Fesili Mai le ʻAufaitau

Aiseā na tusi ai Paulo e faatatau i se avā Kerisiano e faapea: “E faaolaina ia i le fānauga o tama”?—1 Timoteo 2:15.

O le ā ua faaalia e manatu o loo siʻomia ai lenei fuaiupu e faatatau i le mea na uiga atu i ai Paulo? I lalo o le taʻitaʻiga a le agaga paia, na ia tuuina atu ai fautuaga i tiutefai a se fafine Kerisiano i le faapotopotoga. Na ia tusi e faapea: “Ia faapea foʻi fafine, ia latou teuteu iā i latou i ofu e onomea, ma ia lē teuanoaʻi, a ia faamatuāfafine; aua neʻi teteu ma le lauulu fili, po o auro, po o penina, po o ofu tau tele, a o galuega lelei, o le mea lea e tatau i fafine ua taʻua latou e i latou o ē amio Atua.” (1 Timoteo 2:9, 10) Na timaʻi Paulo i ona tuafāfine Kerisiano ia lē teuanoaʻi, ia paleni i le faia o filifiliga a le tagata lava ia e faatatau i teuga, ma ia “teuteu” i galuega lelei.

Ona sosoo lea ma le faamatalaina e Paulo o le faatulagaga ulu i le faapotopotoga, i le faapea mai: “Ou te lē tuuina atu i se fafine ia aʻoaʻo atu, pe pule i le tane, a ia nofo faalologo lava.” (1 Timoteo 2:12; 1 Korinito 11:3) Na ia faamatala le faavae mo lenei faatulagaga i le faaalia faapea, e leʻi faasesēina Atamu e Satani, ae na “ʻolegia le fafine, ona solitulafono lea o ia.” E faapefea ona puipuia se fafine Kerisiano mai le agasala a Eva? Na tali Paulo e faapea: “A e faaolaina ia i le fānauga o tama, pe afai e tumau pea o ia i le faatuatua, ma le alofa, ma le amio lelei, atoa ma le faamatuāfafine.” (1 Timoteo 2:14, 15) O le ā le uiga o upu nei a Paulo?

E foliga mai e manatu nisi tagata faaliliu o le faaolataga o se fafine e faalagolago i lona mauaina o ni fanau. O se faataʻitaʻiga, ua faapea mai le Today’s English Version: “O le a faaolaina se fafine pe a iai sana fanau.” Ae peitaʻi, e lē o le saʻo lea o le faamatalaina o upu nei a Paulo. E tele mau o loo faailoa ai faapea, ina ia faaolaina e tatau i se tagata ona iloa lelei Ieova, talitonu iā Iesu, faatuatua, ma faaalia lea faatuatua e ala i galuega. (Ioane 17:3; Galuega 16:30, 31; Roma 10:10; Iakopo 2:26) E lē gata i lea, e leʻi uiga Paulo faapea, o le a saogalemu atoatoa fānauga a fafine talitonu. E saogalemu ma sologa lelei fānauga a fafine e tusa lava pe talitonu pe leai. Ma e faanoanoa, ona o nisi ua maliliu i le taimi o fānauga, pe talitonu pe leai.—Kenese 35:16-18.

O le isi fautuaga a Paulo mulimuli ane ai i le tusi lava lenei i fafine, ua fesoasoani iā i tatou e malamalama ai po o le ā le uiga o lana faamatalaga. Na ia lapataʻia nisi o fafine talavou ua oti a latou tane o ē na “paiē, e feoaʻi i lea fale ma lea fale; e lē gata foʻi ina latou paiē, a e soona tautala, ma matamata fua i galuega a nisi, ma tautalatala i mea lē tatau.” O le ā le fautuaga a Paulo? Na ia faaauau mai: “Ou te loto ia nofotane o fafine muli ua oti a latou tane, ia fanau ai tama, ia matai i latou i o latou aiga, ina neʻi tuuina atu i lē o loo tetee mai se mea e tasi e taʻuleagaina ai i tatou.”—1 Timoteo 5:13, 14.

Ua faamatilatila mai e Paulo le tiutefai a fafine i totonu o aiga. O le galulue i na galuega e pei o le ‘fānau o ni tama, ma ia matai i o latou aiga,’ o le fafine o le a faaauau i “le alofa, ma le amio lelei, atoa ma le faamatuāfafine” o le a lē taaʻina atu i amioga e lē ati aʻe ai. Ma o le a saogalemu ai lona tulaga faaleagaga. (1 Timoteo 2:15) O le faia o lenā mea, o le a fesoasoani i le tele o fafine muli e ʻalofia ai mailei a Satani.

O upu a Paulo iā Timoteo ua faamanatu mai ai iā i tatou uma, o tane ma fafine ina ia faaalu aogā o tatou taimi. Ua fautuaina e le Afioga a le Atua Kerisiano uma: “Ia faaeteete outou ina ia outou savavali ma le faautauta, aua neʻi faapei o ē valelea, a ia faapei o ē popoto.”—Efeso 5:15.