie i o latou lava tausaga; ua tuuina foʻi e ia le manatu i le lalolagi i o latou loto; a e lē mailoa e le tagata le galuega ua faia e le Atua mai le amataga e oo i le gataaga.” O se fiafiaga e lē muta le aveina i fale o le poto.

[Faamatalaga pito i lalo]

[Faamatalaga faaopoopo i le itulau 5]

“O le ola e faavavau foʻi lenei, ia latou iloa oe . . . ”

[Ata i le itulau 7]

Ia fesoasoani i lou aiga e ave i fale le poto i le taimi nei ma e oo i le faavavau