“O se Tasi Lea o Aso Aupito Sili i Loʻu Olaga”

UA FAAPEA mai se faalapotopotoga na faatupeina e le malo o Ausetalia: “E masani lava ona lipotia mai talavou ua mafatia i le mafaufau, ma o se faafitauli e manaʻomia ona foʻia.” Ua faaalia i suʻesuʻega, e tusa ma le 100,000 talavou i Ausetalia e aafia i mafatiaga o le mafaufau i tausaga taʻitasi.

E aafia ai foʻi ma talavou Kerisiano i lenei mea. Ae peitaʻi, ua fesoasoani le faatuatua iā Ieova i le toʻatele e foʻia ai faalogona tigā, ma manuia ai o latou olaga talavou. O le faia faapea, ua latou tuu ai se faaaʻoaʻoga lelei mo isi. E faapefea?

Seʻi manatu i le mea na tupu iā Kalala o se teine ua 18 ona tausaga. E auai o ia ma lona tinā i se faapotopotoga a Molimau a Ieova i Melepone, i Ausetalia. Ina ua lafoaʻia e le tamā o Kalala lo latou aiga, sa oo ina mafatia lona mafaufau. Ae sa malosi pea lona faatuatua i lona Tamā o Ieova. I se tasi aso, na asiasi atu ai Litia, o le fomaʻi a le aiga i le fale o Kalala ona ua maʻi lona tinā. Mulimuli ane, na fai atu ma le agalelei Litia e la te ō ma Kalala i le nofoaga e fai ai faatauga. A o la malaga atu, na ia fesili atu ai iā Kalala, pe e iai sana uō tama. Na faamatala atu e Kalala e faapea, ona o ia o se Molimau a Ieova, e lē masani ai la ona la eva ma se tama. Sa matuā ofo le fomaʻi i lenei mea. Ona faamatala atu lea e Kalala ua fesoasoani le Tusi Paia iā te ia i le faia o filifiliga atamai i le olaga. Mulimuli ane, ona ia fai atu lea i le fomaʻi, o le a ia aumaia se tusi faale-Tusi Paia lea sa fesoasoani tele iā te ia. O le tusi ua faaulutalaina, Fesili ua Fesili Mai ai Talavou—Tali e Aogā.

I le tolu o aso talu ona maua le tusi, na telefoni atu ai Litia i le tinā o Kalala e faailoa atu i ai lona matuā fiafia i le faitauina o le tusi. Sa ia talosaga atu ai loa mo nisi tusi se ono mo ē latou te faigaluega faatasi. Ina ua alu atu Kalala e avatu tusi, na faamatala atu e le fomaʻi lona matuā ofo lava i le faatuatua o Kalala. Na ofo atu e Kalala se suʻesuʻega faale-Tusi Paia lea na talia e le fomaʻi.

Sa faia e Kalala le suʻesuʻega a le fomaʻi mo ni nai masina i le taimi e mālōlō ai i le aoauli. Ona talosaga atu lea o Litia iā Kalala pe mafai ona ia faia se lauga i le seminā, i le mataupu e uiga i mafatiaga o talavou. E ui ina fefe, ae na malie iai Kalala. E sili atu i le 60 tagata na auai i le seminā. E toʻafā fomaʻi tomai tau i faafitauli o le mafaufau na faia a latou lauga; o tagata matutua uma. Ona sosoo lea ma le avanoa e talanoa ai Kalala. Sa ia faamatilatila le tāua o le iai o se faiā lelei a le ʻautalavou ma le Atua. Sa ia faamatala atu e faapea, e matuā manatu mamafa Ieova le Atua i talavou ma fesoasoani iā i latou uma o ē e liliu atu iā te ia mo se fesoasoani ma se faamāfanafanaga. E lē gata i lea, sa ia faailoa atu foʻi lona talitonuga e faapea, ua toeitiiti ona aveesea lea e Ieova o maʻi uma o le tino ma le mafaufau. (Isaia 33:24) O ā mea na iʻu i ai lenei molimau lelei?

Na faapea mai ia Kalala: “Ina ua uma le seminā, e toʻatele na faailoa mai iā te aʻu lo latou fiafia i le faalogo mai i se talavou o talanoa e uiga i le Atua. Sa ou ofoina atu tusi e 23, Ua Fesili Mai Talavou.” Na tuu mai e ni teine se toʻatolu numera o a latou telefoni. I le taimi nei, ua suʻesuʻe ai e se tasi o nei teine le Tusi Paia. O se tasi lea o aso aupito sili i loʻu olaga.”