Aua le Faalogo i Manatu Sesē!

INA UA puapuagatia Iopu, na asiasi atu ai i lenā tamā matua ana uō e toʻatolu, o Elifasa, o Pilitati, ma Sofara. Na latou ō atu e faamatalaloto ma faamāfanafana iā te ia. (Iopu 2:11) O le tagata aupito sili ona malolosi ona manatu ma atonu foʻi e matua atu, o Elifasa. O ia lava na muaʻi tautala atu, ma sa tele foʻi ana upu na fai atu. O ā mafaufauga na atagia atu i lauga e tolu a Elifasa?

I le manatuaina o se mea uiga ese na tupu iā te ia, na faapea atu ai Elifasa: “Na ui ane i oʻu luma le agaga, ua mātatili [mogea] ai loʻu tino. Na tū mai o ia, a ou te leʻi iloa le uiga o lona tino mai; sa i ai le ata i luma o oʻu mata, sa ligoligo, ona ou faalogo ai lea i le leo.” (Iopu 4:15, 16) O ai lenei agaga na taaʻina ai mafaufauga o Elifasa? Ona o upu taufaaleaga na faia e le agaga, ua tatou iloa ai, e lē o se tasi o agelu amiotonu a le Atua. (Iopu 4:17, 18) O se agaga amio leaga. Auā ana o se agaga lelei, semanū e lē aʻoaʻia e Ieova Elifasa ma ana uō e toʻalua mo le faia o tala pepelo. (Iopu 42:7) Ioe, sa taaʻina Elifasa e temoni. Na atagia mai i ana faamatalaga e sesē ona manatu.

O ā manatu ua atagia mai i faamatalaga a Elifasa? Aiseā e tāua ai le leoleo o i tatou ina neʻi taaʻina i manatu sesē? O ā foʻi gaoioiga e tatou te faia ina ia lē aafia ai?

“Ua Lē Faalagolago o Ia i Ana Auauna”

I ana lauga uma e tolu, sa faaali atu ai e Elifasa le manatu e lē malie le finagalo o le Atua i mea uma e faia e ana auauna, auā e matuā tagisā o Ia. Na faapea atu Elifasa iā Iopu: “Faauta, ua lē faalagolago o ia i ana auauna; ua ia taʻuvaleleaina ana agelu.” (Iopu 4:18) Na faapea mai foʻi Elifasa e uiga i le Atua: “Ua lē faatuatua o ia i lona au paia; ua lē mamā foʻi le lagi i lana silafaga.” (Iopu 15:15) Ona ia fesili atu lea: “Se mea ea e fiafia ai Lē e ona le malosi uma lava ina ua e amiotonu?” (Iopu 22:3) Sa ioe foʻi Pilitati i lenei manatu, auā na ia faapea atu: “O le masina ua lē pupula lea; o fetu foʻi ua lē mamā ia i lana silafaga.”—Iopu 25:5.

E tatau ona leoleo i tatou ina neʻi taaʻina ai i na mafaufauga. E ono oo ai iā i tatou se lagona e faapea, ua soona tagisā mai le Atua iā i tatou. O lenei manatu, ua faaleagaina ai la tatou faiā ma Ieova. E lē gata i lea, afai e tatou te lolo atu i nei mafaufauga, o ā o tatou uiga faaalia pe a aʻoaʻia i tatou? Na i lo o le talia ma le lotomaulalo o le aʻoaʻiga, atonu o le a oo ina ‘ita o tatou loto iā Ieova,’ ma e ono teuloto le ita iā te ia. (Faataoto 19:3) Pagā se mala o le a iʻu i ai la tatou faiā ma le Atua!

“E Aogā ea le Tagata i le Atua?”

E fesootaʻi le manatu e faapea, ua soona tagisā mai le Atua, ma le manatu, e leai se aogā o le tagata i lana silafaga. Ua fesili atu  Elifasa i lana lauga lona tolu: “E aogā ea le tagata i le Atua, e pei ona aogā o lē ua poto iā te ia lava?” (Iopu 22:2) Sa manatu Elifasa e lē aogā le tagata i le Atua. Na faapena foʻi ona finau mai Pilitati: “O lenei, pe faapefea ona taʻuamiotonuina le tagata i luma o le Atua? pe faapefea foʻi ona mamā o ia ua fanau mai i le fafine?” (Iopu 25:4) E tusa ai ma na lava manatu, e faapefea iā Iopu ua na o se tagata faatauvaa, ona manatu o loo amiotonu o ia i le silafaga a le Atua?

Ua mafatia nisi tagata i aso nei i manatu sesē e uiga iā i latou lava. Ua māfua lenei mea ona o vala e pei o le auala na tausia ai i le aiga, o mafatiaga o le olaga, po o le aafia fua i le feitagaʻi o tagata ona o lanu po o ituaiga. Ae e fiafia foʻi Satani ma ana temoni e tuʻimomomoina se tagata. Afai e mafai ona latou taaʻina se tagata e manatu, e lē o fiafia le Atua e Ona le malosi uma i mea o ia faia, e vave ona lotovaivai ai. E iai le taimi o le a teʻa ese ai tagata faapena, ma e ono ō ese ai mai le Atua soifua.—Eperu 2:1; 3:12.

O le tulaga matua, ma faafitauli o le soifua mālōlōina, ua faatapulaa ai mea tatou te faia. E foliga mai ua matuā laʻitiiti lava se sao ua tatou faia i le talaʻiga, pe a fua atu i mea na tatou faia a o talavou, a o lelei le soifua mālōlōina, ma malolosi. E tāua ona tatou iloa e mananaʻo Satani ma ana temoni ina ia tatou lagona e faapea, e lē o finagalo malie le Atua i mea o loo tatou faia! Ia aveese iā i tatou manatu faapena.

ʻAlofia ni Manatu Sesē e Uiga iā i Tatou Lava

E ui i mafatiaga na faapogaia e Satani le Tiapolo, na faapea mai Iopu: “Seʻia oo lava i loʻu oti ou te lē faateʻaina lava laʻu amio saʻo!” (Iopu 27:5) Talu ai lona alofa i le Atua, sa maumauaʻi lava Iopu ina ia tausisia pea lona faamaoni e tusa lava po o le ā le mea e tupu, ma e leai lava se mea e mafai ona suia ai. O se vala tāua lenei ina ia lē lolo atu i mafaufauga sesē. E tatau ona tatou malamalama lelei i le alofa o le Atua, ma talisapaia ma le lotofaafetai lenā alofa. E tatau foʻi ona atili ai ona tatou alolofa iā te ia. E mafaia lenei mea e ala i le suʻesuʻeina e lē aunoa o le Afioga a le Atua, ma manatunatu faatasi ma le tatalo i mea ua tatou aʻoaʻoina.

O se faaaʻoaʻoga, ua faapea mai le Ioane 3:16: “Ua faapea lava ona alofa mai o le Atua i le lalolagi, ua ia au mai ai lona Atalii e toʻatasi.” E matuā alofa Ieova le Atua i le lalolagi o tagata, ma na faaalia lenā alofa i ana feutagaʻiga ma i latou i le faagasologa o tausaga. O le mafaufau loloto i faaaʻoaʻoga mai aso ua mavae, e tatau ona faateleina ai lo tatou talisapaia mo Ieova ma atili ai ona tatou alolofa atu iā te ia, i lea ua mafai foʻi ona tatou ʻalofia manatu sesē.

Manatu i le auala na feutagaʻi ai Ieova ma Aperaamo i le taimi a o faaloloʻi mai le faaumatiaga o Sotoma ma Komoro. E faavalu ona talosaga atu Aperaamo iā Ieova e faatatau i Lana faamasinoga. E leai lava se mea na faaalia ai pe na toʻasā, pe lē fiafia Ieova. Na i lo o lea, o ana tali na faamāfanafanaina ai Aperaamo. (Kenese 18:22-33) Ina ua laveaʻiina mulimuli ane e Ieova Lota ma lona aiga mai Sotoma, na talosaga atu Lota, seʻi sola ane o ia i se aai e latalata ane na i lo o le sola i mauga. Na tali atu Ieova: “Ua ou talia foʻi lou manaʻo i lenā mea, ou te lē faaumatia lenā aai ua e fai mai ai.” (Kenese 19:18-22) Po o atagia i nei faamatalaga o Ieova o se pule e tagisā, ma e lē alofa? E leai. Ua faaalia i na faamatalaga lona uiga moni lava; o Ia o le pule silisili ese e alofa, agalelei, alofa mutimutivale, ma malamalama.

O faaaʻoaʻoga a Arona, Tavita, ma Manase o Isaraelu anamua, ua faamaonia ai le sesē o le manatu faapea, o le Atua e suʻesuʻe masei, ma e leai se tasi e lelei i lana silafaga. E tolu sesē matuiā na faia e Arona. Sa ia faia le tamaʻi povi auro, auai i le muimui a lona tuafafine o Miriama iā Mose, ma sa lē faapaiaina  ma faamamaluina le Atua i Meripa. Ae peitaʻi, sa silafia e Ieova ona uiga lelei ma tuu atu ai pea iā te ia le avanoa e auauna ai o se ositaulaga sili seʻia oo i lona maliu.—Esoto 32:3, 4; Numera 12:1, 2; 20:9-13.

Na faia e le tupu o Tavita agasala mamafa i le taimi o lana pulega. Na aofia ai i nei agasala lona mulilua, fafauina le fasiotia o se tagata e lē sala, ma lona sesē i le faitauina o le nuu. Ae peitaʻi, na silafia e Ieova le salamō o Tavita, ma i Lona faamaoni atu i le feagaiga o le Malo na ia faatagaina Tavita e avea ma tupu seʻia oo i lona maliu.—2 Samuelu 12:9; 1 Nofoaiga a Tupu 21:1-7.

Na faatutū e le tupu Iutaia o Manase fata faitaulaga iā Paala, ma faaui ane ona atalii i le afi, faia faiga faataulāitu, ma fausia fata faitaulaga a lotu sesē i lotoā o le malumalu. Ae peitaʻi, ina ua ia salamō moni, na faamagalo o ia e Ieova, ma faasaʻolotoina o ia mai le faatagataotauaina i Papelonia, ma toe foaʻiina atu iā te iā lona nofoālii. (2 Nofoaiga a Tupu 33:1-13) Po o ni gaoioiga nei a se Atua e leai se tasi e lelei i lana silafaga? E leai lava!

Ua Nofosala Lē o Faia Tuuaʻiga Sesē

E lē o se mea tatou te teʻi ai ona o Satani lava o le faatinoga sili lea o uiga lava ia o loo ia tuuaʻia sesē ai Ieova. E sauā ma tagisā Satani. Ua iloa manino lenei mea mai i le osia o taulaga e tapuaʻiga sesē i tamaiti i aso ua mavae. Sa susunu e Isaraelu fouvale o latou atalii ma o latou afafine i le afi; o se mea e leʻi finagalo i ai Ieova.—Ieremia 7:31.

O Satani, ae lē o Ieova lea e suʻesuʻe masei. Ua faasino atu le Faaaliga 12:10 iā Satani e faapea, o “lē na molia o tatou uso, o lē na molia i latou i luma o lo tatou Atua i le ao ma le pō.” I le isi itu, na pese ai le faisalamo e uiga iā Ieova: “Ioa e, afai e te mātaulia le amio leaga, le Alii e, o ai se na te mafaia ona tulaʻi? A o iā te oe le faamagaloina o sala.”—Salamo 130:3, 4.

Pe a Lē Toe Iai ni Manatu Sesē

Maʻeu se mapusaga na oo i agelu i le lagi, ina ua lafoesea mai le lagi Satani le Tiapolo ma ana temoni! (Faaaliga 12:7-9) O lea, ua lē o toe mafai ai e nei agaga leaga ona faalavelave atu i le aiga o Ieova i le lagi.—Tanielu 10:13.

Ua toe o se aga, o le a olioli ai ē o aināina le lalolagi. Ua lē pine, ona sau lea o se agelu mai le lagi ma le ki o le tō e lē gata, ma se maea uʻamea tele i lona lima, ma o le a ia fusifusia Satani ma ana temoni, ma lafo iā te i latou i lenā tō e lē gata. (Faaaliga 20:1-3) Maʻeu se mapusaga o le a iai pe a faia lenā mea!

Ae i le taimi nei, e lē tatau ona tatou faalogo i manatu sesē. E so o se taimi e tatou te iloa ai ua amata ona tolotolo mai i o tatou mafaufau ni manatu sesē, e ao ona teena e ala i le taulaʻi atu o o tatou mafaufau i le alofa o Ieova. Ona ‘leoleoina lea o o tatou loto ma o tatou mafaufau e le manuia mai le Atua, lea o loo silisili i mea uma e manatu i ai.’—Filipi 4:6, 7.

[Ata i le itulau 26]

Na teena e Iopu mafaufauga sesē

[Ata i le itulau 28]

Na iloa e Lota, o Ieova, o le Pule silisili ese e malamalama