Aogā e Maua Mai le Aʻoaʻoga Sili Ona Lelei!

UA FAAILOA mai e le Tusi Paia, o Lē na faia mea uma e aofia ai ma tagata, o Ieova le Atua. (Kenese 1:27; Faaaliga 4:11) Talu ai o ia o le Aʻoaʻo Sili, na ia aʻoaʻoina le uluaʻi ulugalii o Atamu ma Eva ma saunia i laʻua e ola i le faatoʻaga matagofie i Etena. O lona finagalo ia faaauau ona aʻoaʻoina ma tausia i laʻua e faavavau. (Kenese 1:28, 29; 2:15-17; Isaia 30:20, 21) Seʻi tomānatu i lenā faamoemoe!

Ae pagā lea, na la melea mea matagofie uma sa la maua. O lo la lē usiusitai na māfua ai ona faaleagaina amioga tatau ma lē lelei atoatoa ai tagata uma. (Kenese 3:17-19; Roma 5:12) Ua faapea mai le Tusi Paia e faatatau iā i latou na soifua e leʻi umi talu ona faia le tagata: “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.”—Kenese 6:5.

Ua toetoe lava 4,500 tausaga talu na fetalai Ieova e uiga i le leaga o amioga a tagata, ma ua faateleina le leaga o le tulaga o mea i nei ona pō. E toʻatele o loo pepelo lē mafaufau, gaoi po o le faaoo lima i isi. Ua faatupulaʻia faafitauli i aso uma ma ua leai foʻi se manatu mamafa mo le lelei o isi. Ioe, ua iai faiā faaleaiga i se tulaga leaga. Peitaʻi, e lē tuuaʻia le Atua mo nei mea pe faapea foʻi e lē o manatu mamafa mai i faafitauli. E manatu mai Ieova mo le lelei o tagata, ma e nofo sauni o ia e aʻoaʻo i latou o ē saʻili atu iā te ia mo le taʻitaʻiga ina ia maua ai se olaga fiafia. Na ia auina mai lona Alo o Iesu Keriso i le silia ma le 2,000 tausaga ua mavae i le lalolagi, ma faaalia ai Lona naunau i le aʻoaʻoina o i latou e mananaʻo e taulau manuia o latou olaga. Sa faataatia e Iesu se faaaʻoaʻoga o le aʻoaʻoga e sili ona lelei, talu ai sa autausagā ona aʻoaʻoina o ia e le Aʻoaʻo Sili.

O se Aʻoaʻoga le Faa-Kerisiano Moni

Sa faavaeina e Iesu Keriso le faa-Kerisiano moni, o le olaga ua pulea e le alofa. O le faa-Kerisiano moni, e ōgatusa manatu ma gaoioiga ma le finagalo o le Atua, auā le faamamaluina ma le viiviia o lona suafa. (Mataio 22:37-39; Eperu 10:7) Sa maua e Iesu ana aʻoaʻoga e faatatau i lenei ala o le ola, mai lona Tamā o Ieova. Ua taʻua i le Ioane 8:29 le lagolagosua na maua e Iesu mai le Atua: “O ia foʻi ua auina mai aʻu o loo iā te aʻu ia; e lē tuua aʻu e toʻatasi e le Tamā, auā ou te faia pea lava o mea e lelei iā te ia.” Ioe, sa maua e Iesu le taʻitaʻiga ma le lagolagosua mai lona Tamā a o feagai ma lana faiva. E leʻi fesagaʻia e uluaʻi soo o Iesu luʻi o le olaga e aunoa ma ni taʻitaʻiga. Na aʻoaʻoina i latou e Ieova e ala mai lona Alo. O lo latou mulimuli i aʻoaʻoga ma faataʻitaʻiga a Iesu, na avea ai i latou ma ni ē sili atu ona lelei. O le mea moni foʻi lea o loo tupu i ona soo i aso nei.—Tagaʻi i le pusa, “Iʻuga Lelei Mai iā Iesu ma Ana Aʻoaʻoga,” i le itulau e 6.

O se vala mataʻina o le faa-Kerisiano moni, e mafai ona suia ai amioga a se tasi ona o aafiaga o nei aʻoaʻoga i lona mafaufau ma le loto. (Efeso 4:23, 24) O se faataʻitaʻiga, seʻi manatunatu i le aʻoaʻoga a Iesu e uiga i le faamaoni i le faaipoipoga: “Ua outou faalogo, na fai mai i ē anamua, Aua e te mulilua. A ou  te fai atu aʻu iā te outou, ai se vaai atu i le fafine ina ia manaʻo i ai, ua uma ona mulilua ma ia i lona loto.” (Mataio 5:27, 28) E ala i nei upu, na aʻoaʻo ai e Iesu ona soo e ao ona mamā le loto. Afai ua iai ni mafaufauga ma faanaunauga lē lelei e tusa lava pe leʻi faatinoina, e ono iʻu i ni āuga leaga. Ioe, o manatunatuga leaga e taʻitaʻia ai e gaoioi i se auala e faatigā ai le Atua ma isi.

O lea la, ua fautua mai le Tusi Paia: “Aua foʻi tou te amio faatasi ma lenei lalolagi, a e peitaʻi ia liliuina i le toe fuataʻiina o outou loto, ina ia outou suʻesuʻe pe se ā le finagalo o le Atua, o mea ua lelei, ma le mālie, ma le atoatoa.” (Roma 12:2) Atonu e te fesili: ‘Pe e mafai moni ona toe fuataʻiina le loto e ala i aʻoaʻoga?’ O le toe fuataʻiina o le loto e aofia ai le malamalama lelei i tapulaa ma faatonuga a le Atua o loo i lana Afioga. E mafai ona faataunuuina lenei mea pe a taliaina aʻoaʻoga ua saunia e le Atua e ala mai lana Afioga.

Faanaunauga e Faia ni Suiga

“O loo ola le afioga a le Atua, o loo matuā galue foʻi.” (Eperu 4:12) O loo matuā galue le Tusi Paia i olaga o tagata, lea e faamaonia ai e lē o se tusi tuai. E uunaʻia ai se tasi e suia ona ala, talia le faa-Kerisiano moni ma avea ma sē e sili atu ona lelei. O faaaʻoaʻoga o loo mulimuli mai e faataʻitaʻia ai le aogā o aʻoaʻoga faale-Tusi Paia.

Ua faapea mai Emilia lea sa taʻua i le mataupu ua mavae atu: “O le faia o se taumafaiga e na o aʻu lava, sa lē lava lea e faaleleia ai le tulaga o loʻu aiga. Ina ua ou suʻesuʻe faatasi ma Molimau a Ieova, na ou iloa ai e mafai ona faaleleia loʻu olaga ma sa amata loa ona suia laʻu amio. Na ou iloa ai le tāua o le onosai ma aua le itaitagofie. Na iʻu ina auai faatasi mai laʻu tane i le suʻesuʻega. Sa lē faigofie iā te ia ona tuu lana taumafa i le ʻava malosi, peitaʻi sa mafai lava. Na mafai ona faaleleia ai la maʻua faaipoipoga. O lea la ua avea nei i maʻua o ni Kerisiano fiafia, ma o loo ma tāmauina i loto o la ma fanau tapulaa lelei o le Tusi Paia.”—Teuteronome 6:7.

O le aʻoaʻoga ua saunia e le faa-Kerisiano moni, e mafai ona faasaʻoloto mai ai se tasi mai masaniga leaga ma se olaga lē mamā. Na moni lenei mea iā Manuele. * Sa ia sola ese mai lona aiga ina ua 13 ona tausaga, ma sa ia faaaogāina mariuana ma isi ituaiga o fualaau faasāina. Sa ia faia feusuaʻiga ma tamāloloa ma fafine ina ia maua ai se tupe ma se fale e nofo ai. I nisi taimi, sa maua mai ana tupe e ala i le faoa faamalosi o mea a tagata. Na toetoe lava o aso uma e faaaogā ai fualaau faasāina. Na faafalepuipui soo o ia ona o ana amioga sauā. E fā tausaga sa faafalepuipui ai o ia i se isi taimi, ma o i  inā sa aafia ai i le fefaatauaʻiga o auupega. Ina ua uma ona ia faaipoipo, sa faaauau pea ona seleseleina e Manuele ni āuga mataʻutia. Ua ia faapea mai: “Na iʻu lava ina matou nonofo i se fale na momoe muamua ai moa. Ou te manatuaina pea laʻu avā o kuka le meaʻai i luga o piliki. Sa lē malupuipuia lo ma aiga, ma na uunaʻia e loʻu lava aiga laʻu avā ina ia tuua aʻu.”

Na faapefea ona suia lona olaga? Ua tali mai Manuele: “O se tasi ou te masani i ai na sau i lo matou fale ma talanoa e uiga i le Tusi Paia. Sa ou taliaina ana asiasiga ina ia faailoa ai e faapea e leai se Atua o manatu mai i tagata. Sa ou manatu i loʻu tulaga o se tasi lea o faamaoniga o le leai o se Atua. Na ou maofa i le tauagafau ma le onosai o le Molimau, ma o lea na ou lotomalie ai e auai i sauniga i le Maota o le Malo. E ui na iai nisi i le maota na iloaina loʻu talaaga, ae na latou faafeiloaʻia ma le māfana aʻu. Sa latou fesoasoani ia ou lagona e pei o se tasi o i latou. O se matuā faamāfanafanaga lenei mea. Na uunaʻia ai aʻu e aua le toe faaaogāina fualaau faasāina, ma saʻilia loa se galuega. E fā masina talu ona amata laʻu suʻesuʻega faale-Tusi Paia, ae ou agavaa loa e auai i le galuega talaʻi. Sa ou papatiso i le fā masina mulimuli ane ai ma avea loa o se tasi o Molimau a Ieova.”

O le ā le uiga o le faa-Kerisiano moni iā Manuele ma lona aiga? “Ana lē seanoa le aʻoaʻoga faale-Tusi Paia, ua leva ona ou oti. O le ala o le ola na aʻoaʻo e Iesu na ou toe maua ai loʻu aiga. O le a lē tofo laʻu fanau e toʻalua i mea sa oo i ai loʻu olaga a o talavou. Ua ou fiafia ma faafetai iā Ieova ona o le faiā lelei ua ou maua ma laʻu avā. Na faamālō mai nisi ou te masani i ai ma faapea mai, o le ala lea ua ou ui ai nei, o se ala e sili ona lelei.”

E lē gata e ao ona mamā amioga a ē mulimuli i le faa-Kerisiano, ae e ao foʻi ona mamā i le tino. Na oo ina iloa e Ioane, o lē o  loo nofo i se vaipanoa matitiva i Aferika i Saute lenei mea. Ua ia faamatala mai e faapea: “I nisi taimi e lē faataelea ai la ma tama teine mo le vaiaso atoa, peitaʻi e lē taitai o matou popole ai.” Na faailoa mai e lana avā le tulaga matagā o lo laʻua fale. Ae ona o le fesoasoani a le aʻoaʻoga faa-Kerisiano, ua faaleleia ai le tulaga o mea. Na lē toe auai Ioane i se vaega e gaoia taavale ma na amata ona ia uaʻi atu i lona aiga. “Na ma aʻoaʻoina ai pe a avea o ni Kerisiano, e tatau ona mamā o tatou tino ma laʻei. E ese loʻu fiafia i upu o loo i le 1 Peteru 1: 16, lea o loo timaʻia ai i tatou ina ia paia auā o Ieova o ia o se Atua e paia. O loo ma taumafai foʻi ina ia faamamā ma teuteu lelei lo maʻua fale faatauvaa.”

E Mafai Ona e Maua le Aʻoaʻoga Sili Ona Lelei

O tala i mea na tutupu o loo taʻua i luga e lē o ni mea fou. O le iʻuga o le aʻoaʻoga lea e faavae i le Tusi Paia, ua soifua ai le faitau afe o tagata i ni olaga e sili atu ona lelei. E ala i lo latou faamaoni ma filigā e galulue, ua talisapaia ai i latou e pule o galuega. Ua avea i latou o ni tuaoi ma uō lelei, auā ua manatu mamafa mo le lelei o isi. Ua latou maumauaʻi e ʻalofia masaniga leaga ma tuʻinanauga o le tino, ae uaʻi atu i le tausia lelei o o latou lava mafaufau ma faalogona atoa ma le soifua mālōlōina. Na i lo le faamaumau o tupe i masaniga leaga, ua latou tausia lelei i latou lava ma o latou aiga. (1 Korinito 6:9-11; Kolose 3:18-23) E aunoa ma se masalosalo, o iʻuga o le faatatauina o mea ua fetalai mai e Ieova i le Tusi Paia, ua faamaonia ai o le ola i le olaga faa-Kerisiano moni o le ala sili lea, ma o le aʻoaʻoga e sili ona lelei. Ua faapea mai le Tusi Paia e tusa ai o se tasi e ola e ōgatusa ma tulafono a le Atua: “E manuia foʻi mea uma na te faia.”—Salamo 1:3.

O se fiafiaga le iloa o loo finagalo Ieova le Atua o Lē ona le malosi uma lava e aʻoaʻo i tatou. Na ia fetalai e uiga iā te ia lava: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai.” (Isaia 48:17) Ioe, ua faailoa mai e Ieova le ala i faaaʻoaʻoga ma aʻoaʻoga a lona Alo o Iesu Keriso. Na suia e ana aʻoaʻoga olaga o le toʻatele na iloaina o ia a o iai i le lalolagi, ma o loo faapena foʻi ona suia ai olaga o le toʻatele i aso nei. Pe e te fia malamalama atili i nei aʻoaʻoga? O le a fiafia Molimau a Ieova o loo i lou vaipanoa e fesoasoani iā te oe e mauaina nei aʻoaʻoga aogā.

[Faamatalaga pito i lalo]

[Pusa/Ata i le itulau 6]

Iʻuga Lelei Mai iā Iesu ma Ana Aʻoaʻoga

I le faaaogāina o lona tulaga o se ao lafoga, na mauʻoa ai Sakaio e ala i le gaoia ma faoa o tupe a tagata. Ae na suia lona olaga e ala i le faatatauina o aʻoaʻoga a Iesu.—Luka 19:1-10.

Na lē toe sauā Saulo o Taso i Kerisiano, ae avea o se Kerisiano, ma se aposetolo e igoa iā Paulo.—Galuega 22:6-21; Filipi 3:4-9.

O nisi o Kerisiano i Korinito sa avea o ni ‘ē faitaaga, ifo i tupua, mulilua, tauatane, gaoi, matapeʻapeʻa, onā, agatele, ma faomea.’ Peitaʻi, ona ua aʻoaʻoina le faa-Kerisiano moni, sa latou ‘taeele, faapaiaina, ma taʻuamiotonuina i le suafa o lo latou Alii o Iesu Keriso.’—1 Korinito 6:9-11.

[Ata i le itulau 7]

E mafai e le Tusi Paia ona faasino atu iā te oe le ala e taulau manuia ai