Po o le a E Faaatagia Atu le Mamalu o le Atua?
Po o le a E Faaatagia Atu le Mamalu o le Atua?
“Tatou [te faaatagia atu] le pupula o le Alii e peiseaʻī o i se faaata.”—2 KORINITO 3:18.
1. O le ā le vaaiga na vaaia e Mose, ma o le ā le mea na tupu mulimuli ane?
O SE tasi lenei o vaaiga ofoofogia e leʻi vaai muamua lava i ai se tagata. A o iai Mose i le mauga o Sinai, na tali ai e Ieova lana talosaga, o se talosaga e lē masani ai. Na mafai ona ia vaai i le mamalu o Ieova, lea e leʻi vaaia lava e se tasi. O le mea moni, e leʻi vaai tuusaʻo Mose iā Ieova. E lē mafai e se tagata ona vaai moni i le Atua ma ola pea. Na i lo lea, na ufitia e Ieova ia Mose i lona “lima” e pei o se ufiufi seʻia afio ese o Ia, e foliga mai sa faia e se agelu lenei mea. Na mafai e Ieova ona faavaai Mose i le ata lafoia o lenei faailoaina mai o lona mamalu. Na fetalai atu foʻi Ieova iā Mose e ala i se agelu. Ua taʻua i le Tusi Paia le mea na tupu mulimuli ane: “Ua oo ina alu ifo Mose nai le mauga o Sinai . . . ua pupula le paʻu o ona fofoga, a o fetalai i laʻua ma [Ieova].”—Esoto 33:18–34:7, 29.
2. O le ā le faamatalaga a Paulo e faatatau i le mamalu ua faaatagia atu e Kerisiano?
2 Seʻi faaata i lou mafaufau pe ana e iai faatasi ma Mose i lenā mauga. Maʻeu le faagaee loto i le vaavaai atu i le ofoofogia o Lē ona le malosi uma lava, ma faalogo atu i ana fetalaiga! O se matuā faaeaga le savavali faatasi ifo i le mauga o Sinai ma Mose, o le puluvaga o le feagaiga o le Tulafono! Ae pe e te iloa ua atagia atu i Kerisiano i nisi vala le mamalu o le Atua, i ni auala e sili atu i lo lea na faaatagia atu e Mose? O lenā mea moni faatupu manatu, ua maua i se tusi na tusia e Paulo. Na ia tusi e faapea, o loo atagia atu i Kerisiano faauuina ‘le pupula o Ieova e peiseaʻī o i se faaata.’ (2 Korinito 3:7, 8, 18) O loo faaatagia atu foʻi e Kerisiano o ē faamoemoe e ola i le lalolagi le mamalu o le Atua.
Le Auala e Faaatagia Atu ai e Kerisiano le Mamalu o le Atua
3. Ua faapefea ona tatou iloa Ieova i auala e leʻi iloa ai e Mose?
3 Pe e mafai faapefea ona tatou faaatagia atu le mamalu o le Atua? E tatou te lē vāai pe faalogo i le siʻufofoga o Ieova e pei ona sa oo iā Mose. Ae peitaʻi, ua tatou maua le poto e uiga iā Ieova lea e leʻi maua e Mose. Na faatoʻā aliaʻe mai Iesu o le Mesia e tusa ma le toetoe 1,500 tausaga ina ua mavae le maliu o Mose. O lea la, e leʻi iloa e Mose e taunuu le Tulafono iā Iesu, o lē na maliu e faasaʻoloto tagata mai le nofo pologa i le agasala ma le oti. (Roma 5:20, 21; Kalatia 3:19) E lē gata i lea, sa tapulaa foʻi le iloa e Mose o le ofoofogia o le finagalo o Ieova, lea e faaautū atu i le Malo o le Mesia ma le parataiso i le lalolagi. Ua tatou iloa le mamalu o Ieova, e lē i o tatou mata faaletino, ae ona o lo tatou faatuatua e faavae i aʻoaʻoga a le Tusi Paia. Ua tatou faalogo foʻi i le siʻufofoga o Ieova, e lē ala i se agelu, ae ala i le Tusi Paia, aemaise lava Evagelia ia o loo faamatalaina lelei mai ai aʻoaʻoga ma le faiva a Iesu.
4. (a) Ua faapefea ona atagia atu i Kerisiano faauuina le mamalu o le Atua? (e) O ā auala ua mafai ai e i latou e faamoemoe e ola i le lalolagi, ona faaatagia atu le mamalu o le Atua?
4 E ui lava e lē mafai e Kerisiano ona faaatagia atu le mamalu o le Atua e ala i le pupula o o latou fofoga, ae e laufofoga fiafia i latou a o taʻu atu i isi e faatatau i uiga mamalu o Ieova ma lona finagalo. Na vavalo Isaia e faatatau i o tatou aso e faapea, o le a taʻu atu e tagata o le Atua ‘le mamalu o Ieova i nuu ese.’ (Isaia 66:19) E lē gata i lea, tatou te faitau faapea i le 2 Korinito 4:1, 2: “O i matou ua i ai lenei faiva . . . , ua matou lafoaʻi mea lilo e māsiasi ai, e lē o savavali ma le amio pepelo, e lē o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.” Na faasino faapitoa atu lava Paulo i Kerisiano faauuina, o ē ua fai ma “auauna o le feagaiga fou.” (2 Korinito 3:6) Peitaʻi, ona o la latou faiva ua maua ai e le anoanoaʻi o tagata le faamoemoe e ola e faavavau i le lalolagi. Ua aofia i le faiva a nei vaega e lua, le faaatagiaina atu o le mamalu o Ieova e lē gata i aʻoaʻoga ua latou aʻoaʻo atu, ae o le auala foʻi o loo latou ola ai. O lo tatou tiute ma o se faaeaga foʻi le faaatagia atu o le mamalu o le Atua Silisili ese!
5. O le ā ua faamaonia i lo tatou olaola faaleagaga?
5 I aso nei, ua talaʻia atu le tala lelei mamalu o le Malo i le atu laulau uma e pei ona valoia e Iesu. (Mataio 24:14) Ua tali fiafia mai tagata mai atunuu uma, o ituaiga, ma gagana eseese i le tala lelei, ma ua suia o latou olaga ina ia ōgatusa ma le finagalo o le Atua. (Roma 12:2; Faaaliga 7:9) E pei o uluaʻi Kerisiano, ua latou tautatala atu e faatatau i mea ua latou vāai ma faalogo i ai. (Galuega 4:20) O loo faaatagia atu le mamalu o le Atua i aso nei e tagata e sili atu i le ono miliona, ma ua toʻatele atu na i lo se isi lava taimi. Po o oe o se tasi o i latou? O le olaola faaleagaga o tagata o le Atua, o se faamaoniga lea o le faamanuia ma le puipuiga a Ieova. Ua tatou iloa atili ai, o loo iā i tatou le agaga o Ieova, e ui o loo iai fili malolosi o loo faasagatau mai. Seʻi o tatou iloiloina le māfuaaga ua moni ai lenei manatu.
O le a Lē Taofia Tagata o le Atua
6. Aiseā e manaʻomia ai le faatuatua ma le lototele ina ia tū ai mo Ieova?
6 Seʻi faapea ua valaauina oe e te molimau i le faamasinoga faasaga i se tagata solitulafono mataʻutia. Ua e iloa e iai sana faalapotopotoga malosi tele, ma o le a ia faaaogā so o se auala e taofia ai oe mai le faaalialia o ia. E manaʻomia ai le lototele e molimau faasaga i lenā tagata solitulafono, faatasi ai ma lou mautinoa o le a puipui oe e le malo. O loo tatou iai i se tulaga faapena. O la tatou talaʻiga e uiga iā Ieova ma lona finagalo, ua tatou molimau ai faasaga iā Satani le Tiapolo, e faaalialia o ia o se fasioti tagata ma o sē e pepelo o loo faasesē i le lalolagi uma. (Ioane 8:44; Faaaliga 12:9) E manaʻomia le faatuatua ma le lototele ina ia e tū ai mo Ieova faasaga i le Tiapolo.
7. E faapeʻī le malosi o Satani, ma o le ā le mea ua ia taumafai e fai?
7 O Ieova o le Silisili ese. E sili atu ona malosi lona mana na i lo Satani. E mafai ona tatou mautinoa, e lē gata e mafai ae e naunau foʻi Ieova e puipuia i tatou a o auauna atu ma le faamaoni iā te ia. (2 Nofoaiga a Tupu 16:9) Peitaʻi, o Satani o le pule o temoni ma le lalolagi ua vavae ese mai le Atua. (Mataio 12:24, 26; Ioane 14:30) Talu ai ua taofiofia o ia i le lalolagi ma ua “lotoa tele,” ua matuā tetee Satani i auauna a Ieova, ma e ala i lenei lalolagi lea o loo ia pulea, ua ia taumafai e taofia i latou uma o loo talaʻia le tala lelei. (Faaaliga 12:7-9, 12, 17) Ua faapefea ona ia faia lea mea? A itiiti mai e tolu ni auala.
8, 9. E faapefea ona uunaʻi e Satani faanaunauga sesē ma aiseā e ao ai ona filifili lelei a tatou aumea?
8 O se tasi o auala o loo taumafai ai Satani e faatosina ese i tatou, o le saʻilia lea o mea o le olaga. I nei aso e gata ai, ua mananaʻo tele ai tagata i tupe, alolofa i latou iā i latou lava ma mananaʻo i faafiafiaga. E latou te lē alolofa i le Atua. (2 Timoteo 3:1-4) E “lē iloa” pe lē ano mai le toʻatele i le tala lelei o loo tatou talaʻia atu, ona o le pupū tele i mea fai i aso faisoo o le olaga. E latou te lē fiafia e aʻoaʻoina le upu moni o le Tusi Paia. (Mataio 24:37-39) E mafai foʻi ona aafia i tatou i lenā uiga ma faatalalē ai i mea faaleagaga. Pe afai tatou te maua i le agaga o le manaʻo tele i mea faitino ma faafiafiaga o le olaga, o le a maalili lo tatou alofa i le Atua.—Mataio 24:12.
9 O le māfuaaga lea e faaeteete ai Kerisiano i le filifilia o i latou e aumea atu i ai. Na tusi le tupu o Solomona: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” (Faataoto 13:20) Ia tatou “feoaʻi” ma i latou o loo faaatagia atu le mamalu o le Atua. Maʻeu le fiafia pe a faia faapena! Pe a tatou faapotopoto faatasi ma o tatou uso ma tuafāfine faaleagaga i sauniga ma isi taimi, e faalaeiauina i tatou i lo latou alofa, faatuatua, lo latou olioli ma le atamai. O na faatasitasiga e faamalosia ai lo tatou faanaunauga e filigā i la tatou talaʻiga.
10. O ā auala ua faaaogā ai e Satani tauemuga faasaga iā i latou ua faaatagia atu le mamalu o le Atua?
10 O le auala lona lua o loo taumafai ai Satani e taofia Kerisiano uma mai le faaatagia atu o le mamalu o le Atua, o tauemuga. E lē o se mea fou lenei auala. Na tauemua Iesu i lana talaʻiga i le lalolagi, na aamu tagata iā te ia, ulagia, faaleaga ma feanu iā te ia. (Mareko 5:40; Luka 16:14; 18:32) Sa avea foʻi uluaʻi Kerisiano ma taulaʻiga o tauemuga. (Galuega 2:13; 17:32) Ua faileagaina foʻi faapena auauna a Ieova i aso nei. E tusa ai ma le faamatalaga a Peteru, o le a manatu iā i latou o ni “perofeta pepelo.” Na valoia e Peteru: “E o mai i ona aso e gata ai o ē tauemu, latou te savavali e tusa ma o latou lava tuʻinanau; e faapea mai, Ofea nei le folafolaga o lona afio mai? auā . . . ua tutumau pea o mea uma pei ona faatoʻa faia.” (2 Peteru 3:3, 4) Ua tauemua tagata o le Atua, ona ua manatu tagata e ese le ituaiga olaga o loo latou ola ai. Ua manatu tagata o le lalolagi i tapulaa tau amio a le Tusi Paia o se faiga faaanamua. O le feʻau o loo tatou talaʻia, o se mea valea lea i le toʻatele. (1 Korinito 1:18, 19) O le avea ma Kerisiano, tatou te ono fesagaʻi ai ma tauemuga i aʻoga, galuega ma i nisi taimi i le aiga. Na i lo lo tatou popole ai, o loo tatou faaauau pea ona tatou faaatagia atu le mamalu o le Atua e ala i le talaʻiga, ma le manatu i le Afioga a le Atua, o le upu moni lea e pei ona sa silafia e Iesu.—Ioane 17:17.
11. Ua faapefea ona faaaogā e Satani sauāga e taofia ai Kerisiano?
11 O le auala lona tolu a Satani e taofia ai i tatou, o teteega ma sauāga. Na fetalai Iesu i ona soo: “Ona latou tuuina atu ai lea o outou i le puapuaga, ma latou fasiotia outou; e inosia foʻi outou e nuu uma ona o loʻu igoa.” (Mataio 24:9) O le mea moni, ua fesagaʻi i tatou o ni Molimau a Ieova, ma sauāga ogaoga i le tele o atunuu o le lalolagi. Ua tatou iloa ua loa ona valoia e Ieova le feitagaʻi i le va o i latou e auauna i le Atua, ma ē o loo auauna iā Satani le Tiapolo. (Kenese 3:15) Ua tatou iloa foʻi, o le tausisia o le faamaoni a o puapuagatia, ua tatou faamaonia ai le tonu o le Pule Silisili ese a Ieova i le aoao o mea. O le iloaina o lenei mea, e atili faamalosia ai i tatou e ui i tulaga sili ona faigatā. E lē mafai e sauāga ona taofia i tatou, pe afai tatou te maumauaʻi e tumau i le faaatagiaina atu o le mamalu o le Atua.
12. Aiseā e ao ai ona tatou olioli a o tatou tumau i le faamaoni e ui i teteega a Satani?
12 Po o e teena faatosinaga a le lalolagi ma faamaoni e ui i tauemuga ma teteega? O lea, o se mea e matuā olioli ai. Na faamautinoa atu e Iesu iā i latou e mulimuli iā te ia: “Amuia outou pe a latou upu leaga, ma faasauā iā te outou, ma latou tuuaʻiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele; auā na faapea ona latou faasauā i perofeta ē na muamua iā te outou.” (Mataio 5:11, 12) O lou tumau, e faamaonia ai o loo iā te oe le agaga paia o Ieova ma faamalosia oe e faaatagia atu lona mamalu.—2 Korinito 12:9.
E Mafai Ona Tumau Ona o le Fesoasoani a Ieova
13. O le ā se māfuaaga autū tatou te tumau ai i la tatou talaʻiga faa-Kerisiano?
13 O se māfuaaga autū o lo tatou tumau i le talaʻiga, ona tatou te alolofa iā Ieova, ma fiafia e faaatagia atu lona mamalu. Ua mananaʻo tagata e faaaʻoaʻo iā i latou e alolofa ma faaaloalo i ai, ae e leai se isi e sili atu ona tatou faaaʻoaʻo i ai na i lo Ieova le Atua. Ona o lona alofa, na ia auina mai ai lona Alo i le lalolagi e molimau i le upu moni, ma faasaʻoloto tagata usiusitai. (Ioane 3:16; 18:37) I le pei o le Atua, tatou te faanaunau ina ia salamō tagata ma faaolaina; o le māfuaaga tonu lenā tatou te talaʻi atu ai iā i latou. (2 Peteru 3:9) O lenei faanaunauga faatasi ma lo tatou maumauaʻi e faaaʻoaʻo i le Atua, ua uunaʻia ai i tatou e sogasogā e faaatagia atu lona mamalu e ala i le talaʻiga.
14. Ua faapefea ona faamalosia i tatou e Ieova ina ia tumau i la tatou talaʻiga?
14 Ia manatua, o lo tatou malosi e tumau ai i le talaʻiga faa-Kerisiano, e maua mai iā Ieova. Ua ia faatumauina ma faamalosia i tatou e ala i lona agaga, lana faalapotopotoga ma lana Afioga, le Tusi Paia. E avatu e Ieova “le onosai” iā i latou e naunau e faaatagia atu lona mamalu. E faafofoga mai o ia i a tatou tatalo ma foaʻi mai iā i tatou le poto e feagai ai ma tofotofoga. (Roma 15:5; Iakopo 1:5) E lē gata i lea, e lē faatagaina e Ieova se tofotofoga tatou te lē gafatia. Pe afai tatou te faatuatua iā Ieova, o le a ia saunia le auala tatou te sao ai ma faaauau ona faaatagia atu lona mamalu.—1 Korinito 10:13.
15. O ā mea ua fesoasoani ina ia tatou tumau ai?
15 O le tumau i la tatou talaʻiga e faamaonia ai o loo iai le agaga o le Atua iā i tatou. Seʻi faataʻitaʻi: Faapea nei ua faatonuina oe ina ia tufatufa atu se ituaiga faapitoa o falaoa mai i lea fale i lea fale e aunoa ma se totogi. Ua faatonuina oe ia faaaogā au lava tupe ma lou taimi e faia ai lenā galuega. E lē gata i lea, ua e iloa e toʻaitiiti lava nai tagata e mananaʻo i au falaoa; e tetee nisi i au taumafaiga e tufatufa atu ai. Pe e te manatu o le a e faaauau ai pea ona e galue i lenā galuega mo ni masina po o ni tausaga foʻi? Atonu e leai. Peitaʻi, atonu sa e filigā e faalauiloa atu le tala lelei i lou lava taimi, ma faaaogā ai au lava tupe e faia ai faapea mo le tele o tausaga. Aiseā? Pe e lē ona o lou alofa ea iā Ieova ma e ala i lona agaga ua ia faamanuia au taumafaiga ma fesoasoani iā te oe e tumau? E mautinoa lenā mea!
Se Galuega e Ao Ona Manatua
16. O ā iʻuga mo i tatou atoa ma ē o faalogologo mai ona o le tumau ai pea i la tatou faiva?
16 O le faiva o loo faia e i latou i le feagaiga fou, o se meaalofa e lē mafaatusalia. (2 Korinito 4:7) E faapena foʻi le faiva faa-Kerisiano o loo faia e isi mamoe i le lalolagi, o se oloa tāua foʻi. E pei ona tusi Paulo iā Timoteo, a o faaauau ona e tumau i le talaʻiga, “e faaolaina ai oe e oe atoa ma ē ua faalogologo iā te oe.” (1 Timoteo 4:16) Ia mafaufau i lea mea! Ua maua e isi le avanoa e ola ai e faavavau ona o le tala lelei o loo e talaʻia. E mafai ona e faia se faauōga māfana ma i latou o e fesoasoani atu i ai i le itu faaleagaga. Seʻi tomānatu i le olioli o le a iai, pe a e ola e faavavau i le parataiso faatasi ma i latou na e fesoasoani i ai ia iloa le Atua! E mautinoa, latou te lē faagaloina au taumafaiga e fesoasoani iā i latou. E matuā faamalieina moni lava!
17. Aiseā ua mataʻina ai lo tatou vaitaimi i le tala faasolopito o tagata?
17 O loo outou soifua i se vaitaimi mataʻina o le tala faasolopito o tagata. O le a lē toe talaʻia le tala lelei i se lalolagi o tagata ua vavae ese mai le Atua. Na soifua Noa i se lalolagi faapena, ma na ia vaai i ai a o mavae atu. Maʻeu lona fiafia i le iloaina na ia faamaoni i le faataunuuina o le finagalo o le Atua ia fausia se vaa, lea na faasaoina ai o ia ma lona aiga! (Eperu 11:7) E mafai foʻi ona e maua lenā olioli. Manatu i ou faalogona o le a iai i le lalolagi fou pe a e toe tomānatu i au gaoioiga i nei aso e gata ai, i le iloaina na faia sou sao i le faaauilumaina o le Malo.
18. O le ā le faamautinoaga ma le faalaeiauga ua aumaia e Ieova i ana auauna?
18 Seʻi faaauau ona tatou faaatagia atu le mamalu o le Atua. O le a avea o se mea tatou te manatua e faavavau pe a tatou faia faapea. E lē faagaloina foʻi e Ieova a tatou galuega. Ua saunia e le Tusi Paia lenei faalaeiauga: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa, auā na outou auauna i le ʻau paia, i lē o loo outou auauna i ai. A ua matou mananaʻo tele ina ia outou taʻitasi ma faaali mai lea lava filigā, ina ia mautinoa le faamoemoe e oo i le gataaga; ina ia lē paiē, a ia faaaʻoaʻo i ē ua maua i le faatuatua ma le onosai mea na folafolaina.”—Eperu 6:10-12.
Pe e Mafai Ona E Faamatala?
• Ua faapefea ona faaatagia atu e Kerisiano le mamalu o le Atua?
• O ā nisi o auala ua faaaogā e Satani e taumafai e taofia ai tagata o le Atua?
• O le ā le faamaoniga o lo tatou mauaina o le agaga o le Atua?
[Fesili mo le Suʻesuʻega]
[Ata i le itulau 15]
Na pupula paʻu o fofoga o Mose
[Ata i le itulau 16, 17]
Tatou te faaatagia atu le mamalu o le Atua i la tatou talaʻiga