Ua Salalau Atu le Faa-Kerisiano i Tagata Iutaia o le Uluaʻi Senituri

NA FAIA se fono tāua i Ierusalema pe tusa o le 49 T.A. Sa iai i inā “o ē na taʻupoutūina” o le faapotopotoga Kerisiano i le uluaʻi senituri; o Ioane, Peteru, ma le ʻafa uso o Iesu, o Iakopo. O loo taʻua foʻi le isi toʻalua na iai i le fono, o le aposetolo o Paulo ma Panapa. O le mataupu o le fono, o le vaevaeina o le oganuu telē mo le galuega talaʻi. Na faamatala mai e Paulo: “Ona latou fetagofi lea i le lima taumatau o le mafutaga iā te i maʻua ma Panapa . . . ina ia ma ō i nuu ese, a o i latou ia o i ē ua peritomeina.”—Kalatia 2:1, 9. *

E faapefea ona tatou malamalama i lenei maliega? Pe na vaevaeina le oganuu lea na talaʻiina ai le tala lelei i tagata Iutaia ma tagata faatoʻā liulotu, ma i le isi itu, o tagata o nuu ese? Po o le fono na faia, ona o le vaevaeina o fanua? Ina ia maua se tali, e tatou te manaʻomia ni faamatalaga mai le talafaasolopito e uiga i tagata Iutaia na nonofo i nuu ese.

Le Olaga o Tagata Iutaia i le Uluaʻi Senituri

E toʻafia tagata Iutaia na nonofo i nuu ese i le uluaʻi senituri? E ioeina e le toʻatele i le faamatalaga i le Atlas of the Jewish World: “E faigatā ona iloa fuainumera saʻo, ae e foliga mai o le faatatauga e faapea, a o leʻi oo i le 70 T.A., sa iai le lua ma le ʻafa miliona tagata Iutaia i Iutaia, ae e sili atu i le fā miliona sa taapeape i le malo o Roma. . . . E foliga mai e tusa ma le 10 pasene o le aofaʻiga atoa o tagata o le malo, o tagata Iutaia. Ae i aai i itumalo i sasaʻe, sa nonofo ai le sili atu i le 25 pasene o tagata Iutaia.”

O nofoaga autū o tagata Iutaia, sa i Suria, Asia Itiiti, Papelonia, ma Aikupito, ae i le itu i sasaʻe, sa toʻalaʻitiiti tagata Iutaia na nonofo i Europa. O nisi o Kerisiano lauiloa o Iutaia i le uluaʻi senituri, e leʻi nonofo i Iutaia, e pei o Panapa mai Kuperu, o Pisila ma Akula mai Pono, ma Roma, o Apolo mai Alesania, ma Paulo mai Taso.—Galuega 4:36; 18:2, 24; 22:3.

E tele sootaga o tagata Iutaia i nuu ese i o latou nuu moni. O se tasi o na mea, o le lāfoga faaletausaga lea na aauina atu i le malumalu i Ierusalema, o se auala na faia ai se sao i tapuaʻiga i le malumalu i Ierusalema. Sa faapea mai le tagata poto o John Barclay e uiga i lenei mea: “E iai faamaoniga e faapea, o le aoina o lenei tupe faapea foaʻi tauofo a tagata mauoloa, sa faamaopoopoina lelei e tagata Iutaia o i nuu ese.”

O le isi fesootaʻiga, o le faitau sefulu afe o tagata e faimalaga atu i Ierusalema i tausaga uma mo tausamiga. Ua faataʻitaʻia lenei mea i le faamatalaga i le Galuega 2:9-11, e faatatau  i le aso Penetekoso i le 33 T.A. O tagata Iutaia na faimalaga atu e auai, na ō mai mai Patia, Metai, Elama, Mesopotamia, Kapatokia, Pono, Asia, Ferukia, Pafulia, Aikupito, Lipua, Roma, Kereta, ma Arapi.

O le pulega o le malumalu i Ierusalema, sa fesootaʻi ma tagata Iutaia i nuu ese e ala i fetusiaʻiga. Sa iloa lelei lava, o le faiaʻoga o le tulafono, o Kamalielu lea e taʻua i le Galuega 5:34, sa ia aauina atu ia tusi i Papelonia ma isi vaega o le lalolagi. Ina ua taunuu atu le aposetolo o Paulo i Roma pe tusa o le 59 T.A. o se pagota, na taʻu atu e “alii o Iutaia” iā te ia e faapea, “ua matou lē maua ni tusi mai Iutaia iā te oe, e leʻi sau foʻi se tasi o o tatou uso e tala mai pe fai mai se mea leaga o iā te oe.” E faailoa ai i lenei mea, sa maua pea e tagata Iutaia i Roma ni tusi ma ni tala mai Iutaia.—Galuega 28:17, 21.

O le Tusi Paia sa faaaogā e tagata Iutaia i nuu ese, o le faaliliuga faa-Eleni o le Kenese-Malaki, lea sa lauiloa o le Septuagint. Ua taʻua i se tasi tusi: “Ua talafeagai ona faia se faaiʻuga e faapea, o le Septuagint [LXX] sa talia ma faitauina e tagata Iutaia i nuu ese e faapea, o le ‘Tusi Paia mo i latou.’” O le faaliliuga foʻi lenā na tele ina faaaogā e uluaʻi Kerisiano i a latou aʻoaʻoga.

Sa masani lelei sui o le vaega pule Kerisiano i Ierusalema ma nei tulaga. Ua oo atu ai le tala lelei i tagata Iutaia o nuu ese i Suria ma ona tala atu, e aofia ai Tamaseko ma Anetioka. (Galuega 9:19, 20; 11:19; 15:23, 41; Kalatia 1:21) I se fonotaga i le 49 T.A., e foliga mai, na fuafuaina e i latou na auai se galuega i le lumanaʻi. Seʻi o tatou talanoaina se faamatalaga i le Tusi Paia e faatatau i le faasalalauina o le tala lelei i tagata Iutaia ma tagata na liulotu.

O Malaga a Paulo ma Tagata Iutaia i Nuu Ese

O le uluaʻi tofiga lava o Paulo, o le “momoli [o le suafa o Iesu Keriso] i luma o nuu ese, ma tupu, ma le fanauga a Isaraelu.” * (Galuega 9:15) Ina ua mavae le fonotaga i Ierusalema, sa faaauau ona talaʻi atu Paulo i tagata Iutaia o nuu ese i so o se mea na ia malaga atu i ai. (Tagaʻi i le pusa i le itulau e 14.) E faailoa mai i lenei mea e faapea, i le fonotaga, sa vaevaeina ai le oganuu, e tusa ma fanua ae lē o le talaʻiga i tagata Iutaia ma tagata o nuu ese. Na faalautele atu le galuega faamisionare a Paulo ma Panapa i le itu i sisifo o Roma, ae talaʻi atu isi i Iutaia, faapea le tele o nuu o Iutaia i le itu i sasaʻe.

Ina ua amata le malaga faamisionare lona lua a Paulo ma ana aumea mai Anetioka i Suria, sa latou ō atu i sisifo i Asia Itiiti e oo atu i Teroa. E mai i inā, na latou sopo atu ai i Maketonia, ona sa latou manatu “ua valaauina i [latou] e le Alii e folafola atu le tala lelei [i tagata Maketonia].” Mulimuli ane, na amataina ai ni faapotopotoga Kerisiano i isi aai o Europa, e aofia ai Atenai ma Korinito.—Galuega 15:40, 41; 16:6-10; 17:1–18:18.

Pe tusa o le 56 T.A., i le faaiʻuga o lana malaga faamisionare lona tolu, na fuafua ai e Paulo ina ia alu atu pea i sisifo ma faalautele atu le oganuu lea na tofia i ai o ia i le fono lea na faia i Ierusalema. Na ia tusi e faapea: “O le mea lea ou te naunau ai, ia ou folafola le tala lelei iā te outou foʻi o i Roma,” ma, “ou te ui atu ai iā te outou pe a ou alu atu i Sepania.” (Roma 1:15; 15:24, 28) Ae faapefea le toʻatele o tagata Iutaia i nuu ese, o loo i sasaʻe?

Nuu o Tagata Iutaia i Sasaʻe

I le uluaʻi senituri T.A., sa nonofo ai i Aikupito se nuu tele o tagata Iutaia, aemaise lava i le taulaga o Alesania. E faitau selau afe tagata Iutaia sa nonofo ai i lenei nofoaga o fefaatauaʻiga ma sunako sa salalau ai i le aai. Na faapea mai Philo, o se tagata Iutaia i Alesania, pe tusa ma le miliona tagata Iutaia sa iai i  Aikupito i lenā taimi. E matuā toʻatele foʻi sa nonofo i Lipua, i le aai o Kurene ma nuu tau lata ane.

O nisi o tagata Iutaia na avea ma Kerisiano, na ō mai i na vaipanoa. Ua tatou faitau foʻi e uiga iā ‘Apolo, o Alesania na fanau ai,’ “o tagata Kuperu ma Kurene,” ma “Lukio le Kurene,” o lē na lagolagosua i le faapotopotoga i Anetioka i Suria. (Galuega 2:10; 11:19, 20; 13:1; 18:24) Ae leai se isi faamatalaga i le Tusi Paia e faatatau i le galuega a uluaʻi Kerisiano i Aikupito ma ona nuu tuaoi, seʻi vaganā ai le faievagelia o Filipo lea sa molimau atu i le eunuka Aitiope.—Galuega 8:26-39.

O le isi nofoaga autū mo tagata Iutaia, o Papelonia, ina ua faalautele atu ona aai i Patia, Metai, ma Elama. Ua faapea mai se tusitala o le talafaasolopito, “o oganuu uma i le fanua laugatasi o Hitikelu ma le Eufirate, mai Aminia e oo atu i le fagaloa i Peresia, faapea le itu i mātū i sasaʻe o le sami Kasipiane, ma le itu i sasaʻe e oo i Metai, sa nofoia uma e tagata Iutaia.” Ua faapea mai le Encyclopaedia Judaica i le fua faatatau, o lo latou faitau aofaʻi, e 800,000 pe sili atu foʻi. Ua faapea mai le tusitala o le uluaʻi senituri o Josephus, e faitau sefulu afe tagata Iutaia i Papelonia na faimalaga atu i Ierusalema mo tausamiga faaletausaga.

Pe na iai ni tagata Papelonia na papatisoina i le Penetekoso i le 33 T.A.? E tatou te lē iloa, ae iā i latou ia na faalogo i le lauga a Peteru i lenā aso, na ō mai mai Mesopotamia. (Galuega 2:9) Ae ua tatou iloa, sa iai Peteru i Papelonia pe tusa o le 62-64 T.A. A o iai i inā, na ia tusia ai lana uluaʻi tusi, ma atonu foʻi ma le tusi lona lua. (1 Peteru 5:13) E foliga mai, sa manatu i Papelonia ma le aofaʻiga tele o tagata Iutaia ia sa nonofo ai e faapea, o le oganuu lea na tofia atu iā Peteru, Ioane, ma Iakopo i le fono lea e taʻua i le tusi na avatu i tagata i Kalatia.

Le Faapotopotoga i Ierusalema ma Iutaia i Nuu Ese

Sa auai foʻi Iakopo i le fono lea na tofia ai oganuu ia e taʻua, sa auauna o se ovasia i le faapotopotoga i Ierusalema. (Galuega 12: 12, 17; 15:13; Kalatia 1:18, 19) Sa o ia o se molimau vaaitino i le aso Penetekoso i le 33 T.A., ina ua tali atu le faitau afe o tagata Iutaia mai nuu ese i le tala lelei ma papatisoina i latou.—Galuega 1:14; 2:1, 41.

I lenā taimi ma mulimuli ane ai, na ō mai ai le faitau sefulu afe o tagata Iutaia mo tausamiga faaletausaga. Sa oo ina matuā tumu le aai, ma sa nonofo ai mālō asiasi atu i nuu tuaoi po o le tolauapi foʻi i faleʻie. E lē gata i le feiloaʻi ai ma uō, ua faamatala mai i le Encyclopaedia Judaica e faapea, na ō atu ia tagata na malaga atu i le malumalu e tapuaʻi ai, na ofo atu taulaga ma suʻesuʻe le Torah.

E mautinoa lava sa talaʻi atu Iakopo ma isi sui o le faapotopotoga i Ierusalema, i tagata Iutaia o nuu ese. Atonu na faia foʻi faapena ma le faautauta e aposetolo i le vaitaimi na “tupu ai le sauā tele i le ekalesia i Ierusalema” ona o le maliu o Setefano. (Galuega 8:1) A o leʻi tupu, ma ina ua uma ona tupu o lenei mea, ua faaalia i le Tusi Paia le maelega o nei Kerisiano i le talaʻiga, ma na iʻu ai ina faatoʻateleina.—Galuega 5:42; 8:4; 9:31.

O ā Mea ua Tatou Aʻoaʻoina Mai Ai?

Sa faia lava e uluaʻi Kerisiano ni taumafaiga lelei ina ia faafeiloaʻi tagata Iutaia i so o se mea na latou nonofo ai. I le taimi lava lenā, na oo atu ai Paulo ma isi i nuu ese i oganuu o Europa. Sa latou usitaia le poloaʻiga mulimuli a Iesu i ona soo, ina ia ō atu e fai “nuu uma ma soo.”—Mataio 28:19, 20.

Ua tatou iloa mai a latou faaaʻoaʻoga le tāua o le ō atu e talaʻi i se auala maopoopo, ina ia maua ai le fesoasoani a le agaga o Ieova. Ua tatou iloa foʻi e aogā le faafeiloaʻi atu o i latou e faatāua le Afioga a le Atua, aemaise lava i oganuu e toʻalaʻitiiti Molimau a Ieova e iai. Pe e sili atu ona fua tele ia oganuu e tofia atu i la outou faapotopotoga na i lo o isi? E sili atu ona aogā pe a galueaʻiina soo nei oganuu. Pe e iai ni mea fai a le nuu e mafai ona molimau atu ai i ala tetele, pe e molimau atu ai i se tulaga faasamasamanoa?

E aogā tele mo i tatou ona lē gata ina ia faitau le Tusi Paia e uiga i uluaʻi Kerisiano, ae ia faamasani foʻi i nisi o faamatalaga auʻiliʻili i le talafaasolopito ma laufanua o le lalolagi. O se tasi o mea aogā e mafai ona faalautele atu ai lo tatou malamalama, o le polosiua, ‘Matamata i le Nuu Lelei,’ o loo iai le tele o faafanua ma ata.

[Faamatalaga pito i lalo]

[Siata i le itulau 14]

SA MANATU MAMAFA LE APOSETOLO O PAULO I IUTAIA I NUU ESE

A O LEʻI FAIA LE FONO I IERUSALEMA I LE 49 T.A.

Galuega 9:19,20 Tamaseko — “ona talaʻi loa lea e ia i sunako”

Galuega 9:29 Ierusalema — “ua tautala foʻi o ia. . . ma le

ʻau Elenisi”

Galuega 13:5 Salamina, Kuperu — “ona la folafola ai lea o le

afioga a le Atua i sunako o tagata Iutaia”

Galuega 13:14 Anetioka i Pisitia — “ua ulufale i laʻua i le

sunako”

Galuega 14:1 Ikonio — “ua ulufale . . . i le sunako o tagata

Iutaia”

INA UA UMA LE FONO I IERUSALEMA I LE 49 T.A.

Galuega 16:14 Filipi — O “le tasi fafine ua mataʻu i le Atua, o

Litia le igoa”

Galuega 17:1 Tesalonia — “le sunako o tagata Iutaia”

Galuega 17:10 Perea — “le sunako o tagata Iutaia”

Galuega 17:17 Atenai — “ua ia lauga foʻi i le sunako iā Iutaia”

Galuega 18:4 Korinito — ‘ua lauga o ia i le sunako’

Galuega 18:19 Efeso — “ua ulufale o ia i le sunako, ma

felafolafoaʻi ma Iutaia”

Galuega 19:8 Efeso — “ua ulufale foʻi o ia i le sunako, ma

lauga faamalosi atu . . . i masina e tolu”

Galuega 28:17 Roma — ‘ua faapotopoto mai e Paulo alii o Iutaia’

[Faafanua i le itulau 15]

(Tagaʻi i le lomiga mo le ata atoa)

O nuu nei na ō mai ai i latou na faalogo i le tala lelei i le Penetekoso i le 33 T.A.

ILURIKO

ITALIA

Roma

MAKETONIA

ELENI

Atenai

KERETA

Kurene

LIPUA

PITUNIA

KALATIA

ASIA

FERUKIA

PAFULIA

KUPERU

AIKUPITO

AITIOPE

PONO

KAPATOKIA

KILIKIA

MESOPOTAMIA

SURIA

SAMARIA

Ierusalema

IUTAIA

METAI

Papelonia

ELAMA

ARAPI

PATIA

[Ogasami eseese]

Sami Metitirani

Sami Uliuli

Sami Ulaula

Fagaloa i Peresia